فقراء لم يخلقوا للحب

/20/

#فقراء_لم_يخلقوا_للحب_
ل: #روز_الفياض_
ج٢٠
ثاني يوم اجت امه وخواته من عرفن بيه حامل وظلت امه تتعذر وتبرر..
مشت الايام والاشهر وصار عدنه حمودي وصارت علاقتي زينه باهل ارشد وخواته ماعدا ابوه وخلال هالفتره ابو تغريد وولده عزموا ارشد مره مرتين على عشا وجان يروح ويرجع متأخر..
بيوم من الايام اتصلت بيه داليا كالت:
ادري بيج زعلانه مني ومامتوقعه اتصالي  بس عفيه هسه مو وكت زعل وعتب اكو شي لازم تعرفيه لان اني وحدي مااكدر اسوي شي.
رنا:خير ياطير.
داليا:علمود ارشد.
رنا:شبي؟
داليا:هو هالايام يروح ويه هذا ابو تغريد الرفيق يعزمه على عشا تدرين؟هاي ثاني مره.
رنا:ادري
داليا:تدرين كعدتهم بيها شررب ونسوان وسوالف تعبانه لو لا؟
من كالت هيج غيمت الدنيا بعيني.
رنا:منو كلج؟
داليا: البارحه من رجع مبينه ريحة الشرب بملابسه..
رنا:بملابسه؟
داليا:اي من اجيت اغسل ملابسه شميت بيهم ريحة مشروب.
رنا:والنسوان؟
داليا:هيج كعدات ماتخلى من النسوان تره.
ظليت صافنه هاي السالفه منين طلعتلي بالله انه ناقصه قهر وتفكير.
انتظرته يرجع بالليل حتى اسأله واحجي وياه.
اجه انه جنت انوم حمودي كعد يمي يبوس بأيدين حمودي ويلاعبه.
رنا:تره هيج انت راح تخليه يتنشط ويكعد ماينام بعد.
ارشد:انه اريده يكعد اريد العب وياه خطيه منومته من هسه بعد وكت.
رنا:لاعفيه لاتعبت شلع كلبي اليوم كله مانايم وهسه شوف شلون كعدته هاك اخذه انت تنومه مالي علاقه بعد.
بعد العشا سبحت ولبست وكشخت جان يباوع عالتلفزيون كال:
تعاي يمي.
رنا:ليش شتسوي بيه سهرات ابو تغريد مامكفيتك؟
التفت علي ابتسم كال:
شبيها سهرات ابو تغريد؟
رنا:شبيها بعد غير الشرب والنسوان والحرام.
رجال شايب وولده شباب ومرته حجيه ومتدينه وصايمه مصليه ورجلها يدور شرب ونسوان وسهر.
لزمني من ايدي كعدني على رجله كال:
اي والله صدك.
ماردت اصير عصبيه واسوي مشكله كلت خل اسوي نفسي عادي واحجي بهدوء.
رنا:وشجابرك عالشرب والنسوان مادام اي والله صدك مامكفياتك اثنين؟
ارشد:يانسوان؟ ماكو نسوان بس يجيبون شرب.
وخرت كتله:
مو انت عندك اطفال وفاتح بيتين ورزقك جاري بالحلال ليش تريد تضيع كل هذا؟
ارشد:شمسوي انه كاعد وياهم بس مالي علاقه مااشرب.
رنا:بداعة حميد ورنين ماتشرب؟
ارشد:اي والله.
رنا:اذا تحبنه صدك لاتروح وياهم بعد اعتذر منهم فدوه.
خلي الله يباركلنه بجهالنه ورزقنه.
رجع سحبني بحضنه كال:
صار يدلل الحلو.
رنا:اذا طلعت تجذب والسالفه بيها نسوان اكرهك.
باس خدي كال:
تكدرين؟
رنا:مثلما اتمنيت اكرهك قبل.
ضحكت على كيف..
خزرني كال:
اتمنيتي تكرهيني؟
رنا:لاتخاف لو امنياتي تتحقق جان من الاول ماصار كل شي من شلاع الكلب الشفناه.
ظل يلعب بشعري ويتحسس خدي بعدين كال:
لاتخافين ماكو وحده غيرج تحلى بعيني💏.
حياتنه جانت هادئه وحلوه بعدها اتوفت ام داليا خطيه وقرر ارشد ننتقل للبيت اللي اشتراه وقسم البيت كل وحده الها طابق واجر بيت عمه..
جنت اساعد اهلي احوللهم فلوس دائما لان عندي راتب وارشد جان شغله خير من الله..
مؤمن هم خلص دراسه وهسه بدا يكمل ماجستير..
فات على زواجنه3سنوات.. وبيوم من الايام تأخر ارشد مااجه بالليل اتوقعت يم داليا رحت دكيت عليها الباب استغربت كالت مو يمي.
ظليت محتاره شسوي المن اروح واسألمن عنه بهالليل.
دكيت على ابو اوس جارنه القديم كال هسه يروح يشوفه وين لان مكتب ارشد جان قريب عليهم..
راح وانه وداليا كاعدين ننتظر بعدين كامت واخذت الجهال تنومهم وانه ظليت كاعده يم التليفون خاف يتصل ابو اوس او ارشد.
وره ساعه اندك الباب طلعت لكيت ابو اوس وام اوس خفت ويبست بمكاني كلت سوا حادث ومات..
دخلوا وضيفتهم كال ابو اوس:
والله يا ام احمد رحتله للمكتب مالكيت احد سألت اهل المحلات اللي يمه كالوا اجوا اخذوه الحزب للفرقه الحزبيه.
رنا:يمه ياستار ليش؟
ابو اوس:والله مااعرف.
رنا:دخيلك ربي.
ظلينه كاعدين ننتظر لنص الليل هسه يجي بعد شويه ويجي ماكو ابو اوس وام اوس راحوا وبقينه انه وداليا بحدنه نصفن ونتناقش وحده تكبس ووحده ترفع.
منا للصبح ماكو خبر..
الصبح انه اتصلت على الحجيه ام تغريد وكتلها بلكي ابو تغريد يكدر يعرفلنه ليش اخذوه ووين اخذوه وشوكت يطلعونه.
بقينه للعصر ماكو شي داليا رادت تتصل على ابو ارشد وعصام وتكللهم بس انه كتلها ننتظر لباجر الصبح اذا ماعرفنه شي وماطلع نتصل.
ثاني يوم المغرب اندك الباب طلعت داليا انه جنت اسبح حمودي.. اجت تركض كالت:
اكلج هذا ابو تغريد بره.
كمت انه طلعتله..
كال:
والله ابو رنين ماخذينه لان اكو واحد سامعه يحجي عالسيد القائد ورايح مخبر عنه.
ضربت خدي كتله:
صخام الصخمج رنا، وهسه شلون؟
ابو تغريد:والله اذا ثبتت عليه مااتصور يطلع.
رنا:يعني شنو ينسجن؟
ابو تغريد:الله اعلم.
ماحسيت ابو تغريد حجه كل الحجي يمكن يخاف يمكن صدك مايعرف شي بس ماارتاحيت بس راح دخلت حجيت لداليا وكتلها هسه اتصلي على بيت عمج خل يجون لان انه مااعرف شسوي والمن اروح.
ايام سوده جانت..
لاليلنه ليل ولانهارنه نهار طول الوقت خايفين..
كلما يندك الباب اكوم اركض يتصورلي هو ومرات افكر يمكن  يجون يكولون انعدم..
خلصتها بجي.. ومن اسكت تبدي داليا وهكذا..
اجه ابو ارشد وامه وعصام وبقوا يم داليا..
ظلينه على هالحاله شهر مانعرف وينه وشنو عقوبته ولانكدر نشوفه بس كل فتره ابو تغريد يطمنه ويكول  مابي شي..
وانه وقفوني عن العمل وفصلوني ومااعرف ليش من سألت كلولي كتاب ايقافج وفصلج اجه من الوزاره اي زين شمسويه كالوا ماندري روحي للوزاره وافتهمي..
انه جنت ملتهيه بسالفة ارشد مالي خلك اروح وأسأل واتوسل باليسوه والمايسوه..
ذاك اليوم بالليل اندك الباب الساعه ب12 اجيت ادك الباب على داليا تكل لعصام يطلع بس شفت الاضويه كلها طافيه كلت نايمين.
طلعت لكيت ابو تغريد.
رنا:خير ابو تغريد.
ابو تغريد:شلونج ام احمد؟ سامحيني اجيتكم بهالوقت بس ردت احجي وياج بفد موضوع.
شفت واحد واكف على جهه مديت راسي شفت ابنه وياه.
رنا:بيت عمي نايمين الصبح اذا تكدر تعال واتفاهم وياهم.
ابو تغريد:اي اي صار.
دخلت وقفلت الباب..
الصبح حجيت لعصام.. وظلينه ننتظر ابو تغريد يجي مااجه..
جان ابو ارشد بعده مايحجي وياي لذلك جنت ماادخل يمهم حدي للمطبخ رغم انه وداليا نحجي عادي ومابينه مشاكل...
الى ان راحله عصام للبيت حتى يعرف شيريد.. ومن رجع عصام كلي:
رنا تدرين ارشد مشتري شقه بزيونه من ابو تغريد؟
رنا:لا والله ماادري ماكلي وهو اصلا مو دائما يسولف بهيج اشياء.
عصام:المشكله ابو تغريد يكول محول الشقه بأسم ارشد بس ارشد منطيه نص الفلوس لحد هسه وبعد نص..
رنا:بس لايريد فلوسها هسه؟
عصام:طبعا يريد يضمن حقه كل شي يصير..
رنا:ومنين نجيبله فلوس هو مايخلي فلوس بالبيت كله بالبنك، خلص يصبر شدعوه عليه.
عصام:رنا خل نكون واقعيين احنه مانعرف ارشد وين ولا شنو مصيره.
رنا:عصام لاتكول هيج كلبي ينعصر رجاءا لاتفاولون عليه اذا صارله شي غير اموت.
سكت ماحجه..
رنا:شنو الدليل عنده عقد احنه كل شي ماعدنه ولانعرف شي عن الموضوع.
ظل ابو تغريد رايح جاي على فلوس الشقه ومره من المرات جنه بس انه وداليا بالبيت عصام واهله رجعوا..
وجانوا من يرحون يجي مرات مؤمن اخوي ومرات امي وابوي بس مايطولون يمنه..
اجه ابو تغريد وحجه على موضوع الشقه وفلوس الشقه من شفته انه شلون يباوعلي وشلون يحجي ماعبالك شايب شكبره اشرت لداليا تسكت لان واكفه تسأله وتستفسر منه وكتله ماعدنه فلوس واذا عنده عقد ويريد يشتكي خل يشتكي..
احنه نسوان وماعدنه علم بالموضوع ولانكدر ننطيه فلوسه.
سديت الباب ودخلت كبل اتصلت على عصام.
حجيتله كال:
مو كناله ماعدنه فلوس؟ولاعقد.؟
رنا:مو غايته فلوس لا لا هذا واحد وصخ اليوم عوزه ياكلني جياته وروحاته مو علمود فلوس لا لاوالله وخوفني اليوم طريقة كلامه ونظراته تخوف..
عصام:هو من الاول ماردناه ولا ردنه صحبته بس غير رجلج ماياخذ الحجايه..
رنا:وهسه عفيه شلون شنسوي؟
عصام:لاتخافين مايكدر يسوي شي واذا صدك عنده عقد خل يطلعه حتى نشوفه ونتصرف.
رنا:وارشد؟
عصام:شبيدنه عليه هو تحت رحمة الله.
رنا:ونعم بالله كل احنه تحت رحمته.
مرت الايام ولحد الان صارله ارشد 3شهور مختفي..
بهالفتره جان الوضع العام متوتر وامريكا تريد تضرب العراق وتسقط الحكومه..
بس محد مصدك يصير هيج شي الى ان كعدنه الصبح على دخول الامريكان للعراق...
ولحد قبل السقوط بكم يوم اجه ابو تغريد وهالمره جان صريح وواضح كللش كلي:
الشقه الج هي وفلوسها بس نكضي بيها ليله وحده اني وياج،شتكولين؟ لو اشتكي عليج؟
ظليت من الصدمه متحنطه مامتوقعه الحجي اللي كاله ظليت مااعرف احجي بعدين حسيت مثل اللي جنت مااستوعب وهسه استوعبت كلامه اتخبلت صرت عصبيه حيل وظليت اصيح كتله:
انه مره متزوجه ورجلي مختفي هاي بمكان ماتساعدني وتوكف وياي جاي تبتزني وتهددني وتريدني اروح وياك لشقه ماتستحي على شيباتك ولدك بكدي جان خفت الله رجليك بالكبر وتدور شقق طاح حظك اذا مااشتكيت عليك واكللهم هيج يكلي اصبرلي بس..تف عليك..
وسديت الباب بوجهه وقفلت الباب ودخلت للبيت ركض لداليا..
دخلت للبيت ارجف من الخوف.. حجيت لداليا ظلت تبجي من الخوف كالت:
خل ننهزم.
رنا:وين نروح ماتشوفين الوضع شلون صاير.
داليا:اخاف يهجم علينه هذا الشايب.
ظليت افكر شسوي والمن اروح اشتكي..
فكرت اتصل بمرته واكللها بس كلت خاف يسويلي مصيبه لو يذب علي بلوه لو صدك يروح يشتكي على فلوس الشقه ويطلع عنده عقد وحجيه صحيح منين اجيبله فلوس..
اتصلت بمؤمن وعصام كلت كل شي يصير عالاقل عدهم علم.
مؤمن:هذا شافجن بس نسوان كال خل استغلهن المشكله عندي امتحانات هالفتره بس اخلص اجيلج..
ومن اتصلت على عصام وحجيتله اتخبل كال:
شكد كلب ابن كلب هذا انه اجي كلي لمؤمن لايجي انه فد يومين واكون عدكم ان شاءالله وطز بالشغل وحظرن نفسجن اجيبجن هنا لحدما يهدأ الوضع ويطلع ارشد بالسلامه بعد ماتبقن هناك بحدجن وانه اله هذا الحقير لو بي خير يجي من نكون موجودين ويحجي هيج مو يخلينه نرجع ويوميه جايجن..
بسيطه اله اروح اشتكي عليه..
رنا:لايمعود شتشتكي عليه انوب يذبك بداهيه وياخذونك مثل ارشد احنه ناقصين ظيم..

وره يومين وقبل لايجي عصام سقطت بغداد والوضع جان يخوف بعد السقوط من اول يوم قتل وخطف وسطوا وتسليب ونهب وكل شي..
بدوا يكسرون السجون ويطلعون المساجين..
طلعوا هواي مساجين واحنه جنه منتظرين ارشد يطلع وياهم..