فقراء لم يخلقوا للحب

/8/

#فقراء_لم_يخلقوا_للحب_
ل: #روز_الفياض_
ج٨
رنا:تعبانه
عبالك احجي ويه روحي مارد علي راسأ اتدنه علي يريد يبوسني.
دفعته..
رنا:شنو هاي شبيك اكلك تعبانه؟
جنت تعباانه نفسيا اكثر من كل تعب جسماني حسيت بي بحياتي جنت اتمنى يخليني انام لان اقل تصرف واقل كلمه منه راح يبين ضعفي اكيد وراح ابجي.
وفعلا..
كام بدل ملابسه ودخل للحمام يغسل اني استغليت الفرصه نمت واتغطيت.
طلع اجه يمي سويت نفسي نايمه غمضت عيوني حاجاني ماجاوبت كلت يمكن عنده احساس عنده ضمير ويعتقني اليوم بس
دنك باسني..
هنا بهاللحظه بالذات حسيت اندفنت..
جملة وحده اجت ابالي:
الله يوجع كلبك ياارشد مثلما وجعت كلبي...
طاحت دموعي بس ماهمه الموضوع حسيت بي انسان مريض مو طبيعي.
اكره ذيج الليله لهسه واكره ذاك اليوم واكره ذيج السنين.
مانمت للصبح عيوني مابطلت بجي..
للصبح ماسكت كلبي من العتاب واللوم مره اعاتب ارشد مره اعاتب اهلي مره اعاتب ربي ليش ماخلاني اموت..
نايم ويشخر حتى مااشتهي التفت عليه واشوف وجهه.
كعد الصبح ورحنه للبيت لبيت اهله.
دخلنه محد استقبلنه عبالك غرب امه بالمطبخ وخواته بغرفتهن ومسدود الباب.
رحت انه سلمت على امه ردت علي بمنتهى البرود وحتى من بستها ماباستني حسيت نفسي دخيله ... غريبه... مامرغوب بوجودي بهالبيت.
صعد هو فوك للغرفه وصاح علي.
صعدت باوعت للغرفه بوقتها جان الا غرفة اخشاب صاج.
جنت لابسه تنوره قصيره سوده وقميص ماروني.
كعدت عالجربايه وصفنت شبيهم اهله؟
كعد يمي وكل شويه وباس خدي بعدين دنك لرجلي اني كمزت كتله:
شبيك جواد؟
جواد:شبيج؟ردت انزع الحذاء من رجلج.
ظليت صافنه بوجهه ماادري هذا مريض لو صدك لهدرجه يحبني.
رنا:لا
ظليت افكر محتاره بأمره معقوله وين اكو هيج رجال يسوي لو مو يحب مرته..
نزعت حذائي وبدلت ملابسي وردت انزل جوه يم امه وخواته بس ماقبل.
جواد:تعاي ابقي يمي هنا.
رنا:زحمه خالتي والبنات جوه شيكولون؟
جواد:يطبهن مرض.
فتحت عيوني متعجبه اكيد اكو شي مو طبيعي بعلاقته هو واهله.
كعدت مانزلت كتله:
جواد؟
جواد:يابعد روحه.
رنا:احس اهلك ماحابين وجودي.
جواد:خيولون مالج شغل بيهم.
رنا:ليش هيج تحجي؟صاير بينك وبينهم مشاكل؟معترضين على زواجنه؟
جواد:لامشاكل ولاهم يحزنون وشحدهم يعترضون على زواجنه وليش؟
رنا:ماادري يعني اكول خاف لان حولت البيت بأسمي.
جواد:ذكرتيني بسالفة البيت مااريد احد يعرف بهالسالفه لان اصلا محد يعرف بموضوعه فماله داعي تحجين كدام احد.
رنا:يعني محد يعرف انت سجلته بأسمي؟
جواد:اصلا محد يعرف هو جان بأسمي ومحد يعرف جان مخصص الي.
يعني باختصار محد يعرف جان عندي بيت ثالث.
هزيت راسي اي بس بكلبي اكول شبيهم هيج معاديني اذا حتى بموضوع البيت مايدرون ليش كارهيني؟؟
اكيد علمود مرته الاولى لان بت عمهم ويحبونها ومتعاطفين وياها..
مبين خوش انسانه لهذا السبب كارهيني وكارهين وجودي بسببها.
جواد:رنو
باوعتله كتله:
نعم؟؟
جواد:رنو انتي مو رنا اريد اسميج رنو.
حصرتني الضحكه.
وكت الغدا نزلنه نتغدا ويه اهله شفت خواته الاثنين اللي اجن بالمهر والعرس ووحده ثالثه ماشايفتها معوقه على كرسي.
انقهرت عليها حيل لان شابه مو جبيره وحلوه.
اكل واباوعلهم عائله بارده مااحس اكو مشاعر بينهم حتى عالاكل محد يحجي كل واحد بوداي.
ظليت افكر اذا اخته عدها اعاقه وولده 2 منهم نفس الشي معناها هذا الشي عدهم وراثه..
شلون لو طلع ابني او بتي هم عدهم نفس الاعاقه؟!!!
اسم الله الله لايكولها.
اصلا مااريد جهال منه لا مرضى ولا متعافين.
مااريد شي يربطني بي..
خلصنه الغدا وكعدنه نشرب جاي امه سوته وكعدنه يمها نشرب خواته انسحبن لغرفتهن بدون كلام.
انه هم من شفتهم هيج محد ملكيني وجه شربت الجاي وصعدت لغرفتي.
ردت انام بس فكرة الاعاقه اللي عدهم بالعائله شغلت تفكيري.
لازم اخذ احتياطاتي مااريد اصلا جهال منه مااريد..
طول الايام اللي جان جواد كاعد بيها بالبيت جان الوضع غريب بالبيت.
اسبوع تقريبا ورجع جواد لدوامه..
اول يوم من داوم نزلت الصبح وياه حتى اسويله ريوك لكيت امه كاعده ومسويه ريوك طبعا جواد الولد الوحيد الها.
اتريك وطلع وانه رجعت صعدت كلت شسوي باقيه جوه خواته نايمات وامه ابد ولاتنطق كلمه وياي.
بديت انظف غرفتي وطلعت ملابس اريد اغسلها ونزلت جوه اسمع صوت ضحك وسوالف بغرفة خواته.
مديت راسي الباب مردود فتحته على كيف كتلهن:
صباح الخير
شهالنشاط اليوم شهالروقان عبالي نايمات؟؟
هن التفتن علي باوعلي وباوعن وحده للثانيه وسكتن ماحجن وياي.
بقن ساكتات وحكرني اتعجبت شبيهن شمسويتلهن انقهرت..
طلعت وسديت الباب رحت اغسل الملابس بالحمام وافكر شبيهن.
غسلت الملابس وخلصت سمعت صوتهن رجعن يضحكن ويسولفن.
رحت للمطبخ يم امه كتلها:
شنو عندج خاله حتى اساعدج.
ام جواد:ماعندي شي.
رنا: اكشرلج بصل اكشرلج ثوم الكط الخضره؟
ردت علي ابرود بدون ماتباوعلي:
لاتسوين اي شي انتي هنا بس لخدمة رجلج.
رنا:اي ميخالف بس خوما ابقى كاعده وانتم تخدموني مايصير.
ام جواد:مانريد منج شي.
انقهرت من اسلوبها وحجيها هاي حتى يكلي ترتاحين ويه امي وخواتي.
رجعت صعدت للغرفه ماعندي شي اسويه رجعت نزلت كعدت اباوع عالتلفزيون شفت خواته طلعن من الغرفه وبدن ينظفن ويسولفن بيناتهن ويضحكن.
شويه واجت يمي اخته اللي على كرسي.
هي تباوع عالتلفزيون وانه اباوعلها كاسره خاطري.
انتبهت علي كالت:
عفيه علي التلفزيون شويه احب الموسيقى مال هذا البرنامج.
رنا:تسمعين موسيقى؟شعجب؟
كالت:
ليش مستغربه؟
رنا:ماادري مابين عليج لو على خواتج عدجن هيج اهتمامات.
كالت:
ليش وحد؟
رنا:لا مو وحد بس من اجيت لليوم كله بغرفتجن لاتطلعن ولاتكعدن يمنه ولاتسولفن ويانه حتى من احاجيجن ماتجاوبن.
سكتت شويه حسيتها ماتريد تحجي بعدين كالت:
ضجتي من عدنه؟
رنا:لاماضجت بس الصدك انقهرت لان انه مااعرفكم ولاتعرفوني غريبه ليش هيج موقفج انتي وخواتج وحتى خالتي مني شنو شفتن مني لو سمعتن عني؟
طبعا اخته اسمها سلوى كالت:
لاشفنه ولاسمعنه بس احنه مانريد مشاكل ويه احد فكلنه نظل بعيدين احسن.
رنا:مشاكليش؟
سلوى:وياج وويه جواد.
رنا:ليش تصير مشاكل؟اكو شي انه مااعرفه؟
سلوى:لاماكو.
دخلت اختها الثانيه نجوى كعدت يمنه،حسيت سلوى خافت من اختها يمكن لان سكتت بعد ماحجت.
حاولت اكسر الحاجر واستمر بالحجي ويه سلوى كتلها:
احس اكو شي مو طبيعين احس وجودي مو حلو بالبيت ومحد يريدني.
رأسا التفتت نجوى على سلوى وباوعتلها سلوى:لا ليش مانريدج قابل شعدنه وياج.
نجوى:انتي هنا مرت جواد بس.
رنا:يعني شنو.
نجوى:يعني انتي بحالج واحنه بحالنه.
ظليت صافنه شبيها هاي.
رنا:ادري ام محمد بت عمج وتحبينها ومقهوره عليها حقج ماالومج بس تره انه ماسويتلكم شي يعني مامعقوله واحد يكره واحد بدون مايعرفه.
سلوى رادت تحجي نجوى سكتتها.
رنا:ليش خليها تحجي.
نجوى:احنه لامقهورين على ام محمد ولاعلى غيرها عساها بعد باكثر بس مالنه خلك مشاكل نسوان جواد وتالي يجي يطلع عصبيته علينه.
ظليت ساكته حسيت بديت افهم الامور شويه.
الظاهر صايره مشاكل بين مرته وبين امه وخواته والظاهر عصبي ويخافن منه.
هذا معنى كلامهن ..
مرت اول ايام وانه احاول اتصرف طبيعي وياهن عسى ولعل تتبدل اطباعهن وتصرفاتهن وياي لان مليت كله بحدي كاعده عبالك ساكنه بحدي بالبيت.
بديت اساعدهن بشغل البيت واساعد امه بالمطبخ.
طبعا هالحجي بالوقت اللي يكون جواد بالدوام لان من يرجع يريدني اكابله واكعد وهن هم من يجي يكلبن وجهن علي.
بس من يطلع احسهن يحسنن تصرفاتهن ويكعدن يمي ومرات يسولفن كدامي الى ان مره من المرات رحنه انه وجواد لاهلي العصر وبقينه لليل بس جواد ماقبل نبقى للعشا رغم لزموا بينه وانه هم جنت كاعده على اعصابي حسيت نفسي كرهتهم بس شسوي يبقون اهلي.
رجعنه للبيت ودخلنه جانت امه وخواته يتعشون فجواد رأسا اجه كعد وياهن عالاكل وكل لاخته:
ولج نجوى كومي صبيلنه عشا انه ورنا.
داري علي كلي:
تعاي كعدي اتعشي.
نجوى رادت تكوم كتلها انه:
لا ابقي لاتكومين انه اصب انتي كملي عشاج.
كعدت هي تريد تكمل عشاها وهو رأسا صرخ عليها وضربها على ايدها:
انتي هيييه من اكلج كومي صبي العشا تكومين.
رنا:انه راح اصب خليها تتعشا انه كتلها تكمل عشاها مو هاي انه واكفه شبيه مااعرف اصب؟
التفتت علي وزمخ:
وانتي هم كعدديييييي.
ظليت صافنه هذا شبي.
كامت نجوى بدون كلام صبت الاكل وانه عفتهم وصعدت فوك.
بدلت ملابسي وظليت افكر هذا شبي ليش ماعنده اسلوب.
يمكن من وره اسلوبه محد تحبه من خواته ومحد تحب تكعد وتسولف وياه حتى امه.
لفيت راسي ونمت مااشتهي احجي وياه بعد ولا اشتهي اشوفه اصلا.
ثاني يوم جان جمعه نزلت الصبح جواد ماكو بس امه وخواته يتريكن.
رحت صبيتلي جاي ورجعت كعدت يمهن اتريك.
ام جواد:البارحه مااتعشيتي؟
رنا:اي خاله صعدت نمت.
سلوى:خاف زعلتي؟
رنا:من شنو؟
سلوى:لان سلوى ماكامت وجواد ظل يصيح.
رنا:لا ليش ازعل انه كتلها لاتكومين انه اصب العشا واجيبه بس ماادري شبي جواد كمز علينه.
ضحكن هن كتلهن:
والله اريد افهم شنو سبب العصبيه والصياح شصار؟
ام جواد:هو هذا جواد خاله انتي اتزوجتيه هسه لازم تتعودين عليه هذا اسلوب بس صياح وتكفخ.
رفعت حاجبي كتلها:
شتكفخه؟يكفخ منو كلها كبار قابل جهال حتى يكفخ؟!!
ماحجت ماجاوبتني بيومها حسيت بخوف من حجيها حسيت اكو جانب ثاني انه مااعرفه ولاشايفته لحد الان بشخصية جواد.
الظهر من رجع جواد اتغدينه وصعدنه نمنه كلها راحت تنام صار البيت هدوء.
العصر جنت نايمه اجه جواد كعدني بنتر:
رنا .. رنا ... ولج رنا؟
رفعت راسي كتله:
ها شبيك؟
جواد:شنو شبيك كومي نزلي جوه سلمي على ام محمد اجت.
رنا:ياام محمد؟
جواد:ام محمد مرتي ام الجهال بعد ياام محمد.
الصدك ضجت ماادري ليش بس حسيت مااريد اشوفها يمكن لان عندي احساس بالذنب اتجاها احس اخذت رجلها منها ويمكن خربت بيتها وكسرتها بس جنت مجبوره مو قصدي أءذيها اصلا لو يرجعلي القرار لو اموت مااتزوج جواد بس شسوي للحظ.
كمت غسلت وبدلت ونزلت اسلم عليها.
انزل عالدرج وافكر واوصي نفسي ولج رنا صيري حبابه تره اكيد المره هسه محروك كلبها منج ومسحي حمرتج لان خطيه هي مره جبيره وهسه تنقهر من تشوفج شابه وحلوه وكاشخه ومتمكيجه كافي عليها قهر زواجه عليها.
الله يساعدها انه يمكن لو بمكانها اروح للعروس الثانيه واكتلهم اثنينهم هو وياها هههه.
بعدين اتذكرت ارشد ضاك خلكي كلت الا اذا ارشد اللي مسويها ومتزوج علي مااحجي لان احبه اتحمل.