فقراء لم يخلقوا للحب

/6/

#فقراء_لم_يخلقوا_للحب_
ل: #روز_الفياض_
ج٦
امي:لا شلون يصير انتم هسه مثل المخطوبين.
باوعتله كتلها بكلبي ويييع.
جواد:اي اكيد مادام متفقين معناها خلص
رنا:على شنو متفقين؟
امي:اخليكم انه تتفاهمون براحتكم.
كامت طلعت وسدت الباب.
كلبي انقبض عبالك سدو علي باب الكبر.
التفتت عليه باوعلته عيونه وكحه ماينزل عينه.
جواد:اي رناوي خوما قبلتي تتنازلين شويه.
رنا:ليش اتنازل؟شبيني وبينك حتى اتنازلك؟بعدين انت متزوج وعندك ولد شيضمنلي ماباجر ولدك يطردوني لو مرتك مو لازم تضمنلي مستقبلي مثلهم؟
جواد:صحيح
رنا:وهسه؟
جواد:خلص التردينه يصير تردين البيت باسمج يصير بأسمج مايغلى عليج..
كام من مكانه اجه كعد يمي اني كشيت وخفت.
جواد:بعد شنو تردين اتدللي؟
هزيت راسي ماكو شي ودرت وجهي خفت اباوعله.
حسيته يباوع لوجهي مباشرة بقيت متحنطه شويه حسيته اقترب اكثر ولزم ايدي.
كمزت سحبت ايدي منه وكمت من مكاني.
ضحك على كيف كال:
على كيفج شدعوه؟
رنا:مااحب هيج سوالف.
جواد:خلص كتلج البيت الج بعد شكو؟
رنا:البيت ماله علاقه هالسوالف مااكدر اقبلها مدام مو متزوجين.
كعدت مقابيله وحاولت اتماسك وماابين خوافه ولو انه جنت ارجف من الخوف.
رجع كام من مكانه وكعد يمي كال:
شوكت تردين نروح نسجل البيت؟
رنا:ماادري بيكفك.
جواد:باجر؟
بلعت ريكي صارت صدك انقهرت ودمعت عيوني هاي تاليتي؟
رنا:كيفك
جواد:باجر الصبح انه يمج لاتداومين.
سكتت ماحجيت بس هزيت راسي اي.
رجع لزم ايدي حسيت هالمره الدمعه بطرف عيني.
رنا:جواد عفيه مااحب هيج تصرفات.
ضحك كال:
هسه شمسويلج ماتكليلي.
بقيت كاعده وصافنه حياتي بدت تتحول لمسلسل مصري مثل المسلسلات بالضبط اللي بيها البنت الزغيره الحلوه تتزوج غصبن عنها واحد بكد ابوها بسبب الفقر او بسبب الظلم او الخوف بس هالمره فقر وطمع...
بقى كاعد يباوعلي بعدين كال:
اذا اتزوجنه راح نكعد ويه اهلي.
باوعتله كتله:
ليش؟
جواد:شنو ليش؟راح تكعدين ابيت اهلي امي وخواتي بس بالبيت احسن حتى مااخاف عليج.
رنا:ومرتك وين تره مااكعد وياها تروح تكتلني لو تسويلي مشاكل ومؤامرات تره مااتحمل.
ضحك كال:
شنو تكتلج وين كاعدين بعدين انه ليش اريدج ويه امي وخواتي حتى اكون مرتاح اذا بحدج مااكدر اعوفج واطلع لو اروح لام محمد.
رنا:واذا امك لو خواتك مارادني؟
جواد:ليش مايردنج؟بعدين مو مهم هنه يردنج المهم انه الاريدج.
رنا:ماادري جواد اخاف.
جواد:افه تخافين وانتي مرت جواد اللي يحجي وياج اكص لسانه شتردين بعد؟
سكتت حسيته يتفيك ويهمبل وفارد عضلاته جذب بس شوفيني.
جواد:شبيج لاتضوجين يم امي وخواتي احسنلج.
رنا:واذا ماارتاحيت؟
جواد:ترتاحين صدكيني.
سكتت..
راح واتمنيت مايطلع الصبح مااريد البيت اليربطني بيك ولابغيرك..
حضنت المخده ودموعي عشره عشره..
اكو بنات مثلي اهلهن يبيعونهن؟
اكو بنات بعمري متحملات هيج حمل وهيج مسؤوليه؟
اكو وحده مثلي انتظرت واحد وتالي عافها وخطب بت عمه؟
والمصيبه بقت تحبه..
اكو؟؟؟
حسدت نفسي يمكن لان جنت مرتاحه انه واهلي من اشتغلت لليوم.
ماحسينه بذاك الجوع مثل باقي الناس بايام الحصار.
لااكلنه تمن معفن ولاطحين من نواة التمر ولا ظلينه بحسرة كيلو الشكر لو كيلو الطماطه..
كلها فاتت سلامات خفيفه ماحسينها بيها مثل باقي الناس..
جنت استغرب من اسمع من الموظفين بالدوام ماعدهم شكر لذلك ماخلون شكر للجاي يشربونه مر او اللي يكول نخلي حلاوه بالجاي حتى يصير حلو..
جانت الناس تتعشى وتتغدا باذنجان مشوي حتى مو مكلي..لان دهن ماكو.
واكو ناس جانت تاكل وجبه وحده باليوم لو وجبتين بس لان ماعدهم منين يجيبون من غير هم المدارس ومصاريفها..
اووووف اووووف شلون خلصناها ذيج الفتره ماادري..
ثاني يوم من الصبح اجه جواد ورحنه انه وامي وياه وحول البيت بأسمي.
بالطريق كال:
باجر نعقد بالمحكمه واليوم اجيب السيد يعقدلنه.
انه جنت كاعده كدام وامي وره التفتت على امي حسيت بخوف مو طبيعي.
امي ولاهامها الموضوع مبتسمه عبالك مزوجتني لامير مو لمفوض جواد.
جواد:شو ماتحجين؟
رنا:بس انه بعد عندي شرط.
جواد:شرطيش؟
رنا:ابقى اشتغل اداوم..
جواد:هاا شلج بالدوام؟
رنا:لا عفيه مااريد اكعد بالبيت اختنك.
جواد:لا لا دوام ماكو هذا المدير حاط عينه عليج وجان خاطبج لامااقبل تشتغلين كعدي بالبيت احسنلج.
رنا:اكعد بالبيت شسوي؟
جواد:داري رجلج
اباوع لامي ردتها تحجيلها كلمه ماكو المهم عدها ضمنت البيت بعد الباقي مو مهم.
بقيت ساكته واباوع عالشوارع وضايكه الدنيا بعيني.
وصلنه للبيت نزلت امي وانه اجيت انزل كال:
اليوم اجيب السيد مو تنسين؟
رنا:لا غير يوم خليها اليوم مانلحك لازم اهلي يدرون وكرايبي غير معناها خطبه وكعده وزلم؟
جواد:هلو هلو وعرس بعد فد مره خاف تردين؟
باوعتله بعصبيه كتله:
ليش حبوبي مااسوي عرس شنو داخله بالعمرين؟لو يوميه متزوجه؟
جواد:انه متزوج وولدي بطولي شتكول عليه الناس مسوي عرس؟
رنا:انت متزوج وولدك بطولك انه شنو ذنبي؟الزواج اشهار والناس لازم تعرف انه طالعه من بيت ابوي معززه مكرمه مو سكته عبالك مسويتلي عمله.
جواد:ههههه والله ماينكدر عليج يالله هسه نزلي رتبي وضعج واطيني خبر حتى انه هم ارتب وضعي.
نزلت ووصلت لباب البيت واتذكرت شغله درت هو بعده واكف رجعت فتحت باب السياره وكعدت.
رنا:جواد؟
جواد:يابعد روحه.
ويييع ياربي مااتحمل تصرفاته وحجيه..
رنا:مرتك تدري بزواجنه لو لا؟
جواد:اي تدري لان من زمان انه كايللها اريد اتزوج وهي ماعدها مانع احنه اتزوجنه زغار مانفتهم وخلفنه واحنه زغار خذتنه المسؤوليه ونسينه ارواحنه بسوالف الدنيا وهي كبرت بعد وانه اريد وحده تداريني تهتم بيه وحده حلوه هيج مثلج كون.
ساكته واباوعله شلون يحجي على كل شي مبتسم مدري ماعنده احساس مدري فطير بس المثله وبخباثته وينه ووين الفطاره.
ماحجيت نزلت وسديت الباب ودخلت للبيت اتصلت امي بابوي هسه امنوا بعد مايشتكي على ابوي لان راح يصير نسيبه ولا يكدر يطلعنه من البيت لان اتحول العقد بأسمي.
ثاني يوم صارت الخطبه وانترس بيتنه شرطه من جماعته وجايب وياه امه وخواته وعقدلنه السيد وطشت الناس وامه لبستني الحلقه والمحبس بس لان مهري جان البيت هو مالبسني يستحي عشتوا.
امه وخواته كاعدات اصنام لاصفكه لاحجايه ولا اي رد فعل بس يخزرني.
انه جنت لابسه بدله منفوشه وردي لونها ومسويه تسريحه.
دخل هو لابس مدني ماعرفته بالبدايه متعوده اشوفه بالزيتوني.
كعد يمي والابتسامه شاكه الحلك وكل شويه وباس راسي ولازم ايدي عبالك راح اطير.
رنا:جواد؟
جواد:هاا؟
رنا:امك وخواتك شبيهن حتى بالجذب ماباركنلي ولاعدهن اي رد فعل لاضحكه لاابتسامه لاحجايه صدك جذب؟
جواد:عوفيهن يولن.
طكتني صفنه شنو هالاسلوب اكو واحد يكول على امه وخواته عوفيهن يولن!!
كل شويه ودنك يم اذني وكلي:
شطالعه اليوم؟
كاعده واحس طلعت روحي من كثر التفكير اخر شي دنكت وغمضت عيوني..
بقيت هيج دقايق اتمنيت افتح عيوني الكه كل اللي صار حلم وانتهى.
الكه ارشد كاعد يمي وارشد اللي لازم ايدي وارشد اللي لبسني الحلقه..
ارشد.. ارشد.. ارشد.. كل فكره كل تفصيل كل ثانيه من موضوع الخطوبه متخيلتها وياك..
ولامره اتخيلت روحي متزوجه غيرك..
حتى الحلقه جنت متخيله اسمك مكتوب عليها من البسها وجنت اتخيلك تبوس ايدي برقه وتكلي مبروك..
جنت اتخيل اهلك يجون يهوسون ويركصون فرحانين بيك وبيه..
مامر ابالي لثانيه ممكن تخون..
طاحت دموعي ومسحتها ورفعت راسي فتحت عيوني غصبن ماعلي خلص انتهى الموضوع هذا الواقع ولازم اتقبله..
وثاني يوم رحنه من الصبح عقدنه بالمحكمه خلصنه بسرعه ورجعنه بس انه مخنوكه ومااكدر ابقى بالبيت اموت من التفكير.
رنا:جواد عفيه ذبني عالدوام
جواد:ليش مو مجازه اليوم انتي اصلا راح تلبطلين شتسوين رايحه بعد؟
رنا:ميخالف لازم اروح عالاقل اقدم استقاله مو هيج اختفي.
سكت ماحجه وصلني وراح بقيت واكفه اباوع وراه سيارته سوبر بيضا جانت بوقتها غاليه وذاك من ذاك العنده سياره والاغلبيه اللي عدهم سياره جانت برازيلي.
اباوع وافكر شجابه على حظي ومنين طلعلي؟؟
بيومها فعلا رحت قدمت استقاله بس استاذ بشار مديري ماقبل حسيت وجهه ثكيل وضايج مني كلي:
سويتيها سكته خطوبتج؟
رنا:خليها سكته احسن استاذ.
استاذ بشار:ليش رنا ليش قبلتي مامجبوره تسوين هيج.
بجيت كتله:
لا مجبوره مجبوره اذا مااقبل وين نروح انه وخواتي وين يرحون اهلي؟نكعد بالشارع؟
بقى ساكت ويباوعلي بعدين اتنهد وكال:
وهسه؟
رنا:هسه هاي استقالتي؟
كال:
ليش؟ليش تستقيلين؟
رنا:مايقبل اداوم.
اخذ مني الورقه وفتح الدرج وخلاها بي كلي:
هاي الورقه راح تبقى هنا ماراح اوافق عليها خاف تحتاجين الوظيفه بعدين تلكينها موجوده.
رجعت بجيت كال:
شكد صارلج هنا اتداومين؟
رفعت راسي باوعتله ومسحت عيوني .
قبل لااحجي كال:
من اول ماداومتي وانه يوميه اكول اليوم احاجيج واخطبج بس جنت اخاف ماتقبلين بسبب فرق العمر او لان متزوج.
بقيت ساكته ماعندي حجي ارد بي عليه ولو اجيت للصدك لو محاجيني قبل مااقبل ولنفس الاسباب اللي ذكرها فرق العمر ومتزوج.
جواد قبلت بي مجبوره من لاجاره شسوي وهو لو حال مسألة البيت جان هم اتزوجته مجبره.
استاذ بشار:عموما مكانج موجود بأي وقت تجين تكدرين تداومين.
رنا:مشكور استاذ.
سلمت عليه وعالموظفين وطلعت..
رجعت للبيت مخنووووكه مثل الرايح للموت برجليه هيج احس نفسي زواجي من جواد موت.
غسلت وبدلت وكعدت بغرفتي منتظره ماادري شمنتظره بس منتظره..
لا اعرف شمنتظره منتظره ارشد وارشد بعد مايجي شبقى شانتظر بعد؟انتظر الموت.. اموت احسن عيشتيش هي هاي.
كمت رأسا طلعت طبقة براسيتول بس هاي اللكيتها كدامي وشربتها كلها.
وظليت كاعده منتظره الموت يجي ياخذني يمكن اخلص.
بعدين طلعت للهول لزمت التليفون واتصلت بأرشد التليفون يدك وكلبي يدك وياه اتمنيت اسمع صوته لاخر مره بس للاسف محد شال التليفون.
كعدت ابجي حيل اتهسترت اجت امي وخواتي يسألوني شبيج مااريد اجاوب عليهم مااريد.
كمت رجعت للغرفه اجت اختي رغد وراي بس دخلت صرخت عليها:
اطلعي براااااااااا.
ظلت واكفه هي ماطلعت رجعت باوعتلها مايمي شي اشمره عليها حتى تطلع بس طبقة الحبوب الفارغه شلتها وشمرتها عليها وبعدين شمرت المخده.
رغد:على كيفج شبيج فوكاها؟
رأسا كمت رحتلها ادفع بيها برا دفعتها وهي تحجي فتحت الباب وطلعتها اجيت اسد الباب وحسيت صارت ظلمه... كللللش ظلمه ......
فتحت عيوني انه وين؟مو بيتنه درت راسي شفت امي وابوي واخوي مؤمن كاعدين يمي.
شافوني فتحت عيوني كاموا يمي يحجون ويسألون بس انه احس نفسي بغير عالم مااسمعهم بعيدين احسهم.
كلت يمكن حلم خل ارجع انام احسن...
دقايق وسمعتهم جابوا الدكتور:
هاا رنا شلونج؟
فتحت عيوني باوعتله شفته لابس الروب الابيض وعلى ركبته سماعه رفعت راسي عرفت بالمستشفى.