فقراء لم يخلقوا للحب

/23/

فقراء لم يخلقوا للحب 23

قررت ارجع لوظيفتي كلولي بس جيبي تأييد انه انتي مفصوله لاسباب سياسيه..
وراها سافرنه انه وداليا وعصام وابو ارشد ومؤمن لبغداد حتى نشوف بيتنه وبيت اهل داليا والشقه مال زيونه وحتى نمشي باجراءات حصر الورث..
فكروا يبيعون كل شي لان بعد مانكدر نبقى ابغداد بحدنه بس انه ماقبلت ابيع وداليا هم كالت ماتريد تبيع والبقيه اتنازلوا عن حصتهم بالورث..
بس بعنه الشقه داليا اخذت حصتها خلتها بالبنك.
وانه بنيت بيها القطعه اللي قبل انطانياها استاذ بشار واجرتها..
بعدها من اجت حكومه وصار اكو دستور وقوانين ووزارات البيوت اللي اهلي ساكنين بيها اتملكت لساكنيها مقابل مبالغ تعتبر رمزيه مقارنة بأسعار العقارات..
واشتريته لان هو اصلا عقده بأسمي..
جان ابو ارشد دائما يجينه ويسأل عني وعن حمودي وينطي مصرف لاحمد..
وره سنتين من وفاة حبيبي المانسيته..
اتصل بيه ابو ارشد وكلي اريدج بشغله بس مااريد احد يعرف بيها اذا تكدرين تجينه.
رنا: ان شاءالله عمو.الخميس وره الدوام اجيكم.
ابو ارشد: جيبي حمودي وياج وباتوا يمنه.
رنا: صار.
جنت بيني وبين نفسي حاقده على ابو ارشد مو لان اذاني ولا لان جان مايحبني او يسمعني حجي مطلكه ومطلكه، بس جنت حاقده عليه لان حبيبي مات وهو ضايج ومقهور بسببه وبسبب حجيه..
بس جنت ساعات انقهر عليه مهما كان هذا ابنه ويحبه واكيد متندم على كل اللي سواه..
يوم الخميس رجعت من الدوام اخذت حمودي ورحتلهم..
محد جان موجود داليا والبنات بالسوك وهيثم نايم وعصام طالع باقين بس امه ارشد وابوه.
كعدنه وحجينه وسولفنه ولعبوا ويه حمودي شويه بعدين ابو ارشد راح للديوانيه وصاحلي.
رحت وراه وخليت حمودي يم بيبيته.
من دخلت يمه وكعدت كلي:
المرحوم صارله شكد من مات؟
رنا: صارله سنتين تقريبا.
ابو ارشد:تمام .. معناها راح احجي وياج بشغله ابالي واريدج تساعديني بيها.
رنا: ان شاءالله عمو.
ابو ارشد: انه فكرت ازوج داليا لعصام.
اتفاجأت .. ظليت ساكته.
ماادري ليش ماجنت متخيله لو مفكره مجرد تفكير بموضوع الزواج بعد ارشد مو بس الي حتى لداليا ومن عصام بالذات ..
ابو ارشد: شتكولين؟
رنا:هاا انه؟ شكول يعني؟ ماادري والله عمو فاجأتني مامتخيله داليا تتزوج عصام.
ابو ارشد: ليش شبي؟
رنا:مابي الا كل خير بس ماادري، عموما يعني كيفهم همه اذا هي موافقه وهو يريدها ليش لا..
ابو ارشد: مو هي هنا المشكله.
رنا:مشكلتيش؟
ابو ارشد: عصام مايقبل يتزوج.
رنا: ليش؟
ابو ارشد: ماادري اتصور يحب وحده ثانيه ..
وانه مااريد اغصبه مثل ماصار بالمرحوم وتالي صار اللي صار.. اريده يتزوجها كون وهو مقتنع.
رنا:والمطلوب مني شنو؟
ابو ارشد: اريد منج انتي تحجين وياه وتقنعينه تفهمينه تعرفين منه منو هاي اللي يريدها .. انه اشوفه هو يحترمج وقريب منج اتوقع تكدرين تأثرين عليه.
رنا: والله ياعمو ماادري شكلك بس راح احاول والله كريم.
بعدنه نحجي دخل عصام اتفاجأ من شافني اجه سلم علي وسأل عن حمودي كتله عد بيبيته.
ثاني يوم من وصلني عصام لبيت اهلي فتحت الموضوع وياه كال:
مااكدر.
رنا: ليش شبيها داليا بت عمك وزغيره اصغر مني وحلوه وارملة اخوك وعدها طفله انت اوله بيها من الغريب.
التفت علي كلي:
هذا مو حجيج قبل من خطبها ارشد ؟ لارشد مايصير لان تحبينه بس لعصام يصير؟
رنا: لا والله مو قصدي هيج ابد بالعكس انه هسه اثمن وأيد كل كلمه كالها ارشد قبل الي اخلاقيا ماكدر يعوفها لان مالها احد وانت المفروض تسوي مثله اخلاقيا ماتتخلى عنها..
عصام: تتذكرين قبل من كتلج احب بت خالتي ومنتظرها تخلص دراستها؟
رنا:اي اتذكر بس خلصت دراستها وماشفتك خطبتها هههه.
عصام:جذب ماجنت احبها.
رنا:يعني جنت تجذب علينه ههه؟
عصام:لا والله جنت حاط عيني عليها بس هي ماتدري بيه جنت اكول اذا خلصت دراستها اخطبها مادام ماكو وحده ابالي ولااحب.
رنا:وهسه؟تريدها؟٠
عصام:لا نسيتها من زمااان وراحت ايامها ..
رنا: ليش؟
عصام: نسيتها من زمااان وشلتها من بالي..لان حبيت وحده ثانيه.
رنا: ياا صلوات هههه منو بالله سعيدة الحظ؟
سكت ماحجه كتله:
كول حتى نروح نخطلكياها.ونورط هيثم بداليا ههههه.
عصام: خاف ماتقبل بيه؟
رنا: ليش ماتقبل بيك شناقصك وين تلكه احسن منك؟
اتنهد وسكت وانه اباوعله منتظره يحجي بعدين كال:
هم اسمها رنا..
ضحكت كتله:
شتريد بعد اكيد حلوه مادام اسمها رنا هههه.
عصام: وهم ارمله..
انعصر كلبي كتله:
مسكينه .. ان شاءالله تكون من قسمتك وانت تعوضها.
عصام : ان شاءالله ... وهم عدها ولد ..
درت عليه كتله:
معقوله؟ بس لا هم اسمه احمد؟
ماحجه ..
من شفته بقى ساكت عرفت يقصدني بحجيه كل هالحجي عني انصدمت واستحيت منه ... بعدين اتنهدت وكتله:
كول عصام احجي بدون هالمقدمات ..
عصام : اكثر من هيج شحجي؟
دمعت عيوني كتله:
انه لهسه احب اخوك .. وماعندي استعداد افكر بغيره ..
عصام: ماطالب منج تحبيني هسه ..
رنا : المن كتلي هالحجي اذا ماتريد احبك ؟
عصام: ردتج تعرفين مشاعري وتعرفين شكد دست على نفسي وعلى مشاعري لان اخوي جان يحبج وانتي تحبينه ..
ماكو واحد يسوي مثلي .
طاحت دموعي كتله:
ولااكو وحده سوت مثلي .. ولااكو واحد سوه مثله .. كل واحد من عدنه سوه لخاطر الثاني واتحمل الما يكدر يتحمله غيره ..
عصام: وهسه؟
فتحت باب السياره وكتله:
راح اعتبر نفسي ماسمعت شي لان ماافيدك ..
لزم ايدي كال:
ليش؟
باوعتله وسحبت ايدي كتله:
لان بت عمك اوله بيك مني ..
نزلت وسديت الباب بقى هو كاعد بالسياره ..
ظليت اليوم كله متكدره وضايجه مااتمنيت انحط بهيج موقف وخاصة ويه عصام لان جنه اصدقاء ماعبالك حماي وجنت احسه يعزني ويحترمني بس مااتصورت الموضوع واصل لدرجة الحب ..
مااكدر اتزوج غير ارشد وانه لهسه اشوفه بالحلم كاعد بعيييد واروح اركض اسلم عليه واكله شتسوي كاعد هنا يكلي انتظرج ..
واحس نفسي انه هم منتظرته .. وهالانتظار طول حيييل طول وماادري لشوكت راح ابقى انتظر حتى نرجع ننجمع سوه مثل قبل..