فقراء لم يخلقوا للحب

/3/

#فقراء_لم_يخلقوا_للحب_
ل: #روز_الفياض_
ج٣

بقيت ساكته.
ارشد:الو رنا وينج؟
رنا:هنا
ارشد:وين هنا؟ليش ساكته لان كتلج مااكدر؟
اي مااكدر تدرين بيه احبج وادري تحبيني بعد شنو؟
شلون بعد هالحجي ماكو مفروض بينه؟
لا اكو.. المفروض احنه واحد يحب الثاني اذن النتيجه تكول المفروض اخطبج.
اتنهدت بفزع كتله:
ارشد انه خايفه.
ارشد:من شنو؟مني تتصورين بعد كل هالسنين اعوفج؟
رنا:ارشد؟اليوم مديري خطبني...
ماحجه شي سكت وسكوته طول بس اسمعه يتنهد ويجر حسرات.
رنا:شفت؟عرفت هسه ليش ماكو مفروض بينه؟
ارشد:يعني معنى كلامج انتي موافقه؟
رنا:لا بس معناه انت ماتكدر تجي تخطبني هسه لان بعدك مامستعد.
ارشد:منو كال مامستعد انه انام واحلم بيج الي واكعد واكول آمين.
شلون بعد مامستعد؟
رنا:مو هذا قصدي بس قصدي اهلك ابوك بت عمك؟
ارشد:غيرج مااريد رناوي اهلي وابوي اول وتالي راح يقتنعون وبت عمي شسويلها هاي قسمه الله يرزقها بالاحسن مني ان شاءالله.
رنا:بس؟
ارشد:بس اريدج تصبرين بعد شويه لحدما اكون نفسي زين وبلكي منا لحدما اكون نفسي تكون هي اتزوجت وخصلنه بدون مشاكل وزعل.
ظليت ساكته يعني لشوكت انتظر؟
انه بنيه والبنيه مو مثل الولد كلما تكبر سنه تقل فرصها.
والناس تحجي ماترحم والاهل والكرايب مايقصرون ازيد من الغريب.
وشنو اليضمنلي باجر لو عكبه راح يكدر يخطبني ومايجبرونه يتزوج بت عمه؟؟
سديت التليفون وانه افكر ماوصلت لحل بالعكس هالاتصال عقد اموري اكثر وخله الدنيا سودت بعيني.
احبه واريد انتظره بس شكول لاهلي شمنتظره ليش مضربه عن الزواج؟
احبه وادري بي يحبني بس شلون لو ماكدر يواجه اهله ؟
احبه ومااكدر اتخيل مجرد خيال متزوجه غيره بس شلون لو جبروه يتزوج بت عمه؟
والله ماادري شسوي وماادري شجاوب اذا سألني المدير موافقه لو لا؟
هم جبير وهم متزوج شجابرني عليه؟
صحيح صاحب فضل بس مو معناها اقبل اتزوجه..
اي هذا الصحيح ماله داعي افكر اكثر واعقد الامور هي قسمه.
بقت مشكلة البيت شلون بينه؟؟
ثاني يوم داومت عادي بس محرجه وخايفه خاف يسألني عن جوابي بس الحمدلله ماسأل.
رجعت للبيت نزلت من السياره شفت المفوض هو وجماعته واكفين اباب بيتنه التفتوا علي من شافوني نزلت.
ماسلمت عليهم اجيت افوت للبيت راسا بس لاكوني 2 طالعين من بيتنه رجعت التفتت على امي واخوي واكفين بالباب كتلهم:
شكو؟شيسوون ذوله هنا شيسوون داخلين للبيت؟
امي:يفتشون على ابوج.
رنا:ليش؟
رد علي المفوض:
ابوج عليه القاء قبض ياحلوه.
رنا:وليش يابه؟
ضحك على كيف كال:
يابه هاا؟ههه شنو هاز كاروكج؟
بس ميخالف راح اجاوبج لان كاعدين ابيت مو بيتكم كاعدين ابيتي وحذرتكم هواي ومافاد وهذا اخر تحذير عدكم لراس الشهر يعني بعدلكم 3 اسابيع وتخلون البيت او اخليهم يشيلون غراضكم ويذبونها بالشارع اختاروا.
امي واكفه وتتوسل بي واخوي زغير بعده بالمدرسه واكف وساكت ضجت جريت امي واخوي ليجوه وطبكت الباب بوجهه.
امي:ياا ولج شسويتي اتخبلتي؟
رنا:ولاكلمه شنو هالشكولات هاي وتتوسلين بيهم شيريد يسوي خل يسوي النومه بالشارع اهون من التواسيل بهالناقصين غيره.
بعدني احجي وماحسينه الا واحد صعد عالباب وطفر للحديقه باوعنالها شكد صلف كال:
مرة الثانيه اذا سديتي الباب بوجهي اتصرف تصرف مايعجبج.
رنا:جرب وشوف.
كال:
ماتخافين؟
رنا:ليش اخاف انت المفروض تخاف.
كال:
انه مااخاف بس اخوف ومااريد اخوفج.
رنا:لو سمحت اطلع بره كافي هيج عيب عليك.
كال:
ليش شمسوي حتى عيب علي داخل لبيتي.
رنا:شوكت ماطلعنه منه يصير بيتك.
التفت على امي كللها:
هي دائما هيج عصبيه وماعدها تفاهم؟
امي:اعذرها خاله هي عصبيه.
رنا:لا مااريده يعذرني اريد اشوف بالله شيسوي.
امي:اسكتي فضحتينه.
اتدنه هو يمنه انه رجعت وره امي شويه ضحك كال:
المهم احنه نريد نتفاهم انه هم ماارضاها تتبهذلون كلبي ماينطيني.
امي:كول خاله شتريد فلوس تره ماعدنه جذب لو عدنه جان طلعنه من هالبيت وشفنالنه غير مكان.
كال:
وغيره شنو عدكم؟
امي:ماعدنه شي الله شاهد بس هالبنات والولد وراتبي وراتب البنيه.
كلي:
راتبج شكد؟
رنا:وانت شكو براتبي؟
كال:
حتى اشوف يجوز اشوفه مناسب اخذه وانطيج البيت.
امي صدكت كلتله:
راتبها نعمه زين .....
كال:
هو زين خوش راتب بس مايكفي.
امي: راتبي مااكدر انطيكياه بيش نعيش.
ضحك هو كللها:
لا راتبج مايفيد بس هي.
انه واكفه ساكته اباوعله عينه صلفه ماينزلها كل لامي:
شعجب بتج مامتزوجه؟
امي:يجونها هواي بس هي ماتقبل.
كرصت امي حتى تسكت منه حتى يروح.
كال:
ليش ماتقبل شتريد؟مبين عدها شروط صعبه؟
امي:مهرها غالي ماننطيها لاي واحد.
كال:
هاا اي تستاهل.
دار وجهه مشى للباب فتحه يريد يطلع ودار وجهه علي كلي:
شنو بالله مهرج؟
انه مو بقصدي بس من عصبيتي وحتى اغثه مثلما غثني كتله:
بيت ...
رفع حاجبه باوعلي ودار وجهه وطلع...
ابوي جان طالع الحمدلله مالكوه بالبيت واخوي الثاني جان بالمدرسه.
امي:شلون وين نروح شنسوي؟
رنا:والله ماادري..
ظلينه على هالحال اسبوع يوميه يجون يفتشون البيت على ابوي.
ابوي جان يبقى يم صديقه المقرب مامتزوج وساكن هو وابوه واخوه يعني بس رياجيل فعادي يبقى يمهم.
اتصل ارشد:الو
رنا:الو
ارشد:شلونج؟
رنا:مو زينه.
ارشد:خير شبيج؟
حجيتله القصه بس حسيته هو هم ضايج.
رنا:انت شبيك؟
بقى ساكت كتله:
ارشد شبيك؟
ارشد:رنا شنو طبيعة علاقتج بالمدير؟
استغربت سؤاله كتله:
عاديه ماكو شي خاص.
ارشد:بس الموظفين يكولون غير شي.
غثتني حجايته كتله:
خيكولون اللي يكولونه اللي مايطول العنب يكول حامض.
ارشد:يعني مابينكم شي؟
رنا:شهالسؤال السخيف هذا؟انت اكثر واحد يعرفني وجاي تسألني هيج سؤال؟
ارشد:يكولون المدير مدللها اكيد بينهم شي.
رنا:مدللني يجوز بس ماكو اي مقابل الرجال محترم نفسه ولو بينه شي مايتقدملي يكدر ياخذ اللي يريده بدون زواج مو صح؟
ارشد:صح.
رنا:معناها المفروض من تسمع عني حجايه تدافع عني مو تجي تستجوبني وتشك بيه وتسألني.
ارشد:اخاف عليج.
رنا:اكو فرق بين الشك والخوف الرجال ما عنده كل تجاوز من اي نوع وياي بالعكس اذا شايفيني مو خوش بنيه يمكن لان ماصارلي هواي وياهم بس هو مديرهم من سنين يعني يعرفون اخلاقه اكثر مني وقبلي هم جان اكو سكرتيره ماسمعت من احد مشتكيه منه او من تصرفاته وياها.
ارشد:رنا انه اكول لو تستقيلين احسن او قدمي على نقل لغير دائره.
رنا:ليش؟دوامي مرتاحه بي الحمدلله مديري محترمني ومقدرني ومساعدني ليش اروح لغير مكان ابدي بي من الصفر هذا تصرف غبي وماله معنى.
ارشد:اوكي انه غبي بس مااقبل تبقين وياه مدام خطبج معناها حاط عينه عليج شلون تريدين اتصرف؟
رنا:وانه اعرف اتصرف واحمي نفسي مو مطلوب منك تتصرف.
مااكدر استقيل ولاانتقل..
ارشد:رنا كافي لاتصيرين طفله وتعاندين هي كلمه وحده لو انه لو شغلج بهالمكان؟
صدمني اسلوبه وانقهرت كتله:
هيج صارت؟؟
معناها اذا هيج تخيرني فمن حقي اخيرك لو تجي تخطبني لو تروح لبت عمك انه مو وقف حتى ابقى انتظرك سنين والله العالم باجر تكدر تواجه اهلك وتكللهم تريدني لوتسكت وتروح تتزوج بت عمك وتعوفني ولاكأنه اكو شي.
سكت بعدين كال:
معناها روحي الله يوفقج بت عمي اوله بيه منج..
سد التليفون بوجهي...
بقيت لازمه السماعه على اذني ومتحنطه بس دموعي تجمعت بسرعه مالحكت...
هيج بهالسهوله ارشد بت عمك اوله بيك مني؟؟
لامو صحيح انه اوله انه اللي انتظرت وصبرت وضيعت فرص كومه علمودك مو صحيح بت عمك مو اوله مني..
محد اوله بيك مني محد..
ظليت الليل كله ابجي معقوله ارشد يتخلى عني بعد كل هالصبر؟؟
خلص الشهر انه الهموم مدوختني منا المدير ومنا البيت ومنا ارشد ومنا ابوي اللي يوميه يجون يدورون عليه ويفتشون البيت عليه القاء القبض.
رجعت للبيت شفت سيارة المفوض بالباب بس هو ماكو بس جماعته فتت للبيت وطبكت الباب بوجهم حيل.
دخلت سمعت صوت جوه مديت راسي شفته كاعد هو وامي واخواني.
اتفاجأت ماسلمت بقيت واكفه مستغربه ليش مدخلينه للبيت ومضيفينه جاي.
شافتني امي كالت:
هلا حبيبتي تعاي ليش واكفه؟
التفتت هو علي كال بأبتسامه واتفحصني بعيونه من راسي لرجليه:
هلا بالحلوه.
ماحجيت ولا كعدت بقيت واكفه واباوعلهم شنو الفلم؟
كال:
ليش واكفه فوتي كعدي جنه نحجي ونسولف عنج.
باوعتله مالي خلك حجيه الماصخ ضايكه بيه الدنيا كتله:
خير؟
كال:
كل خير اكيد.
امي:تعاي ماما تعاي حبابه تعاي كعدي ويانه ابو محمد يريد يحجي وياج.
باوعتلها كتلها:
يا ابو محمد؟
ابتسم هو كال:
انه ابو محمد ماتدرين؟
ماجاوبته عفتهم ورحت للغرفه ذبيت جنطتي وكعدت كبال المرايه اباوع لروحي واحجي بكلبي:
هسه ارشد يتصل ويعتذر اكيد مامعقوله يسويها صدك.
دخلت امي كالت بصوت ناصي:
رناوي حبيبتي كومي كعدي يم الرجال عيب صار ساعه كاعد ينتظرج.
باوعتلها كتلها:
شكو؟شيريد؟المن منتظرني عرف ولف شهالمسخره؟
امي:كومي هناك نحجي وافتهمي منه عيب تحكرينه وهو هسه لازمنه من ايدنه التوجعنه اذا طردنه من البيت وين نروح؟
باوعتلها بالمرايه كتلها:
ماارتاحيتله عيونه وصخه.
امي:ميخالف جاريه خل نشوف النتيجه.
رنا:شلون اجاريه يعني؟اتوسل بي؟تدرين بيه مااطخ راس لاكبر واحد واتوسل بي.
امي:لاتتوسلين محد كايلج اتوسلي بس ضبي لسانج حتى لايشد ويانه ويطردنه.
رنا:مااكدر اذا غثني اغثه هاي انه كتلج مو بعدين تكولين ليش كلتي وليش حجيتي مااسكت لاحد يغثني لو يقلل من قيمتي تعرفيني.
امي:خوش خوش نصي صوتج وكومي يالله كعدي يم الرجال شوفي شيريد منج.
رنا:اففففف.
امي:يالله كومي شبيج.
رنا:يعني معقوله دخل للبيت وضيفتوه وصار ساعه على كولتج كاعد ينتظرني وماتعرفين شيريد؟
امي:مااعرف.
رنا:شجنتوا تحجون؟
امي:هاي عالبيت بعد عليمن نحجي.
رنا:بس؟؟
امي:بس
رنا:مو يكول جنتوا تحجون بيه؟
امي:اي سأل عنج كتله بالدوام سأل شمخلصه وين تشتغل من هالحجي يعني حجي عادي.
رنا:وشنو المناسبه يسأل؟
امي:هسه لاتطولينها وهي كصيره كومي كعدي هناك وسمعي لاتظلين تسألين.
اتنهدت حيل وكمت عدلت ملابسي كبال المرايه وامي واكفه تباوعلي مبتسمه ابتسامه عريضه كالت:
حلوه تخبلين مايحتاج تعدلين وترتبين تعجبين الملك.
باوعتلها كتلها وانه بكلبي حسره على ارشد:
هو حارس الملك مامحصلته انوب الملك.
ضحكت امي على كيف وكالت:
لا والله الملك انتي بس طلعي هسه وشوفي تاليتج شنو.
بس ها مثل ماوصيتج لسانج ضبيه.
رنا:مالي خلك ماما وكتلج اذا غثني اغثه فلا تحاولين.
امي:دامشي هسه امشي راسج يابس ماكو مثل عنادج عناد.
طلعت هي راحت يم ابو محمد المفوض وانه امشي خطوه وارجع خطوه كلبي مقبوض وروحي احسه رايحه مني بس شسوي هالعائله كلها اتكالها علي ومسؤوليتي.