دعاء مستجاب

الاخير

#دعاء_مستجاب_
ل: #روز_الفياض_
ج١٧ والاخير
دائما جانت امي تكول اذا اتمنيتوا شي ادعوا من كل كلبكم واذا تأخرت هالامنية ظلوا لحوا بالدعاء والله راح يحققها ..
واني مستمرة بدعائي وكلي يقين انه الله سبحانة وتعالى مراح يجازي حسن ظني الا بكل اللي اتمناه ..

سافرت لعمان اني وامي والتقينه بدكتور بشار ..
وفاجأني بأنه اقترح علي اسوي عملية زرع نخاع ..
عملية زرع نخاع العظم يسووها للي مثل حالتي ولحالات اخرى ثانية لانها عبارة عن نسيخ من داخل العظم يؤخذ من شخص سليم من نفس العائلة ويزرع او يحقن بكل بساطة بجسم المريض حتى يقوم بصنع صفائح دموية جديدة ..
صحيح العلمية سهلة وتعتبر جدا بسيطة في دول مثل تركيا وعمان لان العلم والطب بيها متطور لكن الخطورة تكمن بالفترة بعد العملية ..
اذا حصلنه شخص من اهلي او اخواني متطابق وياي وقبل ناخذ منه نسيج راح يزرعون هالنسيج بجسمي وينطوني علاجات تقلل المناعة وتقلل مقاومة الجسم ..
النسيج الجديد ممكن يعتبره جسمي جسمي مضاد ويحاربة ويرفضة وتفشل العملية ..
لذلك ينطوني علاجات تقلل المناعة والمقاومة وجسمي راح يكون جدا ضعيف وهش لان ماعندي مناعة ومقاومة ممكن اقل فايروس يقضي على حياتي ..
تجنبا لهيج نتائج لاسامح الله لازم ابقى فترة طويلة بالمستشفى الله اعلم شكد لكن حسب اللي فهمته اشهر ممنوع اطلع خلالها وممنوع التقي ناس الا المقربين وبحالات الضرورية فقط وتحت رقابة وحجر صحي مشدد حتى ماتنتقلي اي عدوى لاي مرض ..
وطبعا راح اعاني من نفس الاعراض اللي جنت اعاني منها من اخذ العلاج الكيمياوي يعني غثيان وتقيأ والالام بكل الجسم وفقدان الشهية ووهن وضعف عام وغيرها لكن هالمره اقوى اكبر لان جسمي ضعيف ..
طبعا العملية مكلفة وتحتاج علاج مكلف بعد العملية ... ولازم قبلها اكون ماخذه جرعة كيمياوي حتى يكون جسمي مستعد لتلقي العلاج ..
بأختصار راح تكون مرحلة جدا صعبة وحرجة وخطرة وتحدد حياتي ..
هذا الكلام اللي سمعته من دكتور بشار واللي اول ماسمعته فرحت بي ..
رغم الخطورة الجبيره بي على حياتي بعد العملية لكن كلي امل بنجاحها  ...
امي ظلت تبجي من سمعت كلامه بس اني فرحت اصلا خلص احسها هانت ..
مابقى شي واطيب ..
فرحت متفائلة حيل ومبقى احد محجيتله هالموضوع اتصلت بالكل وكتلهم عالخبر ..
الكل فرح ..
الكل يدعيلي حتى اطيب ..

بنفس اللحظه انطيت موافقتي عالعملية لدكتور بشار ..
وطلب من عدنه نبدي بالفحوصات والتحاليل حتى نشوف منو يطلع من اهلي النسيج مالته مطابق ..

بس طلبت منهم طلب قبل العملية ..
افراح: ماما؟

امي جانت تطبخ التفتت علي كالت:
هاا ..
افراح: ماما اريد اروح للعراق قبل لااسوي العملية ..
امي: ليش شعندج؟
افراح: اريد اروح اشوف الكل واسلم عليهم واريد اروح ازور اريدهم ياخدوني للامام الكاظم واريد اروح للامام الحسين والامام العباس ...
اريد اسوي العملية واني مرتاحة ومطمئنة ..
بقت امي ساكتة شوية ومدنكة بعدين كلتلي:
ان شاءالله ..
كولي لاخوانج خل يحجزونه هالايام حتى نروح ونزور بقوة الله ..