دعاء مستجاب

10

#دعاء_مستجاب_
ل: #روز_الفياض_
ج١٠
ظليت صافنه هذا شبي صهيب هيج يحجي وياي؟
ومنو علياء؟
معقولة يطلع متزوج؟
لو يمكن هذا مو صهيب واحد ثاني؟
رجعت اتصلت من جديد طلع نفس الصوت رد علي ونفس الاسلوب ..
بقيت ساكته وهو يحجي ويكول الو ...
سديت التليفون ..
مكدرت احجي شحجي .. بقيت الوم بنفسي شوداني واتصلت عليه شبيج افراح شهالسوالف شهالتصرفات ..
بعدني كاعده واحاسب نفسي دك تليفوني باوعت .. صهيب ...
كمزت ...
خفت ... مااعرف ليش بس خفت حيل ...
ظليت متردده بعدين جاوبته:
الو؟
صهيب: الوووو؟
افراح: نعم؟
صهيب: نعم الله عليييج بس انتي اللييي متصله عليي مو اااني ..
حسيت بالقرف من طريقة كلامه ..
افراح: آسفة بالغلط دكيت ..
صهيب: ياغلط هذا وانتيي تعرفين اسمييي ؟

معناها صدك صهيب هذا ... بس طريقة كلامه مال واحد عبالك سكران ...
معقولة يشرب ؟؟؟
افراح: صهيب انت شارب؟
صهيب: اي هههههه شارب نفط ..
ضجت كتله:
اوك ... رجاءا بعد لتتصل بيه لان بالغلط دكيت عليك ..
سكت مجاوبني .. بعدين كال:
انتي منو؟
افراح: مو احد ... متعرفني ..
صهيب: انتي فرح مووو؟
انصدمت لان عرفني هذا سكران وهيج عنده تركيز وقابلية لاعجب عليه وهو صاحي شلون يربط ويستنتج ...
مجاوبته كال:
احجي فررح ... خليني اسمممع صوتج ..
انقهرت ودمعت عيوني هاي اني وهذا حظي كلما احب واحد يطلع بي عله ....
افراح: شحجي انت خليت بيها حجي ..
صهيب: ليييش؟ شسويتلجج؟ لان اشررب كل الشباب يشرربون ..

بعدني احجي وياه كال:
يالله يالله ... روحي كافي ..
سد التليفون بوجهي ...
بقيت مدهوشه ... هذا حظي؟
واحد يشرب  وواحد نصاب وممثل ...
شبعد عندك من مفاجآت صهيب ..
بقيت كاعدة بليلتها للفجر ..
صليت وقريت قرآن ودعيت لصهيب الله يهديه ..
الله يهديه للطريق الصحيح حتى لو مو الي ..
حتى لو مو من نصيبي ...
اتمناله كل خير ...
بس صدمتي بي اليوم كسرت كلبي ..
ماادري ليش دائما اتوقع الناس زينه واشوفهم بأحسن صورة ..
بعدين يصير شي يخرب هاي الصورة وتصير عندي صدمة وخيبة امل ..
بعدها استوعب انه الناس كل الناس بشر والبشر خطاء ومتلون حسب حاجته ومصلحته ...
استوعب انه الناس مجرد ناس لاانبياء ولامعصومين ..
الغلط بيه مو بيهم .. اني اللي توقعاتي ونظرتي الهم اكبر منهم ومن حجمهم ...
بس مااتوب ...
شسويله هالكلب ويتوب من الناس ..؟
ماصدكت حسيت احد يحبني تالي طلع بي عيب لايغتفر ...
اني اصلي واقرا قران والحمدلله ... وهو يشرب؟
شسوي هسه؟
بس ماعرفت منو علياء؟
نمت ...
كعدت الصبح على صوت التليفون ..
ترميشه ..
فتحته شفت صهيب يرمش علي ..
مجاوبته .. مالي خلك ومااعرف شحجي وياه ...
بقى طول اليوم يرمش ..
دزلي مسج:
- فرح ليش متجاوبين؟ بيج شي؟ مريضة؟
غلقت تليفوني ..
واصلا المفروض اليوم نرجع لتركيا ..
خلص انتهت سفرتنه شفت الدكتور واتفقنه على حميه معينه وعلاج من نوع جديد وهسه لازم نرجع ..
جهزت جنطتي ..
طيارتنه جانت ب١٢ الظهر ..
الساعة ب١٠ طلعنه للمطار ..