دعاء مستجاب

2

#دعاء_مستجاب_
ل #روز_الفياض_
ج٢
ورجعت لبغداد ..
لاهلي ..
لامي ..
ولاخواني ..
هاي الكلمات اللي سمعتها من الكل من يشوفني ابجي ويسمعوني اكول اريد امي وابوي واهلي واخواني ..
ولهسه اتذكر اللقاء البارد بيني وبين امي .. فعلا شعور غريب من تفكر معقوله هاي امي وهيج تستقبلني عبالك شايفتني امس ..
افراح :سلام
ردت علي نضال اللي هي امي اللي جابتني:
ها اجيتي .
باستني بوسه بارده من خدي..
افراح :اي ..
بقيت اباوع على حيطان البيت القديم اللي ساكنين بي رغم جان مبين انه مصبوغ جديد بس حسيته يخنك ..
دخلت لسجن بيومها حسيت مو لبيت اهلي ..
وكعدت عالقفنه مثل الغريبة بحدي محد كلي كومي بدلي وغسلي وارتاحي محد كلي هاي الغرفة الج ..
محد حاجاني اصلا ..
راحت نضال للمطبخ وبقت وحده من جناينها كاعده كبالي متحنطه مثل المومياء صافنه بوجهي ..
ومبتسمه وحاصرتها الضحكه مااعرف على شنو ..
بوقتها ماعرفت شبيها ومااهتميت ..
بقيت كاعده بمكاني اكثر من ساعة ومحد معبرني ..
اجه اخوي الزغير عمار من شافني كلي:
ها شلونج؟
من بعيد حتى مااتدنه يمي ولاسلم علي بالايد عبالك مال من شوفتي ..
افراح :زينه الحمدلله .
دخلت نضال كالت:
هذا اخوج عمار اصغر اخوانج قصي ولؤي اكبر منه .. قصي متزوج وساكن بغير بيت بس لؤي وعمار متزوجين هنا ويانه بالبيت ..
هزيت راسي اي وبقيت ساكته ..
عمار اخذ مرته الكاعده ومتحنطه كبالي وراحوا لغرفتهم ..
نضال: خواتج متزوجات قريب يمنه ..
مجاوبتها ..
مااعرف اصلا شكد عندي خوات منها بس عرفت عندي ٣ اخوان ..
بداخلي يمكن فرحت من عرفت هلكد عندي اخوان وخوات بس جنت احس بصدمه وبروود مو طبيعي بسبب طريقة استقبالهم الي ..
حسيت بكآبة هذا البيت بروحي حسيتها خوت ..
ممتوقعه من البداية هالبرود .. ليش رادوني ارجع اذا هيج باردين وميحبوني وميهتمون لوجودي ..
ليش حرموني من امي ..
وبدوا اعضاء عائلتي الكريمه يتوافدون ..
واني كاعده بمكاني ..
اجه لؤي وزوجته جانوا طالعين ونفس اللقاء المرعب ..
بس هالمره فرق زوجته ضحكت بصوت عالي من شافتني وماادري ليش ..
اكتشفت ليش تضحك بعدين .. من اجوا خواتي حتى يتفرجون علي على الدخيله اللي جابوها اللهم واللي يمكن بدل ميستفادون من الفلوس اللي عدها يمكن تشاركهم بحصصهم بالبيت ..
زوجة عمار: شفتيها شلابسه عبالها كاعدين بأمريكا .
زوجة لؤي وهي تباوعلي وتضحك :
اي خيه صايره الناس كلها شرطة هههههه.
مافهمت شنو علاقتي بالشرطه ولاشنو علاقة لبسي بأمريكا ..
بحكم سنين حياتي اللي عشتها خارج العراق اتعودت البس مثل البيئة اللي عايشه بيها بنطرون جينز وتيشيرت او قميص وكنت طفلة ناعم وضعيفه ومبينه اصغر من عمري ..
يعني تلميحاتهم جان مالها داعي ..
اختي الجبيره اسمها مناهل والثانية تغريد طلعوا اضرب من اخواني وزوجاتهم ..
صح سلموا علي وباسوني بس حسيتهم كارهيني ومو طايقين وجودي وكل شويه وحده منهم تدنك يم نضال(امي) وتحجي حجايه وتباوعلي ..
كل تفكيري جان شوكت تخلص جلسة الفحص والتدقيق هاي شوكت يطلقون سراحي تعبت من الكعدة ..
بالكوه خلص اليوم مابين نظرات الكل ومابين الكلمات اللي تنكال بصوره عابره بينهم لكن احسها رموز وشفرات يقصدون بيها اشياء مااعرفها وماافهمها ..
بعد العشا اخذتني زوجة عمار لغرفه زغيره وشكلها مثل المخزن كلها كراكيب وزعابيل وهوسه كالت:
هاي الغرفة عدلناها الج حتى تنامين بيها ..
هزيت راسي اي واني مشمئزه من المكان والدمعه بطرف عيني وين جانت غرفتي عد اهلي ووين هاي حتى جرباية ماكو ..
جنت متخيله نضال تكون ملهوفه علي وتكولي تبقين وياي تنامين بغرفتي ..
تالي هنا انام بمخزن ..
ماغمضت عيني للصبح ..
دموعي مانشفت لحدما غفيت ..
اريد امي .. اريد ابوي واخواني .. مااريد ذوله مااعرفهم ..
الصبح توني نايمه وكعدت على صوت صياحهم وعرايك الجهال ..
كل شويه احد يجي يفتح الباب علي ويباوعلي ويروح عبالك شايفين كائن غريب ..
كائن فضائي ..
خجوله بطبعي ومااحب اتطفل على احد جنت استحي اطلع من غرفتي واروح يمهم ..
مسألة ايام بس وبدا كل شي يتغير نحو الاسوء ..
الجناين ظلن يحجن ويدردمن:
شنو هي بس كاعده واحنه نشتغل ونظف شنو على رجليها نقش الحنه ..
المشكلة اني جنت مااعرف اسوي شي بالبيت لان طول عمري كان عدنه خدامة بالبيت ..
وطفلة محد معلمني شي فجأة يردوني اكنس واغسل وامسح وكل وحده من جناينهم تريد تذب علي شغلها وواجبتها حتى تخلص ..
وبدوا اخواني يضايقوني على لبسي لان زوجاتهم يحشن براسهم ..
لؤي: انتي هييه افراح ؟
افراح: نعم
لؤي: منا ورايح ماكو بنطرون وماكو بجامه بالبيت افتهمتي؟ تلبسين دشداشه حالج حال البنات مو عبالج هنا تظلين على كيفج .
افراح : هاي ملابسي ماعندي غيرها ومااعرف البس دشداشه بالبيت ..
ماحسيت الا انكفخت كفخه دخت ..
لؤي: من اكول حجايه تكولين صار لاتخليني اطيح حظج واكص لسانج ..
بكل سنين عمري اللي عشتها قبل عد اهلي امي وابوي مايوم من الايام مدوا ايدهم علي لو غلطوا علي ..
هادئة وخجوله ومطيعه جدا جنت ...
بيومها خلصتها بجي بغرفتي وكل شويه وحده من الجناين فاتحه علي الباب:
كومي عيوني كومي خلصي شغلج ..
نضال(امي): عليمن تبجين شنو هالدلع هذا؟ بس هو مو صوجج صوج امج وابوج اللي دلعوج وخلوج خارمه كل شي متعرفين تسوين ..
مو جنه مرتاحين من هالدوخه قابل ناقصين احنه دوخة راس وعمج لزك الا ترجع .. مااخذج عنده كون هو هيج كاتل نفسه عليج ..