دعاء مستجاب

3

#دعاء_مستجاب_
ل: #روز_الفياض_
ج٣
افراح: لا مااخاف منك ليش اخاف انت دكتور ماشاءالله مو مثلي .
عادل: ليش انتي شوية هم انت صيدلانية ان شاءالله .
افراح : اي بياعة دوه مو هيج يكولون عن خريجين الصيدلة بياعين دوه ..
عادل: لو شغلة بيع جان مخلوا قبولها الا بمعدل عالي جان خلوها حالها حال باقي الكليات اللي تقبل معدلات بسيطه مو صح ؟
افراح: صح..
عادل: معناها هسه اريد اعرف رأيج بيه .. موافقه علي لو لا؟
فاجأني بس جاوبته بصراحه:
اني لاموافقه ولا رافضه .. كل مابالموضوع اني مااعرفك معرفة قوية ..
عادل: ماكو اختلاف .. مابيها شي هي مجرد خطوبه ننخطب واتعرفي علي براحتج.. هي الخطوبه شنو غير فترة تعارف حتى كل طرف يعرف الطرف الثاني قبل لايخطون خطوة الزواج ..مو صح ؟
افراح: صح .
عادل: اذن متفقين 😉..
وفعلا تمت الخطوبة على هذا الاساس ..
وبديت اتعرف على عادل ..
بديت اتعلق بي .. واحبه ..
كل يوم اكتشف بي شي جديد يخليني احبه اكثر ..
طيب ..
هادئ ..
حنون ..
مرتب ..
مثقف ..
تفكيره يطابق تفكيري بأغلب الاحيان ..
ويحاول يعبرلي عن حبه واعجابه بكل الطرق الهادئة والحلوه والبريئه ..
مره يجي يجيبلي ورده ..
ومره كتاب قصة او روايه حلوه ..
ومره شوكولاته لان يعرفني احبها ..
مره يكتبلي قصيدة لنزار قباني بورقة وظرف كأنما مسلمني رسالة ..
ويكولي الحب بالرسائل الورقية احلى ..
اكعد الصبح اول شي اسويه اقره المسج اللي يدزلياه يوميه الصبح :
( صباح الافراح )..
عادل جان بالنسبة الي طوق النجاة اللي نجاني من الوضع اللي جنت عايشته ..
ظليت افكر سبحان الله يمكن الله رجعني للعراق حتى اتعرف على عادل واحبه وننخطب ..
قسمتي ونصيبي ..
مااتخيل يومي صرت بدونه ..
وجان يعرف وضع نضال واولادها وياي وجان يهون علي ويكولي اني وياج مااعوفج ..
شتسوي وشتقررين اني مساندج ..
الى ان اجة موعد سفري ..
لازم ارجع لاهلي لتركيا ..
افراح: حبيبي شلون هسه شسوي؟
عادل: بشنو حبي؟
افراح: يعني اني لازم اسافر اروح لاهلي ..
عادل: ودراستج؟
افراح: راح نرجع لعمان وادرس هناك ..
عادل: بس اذا رحتي ميحسبولج السنة اللي درستيها هنا بالعراق..
افراح : مو مهم المهم اخلص انت تعرف وضعي هنا بالبيت وتعرف شلون واكفيلي مثل العظم بالبلعوم على كل شي اترزل وعلى كل شي مشكلة وصياح واهانه ..
مليت تعبت من الضرب ..
مااكدر اتحملهم واتحمل زوجاتهم اللي بكل شي مدخلات نفسهن عبالك يفتهمن ..
كل انواع الخباثه واللؤم شفتها بهالبيت ..
مااحبهم مااكدر اتحملهم حس بيه الله يخليك اني مثل الكاعد  بغابة كل واحد منهم يريدني على حسب مصلحته ..
تعبت اصير مكفخه الهم ولزوجاتهم ..
حتى على النوم اتحاسب ..
مو عيشه هاي عادل مو عيشه ..

اتنهد وسكت مجاوبني ..
جنت بقمة السعادة احسب يوم يوم لرجوعي لاهلي حتى اخلص من الشياطين اللي عايشه وياهم ..
................. .................