دعاء مستجاب

11

#دعاء_مستجاب_
ل: #روز_الفياض_
ج١١
اتوفى ابوي الغالي ..
وصار البيت ظلمة ...
حياتنه اتغيرت ...
اكو فراغ جبير ...
جنت اكعد بالبالكون واصفن اتذكر من جنت زغيره شلون جان يشيلني ..
شلون جان مدللني ..
شلون شايل همي ..
جنت عنده اعز من اولاده وبناته اللي من صلبه ...
اتذكر دموعه سافرت للعراق لان كلوله ميصير تبقى ابيتك بعد صارت شابه حرام ..
انت مو ابوها ...
اتذكر شلون يبوس ايدي ويبجي ويحضني ويكلي لتخافين ارجعج ارجعج مو بكيفهم ...
انتي بنيتي وعزيزتي ..
اصفن اكول شلون مو ابوي ..
شلون مات ؟
شلون بيه عكب عينه ؟
منو الي ؟
.......................................

احساس بالضياع يتلاقفني ..
يرميني بين احضان الذكريات تارة ... وبين خوف من المستقبل تارة اخرى ..
يجعلني اتساءل حقا ... ما اليتم؟
وهل انا يتيمة؟
في سني هذا هل اعتبر يتيمه؟
لا اظن ... لكن احساس باليتم يملىء روحي .. ففراغ فراقك يؤلمني يوجعني يدمي قلبي ويؤذيني ...
ابي ..
وما للابوة معنى سواك ...
حنان وعطف ودمع وحب وقلب عظيم هذا مااراك ..
ابي ... حبيبي ... ومانطقت شفتاي هذا الكلام لشخص عداك ..
..........................................

مرت الايام والاشهر واحنه بحزن ...
امي جانت تصبرني اكثر مااني اصبرها ..
اغلب وقتي جنت اخلصه كاعده بغرفتي اقرا قران واهدي لروح ابوي ثواب القراءة ..
جنت افرح من اختم القران واهديلة الثواب ..
احس هذا اقل شي ممكن اسويه اله ...
مانسيته بدعاء ولا بصدقة ...
فراغ بروحي جبير بسبب فراقه ...
الم يعصر كلبي كلما مريت يم الكرسي اللي جان يكعد عليه ويشرب جاي العصاري هو امي ...
اووف يا بابا شكد مااوصفلك اشتاقي الك قليل ...

بهالفترة جان عادل مرات يجي هو وعمتي تجي يم امي تواسيها على اساس ...
عادل بعد بهالسنوات اتخرج وفتح عيادة وصار دكتور اسنان معروف تقريبا واغلب معارفنه واصدقائنه جانوا يرحون يعالجون اسنانهم عنده ..
من جانت عمتي تتصل بأمي تكول جايين جنت اروح لخواني  ..
مرات جنت اتصل على واحد من اخواني او خواتي واكلهم راح اجيكم ...
جنت اروح عدهم اخلص كم يوم او همه يجون يمرون علي من يعرفون عمتي وعادل جايين  ...
يعرفون كللش زين اني مااريد اشوف عادل ولا التقي بي ..
مااشتهي اسمع صوته حتى ...
وبيوم من الايام ..
جنت اقرا قران وسمعت جرس الباب ...
استمريت اقرا وشوية سمعت صوت بس مافرزنت منو  ..
اندك باب غرفتي صحت:
فوتي ماما ..
بس ماانفتح الباب الظاهر اني قافلته ...
جنت لابسه ازار الصلاة ..
كمت فتحت الباب وشفت عادل بوجهي ..
ماادري شحسيت شعور مااعرف اوصفه بس شعور مو حلو مفاجأة غير سارة جانت ..
ابتسم بوجهي بس اني ظليت متحنطه ويمكن مبين علي ضجت ..
عادل: السلام عليكم
افراح: وعليكم السلام
عادل: مصدكت من كلولي موجوده كلما اجي ماالكاج مااشوفج كله لو طالعة لو نايمة لو مدري وين ..
افراح: لعد وين اروح ..
عادل: زين كولي عالاقل اتفضل كولي الحمدلله عالسلامة ..