دعاء مستجاب

1

دائما جنت اسأل امي وابوي:
ليش سميتوني افراح ؟
جانوا يجاوبوني:
لان فرحتنه بيج جان مالها حدود متنوصف ..
ولان من دخلتي لبيتنه وصرتي بتنه حياتنه اتغيرت وشفنه كل الخير والفرح بوجودج ..
افرح من اسمعهم يعيدولي نفس الجملة كل مره واحزن لان بقية اهلي يشوفوني شؤوم ..
يالله الحمدلله على كل حال ..
الله عوضني بأب وام لو رجع بيه الزمن وجان اللي حق الاختيار .. مستحيل اختار غيرهم او ابدلهم لو بكنوز الكون ..

اخذوني امي وابوي بعدما امي رفضتني واهل ابوي مو بحالي ومو ناقصين دوخة نفر جديد بعوائلهم ..
عندي اخوان ٣ وخوات ٢ ..
وعم واحد والثاني متوفي وعندي عمه وحده ..
بعد مرور سنتين من تبني خالتي وزوجها اللي الله رزقهم بأول طفل ..
اخوي ليث اللي حاليا متزوج وعنده ٣ اطفال ..
وبعده اخوي زيد واللي عنده حاليا متزوج وعنده طفل وزوجته حامل ..
وبعده اخوي مخلد بعد مامتزوج ..
وبعدهم اجوا خواتي ٣ الله يحفظهم جنا وسما وسنا ..
حاليا كلهم متزوجات ..
ابوي اللي هو زوج خالتي جان يشتغل بمكان حساس بالدولة مسؤول جبير واله سلطة ومكانة جبيره في زمن النظام السابق ..
يعني يعتبر شخصية واصلة ..
واغلبكم تعرفون شنو يعني الانسان يكون بهيج موقع ..
يعني .. سلطة .. وفلوس .. وقوة ..
ابوي كان اب بكل ما للكلمة من معنى ويمكن اكثر ..
وامي كذلك ..
بعد مرور فترة من وجودي وياهم تم نقل ابوي من وظيفته ..  الى ملحلق بالسفارة العراقية في عمان ..
وطبعا هالشي كان بالنسبة النه تغيير للافضل ..
وانتقلنه لعمان وعشنه هناك حياة مريحة ومستقره ..
داومت هناك بالمدرسة اني واخواني وخواتي وحياتنه كانت من احسن مايكون ..
ماجان اكو اي تواصل بيني وبين امي الحقيقية او اخواني ..
اصلا ماجنت اعرفهم خصوصا اخواني ..
احبهم اكيد بس لانهم اخواني رغم ماحسيت بيوم عندي اخوان غير اخواني من خالتي ..
جنت احس بيهم ينظرولي نظرة حسد لان اني عايشة بوضع مادي ونفسي احسن منهم ..
عندي ام واب مدلليني ويحبوني يموتون علي لو طلبت لبن العصفور مراح يتأخرون ..
ربيت وبديت اكبر ويه عائلتي الجديدة امي وابوي واخواني وخواتي عشت احلى ايام واحلى طفولة واحلى سنين عمري ..
عشت حياة متأكدة لو باقيه عند اهلي اللي جابوني مراح اعيش مثلها..
طفوله حلوه وجميله وهادئة ..
طفولة مثل طفولة اي طفل طبيعي بعائلة محبه وطبيعيه ..
كبرت واني اعرف امي هي اصلا خالتي وابوي هو زوج خالتي لكن ماشكل هالموضوع فرق عندي لان همه عندي امي وابوي ماعرفت غيرهم ام واب ..

الى ان صار عمري ١٤ سنة..
وصار السقوط ..
قرروا اهلي ننتقل من عمان الى تركيا ..
انتقلنه اشترينه بيت وبدينه نأسس حياتنه هناك ..
ابوي جان متمكن ماديا وعلى كدما يحبني وشايل همي ويفكر بيه وبمستقبلي اشترى مصنع للملابس بتركيا وسجل نصه بأسمي .. حتى يضمن مستقبلي لان يعرف اني يتيمه ومحد الي غيرهم هو وامي همه اهلي اللي ربوني ..
لكن هالخطوه فتحت علي باب المشاكل ..
اهلي اللي همه اهل ابوي الحقيقي الشهيد .. من سمعوا بالموضوع فجأة صرت عزيزة عدهم ..
وظلوا يفكرون بيه وبحياتي وبالاصول والعيب والحلال والحرام ..
ماادري وين جانت غايبه عنهم كل هالمبادئ ..
قرروا انه اني لازم ارجع واعيش وياهم بين امي واخواني وعائلتي الحقيقيه ..
امي اللي عشت كل عمري احسها غريبه .. واخواني اللي مااعرفهم ولا شايفتهم من سنين وماكو يوم حنوا علي وسألوا عني لو فكروا انه عدهم اخت صغيره من واجبهم يسألون عليها ..
عائلتي اللي مااعرفها ولااعرف اي فرد منها ..
عمي منو اصلا؟ مااعرفه منو..
والعذر انه اني كبرت ميجوز ابقى ابيت رجال غريب وويه اولاده ..
وحرام بعد ابقى وياه بنفس البيت ..
بس بوقتها سؤال واحد كان شاغل بالي ..
اذا يعرفون الحلال والحرام وين جانوا من بقيت سنتين حتى اسم ماعندي؟
اذا يعرفون الحلال والحرام وين جانوا كل هالسنين المضت محد شال سماعة التليفون وكال اسأل عنها مجرد سؤال عادي ..
اذا يعرفون الحلال والحرام ليش هسه يالله حسوا اني بتهم ومحسوبه عليهم وميجوز رجال غريب يربيني وابقى ابيته ؟
وين جانوا كل هالسنين؟
وليش هسه يالله اتذكروني؟.
ليش؟
عندي.. مالها غير تفسير واحد .. الفلوس ..
هسه صار عندي فلوس .. فصرت عزيزه وطلعلي عم وطلعتي ام وطلعولي اخوان يطالبون برجوعي للعراق لبيت ابوي ..
طلع عندي بيت اب وعائلة...
كان الموضوع بالنسبة الي ولاهلي صدمه شلون اروح لناس مااعرفهم ..لان فعلا مااعرفهم ولايعرفوني الشي الوحيد اللي كان يربطني بيهم الاسم ..
شلون راح ارجع للعراق اصلا؟
ومدرستي واهلي وامي واخواني؟ شلون؟
شلون راح اكدر اتأقلم ويه ناس اغراب ومابيهم محنه ..؟
الموضوع كان فوق المستحيل بالنسبة الي ..اتخيلوا نفسكم فجأة يكلولكم راح تعيشون مع العائلة الفلانيه وانتو متعرفون افراد هالعائلة بالنسبه الكم اغراب شراح تسوون؟
شراح يصير بيكم ياترى؟
هذا اللي صار وياي ....
امي: يعني شنو ترجعلهم؟
بابا: يعني ترجع لاهلها لامها الحقيقية لاخوانها من امها وابوها ..
امي: توفيق انت تعرف شدتحجي؟بتي ماانطيها لاحد هاي بتي اني ربيت وتعبت وكبرت ياامها هاي الحقيقيه يااخوانها اللي من امها وابوها ... لعد اني وانت شنو مو امها وابوها؟
ليش ربيناها اذا يردوها بعدين؟
ليش خلونه ناخذها ونربيها اذا يردون بالنهاية يكولون بتنه وعيب وحرام؟
بابا: حسبنا الله ونعم الوكيل ..
امي: سوي شي توفيق ..سوي اي شي ..
بابا: مابيدي شي مااكدر اسوي اي شي .. بتي راح تروح من ايدي ومااكدر اسوي شي ..
امي: لا مو معقوله.. ماانطيها.. هاي بتي اني.. اني امها.. اني سميتها واني ربيتها واني سهرت وتعبت وكبرت وربيت اني .. بتي مو بت احد ثاني ..
بابا: كافي وفاء كافي اللي بيه مكفيني تره ..
جنت طفلة زغيره بعمر ١٤ سنة اشوف امي وابويه يبجون ويصيحون ومقهورين حيل ومتأذين ..
ومااعرف شبيهم ..
بعدين عرفت من امي انه لازم ارجع للعراق لامي اللي جابتني واخواني اللي محسيت بيهم بيوم اخواني ..
عرفت عمامي مسوين مشكلة جبيره وكايلين لازم ارجع وميجوز ابقى بنفس البيت ويه رجال غريب اللي هو ابوي .. بس هو ابوي شلون غريب.. معقوله تفكيرهم هيج ؟
الاب اللي يربي ويكبر ويصرف دم كلبه على ضناه هذا مو غريب هذا اب .. اب حقيقي غصبن عالكل ..
بيومها ظليت ابجي للصبح وكلت لماما :
مااروح ..
ماارجع ..
وين اعرفهم حتى اروح اكعد عدهم ...
وين جانوا قبل ميسألون عني ..
ليش هسه اتذكروني شيردون مني .. مااريدهم مااعرفهم ومااحبهم ..
امي: لج كافي شلعتي كلبي هو بكيفي ..
امي تبجي واني ابجي وابوي يبجي ...
ماكو طريقة بالعلم تكدر تقنع بيها طفل انه خلص لازم اهله يتغيرون امه وابوه يتغيرون .. اخوانه يتغيرون ..
حياته كلها تتغير ..
شلون تقنعه امه خلص بعد لازم تغير ..
شلون نغير الام ..
ماكو حل ثاني ولااكو منفذ جان لازم ارجع ..
وبعدها بأيام رجعت ..

رجعت لامي الجابتني .. مو امي الحقيقية لان الام الحقيقية هي الام اللي تربي وتحب وتسهر وتضحي ..
ولاخواني منها ومن ابوي الشهيد .. مو اخواني الحقيقيين لان الاخوان الحقيقيين اللي يحبون اختهم ويسألون عنها ...
ويعرفوها وتعرفهم مو اغراب ...
رجعت لاهل ابوي .. مو اهلي اهلي اللي ربوني وحبوني وكبروني مو اللي ماصدكوا يخلصون مني ومن مسؤوليتي وهسه من سمعوا صار عندي فلوس رادوني ..
رجعت للعراق .. بس مو لبلدي .. لان البلد يحلى بناسه واني مااعرف احد منهم ناسي واهلي لازم يبقون برا ميكدرون يرجعون للعراق ..
لازم ارجع وحدي غريبه مثل ماجنت من جابتني امي ومحد رادني .. بقيت غريبه لان شافوني نحس ..
بقيت بدون اسم ..
هذا تاريخهم عندي ..
شيردون مني بعد .. شيردون من رجعتي .. ليش اصروا على رجعتي ..
نسوا اني نحس ؟
نسوا اني شؤوم ؟
لو على كولت اهلنه ..
الفلوس تحلي العروس ..
وهنا بدا شوط جديد من حياة هالعروس ..

توقعاتكم اصدقائي شنو اللي منتظر فرح ياترى؟
للعلم القصة حقيقية ..
انتظر تعليقاتكم الحلوه 😘