Sazaye ishq. سزائے عشق Completed ✔️

Book 2 : chapter 39

" Aayat maine tumsay sawaal kiya hai , tum jawaab do...kya is tarhaan se baat kartay hain apnay shohar se!!!?...main jaanti hoon tumhaara rishta pyar mohabbat waala nahien hai , lekin tum is tarhaan se Mateen ke saath bartaao karo gi , mujhay tumse ye umeed nahien thi..." Fehmida beghum ka gussa shadeed maayoosi main badal gaya tha. Aayat se zyada unhain khud pe gussa aa raha tha. Itnay mahinon se Aayat ka Mateen ke saath bartaao dekhtay huway bhi wo khud ko kabhi ye keh kar samjhaatien ke shayad ye unki galat fehmi hai , to kabhi ye sochtien ke shaayad Aayat ke maazi ki wajaah se wo aisi hai..par aaj Aayat ko Mateen se is tarhaan baat kartay sun , unki apni zaat pachtaaway ki agg main jhonk di gayi thi.

" Chachi please..." Mateen jaanta tha ke ye sub kis taraf jaa raha hai , aur wo aisa nahien honay de sakta. Is liye wo ek baar phir Aayat aur Fehmida beghum ke beech kharaa ho gaya tha. Aur Fehmida beghum ko minnat bharay lehjay main mukhaatib kiya tha , lekin uski baat poori honay se pehlay hi Aayat ki halki lekin mazboot awaaz aayi thi.

" main ye shaadi nahi nibhaa sakti..."

Jis din se Aayat aur uska nikaah huwa tha , wo jaanta tha ke Aayat ek din us se ye alfaaz kahay gi...lekin guzartay waqt ke saath uskay apnay mazboot iraaday ne uskay is dar ko bohat peechhay chhor diya tha. Lekin aaj...aaj uska hosla , uska yaqeen , sub uskay saamnay tukray tukray ho gaye thay. Aayat ke ye alfaaz Mateen ko be hawaas kar gaye thay. Wo be hass o harkat usay dekhta raha. Lekin us sangdil ne uski taraf ek nazar dekhnay ki bhi parwaah nahien ki.

" Aayat....!!! " Fehmida beghum ko yaqeen nahien ho raha tha ke unkay saamnay khari le larki Aayat hai..jo kabhi unkay saamnay bila jhujhak baat nahien kar sakti thi. Is waqt itni bari baat itni be hissi , aur kitni aasaani se unki aankhon main aakhain daal kar keh gayi thi.

" Main aap kay Mateen ke laayak nahien hoon chaachi..jo larki khud barbaad ho chuki ho , wo kisi aur ka ghar aabaad nahie kar sakti...aur main jaantien hoon ye baat aab pehlay hi mehsoos kar chuki hain , abhi... is waqt bhi mujhay aap ki aankhon main nafrat aur gussay se zyaada, aap ka pachtaawaa nazar aa raha hai , mujhay Mateen ke liye pasand karnay ka kapachhtaawa.  is ghar ki bahoo banaanay ke faislay ka pachhtaawaa.  is liye behtar yehi rahay ga ke main is ghar se door chali jaaoon. kyunkay main ab mazeed aap sub ko takleef nahien dena chaahti..aap ne mujhay bohat pyar diya hai , lekin shaayad ye sub meray naseeb main nahien hai.  " Aayat unki aankhon main dekhtay huway khud ko mazboot zaahir kartay huway ye sub keh rahi thi.

Fehmida beghum ko ye sub kehnay ka uska koyi iraada nahien tha , lekin jis lumhay Aayat ne unki aankhon main maayoosi aur pachhtaawa dekha , is lumhay wo jaan gayi thi ke uska Mateen se shaadi ka faisla kitna galat tha. Ye jaantay huway bhi ke wo kabhi Mateen ko muaaf nahien kar sakti , uskay baawajood uska is ghar main uski mankooha ban kar rehnay ka faislay baaqi sub ke liye kitna galat tha. Aur is ahsaas ke wo khud ko ye sub kehnay se rok nahien paayi.

Lekin wo ye nahien jaanti thi ke uskay aisa kehnay se uska apna dil ruk jaanay ki had tak sust par jaaye ga. Jesay uska is ghar se door jaanay ka ahsaas........Mateen se door jaanay ka ahsaas uska dil ke liye naa qaabil e bardaasht ho.

" paanchh saal pehlay meray saath jo kuchh huwa , main wo sub nahien bhoo sakti...wo karwaa sach meri zindagi ka hissa hai...wo sub bhool ke main aagay nahien barh sakti. " ye kehtay huway usnay itni dair baad pehli baar Mateen ki taraf khaali nazron se dekhaa tha. Lekin un aankhon main tairtaa paani uski haalat ki gawaahi de raha tha. "lekin jub tak mujhay wo raat yaad rahay gi..main aagay nahien barh sakti. "

Mateen muthiyaan bhainchay uski aankhon main aankhain daal kar dekh raha tha. Wo Aayat ko saaf bataa denaa chaahta tha ke ye sub keh ke wo chaahe Usay kitni hi aziyat de , usay khud se kitna hi door karna chaahay , wo usay khud se door nahien honay dega!!!...ye jaan ke to bilkul bhi nahien ke Mateen se door jaakay wo khud ko mazeed tanhaayion ke saayon main hi kho de gi. Aur wo hargiz aisa nahien honay dega.