ﻧﻬﻠﺔ ﺻﺎﺣﺒﺘﻲ ﻣﻦ ﺗﻨﺪﻟﺘﻲ ﻓﻲ ﻭﻻﻳﺔ ﺍﻟﻨﻴﻞ ﺍﻻﺑﻴﺾ ... ﻭ ﻟﻔﺮﺣﺘﻲ ﺍﻟﺸﺪﻳﺪﺓ ﺍﻛﺘﺸﻔﺖ ﺍﻧﻬﺎ ﺳﺎﻛﻨﺔ ﻣﻌﺎﻱ ﻓﻲ ﻧﻔﺲ ﺩﺍﺧﻠﻴﺘﻲ ...
ﻧﻬﻠﺔ ﻋﻨﺪﻫﺎ ﺍﺧﻮﻫﺎ ﻣﻬﻨﺪﺱ ﻣﺘﺰﻭﺝ ﻭﺳﺎﻛﻦ ﺑﺰﻭﺟﺘﻪ ﻓﻲ ﺍﺭﻛﻮﻳﺖ ... ﻫﻲ ﺑﺮﺿﻪ ﺑﺘﻤﺸﻲ ﻟﻴﻬﻢ ﻣﺮﺍﺕ ﻓﻲ ﺍﺟﺎﺯﺓ ﻧﻬﺎﻳﺔ ﺍﻻﺳﺒﻮﻉ ... ﻗﺎﻟﺖ ﻟﻲ ( ﻫﻢ ﻗﺎﻟﻮﺍ ﻟﻲ ﺍﺟﻲ ﺍﻗﻌﺪ ﻣﻌﺎﻫﻢ ... ﻟﻜﻦ ﻫﻲ ﻛﻠﻬﺎ ﺷﻘﺔ ﺻﻐﻴﺮﺓ ﻭﻫﻢ ﻋﺮﺳﺎﻥ ﺟﺪﺍﺩ ... ﻣﺎﻓﻲ ﺩﺍﻋﻲ ﻟﺘﻘﻞ ﺍﻟﺪﻡ ... ﻛﺪﺓ ﺍﺣﺴﻦ ﻟﻲ ﻓﻲ ﺍﻟﺪﺍﺧﻠﻴﺔ ... )
ﻓﻲ ﺍﻟﺪﺍﺧﻠﻴﺔ ﺍﻧﺎ ﻧﻬﻠﺔ ﻣﺸﻴﻨﺎ ﻟﻠﻤﺸﺮﻓﺔ ﻭﺣﻨﺴﻨﺎﻫﺎ ﺣﻮﻟﺘﻨﺎ ﻓﻲ ﻏﺮﻓﺔ ﻭﺍﺣﺪﺓ ﻣﻊ ﺑﻌﺾ ... ﻃﺒﻌﺎ ﻣﻌﺎﻧﺎ ﺑﻨﺎﺕ ﺗﺎﻧﻴﺎﺕ ﻟﻜﻦ ﻣﺎ ﻛﻨﺎ ﺷﻐﺎﻟﻴﻦ ﺑﻴﻬﻢ ﻛﺘﻴﺮ ...
ﻭﻣﻦ ﺍﻟﻠﺤﻈﺔ ﺩﻳﻚ ﻧﻬﻠﺔ ﺍﺣﺘﻮﺗﻨﻲ .. ﻭﺑﻘﺖ ﻟﻲ ﺩﻋﻢ ﻭﺳﻨﺪ ﻓﻲ ﺍﻟﺪﺍﺧﻠﻴﺔ ﻭﻓﻲ ﺍﻟﺠﺎﻣﻌﺔ ... ﺑﺎﻟﺬﺍﺕ ﻓﻲ ﺍﻟﺠﺎﻣﻌﺔ ... ﻫﻲ ﻃﺒﻌﺎ ﻋﻜﺴﻲ ﺗﻤﺎﻡ .. ﺍﻟﻨﻮﻉ ﺍﻟﺸﺨﺼﻴﺘﻬﺎ ﻗﻮﻳﺔ ﻭ ﺍﺟﺘﻤﺎﻋﻴﺔ ....
ﻭ ﻫﻲ ﺟﺎﺕ ﺍﺗﻌﺮﻓﺖ ﺑﻲ ﻋﺸﺎﻥ ﺣﺮﻗﺘﻬﺎ ﺣﻘﺎﺭﺓ ﺍﻟﺒﻨﺎﺕ ﺍﻟﻔﻘﺮﻳﺎﺕ ﺩﻳﻚ ﺑﻲ ... ﻭﻗﻔﺘﻬﻢ ﻓﻲ ﺣﺪﻫﻢ .. ﺑﻘﺖ ﻃﻮﺍﻟﻲ ﺣﺎﻳﻤﺔ ﻣﻌﺎﻱ .. ﻭﻟﻤﺎ ﻧﺠﻲ ﺑﺠﻨﺒﻬﻢ ﻃﻮﺍﻟﻲ ﺗﻌﺎﻳﻦ ﻟﻴﻬﻢ ﻓﻲ ﻋﻴﻮﻧﻬﻢ ﻭ ﺗﺤﻤﺮ ﻟﻴﻬﻢ ....
ﻭﺑﺮﺿﻪ ﻋﻦ ﻃﺮﻳﻘﻬﺎ ﺍﺗﻌﺮﻓﺖ ﺑﺒﻨﺎﺕ ﺗﺎﻧﻴﺎﺕ ﻓﻲ ﺍﻟﺪﻓﻌﺔ ... ﻭﺑﻘﻰ ﻋﻨﺪﻧﺎ ﻗﺮﻭﺏ ﺯﻳﻨﺎ ﻭﺯﻱ ﻏﻴﺮﻧﺎ ... ﻭﺍﻟﺒﻨﺎﺕ ﺩﻳﻚ ﺧﻠﻮﻧﻲ ﻭ ﺷﺎﻓﻮﺍ ﻟﻴﻬﻢ ﻣﻮﺿﻮﻉ ﻏﻴﺮﻱ ....
ﺍﻧﺎ ﻃﺒﻌﺎ ﻛﻨﺖ ﻫﺎﺩﺋﺔ ﻭﻣﺴﻜﻴﻨﺔ ﻓﻲ ﺍﻟﺒﺪﺍﻳﺔ .. ﻭﺑﺴﺒﺐ ﺻﺤﺒﺘﻲ ﺑﻨﻬﻠﺔ ﺑﻘﻴﺖ ﺷﻮﻳﺔ ﻛﺪﺓ ﻣﻨﻔﺘﺤﺔ ﻭﺍﺟﺘﻤﺎﻋﻴﺔ .. ﺍﺩﺗﻨﻲ ﺷﻮﻳﺔ ﺛﻘﺔ ﻓﻲ ﻧﻔﺴﻲ ...
ﻣﻦ ﻧﺎﺣﻴﺔ ﺍﻟﺠﻜﺲ ﻧﻬﻠﺔ ﺑﺮﺿﻮﺍ ﻛﺎﻧﺖ ﻋﺎﻣﻠﺔ ﻟﻲ ﺣﻤﺎﻳﺔ ... ﻗﺎﻟﺖ ﻟﻲ ( ﺟﻜﺲ ﺍﻟﺠﺎﻣﻌﺔ ﺩﻳﻞ ﻣﺎ ﻓﻴﻬﻢ ﻓﺎﻳﺪﺓ ... ﻋﺎﻳﺰﻳﻦ ﻳﻘﻀﻮﺍ ﻭﻗﺖ ﺳﺎﻛﺖ ... ﺷﺎﻳﻔﻨﻚ ﺷﻬﺎﺩﺓ ﻋﺮﺑﻴﺔ ﻭﻃﻤﻌﺎﻧﻴﻦ ) ... ﻭﺍﻟﻠﻪ ﺍﻇﻦ ﻛﺎﻥ ﻓﻲ ﻛﻢ ﻭﻟﺪ ﻣﻌﺠﺒﻴﻦ ﺑﻲ ﻟﻜﻦ ﺧﻮﻓﺔ ﻣﻦ ﻧﻬﻠﺔ ﺳﺎﻱ ﻣﺎ ﻭﺻﻠﻮﻧﻲ ..
ﻭﺑﺎﻟﺬﺍﺕ ﻛﺎﻧﺖ ﺑﺘﺤﺬﺭﻧﻲ ﻣﻦ ﻧﻮﻉ ﺍﻻﻭﻻﺩ ﺍﻟﺒﻜﻮﻧﻮﺍ ﺍﺟﺘﻤﺎﻋﻴﻴﻦ ﻭﺑﺘﺎﻋﻴﻦ ﺿﺤﻚ ﻭ ﻫﻈﺎﺭ ﻭﻛﺪﺓ .. ﻗﺎﻟﺖ ﻟﻲ ( ﺩﻳﻞ ﺑﺎﻟﺬﺍﺕ ﺗﺒﻌﺪﻱ ﻣﻨﻬﻢ ... ﺩﻳﻞ ﻋﺎﻳﺰﻳﻦ ﻳﻠﻌﺒﻮﺍ ﺑﺒﻨﺎﺕ ﺍﻟﻨﺎﺱ ﻭ ﻳﻘﻀﻮﺍ ﺑﻴﻬﻢ ﻭﻗﺖ .. ) .. ﺍﻟﻤﻬﻢ ﺍﻧﻨﺎ ﻟﻐﺎﻳﺔ ﻣﺎ ﻭﺻﻠﻨﺎ ﺍﺧﺮ ﺳﻨﺔ ﻛﻨﺎ ﺳﻨﺎﻗﻞ ﺩﺭﺟﺔ ﺍﻭﻟﻰ ....
ﻃﺒﻌﺎ ﻋﻴﺸﺘﻲ ﻓﻲ ﺍﻟﺴﻌﻮﺩﻳﺔ ﻋﻮﺩﺗﻨﻲ ﻋﻠﻰ ﺣﺎﺟﺎﺕ ﺗﻌﺒﺘﻨﻲ ﺷﺪﻳﺪ ﻓﻲ ﺍﻟﺴﻮﺩﺍﻥ ... ﻓﻲ ﺍﻟﺴﻌﻮﺩﻳﺔ ﻭﺭﻏﻢ ﺍﻧﻨﺎ ﺯﻱ ﻣﺎ ﻗﻠﺖ ﻛﻨﺎ ﻣﻦ ﺍﻟﻄﺒﻘﺔ ﺍﻟﻤﺘﻮﺳﻄﺔ ﻟﻜﻦ ﻛﻨﺎ ﻋﺎﻳﺸﻴﻦ ﻓﻲ ﺑﻴﺌﺔ ﻣﺨﺘﻠﻔﺔ ... ﻻ ﻓﻲ ﺫﺑﺎﺑﺔ ﻻ ﻏﻴﺮﻩ ﺣﺎﻳﻢ ... ﺍﻟﻤﻮﻳﺔ ﻳﺎﻫﺎ ﻣﻮﻳﺔ ﺍﻟﺼﺤﺔ ﻭﻛﺪﺓ ...
