ﻣﻌﺮﻭﻑ ﻋﻨﻨﺎ ﻧﺤﻦ ﺍﻟﺴﻮﺩﺍﻧﻴﻴﻦ ﺍﻟﺘﺰﺍﻣﺎﺗﻨﺎ ﺍﻻﺟﺘﻤﺎﻋﻴﺔ ﻛﺘﻴﺮﺓ ... ﺍﺑﻮﻱ ﻛﺎﻥ ﺑﺼﺮﻑ ﻋﻠﻰ ﻋﻤﻲ ﺍﻟﺼﻐﻴﺮ ﻟﻐﺎﻳﺔ ﻣﺎ ﺍﺗﺨﺮﺝ ﻣﻦ ﺍﻟﺠﺎﻣﻌﺔ ﻭ ﺍﺷﺘﻐﻞ ... ﻭﺑﺮﺿﻪ ﺑﺮﺳﻞ ﻣﺼﺎﺭﻳﻒ ﺷﻬﺮﻳﺔ ﻟﻨﺎﺱ ﺑﻴﺘﻬﻢ .. ﻭﺑﺮﺿﻪ ﺑﺮﺳﻠﻮﺍ ﻣﺼﺎﺭﻳﻒ ﻟﻨﺎﺱ ﺣﺒﻮﺑﺘﻲ ﺍﻡ ﺍﻣﻲ ... ﺩﺓ ﺑﺎﻻﺿﺎﻓﺔ ﻟﺒﻘﻴﺔ ﺍﻻﻫﻞ ... ﺩﺓ ﻋﺮﺱ ... ﻭﺩﺓ ﺑﻜﺎﺀ ... ﻭﺩﺓ ﻋﻼﺝ ...
ﻭﺑﺎﻟﻨﺘﻴﺠﺔ ﺍﻧﺎ ﺩﺧﻠﺖ ﺍﻟﺜﺎﻧﻮﻱ ﻭﺧﻠﺼﺘﻪ ﻭ ﺟﻴﺖ ﻟﻠﺠﺎﻣﻌﺔ ﻭﺍﺑﻮﻱ ﻟﺴﺔ ﻣﺎ ﻋﻤﻞ ﺣﺎﺟﺎﺗﻪ ﺍﻟﺨﻄﻂ ﻟﻴﻬﺎ ﻛﻠﻬﺎ ... ﺑﻨﻰ ﻟﻴﻨﺎ ﺑﻴﺖ ﻓﻲ ﺟﺒﺮﺓ ﺣﻲ ﺍﻟﺸﺎﺭﻗﺔ ﺗﻤﺎﻩ ﻃﺎﺑﻘﻴﻦ ﻟﻜﻦ ﻟﺴﺔ ﻣﺎ ﻣﺸﻄﺐ ﻧﻬﺎﺋﻲ ...
ﺍﻧﺎ ﻃﺒﻌﺎ ﺍﻣﺘﺤﻨﺖ ﺷﻬﺎﺩﺓ ﻋﺮﺑﻴﺔ ﺍﻟﻤﻨﻬﺞ ﺍﻟﺴﻌﻮﺩﻱ .. ﻭﻃﺒﻌﺎ ﻣﻌﺮﻭﻑ ﺍﻟﺒﺤﺼﻞ ﻟﻠﺸﻬﺎﺩﺓ ﺍﻟﻌﺮﺑﻴﺔ ﺷﻨﻮ ﻟﻤﺎ ﻧﺠﻲ ﻧﻘﺪﻡ ﻟﻠﺠﺎﻣﻌﺔ ﻓﻲ ﺍﻟﺴﻮﺩﺍﻥ ... ﻧﺴﺒﺘﻨﺎ ﺑﺘﻨﺰﻝ ﻭﻣﺎ ﺑﻨﻘﺪﺭ ﻧﻨﺎﻓﺲ ....
ﻟﻤﺎ ﺟﻴﺖ ﺍﻗﺪﻡ ﻟﻠﺠﺎﻣﻌﺔ ﺍﺍﺑﻮﻱ ﻛﺎﻥ ﻣﺴﺘﻌﺪ ﻳﻘﺮﻳﻨﻲ ﻃﺐ ﺍﻭ ﺻﻴﺪﻟﺔ ﺧﺎﺹ ﺑﺎﻟﻘﺮﻭﺵ ... ﻟﻜﻦ ﺍﻧﺎ ﻃﺒﻌﺎ ﻋﺸﺎﻥ ﻋﺎﺭﻓﺔ ﺍﻟﻈﺮﻭﻑ ﺭﻓﻀﺖ .... ﻗﻠﺖ ﺑﺪﺧﻞ ﺣﻜﻮﻣﻲ ﺍﻱ ﻛﻠﻴﺔ ﺗﺪﺧﻠﻨﻲ ﻟﻴﻬﺎ ﻧﺴﺒﺘﻲ ... ﻭ ﺍﺻﻼ ﺍﻟﻄﺐ ﻭ ﺍﻟﺼﻴﺪﻟﺔ ﻣﺎ ﺭﻏﺒﺘﻲ ﺷﺪﻳﺪ ... ﻗﺪﻣﺖ ﺩﺑﻠﻮﻡ ﻣﻌﻤﺎﺭ ﺟﺎﻣﻌﺔ ﺍﻟﺴﻮﺩﺍﻥ ... ﺍﺻﻼ ﺑﺤﺐ ﺍﻟﻔﻨﻮﻥ ﻭ ﺍﻟﺘﺼﻤﻴﻢ ﻭﻛﺪﺓ ... ﻭ ﺍﻟﺤﻤﺪﻟﻠﻪ ﺷﺎﻟﻮﻧﻲ ﻣﻦ ﻏﻴﺮ ﺭﺳﻮﻡ ...
ﻭﺟﺎﺕ ﻣﺸﻜﻠﺔ ﺍﻧﻲ ﺡ ﺍﻗﻌﺪ ﻭﻳﻦ؟؟؟ .. ﻭﻣﻊ ﻣﻨﻮ ؟؟؟ ... ﺧﺎﺻﺔ ﺯﻱ ﻣﺎ ﻗﻠﺖ ﺍﻧﻲ ﻣﺎ ﻣﺘﻌﻮﺩﺓ ﻋﻠﻰ ﺍﻟﺴﻮﺩﺍﻥ ﺷﺪﻳﺪ .. ﻳﺎﻫﺎ ﺍﻻﺟﺎﺯﺍﺕ ﺍﻟﻜﻨﺖ ﺑﺠﻲ ﻓﻴﻬﺎ ﻣﻊ ﻧﺎﺱ ﺍﻣﻲ ...
ﻓﻲ ﺍﻻﺟﺎﺯﺍﺕ ﻛﻨﺎ ﺑﻨﻘﻌﺪ ﻓﻲ ﺑﻴﺖ ﻧﺎﺱ ﺣﺒﻮﺑﺘﻲ ﺍﻡ ﺍﻣﻲ ..... ﺣﺒﻮﺑﺘﻲ ﻣﺎ ﻛﺒﻴﺮﺓ ﺷﺪﻳﺪ .. ﻭﻗﺎﺭﻳﺔ ﻟﻐﺎﻳﺔ ﺍﻟﺜﺎﻧﻮﻱ ﺍﻟﻌﺎﻟﻲ ... ﻧﺤﻦ ﺑﻨﺎﺩﻳﻬﺎ ﻣﺎﻣﺎ ﺳﻌﺎﺩ ...... ﺟﺪﻱ ﺍﺑﻮ ﺍﻣﻲ ﻣﺘﻮﻓﻲ ... ﻭﻣﺎﻣﺎ ﺳﻌﺎﺩ ﻗﺎﻋﺪﺓ ﻓﻲ ﺑﻴﺘﻬﺎ ﻓﻲ ﺍﻟﺤﺎﺝ ﻳﻮﺳﻒ ...
ﺍﻟﺒﻴﺖ ﻣﺎ ﺷﺎﺀ ﺍﻟﻠﻪ ﻛﺒﻴﺮ ... ﻣﺴﺎﺣﺔ ﻗﻄﻌﺘﻴﻦ ... ﻗﺎﻋﺪﺓ ﻓﻴﻪ ﻣﻌﺎﻫﺎ ﺍﺻﻐﺮ ﺧﺎﻻﺗﻲ ﺍﺳﻤﻬﺎ ﺍﻳﻤﺎﻥ ... ﻣﺘﺰﻭﺟﺔ ﻭﻋﻨﺪﻫﺎ ﻃﻔﻠﻴﻦ ﺻﻐﺎﺭ ... ﻭﺑﺮﺿﻪ ﺳﺎﻛﻦ ﻣﻌﺎﻫﺎ ﺧﺎﻟﻲ ﺍﺳﻤﻪ ﻋﺼﻤﺖ ﺷﻐﺎﻝ ﻟﻜﻦ ﻣﺎ ﻣﺘﺰﻭﺝ ... ﺧﺎﻟﻲ ﻋﺼﻤﺖ ﻫﻮ ﺍﺻﻐﺮ ﺧﻴﻼﻧﻲ ... ﺍﻛﺒﺮ ﻣﻨﻲ ﺑﻌﺸﺮﺓ ﺳﻨﻮﺍﺕ ﺗﻘﺮﻳﺒﺎ .... ﻭ ﺷﻐﺎﻝ ﻛﻮﻳﺲ ﻓﻲ ﻭﺍﺣﺪﺓ ﻣﻦ ﺷﺮﻛﺎﺕ ﺍﻻﺗﺼﺎﻻﺕ ... ﻋﻨﺪﻱ ﺧﺎﻟﺘﻲ ﺗﺎﻧﻲ ﺍﻛﺒﺮ ﻣﻦ ﺧﺎﻟﺘﻲ ﺍﻳﻤﺎﻥ ﻣﺘﺰﻭﺟﺔ ﻭﺳﺎﻛﻨﺔ ﺑﺎﻭﻻﺩﻫﺎ ﺑﺮﺿﻪ ﻓﻲ ﺍﻟﺤﺎﺝ ﻳﻮﺳﻒ ﻗﺮﻳﺒﺔ ﻟﻨﺎﺱ ﻣﺎﻣﺎ ﺳﻌﺎﺩ .. ﺍﺳﻤﻬﺎ ﺍﻧﺘﺼﺎﺭ
ﺍﻫﻞ ﺍﺑﻮﻱ ﻛﻠﻬﻢ ﻓﻲ ﺍﻟﻬﻼﻟﻴﺔ ﻓﻲ ﺍﻟﺠﺰﻳﺮﺓ ... ﻋﻨﺪﻱ ﻋﻤﻲ ﻭﺍﺣﺪ ﺍﺳﻤﻪ ﻣﺎﻣﻮﻥ ﺳﺎﻛﻦ ﻓﻲ ﺍﻟﺨﺮﻃﻮﻡ .. ﻟﻜﻦ ﺑﺮﺿﻪ ﺑﻌﻴﺪ ﻓﻲ ﺍﻣﺪﺭﻣﺎﻥ .. ﻭ ﺯﻭﺟﺘﻪ ﻏﺮﻳﺒﺔ ﻣﺎ ﻣﻦ ﺍﻫﻠﻨﺎ ﻭﻣﺎ ﺩﺍﺧﻠﺔ ﻓﻲ ﺍﻟﻨﺎﺱ ﺷﺪﻳﺪ ....
الجزء 01
Start from the beginning
