بلاسنتا || الإصدار القديم

Chapter 3

روحت جلنار للحوش و دخلت دارها و سكرت الباب و غيرت ملابسها و تسطحت بس مجاهش نوم وهي تفكر في كلام قيس

عقلها قعد مليان بالضجيج , قعدت اتقلب يمين و يسار و هي تنفخ بفمها و متضايقه , فتحت شنطتها اللي كانت حاطتها جنب السرير

و خذت منها السماعات و فتحت موبايلها و حطت اغنية Bad things - Camila Cebello كانت من الاغاني المفضله عندها اللي لما تحس بمشاعر ملخبطه تهدا لما تسمعها , و غمضت عيونها و بدا جسمها يرتخي مع لحن الاغنية الهادئ

عند رائد ..

خش رائد للحوش وهو مستعجل بعد شاف سيارة جلنار مدرسه برا في الحديقة و سكر خط المكالمه اللي كان يحكي فيها و ركب الدروج و من الدروج لغرفة جلنار , خبط خبط بس مفش رد , رد خبط من جديد بس مجش رد و بالرغم من انه كان متأكد انها قاعده في دارها , فتح الباب بالشويه و خش و هو يبحت يمين و يسار عشان يتأكد اذا كانت قاعده او لا و بعدين شاف حاجه متغطيه ع السرير و لان الدار كانت مظلمة فمقدرش يشوف كويس , قرب من السرير وهو يبحت شوي لقاها مغمضه عيونها و مرتخيه و راقده و هي لابسه السماعات , انحنى بظهره عشان يقعد وجه مقابل لوجهها وهو يبحت فيها و يبي ينوظها بس وجهها وهي راقده كان يشبه البيبي الصغير لما يرقد , بشرتها الناعمة و رموشها و شعرها اللي كان منسدل علي وجهها و رقبتها و جز منه مغطي كتفها

رفع السماعات و مش هاين عليه اينوضها , بس مجرد ما رفع السماعات هي ناضت تلقائي و تقابلت عيونه مع عيونها العسليات اللي كيف صاحيات من النوم

وقعد كل واحد فيهم يبحت في اللاخر مصدوم , لعند ما تحرك رائد و وقف يبحت فيها مرتبك و منحرج " احم , انتي كنتي مسكره موبايلك ؟ "

سحبت جلنار نفسها وهي تحاول تقعمز و ردت عليه بصوتها الناعم " اه كانت حاطته علي وضع الطيران , في حاجه ؟ "

رائد : لا بس هلك اتصلو بيا وقالولي انهم حاولو يتصلو بيكي بس موبايلك مسكر و انشغلو عليك , في البدايه قلتلهم يمكن انك في غرفة العمليات و لا حاجه بس بعد وصلت لقيت سيارتك مدرسه برا , و عموما شكلهم متفقين مع هلي انهم يديرولنا زيارة اليوم ف حاولت انصحيك عشان نعطيك خبر انهم جايين بعد ساعتين , يادو تلحقي عشان توتي روحك

ناضت جلنار من ع السرير و هي تحرك في شعرها و تحط في ورا وذنها " تمام , حنجهز نفسي"

بحت فيها رائد و واضح عليه الخجل و الارتباك بالرغم من ان مقدرش يشيل عيونه من عليها " تمام , انا حنطلع عشان تجهزي نفسك و حنعدي انجيب كم حاجه من السوق عشان نستقبلوهم بيها "

هزت جلنار راسها , و طلع رائد من الدار بسرعه وهو يحس بشعور غريب , و طول الطريق مقدرش يمسح من راسه صوت جلنار الناعم وهي كيف نايضه من النوم و وجها اللي كان يشبه البيبي وهي راقده

عند جلنار ..

فتحت الدولاب و هي تشوف الملابس و شن تختار عشان تلبس , و بدت تجهز في نفسها وهي مش طايقه تشوفهم و مزاجها اللي مكانش رايق ... وبعد جهزت نفسها فجأه وهي تمشط في شعرها بدت يدها لمين ترعش من جديد بدون سبب

كانت جلنار مصدومة وهي تبحت في يدها اللي كانت تهز بشكل غريب و مسكتها بيدها ليسار عشان تخفف الاهتزاز بس مفش فايده

دق رائد الباب " جلنار كملتي ؟ هلي قريب يوصلو "

بحتت جلنار بتجاه الباب و هي تحس بدوخه و بدا نظرها يشوش و فجأة سمع رائد صوت حاجه ثقيله طاحت في الدار فخش بسرعه

و لما خش لقى جلنار طايحه ع الوطى و اتنفس بصعوبة " جلنار !!! جلنار !!! " حاول رائد يناديها وهو ماسك كتفها و يحاول يخليها تقعمز

قعمزت جلنار وهي داخيه تحاول تمسك نفسها " انا كويسه "

رائد : مفهمتش كيف كويسه وانتي طايحه ع الارض ؟ انتي مريضه ولا حاجه ؟

جلنار : لا شكله عندي هبوط

بحت فيها رائد وهو مش مقتنع بالكلام و طلع من جيبة الضي متاع الليزر و فحصلها بيه عيونها و لسانها

رائد : حاسه كبدك زاعمة ؟ ( غثيان )

هزت جلنار راسها بـ ( لا )

رائد : مش هبوط لان معندكش جفاف , و معندكش غثيان بالتالي اكيد السبب حاجة اخرى

حاولت جلنار توقف علي رجليها وهي تقول ببرود " مش مهم "

عدلت جلنار شعرها و نزلت من الدروج و لحقها رائد

بعد شويه وصلو هل رائد و وراهم هل جلنار و كانت اللمه العائليه فيها اجواء من التوتر و الاضطرابات بسبب برود جلنار معاهم

كانت امال والدة رائد تحاول تتقرب من جلنار عشان تعرف اخبارها مع رائد بينما رائد و جلنار كان وضعهم طبيعي بحيث انهم حاولو يبانو كأي متزوجين و يتعاملو مع بعضهم عادي

بحتت فيها امال و هي حاطه رجل علي رجل و تشرب في فنجان القهوة " اي ؟ قوليلي .. شن الاخبار بينكم ؟ "

كانت امال ام رائد يبان عليه التكبر و الغرور فبالنسبة لجلنار مكانت مرتاحتلها ابداً حتى بالرغم من انهم من نفس الطبقة الاجتماعية

انسندت جلنار بظهرها وهي مقعمزة ع الصالون ببرود " يعني مثلا انتي توا جايه تسئلي فيا ؟ كان لازم تسئليني السؤال هضا قبل ما تجبروني عليه مش توا بعد اللي صار صار , قصدي انتم اللي تبوه صار ومعتقدش ان مهم واجد توا في انكم تعرفو شن يصير بينا بس اطمني في كلتى الاحوال حياتي حلوه مازلت زي ما هي "

ضحكت امال ضحكة استهزاء خفيفة مصدومة ن رد جلنار " صدق اللي قال ان اللي يجي بلا ام يقعد بدون تربية , لولا نسب عيلتك ماكنتش حناخذك لولدي , يكفي بس نسب عيلتنا و غير ان هو دكتور و وسيم و عنده فلوس ماشاء الله الف من تتمناه "

ابتسمت جلنار ابتسامة خفيفة بدون ما ترد عليها

بعد كمل الاجتماع العائلي و روحو كلهم لحوشهم قعمز رائد ع الصالون اللي مقابل جلنار

رائد : شن صار معاك ؟

جلنار : ولا شي

ارتبك شويه رائد وهو يبحت في جلنار " امي ضايقاتك في الكلام ؟ "

ابتسمت جلنار ابتسامة خفيفة اتدل علي الحزن و قالت " لو تبي الحق يمكن انا ضايقتها الاول "

و وقفت جلنار و كانت حتركب لغرفتها بس جاها اتصال من عادل

عادل : دكتورة في عندنا حالة غريبة

جلنار : شنو نوعها ؟ عطيني التشخيص

عادل : الحالة عمرها 35 في الشهر الثامن و عندها ضعف في الاعضاء الحيوية و واضح ان جسمها فاقد الاتزان , تورم في الحلق و عندها نوبات الارتعاش وفقدان الوعي بس النوبات مش نوبات صرع و عندها نوبة من عدم الاستجابة و عندها تأثر في القدرات الحسية من بينهن تخدرفي الاعضاء وعدم القدرة على الكلام أو تلعثم النطق و الحدقه متاع العين ضيقه و عندها مشاكل في الرؤيه و السمع

خذت جلنار وضعية التفكير وهي تقول " لحظة ! تأثر الوضائف الحسية و الشلل هضا تقريبا مرتبط بالاعصاب "

عادل : انحولها علي طبيب اعصاب ؟

جلنار : لحظة خليك ع الخط شوية

التفتت جلنار علي رائد وهي تقول " ضعف في الاعضاء الحيوية وفقدان الاتزان , تورم في الحلق و نوبات الارتعاش وفقدان الوعي بس مش نوبات صرع و نوبة من عدم الاستجابة و عندها تأثر في القدرات الحسية من بينهن تخدرفي الاعضاء وعدم القدرة على الكلام أو تلعثم النطق و الحدقه متاع العين ضيقه و عندها مشاكل في الرؤيه و السمع , شن رايك ف الاعراض ؟ برايك لهن علاقه بالاعصاب ؟ "

رائد : اكيد , هذينا اعراض مرض الاضطراب العصبي الوضيفي

جلنار : و الحل ؟ انحولوها علي طبيب اعصاب ؟ علي حسب ما فهمت ان هي في الشهر الثامن

رائد : اول شي لازم اديرولها اختبار دم و تقيسو نسبه لبروتين أخد عينه من السائل الامنيوسي ( السائل المحيط بالجنين ) و اختبار الأشعة الفوق صوتية

جلنار : ماشي وهل برأيك حيتطلب الوضع جراحة ؟

رائد : في الحالات هذينا الجراحة لازمة

جلنار : معناها في الحالة هذي الوضع حيسبب خطورة ع الام و الجنين

رائد : بس في الحالة هذي العملية الجراحية ضروري منها

جلنار : الحامل قبل الولادة لو تعرضت للبنج الجنين حيموت هضا غير الادوية الكيماوية و الحيوية اللي حتنعطالها ما بعد العملية , مستحيل

رائد : بس برضو حتعرضي المريضه للخطر لو مخششتيهش ع العملية

قعدت جلنار ماشية جاية وهي تفكر .. و بعدين رفعت الموبايل علي وذنها " عادل جهزلي غرفة العمليات حنديرو للمريضه ولاده قيصرية , شوية و حنكون عندك "

عادل : تمام

رائد : حتطلعي توا في نص الليل ؟ بس الوقت تأخر !

جلنار : تقريبا قلنا ان محدش حيتدخل في شغل الثاني

نهاية الفصل ———————————————-

اسفه ع التأخير لان في كم حاجه صارت عطلتني و اسفه لو في اخطاء املائية لاني مقدرتش انراجعه كويس لاني كنت مستعجله