استقرت اوضاعنا صحيح واجهنا صعوبات وبهذله بالبدايه خصوصا مابين سنة 1993 وسنة 1994 بسبب الحصار الاقتصادي الشباب بعد ميجي للملهى شي قليل الي يجي بس التاجر ورجل الاعمال والمتريش وبصوره قليله بس شمعون ابن كار ويعرف شلون يدبر الامور ....
بداية عام 1995 تحسنت الاوضاع والدوله دعمت الفلاحين وصاروا بفلوسهم يجون للملاهي كنت شاطره بشغلي والفلاح محروم وما شايف نسوان حلوه مرتبه استغليت الوضع والفلاح مبين خليتهم يذبون ملايين ع الميز كل واحد يجي افرغ جيبه واطلعه ....
وبدون ما اهتم كل همي اخذ فلوسه زواجي من شمعون عزز ثقتي بنفسي ازوجته بديانتي المسيحيه الي هو سواها الي قبل منسافر للاردن ....
بس ما انتقلت اعيش وياه لان ما اكدر اعوف قرطاجه وفريده ووحدهم
بقيت اتردد عليه يوميه بالليل ومن اخلص ارجع ع البيت ....
ومره كنت ع المسرح اركص وكانت اغنية ام كلثوم زي الليله بصوت المطرب قاسم السلطان واني اركص عليها ....
شفت فريده يركض هو وقرطاجه على مكتب شمعون ....اشرت على زكريا حتى اختم الرقصه ...خلصت بسرعه ورحت ركض وراهم لكيت صوت عالي بمكتب شمعون ويحجون بس ما نفتهم شي منهم .....
وصار حتى ضرب وبوكسات اني كنت خايفه على شمعون ...واني والموظفين منكدر ندخل لان شمعون ما دك الجرس .....
لحظات صعبه ومريره من طلعوا انتبهت على شكولهم تخوف ومبين اعضاء عصابه شفنه المكتب متفوش وشمعون مكسور خشمه والدم على ملابسه ....
دخلت عليه وكان عصبي بس ميحجي حضنته ومسحت الدم من وجهه
كلي خلي زكريا يطلع الزبائن ويغلق الملهى ...وفعلا سوينه مثل طلب ورحت وياه ع البيت ....
وصلنا كان تعبان وينزف دخل للحمام واني وراه حاولت اخفف عنه بس صعب وغامض كلي نشوك انتي كولشي متعرفين عني صحيح ازوجنه بس متعرفين شي عني ....اني راح اسجل الملهى بأسمج وانتي بيعي واخذي فلوسه الج ضمان واني الاسبوع الجاي اسافر واحتمال اتاخر راح انطيج رقم تلفون تخابريني عليه كلما تحتاجيني وان شاء الله متحتاجيني وما اتاخر ....حاولت اسأل شنو السبب كلي بعدين تعرفين كولشي .....
وراح اخلي زكريا هو يجيبلج زباين وترحين للبيوت احسن ....
عدت الايام بسرعه وسافر شمعون واني مثل الثوله لا كدرت اروح وياه ولا كدرت اتحمل فراقه ...من سافر اني تعبت وبجيت هواي ما اتحملت بعده عني ....حتى للشغل ما طلعت لان نفسيتي تعبت ....
بس وره عشرين يوم اني تخربطت حيل ورحت للطبيب ...اخذتني قرطاجه حجزنه يم دكتور باطنيه ....كشف عليه وسوالي تحاليل من شاف تحاليلي كلي انتي حامل وراح احولج على دكتوره نسائيه ...
حولني على دكتوره ...طلعت من يمه اني ممصدكه حامل بس شلون بشغلي اعوفه لو اترك ما ادري .....
رجعت ع البيت قرطاجه كالت ذبي هذا الطفل شسوين بي ابقي وحيده ترتاحين لاهم ولا مشاكل ولا هم يحزنون ....
بس اني كنت متردده شلون اخلص منه لو ابقي ...كوتلها نروح ع الطبيبه ونسمع حجيها واذا اكدر اتخلص منه بعد احسن قبل ميجي شمعون ....
ثاني يوم رحت ع الطبيبه وسولفت وياها كالت ماما حرام وبعدين انتي عندج اجهاض قديم ورحمج متعرض لتشوه اثناء الاجهاض يعني اذا تخلصتي من الطفل بعد ميصير عندج لتضيعين هاي الفرصه ....
رجعت واني مقرره احتفظ بالطفل وكعدت بالبيت لا طلعه ولا طبه ما اريد اخسر هاي الفرصه ....
بعد شهرين قررت اتصل على شمعون رحت على دائرة البريد واتصل انطيت الرقم للموظف كلي هذا الرقم الماني ....اتصل وكلي هاج انفتح الخط ...
طلعت بنيه تحجي اجنبي كولشي مفتهمت منها ...غلقت التلفون بوجهي ....رجعت ع البيت وسولفت سالفتي يم قرطاجه وفريده
كالولي يمكن شمعون فلت انهزم انسي حيري بوضعج وبالحمل ...
بقيت كل فتره اتردد على دائرة الاتصالات اتصل ...
وكل مره نفس المره الاولى ينغلق الخط بوجهي ....
اجت ناس تشتري الملهى بعته واخذت الفلوس خليتهم عندي والشغل عفته خليت قرطاجه تطلع بمكاني ...
تعبت وتمرضت خصوصا من كبرت بطني وصرت مثل الطوبه حملي كان صعب ومرهق ومزعج وكل اسبوع اني يم الدكتور ...مرات اتندم اكول ليش تخلصت منه ومرات اكول لا يمكن الطفل يفيدني باجر عكبه....
قرطاجه تروح للشغل بالبيوت تركص وتجي تعبانه وتنام واني فريده ساعه نكعد ع التلفزيون وساعه ناكل مرت تسع شهور وتعبت حيل وتعقدت تخربط وضعي والدكتوره دخلتني مستشفى وكالت احتمال تموتين ....لازم عمليه بسرعه لان الطفل وانتي اثنينكم تعبانين ....
وصيت قرطاجه كتلها اذا متت خلي الطفل عندج وربي اذا رجع شمعون انطيهياه واذا ما رجع ربي خلي عندج تربي....
دخلت صالة العمليات وكنت مأيسه اعيش ....بس الله كان كاتبلي خبزه بعد سويت العمليه وطلعنه سلامات خلوني بالافاقه ساعه كامله من رجعت الواعيتي ....شفت قرطاجه على راسي ضحكت وكالت جبتي بنيه تخبل مثل القمر تشبهج اني ما صدكت كتلها جيبيها اشوفها
من شفتها كانت تخبل عيونها حلوه ملونه ازرك وسمينه حضنتها قرطاجه كالت سميها كتلها اسمها ماري على اسم ام شمعون
وهنا كانت بداية النهايه .........
الفرحه بولادة بنتي مانستني شمعون وأيامه بديت اشتاقله وانهار ساعات ابجي وساعات انسه واضحك ومرات من اسمع الباب تندك اكول هو شمعون اركض ع الباب مثل الخبله....
الشوق والوحشه كتلني مشتاقتله بس ما بيدي حيله
اروح اتصل على رقم التلفون ماكو جواب العصبيه الهستيريا التوتر كلهن انجمعن عليه.......حتى هملت نفسي وبنتي ....وعفت شغلي وحياتي.....
قرطاجه خطيه انتبهت عليه بس خطيه متكدر تحجي وياي خايفه لا انهار وفريدة خامل وميسولف أخذتني الأيام بدوامتها وهوستها......
عدت اربع شهور ونص بنتي شويه كبرت فطمتها من صدري وحولتها على حليب القواطي....وبديت ارتب نفسي وحالي خصوصا زكريا كل يوم يتصل شوكت ترجعين للشغل الزبائن تسأل عنج....
زكريا دبرلي موعد ويه واحد مسؤول قياده قطريه ما صار هواي من مترفع ومسوي حفله رحت كملت الحفله عادي ورجعت .....
مرت الأيام وحفلات ورقص وسهر وسكر وشرب و شمعون طول غيبته عليه ....
كلما اذكر اسمه كدام قرطاجه ادكولي عوفي انسي هذا عافج وراح انطاج الملهى مقابل خدماتج لان انتي بالنسبة اله صندوق الكنز ......من شبع انهزم ....
عقلي وكلبي كانوا رافضين كلامها....كلما اتصل بزكريا اساله يكولي ماكو خبر منه.....
يوميه صرت اطلع خصوصا من كبرت بنتي وصار عمرها سنتين تعودت على فريده وقرطاجه كلما يخابرني زبون اطلع
ومره حوالي الساعه بالتسعه خابرني زكريا على زبون كالعاده خابرت كمال وطلبت منه يجي يوصلني ع العنوان
وصلني كملت السهره ورجعت لكيت كمال يبجي ومخلي رأسه بين رجليه ويبجي......
كعدت يمه وسألته شبيك كمال منو وياك ليش تبجي سولفلي اني مو اختك..
جاوبني والغصه بحلكه أبو البيت يريد يطلعني واني على كد حالي مرتي جبيره بالعمر وبناتي اثنين حاير بخبزتهن واني عزة نفسي تمنعني اطلب بس العوز يفشل نشوك
لطمت على خدي....كتله ما عاش اليبجيك وانعل أبو العوز والفكر الانقيادي هاك هاي فلوس ....
طلعت من جنطتي فلوس من غير ما احسبهم...كتله أخذ مسواك للبيت...وباجر تجيني الصبح ضروري....
نزل على رجلي يبوسها ما خليته وكومته وصلني ع البيت
ثاني يوم اخذت فلوس و طلعنا اني وهو ندور على بيت هو رفض كتله شوف كمال اني ما منطيتك البيت حتى أتفاخر بس اريد اسوي زين بحياتي مره وحده ع الاقل...
اشتريتله بيت قريب على بيتي ...وزودت راتبه....
الأيام بالنسبه الي مره وقاسية بس من اشوف بنتي اصبر واكابر....
الليل كله اطلع وارجع الفجر واغلب النهار لونايمه لو صالون لو سوك....
كلما يخابر زكريا على واحد لازم اروح وارضي الجماعه ومره رحت على ناس حزبيين كبار كالعاده رحت بس قرطاجه كالت لتروحين كلبي مقبوض اني ضحكت وكتلها شيصير
يصير لتخافين ما اموت ....
وصلت كانت شقه بشارع حيفا كبيره وحلوه لكيت اثنين كاعدين يشربون .....
واحد منهم شغل موسيقى واني بديت اركص حوالي ساعه كامله .....خلصت صاحني واحد وكلي تعاي صبيلي بيك
اني فتحت البطل وبديت اصب بالكلاص ....كعدوا يسولفون يكولون هي هاي الحفلات وقبل حفلات ايام فلان وفلان كعد يعدد أسماء ووصل لاسم نزوكه وابراهيم جلاوي وكع البطل من ايدي ورجفت وخفت همه انتبهوا عليه كالولي شبيج تخربط الكلام بحلكي لا بيه اكوم ولا بيه اكعد.....
ذوله يعرفون ابويه بس لايعرفوني حاولت اسيطر على نفسي مكدرت......
هملوني وكملوا سوالفهم وكالوا الله يرحمه كله سبب بنته نهبت وشردت ويه عشيقها الرجال متحمل انجلط ومات
هنا اني فقدت وماعت روحي....
ما حسيت إلا اني بالبيت على جربايتي من فزيت لكيت قرطاجه وكمال وفريدة على راسي طفرت ارجف وهمه يهدأون بيه....
سألتني قرطاجه شبيج.شصار وكعتي وجابج كمال للبيت
كتلها بعد ما اطلع ولج ذوله يعرفون ابويه ويعرفوني يكولون خطيه ابراهيمم جلاوي انجلط بسبب بنته بعد ما اروح بس احجي وابجي والهث وكلهم يحاولون يسكتوني.....
وللحكايه.بقيه......ليلان العطواني
البارت ٣٤ و ٣٥
Start from the beginning
