آنين الليل الاحمر.........💞💞💞
الفصل الثاني......25........
الشكر لله ........ليلان العطواني
من خلصت النمره مالتي رحت على مكتب شمعون بس كنت خايفه لايطردني لان سمعت عنه ميتفاهم وصعب وينتبه على كولشي ومستحيل تفوت عليه فتفوته زغيره ....وصلت للمكتب دگيت الباب لگيت واحد گاعد يمه شكله مو غريب عليه گلي اگعدي هسه نخلص دقايق ....
گعدت ع الكرسي وإني أراقب بهذا وين شايفته عين وعين من غير ميحس عليه ولا ينتبهون راقبته بكل تصرفاته احاول اذكر وين شايفته ما اعرف طار من عقلي ...سلم على شمعون وطلع وإني ولا تذكرته .....
أتوجه عليه شمعون وگلي ...اني ما احب الف وادور اني كنت مراقبج من مده وعرفتچ انسانه مخلصه بعملج وتحبين تعيشين لذلك رشحتج تكونين مقربه مني يعني مثل السكرتيره الي خاصه ادزج مشاوير ووياج غراض توصليهم شتگولين ....
بالبدايه ارتبكت بس هو گلي لتخافين راح يزود راتبج يعني باليوم الي ما ادزج بكيفج تاخذين اجورج سواء رگصتي او. لا
وما اريد اي واحد يعرف بهذا الموضوع غير بس اني وانتي خوش حچي .......
طلبت منه فرصه افكر والصراحة مو تفكير هو وانما اروح اسأل قرطاجه هي اكبر مني وافهم وعدها علاقات ويه ناس حتى بالأمن يعني تعرف كولشي .....
طلعت ووصلني السايق للبيت هو كان شاب زغير يعني يطلع اكبر مني بسنه سنتين كانوا يسموه كمال .....
وصلني ع البيت لگيت نزوكه راجعه من الكويت سلمت عليها وگعدت يمها شويه ورحت على غرفتي يم قرطاجه ...
سولفتلها السالفه كلها حرف حرف ....
هي استغربت وگالت شيريد منچ هذا وشنو سكرتيره خاص يعني لو يريد ينام وياچ يطلب منج وياخذ الي يريده اكو شي ما مفهوم بهاي السالفه ...وشنو هاي المشاوير ....شوفي نشوگ باچر تسألي شنو نوع الشغل خل يوضحلج السالفه تره ذوله لا ذمه ولا ضمير وخاف توگعين بمصيبه ....
ثاني يوم ماكان عندي شغل بقيت بالبيت گاعده ....كالعاده البنات حضرن الصاله والمشروب وسبحن وبدلن واجت توحه زوگتهن وعدلتهن .....ونزلن يرگصن ..
وإني گاعده أراقب سمعت الباب الخلفيه اندگت ماكانت نزوكه تسمح لاي واحد يفتح هاي الباب غيرها بس بذاك اليوم گالت روحي نشوگ افتحي الباب ...
فتحت الباب وانصدمت شفت نفس الرجال الي لگيته بمكتب شمعون گاعد بس هالمره لابس زي عربي عبايه ودشداشه ..
دخل هو واثنين وياه ....قدمنالهم المشروب والأكل ورحت گعدت بالغرفه منتظره قرطاجه تخلص رگص وتجي.....
بقيت افتر بالغرفه وكل شويه اطلع أراقب هذا الرجال واشوفه ....الحد ما أخذته وحده من البنات ودخلت بي الغرفه .....
من غير انتباه اجتني قرطاجه وهي تعبانه وتلهث من الرگص گالت هااا ولج اباوعلچ من بعيد اشوفج مو على بعضج شبيج نشوگ....
جريتها للغرفه وسديت الباب سألتها منو هذا الي دخل من الباب الخلفيه وگعد ع الطاوله وغنتله نزوكه ....هي مفتهمت بس من گتلها هذا الي راح ويه فوزيه للغرفه.....
هنا هي عرفته ...گالت هذا اسمه سلوم ابو شوارب من اكبر تجار العراق بالمواد الغذائيه ....كان يجينا قبل بس انقطع فتره وهو من اصدقاء الحكومه ......والرفاق وحتى نزوكه كانت من يجي هو وصديقه تفرغ البيت علمودهم وتخلي كل البنات تحت تصرفه ....بس من مات صديقه انقطع كل هاي السنين ....أخذني الفضول اكثر وسألتها منو صديقه الي مات
گالت واحد تاجر چبير وزنگين ماليه حمره چان يجي دائما لهنا ومياخذ من البنات غير بس نزوكه يموت عليها ومن چان يسافر هي تروح وياه ويدللها دلال حتى من يجيها هنا تودينا غير مكان ومتخلي يمها غير بس فريده علمود يخدمها ....
اي ولج كملي شسمه صديقه .....
گالت صديقه اسمه ابراهيم جلاوي ......وهسه مات ....
هنا لطمت على خدي منووووووووو عيدي الاسم وانتي متأكدة.....
قرطاجه حلفت وگالت شايفته ومسلمه عليه وچان داىما ينطين فلوس لو قطعه ذهب ....
گعدت الطم وادك على روحي ما ادري اصدگ لو اجذب الخبر معقوله أبويه بسوي هشكل لا لا مستحيل اصدگ ....
قرطاجه استغربت وگالت شبيچ نشوگ انتي تعرفي هذا الرجال .....من ذكرت اسمه وانتي تغير لونج شكو شبيچ......
اي ولج اعرفه ابراهيم جلاوي يصير أبويه .....
يااااا صدوك.....
اي ولچ والمصيبه مو هنا المصيبه نزوكه تعرف اني بت منو وتدري أبويه ابراهيم جلاوي لهذا هي مهتمه بيه ....
منو يگول نشوگ يجوز متعرف ...خل نسأل سميره ...ونتأكد احسن .....
وللحكاايه بقيه........
