.آنين الليل الاحمر.......💞💞💞💞
الجزء الثاني ....18.....
الشكر لله .........
من شفت عمامي يدافعون ويه ابويه واخوتي خفت وجسمي كله صار يرجف وبچيت اني شسويت بحالي وشسويت بأهلي كل شويه اسمع عدهم عيطه كل شويه اسمع يمهم هوسه وصياح ومرات اصعد للبيتونه مال بيت سميره واندگ راسي واگعد بصف الحايط .....اسمع امي تبچي وأخويه ماجد يصيح ويكفر ....وسعاد صايره بالنص بين امي وماجد المتهور وإني المستهتره الي ما حافظت على شرف عائلتي
......كل هاي بچفه وابويه وابويه بچفه ثانيه من صارت مشكلتي مسمعته ولا شفته طلع .....ولاسيارته تحركت من گراج البيت ....وحتى سعاد ما شفتها غير مره وحده تبچي بحديقة البيت ....مرت عليه شهرين وإني بيت سميره لا طلعه ولا طبه خاتله خايفه طول ذني الشهرين سميره ماتطلع من البيت غير يوم واحد بالاسبوع تطلع الصبح ترجع بالليل وجايبه وياها مسواگ واحتياجات البيت وكانت حزينه ومرات اسمعها تبچي ..... وكنت ابچي وياها ....
بس ما اعرف على شنو تبچي ....وكانت طيبه وياي وداريني حتى متخليني انظف ....استغرب عليها بس هي سولفتلي سالفتها .....گالت ....
اني بنيه من عائله فقيره ..حبيت ابن جيرانه كلما يريد يخطبني أهله ميقبلون بحجة اني بت فگر مره مرتين تلاثه الحد جزع وعافني ... اضطريت ازوج واحد فقير مثل حالتي بس چان اكبر مني بالعمر بهواي اني بت اربعطعش وهو ابن التلاثين ما تراهمنا عرك وضرب وهو اذا يشوف عندي وصلة ذهب يأخذها يبيعها طكت روحي منه وطلگت ورجعت لاهلي
بقيت يم اهلي سنه ونص رجعت لحبيبي القديم وصارت بيناتنا علاقه وحبلت منه ببنيه ومن گتله اني حامل هو نكر وعافني وطردني طرد خفت من اهلي اذا كشفوني حامل يكتلوني ...بعدها وينفضحون فكرت بحيله انهزم بيها اخذت گدر المي ورحت للشط وزلگت ووگعت بالشط لزمت خشبه توچيت عليه واخذني الحد وصلت المنطقه بعيده عن اهلي گعدت اصيح بعالي الصوت اجوني ناس طلعوني ...واخذوني يمهم فتره وعفتهم اجيت لهنا على بغداد وتعرفت على واحد دلاني على وحده اشتغل يمها ...بقيت وياها فتره اشتريت هذا البيت وعفتها كل فتره احصل شغل اروحلها ....
ومن سألتها شنو شغلج ....گالت نفس السويتي بس الفرق اني اريد اعيش .....سألتها عن حملها ....گالت جبت بنيه وربيتها من صار عمرها عشر سنوات تمرضت وماتت وهسه اني وحدي مثل متشوفين.....
استغربت من سالفتها واستغربت اكثر شلون عايشه وحدها وليش ما رجعت لأهلها....معقوله ما سألت على اخوتها اخواتها امها ابوها ....
مرت الايام وإني استغرب اكثر من حياة سميره تطلع يوم واحد بالاسبوع وين تروح ومنين ترجع ...ليش متختلط بالناس معقوله بسبب عملها ....لو هي متريد الاختلاط....يوم وره يوم ...اسمع المشاكل بيت اهلي وعرفت من سميره همه جاي يدورون عليه خفت اكثر وعرفت أبويه مريض وتعبان وعمامي حالفين على ذبحي اهلي تبهذلوا وامي الي كانت شيخه ومحد يگدر يرفع صوته گدامها صارت ذليله ومحد يحترمها .....وبيوم جنت گاعده بالحديقه بالليل .. سمعت امي تصيح ....ولك سجاد اگعد ابوك مات ولك يمه تعال شوف ابوك ....اني من سمعتها ردت اطفر الحايط واروحلهم بس سميره لزمتني ......
الصايح والعياط بيت اهلي وصل صوته لآخر المنطقه التناسليه الناس وأخذوا أبويه للمستشفى ساجد وولد الجيران ......للصبح جابوا أبويه مخلي بتابوت والناس تصيح الله يرحمه كتلته بته ......
اسمع امي تصيح وسعاد ونسوان الجيران...
دخلوا أبويه للبيت وشويه وطلعوا ...شايلي عمامي واخوتي وامي طلعت تصيح وراه واختي تملخ بروحها ...ردت افتح الباب واطلع اركض وره الجنازه اريد اشبگ التابوت وابچي اني كتلتك بويه بس سميره لزمتني وخلت ايدها على حلگي وگالتلي .....
شوفي يمه وداد ...اذا انتي تردين تموتين اني ما اريد اموت استري على نفسج وعليه لان اهلج ميسكتون ويتهموني اني خاطفتچ لو اني ملفيتج ويذبحونه وإني محد يطلع وراي لان محد يعرفني اگعدي بهاي الغرفه وابچي على راحتچ......
خلصت الفاتحه وخلصت وياها روحي كتلني تأنيب الضمير والبچي والقهر حلفت الا انتقم من ماهر لو يبقى يوم من عمري ......مرت الشهور وإني خاتله وسميره توصلي اخبار اهلي ....ومره اجتني تركض وگالت اخوج ساجد راح يسافر للخارج وامج ما راضيه ......لان منو يبقى الها بعد وعمامچ كل يوم مشكله ويه امچ.....
بچيت ولطمت بس سميره ....رزلتني وگالتلي ...البچي ميرجع الراح ولا يصلح المكسور ولا يريح انتي گلب ولا انتي ترتاحين الحل الوحيد انسي لان همه هم راح ينسوچ
وللحكايه بقيه انتظرونا ليلان العطواني....
