اصبعي وهو اصبعي ان غدرني اقطعه

جزء 23

( الفصل الثالث والعشرون )



خالد – وآخيرا وصلنا جده
التفت خلفه 00 وشاف خلود تمسح دمعه يتيمه سقطت من عينها 00 ناظر في عيالها شافهم كل واحد يحكي للثاني عن اللي يعجبه ويتذكره في هالمطار
اقترب من خلود وضمها – الله يخليك امسحي دموعك مااحب اشوفك متعذبه تكفين خلود
خلود اللي زادت دموعها – مااني قادره خالد كل مااتذكر روحاتي ورداتي انا وإياه على هالمكان على هالارض هنا هنا ( وتأشر ) وقفنا وحكينا وضحكنا كثر مارحنا للرياض وردينا ( ناظرت في خالد وبألم ) افقده افقده افقده بالحيــــــــــــــــــل ياخالد
خالد تعب من كلامها – الله يرحمه وانا اخوك ادعيله بالرحمه ويسكنه فسيح جناته
خلود تمسح دموعها – الله يرحمه الله يرحمه
لفوا على صوت الضحك والوناسه ( وشافوا يزيد وزياد يضمون نايف ويضحكون
معه )
اقترب خالد من نايف وسلم عليه – وشلونك وش اخبارك
نايف – الحمدالله تمام وشلونكم انتم وش اخباركم
خالد – الحمدالله .. وش عندك جاي المطار
نايف ابتسم – جاي استقبلكم امي كلمت خالتي ام تركي وقالت انكم بتجونها ومن واجبي عاد استقبلكم
خالد اللي أثر فيه موقفه – ماتقصر يانايف عسى ربي يعافيك
نايف – اجل يالله اتفضلوا معي
خالد – بس لحظه ( واتجهه على خلود وخبرها .. بدورها سكتت ومشت معهم )






الوقت بعد صلاة المغرب .. وخيوط الظلآم بدت تبان .. الرؤيه اصبحت شبه معدومه في هالوقت .. ونوف تصرخ وتستنجد في مشعل اللي لاحياة لمن تنادي
خافت لما بدأو يبتعدون عن السياره ويتجهون خلف المحطه 00 وقامت ترجف
نوف وترجف – وين بتأخذني وين بتوديني مشعل الله يخليك لاتتركني
مشعل يمشي وهو ساكت ولاينطق بحرف ابد 00 وعيونه حمر 00 واصابع يده علّمت على كتفها وغارس اظافيره فيها
نوف وقامت تصيح وتبكي – الله يخليك مابعيدها والله مااعيدها لاتتركني اموت حرام عليك كيف بتتركني انا وولدك اللي في بطني ( تحاول تستعطفه عليها )
بس ابد جامد مثل الصخر جلمود 00
نوف وقفت بقوه غريبه ولفت مشعل غصب عنه معها – تبي تذبحني اتفضل اذبح
بس انا مااحب الموت البطئ
مشعل ناظر فيها ولافتح فمه بكلمه
نوف – وش تنتظر تبي تذبحني اذبحني ليش خايف ( وتصرخ ) ليــــــش
اسكتها الكف اللي جاها وخلى وجهها ينلف غصب عنها وطرح لثمتها .. لفت له وجهها ابرود وناظرت فيه
مشعل – مااكون ولد ابوي ان ماربيتك من اول وجديد
غطى وجهها غصب عنها00 وسحبها بقوه عجيبه إلى السياره وسط سكوتهم إثنيناتهم 00 وارتياح نوف انه ماسوى فيها شي 00 نوف اللي رسمت بخيالها انه بيتركها ويخليها تموت في صحراء قاحله ومكان ماتعرفه
وصلوا السياره تحت طبخ ساره من القهر 00 وعيونها اللي بتأكلهم 00 فتح الباب
وركبها بقوه عجيبه مؤذيه 00 وسكره بقوه 00 تحت صرخة نوف 00وإرتجاف ساره من المنظر اللي قدامها 00 هالمنظر اللي كفيل بس انه مايخليها تفتح فمها بعده 00 ركب بعصبيه 00 وركبت ساره والخدامه ايضا 00بخوف وهم يتراجفون
ونوف اللي بلعت غصتها 00 وهدت نفسها انه مستحيل يسوي لها شي 00 مهما كان تظل بنت عمه 00 ومن لحمه ودمه
ماحرك السياره 00 وجلست ساره والشغاله يناظرون فيه 00 ونوف اللي منزله رأسها ودموعها مثل المطر على خدودها 00 هو يناظر لقدام وهم بخوف يناظرون فيه 00 استغربوا وقفته وانه ماتحرك ابد
ساره بخوف – مشعل وش فيك ليش ماتمشي
وطال سكوت مشعل ونظرته مثل الصقر قدام 00 والحقيقه انه خايف يكون نوف متأذيه وصاير لها شي 00 ويبي يطمن عليها بإي وسيله كانت من دون ماتحس بااهتمامه 00 الدزه اللي دزها فيها للسياره مو مطمنته 00 مستحيل تكون بخير هو عارف انه أذاها بس وين الأذى مايدري خايف من الله فيها ومن امه لو صار فيها شي ..
مشعل بهدوء عكس اللي يحس فيه من براكين تطبخ – انزلي وتعالي قدام بسرعه
النظره الغريبه كانت من عيون ساره 00 اللي اهانها مشعل بهالكلمه 00 بس صمتت وماافتحت فمها
فجاءتهم نوف وهي تبكي بصوت مسموع – مااقــــــــــــدر







وصلوا مطار ينبع وبدوره السايق ينتظرهم والخدم
دنيا – وااااااااااااااااااي مامي جوهم براد وحلو
بدريه – احسن من الرياض اللي غبار وعجه
ناظروا في سالم اللي بدوره سرحان 00 ويمشي معهم
بدريه – وش فيك ليش ماتتكلم
ناظرها سالم بقهر – بلاي والله مقهور من ولدك ذا المهبول آآآآآآآآه ماادري متى بيجيبلي البيت منها
بدريه ناظرت فيه بلؤم ومشت وخلته
اتجهوا على فلتهم المطله على البحر 00 هناك كل شي زجاج × زجاج طابع على البيت كله 00 عشان يتمتعون بمنظر البحر
دنيا – انا بصعد داري تبغون شي مني
بدريه – شنهو مابتتعشين ويانا
دنيا – لا مامي ابي بس انام عشان اصحي بدري
سالم يناظرها ويبتسم – من تصحين بكره بتشوفين المفأجاه اللي مجهزها لك
انبسطت دنيا – صدق بابا
سالم ناظره بزعل – قد كذبت عليكي
شافت نظرة الزعل في عينه 00 وركضت له تضمه – طبعا لا كل شي تقوله توفي فيه ماتقصر ياابو دندونه






ريم بخوف – وش يبي منك مشعل
راشد بعصبيه – يسأل عن مستشفى قريب في الطريق قلت له مافيه غير لين المحافظه الجايه اللي باقي عليها 150 كيلو
ريم بخوف – ليه مين التعبان
راشد – نوف ماتقدر تحرك رجلها يقول لما ركبت عقب ماصلينا وإياهم في المسجد انحنت رجلها ولاقدرت تحركها
ريم بحزن – مسكينه هالنوف الله يصبرها
راشد – ياليتها يطلقها ويريحها منه كانت بتسافر مع امي وترتاح بس راسه وألف سيف ماتروح غير معه هاذا فيه مرض الشك
ريم – الله يصبرها يارب صدقني نهايتهم طلاق وقول ريم ماقالت






تعض شفايفها من الآلم بس ماابي توريهم 00 عارفه ان اللي راكبين في السياره كلهم اعداها 00 أبتداء في مشعل وإنتهاء في ساره
مشعل اللي مسرع في السياره ومعصب – هانت قريب ونوصل
ساره بقهر – انتبه لانصدم ترى فيه جمال سائبه لاتهدر ارواحنا عشان شي مايستاهل
الكل صامت 00 ونوف عاضه شفتها ودموعها تسيل 00 لما دزها مشعل كانت رجلها ملتفه 00 هي سمعت الطقه 00 وعارفه ان فيه كسر 00 وكان في البدايه الخوف غالب على الآلم 00 بس الحين الآلم كل ماله ويزود
بعد فتره وانقضاء ساعه بالكثير وصلوا المستشفى
مشعل راح يجيب عربيه 00 بس نوف انزلت قبل يوصل 00 كفايه الاهانه اللي تحس فيها 00 ورد معصب لانه مالقى عربيه
مشعل شافها وركض لها – وش نزلك انتي
نوف صامته ولا تنطق بحرف 00 مشوا لين وصلوا غرفة الكشف
كشف عليها الدكتور السوداني – هازي والله اعلم ان فيها شعرايه في رجلها
مشعل بعصبيه – هالحين سولها إشاعه وشف بدال فلسفتك علي
الدكتور – حازر تحت امرك يازول
وسووا لها الاشاعه اللي وضحت لهم بس انها شعره وتحتاج جبيره لمدة اسبوع
الدكتور – تبغوا اسوي ليها الجبيره ولا ايه رايكم
مشعل بقهر – لا صور معها احسن
نوف ناظرت فيه بقهر
الدكتور – نعم شنو قلت
مشعل – اقول خلصنا ورانا طريق سو لها الجبيره وخلنا نتوكل
نوف بعناد – ابي مراهم يادكتور ماابي جبيره
مشعل ناظرها بنص عين – ليش بالله
نوف وموجهه نظره للدكتور – ابي اخذ راحتي يادكتور عطني مسكن ومرهم وخلصنا
مشعل بعناد – لا سو لها جبيره خلها تقر
نوف ناظرت فيه – مايخصك رجلي ولا رجلك
الدكتور عصب – ازاهر انكم مش عايزين جبيره خلوني اروح انام احسن ليا ليما تخلصوا الهوشه بتعتكم
مشعل – ماعليك بس سوا الجبيره اظاهر الدوله تدفعلك فلوس عشان تنام
سووا لها الجبيره وجبسوا رجلها
بعد فتره
مشعل – يالله مشينا
نوف – ابي عربيه مااقدر امشي على رجلي
مشعل – مافيه عربيات
نوف عصبت – وكيف امشي يعني طيب عكازات
الدكتور – مافيش عكاكيز عندنا الحكومه مابتشتريش
مشعل – امشي امري لله اشيلك
نوف ناظرت فيه ووقفت – مايخصك فيني
جاها مشعل وساعدها وهي عارضت مسكها بقوه – مو لسواد عيونك بس إحساس الذنب يعورني
نوف – مالت عليك وعلى إحساسك
مشعل بعصبيه – لاحظي اني ماسك اعصابي بس والله والله اني شين لو استمريتي على كذا تعرفين من يكون مشعل
اتوجهوا للسياره 00 وشافوا راشد وريم تو وصلوا
راشد – سلامات سلامات هاه خلصتوا
مشعل – ايه خلصنا
ريم – سلامتك نوف ماتشوفين شر
نوف فكت يدها من مشعل وإتوجهت للسياره – الله يسلمكم
ركبت وسمعت ساره تتحلطم – افففففففففففففففففف كسر ماعقبه قومه إن شاءالله
مصدقه عمرك مسويتلي مهمه من حلاتك ماادري ليش صابر عليك مشعل مسكين وعلي عليه مو مصبره عليك غير اللي يبيه منك هو وعمي
وسكتت لما شافت مشعل وصل السياره 00 وريم وراشد توجهوا لسيارتهم
نوف – اسمعي انتي يالهبله مايخصك فيني وإن شاءالله تنكسرين كسر ماتقومين منه
انتي اللي حاشره عمرك بالنص
ساره بكيد النسا – هاه سمعتها بااذنك يامشعل ( وتخلي صوتها حزين ) جزاي اني
قلت لك سلامتك ماتشوفين شر وانتبهي بعدين لاتصيرين مطفوقه واعقلي تدعي علي
مشعل بعصبيه – لانها وقحه ويبيلها تربيه بس هين ياحفيدة الباكستانيه ان ماربيتك مااكون مشعل
ساره انبسطت على نجاح خطتها
نوف – تخسي انت واللي جنبك انا متربيه احسن منكم وتراها قاعده تبلى بس انت خبر خير ذيل حرمه
مشعل – لو مارجلك مكسوره ولا عرفت اقص هاللسان