اصبعي وهو اصبعي ان غدرني اقطعه

جزء 14

وقفت السياره عند البيت 00 وبدريه تساعدها على نزول
نوف – عمه بقولك شي
بدريه – آمري ياعيون عمتك
نوف – تقولين لمشعل اني ابي جوازي لانه عنده
بدريه – إن شاءالله ياروح عمتك ,, هالحين خلينا ندخل الحر ذبحنا
دخلوا البيت 00 وعبدالكريم ينزل الاغراض00 ويعطيهم الخدم يدخلونها
نوف – لحظه
وقفوا الخدم وناظروها
نوف ناظرة عمتها – ابي مفتاح غرفتي القديمه ياعمه
بدريه بحزن ومنزله رأسها على الحاله اللي وصلت لها نوف – طيب خلينا نجلس شوي ونتغداء وبعطيك المفتاح
نوف تجلس في الصاله – طيب
نزلت عليهم دنيا 00 وأول ماشافتهم ماتدري وش تسوي ودها تنحاش وارتاعت من منظر وجه نوف
بدريه شافتها – تعالي سلمي
دنيا تقرب من أمها وتسلم عليها
بدريه – قربي من نوف وسلمي عليها
دنيا طنشتها وجلست على الكنبه وحطت رجل على رجل وهي تسرح في وجهه دنيا
بدريه – ليش ماتسلمين
دنيا تبي ترقع سالفتها لانها حست ان امها كاشفتها – انا مااسلم على ناس يخونون
نوف انصدمت منها وناظرتها 00 ودنيا شتت نظرها
بدريه بعصبيه – عيب عليــــك ( وهي توقف ) الشرهه موعليك ولاعلى اخوك على تربيتي لكم اللي ماعرفت اربيكم قومي يمه نوف تعالي بنطلع فوق
وقفت نوف 00 وطلعت معها فوق 00 ودنيا مكشره موعاجبها إهتمام امها بنوف
ريم دخلت عليهم جناح نوف القديم – لالالالا من صدق خلاص طلعتي ( تتقرب منها وتبوسها ) تو مانور البيت
نوف بتعب – البيت منور بأهله
بدريه – خلاص ريم خلينا نطلع عشان نوف ترتاح
ريم – زين بقول للخدم يحضرون لها الغداء
نوف – بس ريم ماأشتهي الحمدالله
بدريه تناظرها بحنان – ليش يمه مااكلتي شي
نوف – الله يخليك ياعمه لاتغصبيني
بدريه – على راحتك بس من تصحين تنزلين تتغدين وهذاني قلت لك
نوف – إن شاءالله
طلعوا من عندها 00 عشان دموعها تنزل وتمسحهم بقوه 00
حرام عليها انا بنت عمها كيف سوت فيني كذا 00 هذا وانا اللي ساتره عليها حسبي الله الذي لا إله إلا هو عليه توكلت وهو رب العرش العظيم
يااااااااااااااارب خذلي حقي يارب 00 انت تعلم جاهر الامر وسره 00 وتعلم بواطنه
اكشف عني ضرهم ياااااااااااارب يااااااااااااااارب
مسحت دموعها وهي تقول بنفسها من اليوم انا نوف غير ماابصيح ولاابكي لين اطلع من هالبيت اللي كاتمني 00 دخلت الحمام تتحمم وتتوضأ

على العصر \ مشعل وصل البيت
جلس في الصاله – نعم يمه ازعجتيني تعال تعال تعال هذاني جيت شاتبغين
بدريه وهي توقف – امش مكتب ابوك ابيك هناك
مشعل – لازم
بدريه وهي بنص الطريق – ايه لازم
دخلوا المكتب
بدريه وهي تجلس على مكتب سالم – صكر الباب معك موحنا صار في بيتنا جواسيس
مشعل يصكر الباب ويمشي لين جلس – نعم يمه
بدريه – ايش اللي سويته في نوف
مشعل – انتي بنفسك تعرفين السالفه
بدريه – ومتأكده من برآة السالفه
مشعل – هه وش دراك
بدريه – ملعوب مسوينه بنات إبليس
مشعل بسخريه – الله يايمه قمنا نرقع لها ,, ومن هالمهمه عشان يسون فيها ملعوب
بدريه – اللي يكونون 00 اسمعني مشيعل هالبنت بالذات ماابي يصير لها شي والله ان تعرضت لها مايحصلك خير صدقني
مشعل – أصلا انا موطايق شوفتها
بدريه – يكون احسن حتى هي ماتبي تشوفك بس عطني الجواز
مشعل – أي جواز
بدريه – أي جواز يعني جوازها
مشعل عصب ووقف – هذا اللي ناقص والله لوتحب السماء ماعطيتها الجواز انتي مصدقه لايسمعك ابوي بس لايقلب عاليها واطيها هذي بتهرب لخالها عشان البيت
بدريه بعصبيه – لا اكفخني احسن
مشعل – اعوذ بالله منك ياإبليس ( ويهدئ نفسه ) يمه مااقدر افهميني
بدريه – وش عليك من ابوك انا اللي بتصرف معه بس هات الجواز
مشعل وهو يلف ظهره – لا ماابي
بدريه – ليش تعطيني ظهرك وانا اكلمك كم مره اقول بطل هالعاده 00 وهات الجواز يامشعل لاتدخل عنادك في السالفه
مشعل بعصبيه – تخسي ثم تخسي هاذي وطت راسي بالقاع تعرف شباب وتبيني اعطيها الجواز والله ماتسافر لخالها هاه شوفيني حلفت يايمه بتكفرون بحلفي
بدريه بهدوء – مشعل حرام عليك البنت يتيمه وكارهه العيشه هنا
مشعل – ايه ماكرهت العيشه غير يوم عرفنا بسواد وجهها قوليلها يمه والله ماتشم ريحة الامارات.. ولاليش تقوليلها انا اقولها ( عطى بدريه ظهره وطلع بسرعه )
بدريه تركض وراه – يامشعل يامشعل حرام عليك حرام
مشعل وقف في نص الدرج وبعصبيه وصراخ – انا كارهه شوفتها يايمه قوليلها والله ثم والله سفره للامارات ماتسافر وتجلس وتنثبر ليكون مواعده الكلب الواطي هناك
بدريه – اششششششش صك فمك صكه خلاص اذلف اذلف ولاتشوفك عيني انقلع
وانا اللي بوريك يامشعلوه
طلع من البيت وخلاها