A Poem A Day Keeps the Stress Away

Apat Yata O Lima

Nang pumasok ka

sa isang opisina,

ika'y kakaba-kaba.

Iyong porma,

hindi yata akma.

Masikip na hininga,

iyong damang-dama,

lalo na nang humarap na

ang managera.

"Introduce yourself", aniya.

Napalunok ka,

dugo ay tinakasan ka.

Pinilit magpakilala

kahit nauutal ka.

Iyong ipinakita

na kahit ika'y nagmula

sa pipitsuging akademiya,

'di ka basta-basta.

Na-impress yata siya

dahil nagtanong pa.

Apat yata o lima

ang tanong niya,

saka siya'y nag-Thanks na.

Nakipagkamay pa.

"Tatawagan ka

ng aming kompanya,"

pahimakas niya.

Ikaw ay tila

tinakluban ng lupa.

Ilang beses na ba

na ika'y pinaasa?

Marami na---

mga apat yata o lima.