مصيرُ طفل .. الجزء الأول من سلسلة " ضحايا القناع "

* الفصل السادس *

بعد ساعات صحي إساف من النوم و هو بيصرخ ، و فجأه شاف والده واقف قدامه ، و كل الضرب القاسي اللي صحاه من نومه ده كان من والده .. أنفجر إساف في العياط و والده بيضربه أكتر ب قسوه و هو بيحاول يفادي جسمه من الضرب ، بس جسمه الصغير ما كنش مساعده و كل ضربه كانت بتصيب جسمه أكتر .. حاول يبعد و هو بيتكلم مع العياط و والده مش بيرحمه ....
إساف:حرام عليك يا بابا .. مش قادر .. انا عملتلك أيه ، بتضربني ليه
ماردش عليه و كمل ضرب فيه بكل قسوه .. في اللحظه دي زادت صرخات إساف ب إستغاثه ، أول ما سمعته والدته جريت علي أوضه إساف .. أتصدمت أول ما شافت اللي بيحصل ، جريت علي إساف و أخدته في حضنها ، و زقت جوزها ب عنف ، و هي بتتكلم ب صريخ .....
- أبني ، حرااااام عليك .. أنت أزاي تعمل كده في أبنك يا عديم الرحمه و الأحساس .. منك لله يا صفواااان ، منك لله من قلبي بجد .. ربنا ينتقم منك
في اللحظه دي قرب منها صفوان ، و قبل ما يضربها أتكلمت ب صرخه ....
- أقسم بالله هبلغ عنك ، مش هفضل طول عمري ضعيفه معاك
وقف في مكانه من كلامها ، و رد عليها ب تحدي ....
( روايات بسوم )
صفوان:تبلغي عني يا روبين .. بقي هي دي أخرتها !! طب و الله ما هرحمك
قال الكلام ده و مشي ، و قبل ما يخرج من الأوضه ، أتكلمت روبين ب صوت عالي ....
روبين:أبعد عني بقي و عن عياااالي ، حرااام عليك
وقف صفوان بصلها ، و أتكلم ب برود ....
صفوان:للأسف عيالك هما عيالي ، يعني ليا حق فيهم زيك ب الظبط
روبين:حقك أنك تموووتهم !! عايز تموتلي عيااالي !
صفوان:فين ماتوا ده ، ما هما عايشين أهو .. و بعدين انا ما بعملش كده مع حد فيهم غير ده بس
روبين بدموع:طب و لييه ، ده عملك أيه !! أشمعنا ده يعني !??
صفوان:أبقي شوفي شهادته اللي جنبه و أنتي تعرفي
روبين بإستغراب:شهادته !! فين دي ؟
صفوان:هتلاقيها جنبه علي السرير .. أمسكيها و شوفيها
في اللحظه دي دورت روبين علي الشهاده ب عينيها .. و أول ما شافتها مسكتها و بصت فيها ، و بعد ثواني صرخت بصوت عالي و هي بتتكلم ....
روبين:كل ده عشان مُلحق إنجليزي ، يا ظاااالم .. انت ما عندكش قلب ولا عندك رحمه
صفوان ببرود:و ما عنديش حاجه خالص .. و المدرسه دي أبنك مش هيشوفها تاني
في اللحظه ، دي أتنفض إساف بخوف ، و أنفجر في العياط أكتر .. و روبين أتكلمت .....
روبين:يعني أيه ده ! .. أنت كمان هتتحكم في مستقبله .. انا مش هسمحلك تعمل كده أبداً
ضحك صفوان ب سخريه ، و رد .....
صفوان:ده بجد ؟ و انتي من أمتي بتقدري تتحكمي بقي
روبين:من دلوقتي
صفوان:طب هنشوف .. انا قبل كلامك ده كنت ناوي أشغله معايا .. بعد بقي كلامك ده ، هشغله زبال
خلص صفوان كلامه و خرج قبل ما روبين تتكلم .. زاد عياط إساف أكتر و بدأ يتكلم ب قهر ،  و روبين حضناه ....
إساف:ماما انا عاوز أروح المدرسه .. مش عاوز أشتغل زبال
روبين:ما تخافيش يا حبيبي ، بابا بيخوفك بس .. لكن انت هتروح المدرسه و الجامعه كمان و هتبقي دكتور كمان
إساف بدموع:بجد يا ماما ؟
روبين:اها يا حبيبي طبعا بجد .. و في الترم التاني هتنجح إن شاء الله ، ما تخافش
سكت إساف و بص في الأرض ، و دموعه بتزيد ب صمت ....
( روايات بسوم )
°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°
سكت إساف ، و عينيه أتملت ب الدموع .. و كساب أتكلم ب حُزن ....
كساب:طب انت بتدمع ليه دلوقتي ؟
حاول إساف يداري دموعه ، و رد ب إبتسامه مُزيفه ....
إساف:مش بدمع ولا حاجه
كساب:لا بتدمع .. مالك ؟
إساف:يا كساب مش بدمع ، انا بس بزعل لما بفتكر
كساب:طب ممكن ما تزعلش نفسك .. و لو مش هتقدر تحكي بلاش ، المهم ما تضايقش نفسك
إساف:لا انا مش مضايق .. بس طبيعي لما أفتكر أزعل
كساب:خلاص طيب ما تحكيش عشان ما تفتكرش 
إساف:لا هحكي عادي .. أحسن من الكتمه
ما عرفش كساب يرُد ، و بص في الأرض .. و إساف كمل .....
إساف:اليوم ده ، من كتر التعب و الضرب و العياط .. نمت في حضن أمي و ما حسيتش
( روايات بسوم )
«»«»«»«»«»«»«»«»«»«»«»«»«»«»«»«»«»«»»«»«»
في نفس الوقت ، في 2007 ........
في شقه صغيره في القاهره .. قاعده بنت عندها 15 سنه علي الكومبيوتر ، و بتكلم صاحبتها في الموبايل .....
- طب بيتعمل أزاي ده .. انا مش فاهمه حاجه من الصبح ، اها .. طب بصي ، قوليلي الخطوات واحده واحده و انا هعملها .. ماشي ، أعمل أيه الأول بقي ؟
في اللحظه دي دخلت والدتها الأوضه ، و هي بتتكلم بعصبيه .....
( روايات بسوم )
- هتفضلي قاعدالي طول النهار و الليل كده علي الزفت الكومبيوتر ده ، مش لاقيه حاجه تعمليها في دنيتك غيره ؟؟
ردت البنت بهدوء ....
- معلش يا ماما ، انا أسفه .. بس ثواني عشان بتكلم في الموبايل
ردت والدتها ب عصبيه ....
- بتكلمي مين يعني ؟
- بكلم صاحبتي يا ماما .. بعد أذنك كفايه زعيق
أنفعلت والدتها أكتر و أتكلمت ....
- جالك القرف انتي و صُحابك كُلهم في ساعه واحده ، زي ما انتي قرفاني كده .. قومي يا بت أعمليلك حاجه مُفيده .. قاعده تعملي أيه علي الزفت ده دلوقتي ؟
حاولت البنت تكتم سماعه الموبايل ، و قامت وقفت و أتكلمت ب خنقه .....
- حرام عليكي بقي يا ماما .. شويه و جايه بقولك
- طب أعرف الأول بردو قاعده بتعملي أيييه
- بعمل أميل جوجل يا ماما
في اللحظه دي مسكت والدتها جنبها ب أيديها ، و أتكلمت ب إستهزاء .....
- و أيه بقي إن شاء الله إيميل جوجل اللي طلع لنا جديد ده كمان
نفخت البنت ب ضيق ، و حاولت ترُد بهدوء ....
- هبقي أفهمك كل حاجه بعدين يا ماما .. ممكن بس دلوقتي تسيبيني أخلص مكالمتي
بصيت لها والدتها ب إستحقار و أتكلمت و هي بتخرج من الأوضه ....
- طبعاً ، ما انتي لو كنتي لسه مخطوبه ل نايف ما كنش زمانك تقدري تقعدي علي الكومبيوتر حتي و لا تيجي جنبه
في اللحظه دي أتعصبت البنت جداً و ردت ب عصبيه ....
- ما انا بقعد علي الكومبيوتر عند فيه علي فكره ، و من النهارده هعمل اللي انا عايزاه براحتي .. و الحمدلله انه غار في داهيه أساساً
في الوقت ده ، وقفت والدتها مكانها و بصت لها ، و أتكلمت ب شماته ....
- دلوقتي الحمدلله انه غار !! مش ده بردو اللي وقفتي قدامنا كلنا علشانه .. بس يالا أحسن فعلاً أنه سابك و غار في داهيه
في اللحظه دي البنت دمعت ، و حاولت تداري دموعها و ترد ب قوه ....
( روايات بسوم ) 
- انا اللي سيبته علي فكره ، عشان عرفت أنه زباله
ضحكت والدتها ب سخريه ، و ردت .....
- و الله ! و لما كُلنا قولنالك انه كده ما صدقتيش ليه ؟ و لما سألنا عليه و لقينا سُمعته في الأرض فضلتي مُتمسكه بيه ليه !! أقولك .. أنتي تستاهلي كل اللي بيحصلك ، عشان انتي من يوم ما جيتي الدنيا و أنتي تعباني معاكي
أول ما خلصت كلامها ، قفلت البنت الموبايل و رميته علي السرير ، و أنهارت من العياط و هي بتتكلم ب زعيق .....
- و هفضل طول عمري تعباكي ، و هعمل اللي انا عايزاه .. و اللي انا شايفاه صح و في مصلحتي هعمله
- يا سلام ؟ انا ما شوفتكيش عملتي حاجه صح في حياتك ، و في كل مره بتعملي اللي في دماغك بيطلع غلط ، و بيحصل مصيبه في الآخر
بصت لها ب قهر ، و ردت ب تحدي .....
- ماشي ، انا بقي هفضل أعمل كل اللي في دماغي عشان تحصل مصايب .. و لو سمحتي بقي ما لكيش دعوه بيا خالص
- أحترمي نفسك يا فيرووووز ، بدال أقسم بالله هاخد منك الموبايل و مش هتشوفيه ولا هو ولا الكومبيوتر ولا الشارع تاني .. أنتي فاهمه ولا لا ؟
فيروز:......
( روايات بسوم )
«»«»«»«»«»«»«»«»«»«»«»«»«»«»«»«»«»«»«»«»
في القهوه ، في أسكندريه .......
إساف عيونه كلها دموع و بيتكلم ، و كساب بيسمعه ....
إساف:اليوم ده ، من كتر التعب و الضرب و العياط .. نمت في حضن أمي و ما حسيتش
كساب:و بعدين ؟
( روايات بسوم )
°°°°°°°°°°°°°°°°°°°°°°فلاش باك°°°°°°°°°°°°°°°°°°°°
تاني يوم الصبح ......
صحي إساف علي صوت صفوان مفزوع .. قام قعد بسرعه و أتكلم ب خوف ....
إساف:نعم يا بابا ؟
صفوان:قوم يالا بسرعه ، عشان هتنزل معايا الشغل
في اللحظه دي ، إساف ما قدرش يتحكم في دموعه و عيط .. بصله صفوان ب إستهزاء ، و أتكلم ب قسهوه .....
صفوان:سمعت قولت أيه ؟
رد إساف ب قهر ....
إساف:حاضر يا بابا
مشي صفوان .. و قبل ما يخرج من الأوضه ، بص ل إساف و أتكلم ....
صفوان:ربع ساعه لو ما لقيتكش في الشارع تحت ، هموتك .. فاهم ولا مش فاهم ؟
إساف بخوف:فاهم
( روايات بسوم )
خرج صفوان و نزل ، و قام إساف و جري بسرعه علي أوضه روبين ....
أول ما شافته روبين ، قامت حضنته و أتكلمت ....
روبين:مالك يا حبيبي ؟ وشك مخطوف ليه !! خايف من أيه ؟
إساف بعياط:أصل بابا قالي أنزل عشان أروح أشتغل معاه ، و قالي لو أتأخرت هيموتني .. يعني هيقعدني من المدرسه يا ماما
في اللحظه دي ، بدأت تطبطب روبين علي إساف ب حنان ، و بتحاول تهديه و هي بتتكلم ....
روبين:ما تخافش يا حبيبي .. أسمع كلامه و هو مش هيقعدك من المدرسه ولا حاجه ، هو بيخوفك بس .. أنت أشتغل معاه في الأجازه عشان تراضيه ، و لما الأجازه تخلص انا هخليك تروح المدرسه
إساف بلهفه:بجد يا ماما ؟
روبين:و الله يا حبيبي بجد .. بس يالا أنزل دلوقتي عشان ما يضربكش
إساف بضعف:حاضر
روبين:ما تخافش يا حبيبي
إساف:حاضر يا ماما
روبين:خالي بالك من نفسك يا روح قلب ماما
أبتسم إساف و قام من حضن روبين ، مشي و دخل علي أوضته .. غير هدومه و نزل علي طول .....
( روايات بسوم )
أول ما وصل عند صفوان ، شدُه صفوان بقسوه و مشيوا .. و أول ما وصلوا الشغل بدأ صفوان يتكلم بصوت عالي ، و هو بيعرف إساف علي كل حاجه هيعملها في الشغل .. و بعد ما خلص بصله ب إحتقار و أتكلم ....
صفوان:الشغل ده كله لو ما خلصش النهارده ، هموتك و هحبسك في المصنع و همشي
إساف بدموع:بس ده كتير أوي يا بابا
صفوان بزعيق:انت هتقاوحني ولا أيه .. الشغل ده يخلص من غير كلاااام كتيررر
إساف بخوف:حاضر .. هخلصه حاضر
صفوان:لما نشوف
سكت صفوان و مشي علي طول .. قعد إساف علي الأرض و أنفجر في العياط .. و بعد دقايق قام وقف ، و بدأ يمسح دموعه و يشتغل ....
( روايات بسوم )
بعد 12 ساعه .........
رجع صفوان ل إساف .. و أول ما دخل المكان أتكلم ب قسوه ....
صفوان:خلصت ، ولا أقفل عليك و أسيبك و أمشي ؟
أتنفض إساف ، و أتكلم ب خوف ....
إساف:لالا ، و الله خلصت .. خلصت كل حاجه قولتلي عليها
صفوان:طب أتفضل أقفل عشان نمشي
إساف بضعف:حاضر
خرج صفوان ، و قفل إساف المكان و خرج وراه ....
مشيوا هُما الأتنين من غير ما حد يتكلم خالص ، و أول ما وصلوا البيت و دخلوا .. إساف أغمي عليه .....
( روايات بسوم )
°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°°
زادت دموع إساف .. و كساب أتكلم ب صدمه ....
كساب:أغمي عليك !!
إساف بحزن:أيوه
كساب:طب ليه ؟
إساف:من التعب .. 12 ساعه بحالهم شغل بس ، من غير راحه
كساب:أمممم انا أسف ، بس والدك ما عندهوش قلب
ضحك إساف ب سخريه ، و أتكلم ....
إساف:طب ما دي الحقيقه .. من غير ما تتأسف
بص كساب في الأرض و ما ردش ، و إساف كمل كلامه ....
إساف:لما فوقت ما لقيتهوش موجود .. كان غير هدومه و نزل يقعد علي القهوه مع صحابه .. يعني انا فعلاً مش فارق معاه ، مش بيعمل كده خوف عليا ولا حاجه
كساب بحزن:الله يسامحه .. و بعدين ؟
إساف:فضلت أكتر من ساعتين بعيط من قهرتي ، لحد ما نمت .. و تاني يوم بردو صحاني ب نفس الطريقه ، بس المره دي أقسم أني مش هروح المدرسه تاني
كساب بإندفاع:ليييه يعني !!
إساف بدموع:قالي شغل يوم واحد يعمل فيك كده .. انا بقي مش هخليك تسيب الشغل لحظه من النهارده عشان تبقي راجل
كساب:أزاي طيب !! أزاي بجد ؟ مش ممكن أبداً القسوه دي .. راجل أيه و عيل أيه ، 10 سنين يعني طفل .. أزاي أبوك بيفكر ب الطريقه دي !!!?
إساف بحزن:مش عارف .. ماكنش بيرحمني خالص
كساب:طب و أيه اللي حصل بعد كده ؟
إساف:نزلت الشغل و انا مش شايف قدامي من العياط .. و بعد كام ساعه كده جالي و كلمني بمنتي الأمر و القسوه ...
( روايات بسوم )
°°°°°°°°°°°°°°°°°°°°°°فلاش باك°°°°°°°°°°°°°°°°°°°°
صفوان:تعالي هنااا
جري إساف ، و وقف قدام صفوان ب خوف .. و صفوان أتكلم .....
صفوان:تاخد الفلوس دي ، و تخالي بالك منها كويس أوي .. و تروح تجيب الزيوت اللي مكتوبه في الورقه دي ، ضروري عشان المكن .. و لو أتأخرت همووتك يا إساف .. و لو حاجه ضاعت منك هيكون أخر يوم في عمرك .. انت سامع ؟
أخد إساف الورقه و الفلوس ، و رد ب خوف .....
إساف:مش هضيع حاجه
صفوان بتهديد:و ما تتأخرش
إساف بقلق:مش هتأخر
صفوان:يالا غور
إساف:حاضر
( روايات بسوم )
مشي إساف بسرعه ، و الدموع في عيونه مش بتخلص ....
أشتري الزيوت كُلها ، و مسكهم في أيديه و في أيديه التانيه الفلوس الباقيه ، و مشي علشان يرجع علي الشغل .. و بعد ما مشي مسافه كبيره و هو بيحاول يسرع خطوته علشان ما يتأخرش ، فجأأأه ......
.........................
#بسمه_ممدوح