بيرق الاحزان
همس القوارير
البارت ١٥ والاخير
وفعلا عگب هاي المشكله اخذت ملابسي وملابس الجهال ورحت لهلي واني ميته قهر ياربي شسوي والله مليت شوكت ارتاح شوكت اتنفس تعبت واختنگت يعني لا استقرار ولا راحه لازم هالمره نطلع بعد ما اتحمل لو يطلگني الي تحملته كافي كل انسان اله حد للتحمل واني هذا حدي خلاص بعد يوم واحد ما اتحملها ما خلت شي ما سوته وتهمتني بيه بقيت اسبوع عند اهلي ويوسف يوميه يجي علينا
يوسف
خلاص حبيبتي راح ترتاحين أجرتلج بيت وهسه نستقر
زمن
يا بعد عمري والله تعبت ياريت اريد ارتاح
يوسف
مبقى شي اليوم شفته عجبني وراح اشتري طباخ وقنينه وثلاجه واجيب شغلاتنا الي بغرفتنا ونسكن لحد ما شوي شوي ونجهز نفسنا
زمن
ربي لا يحرمني منك
فعلا ورى كم يوم انتقلت لبيتي الجديد وسمعت امه لاعبه بيه طوبه لان طلعنا من البيت واخذنا غراضنا وارتاحينا استقرينا بيتنا جان عباره عن غرفتين وهول صغير ومطبخ وملحقات كلش ملموم وحلو ومرتب وكلش كافي عليه اني وزوجي واطفالي امي انطتني مواعين وطاوات وملحق مالت كاونتر وصوبه والناقص كل شهر نشتري شي ناقصنا استقرت اوضاعنا والف الحمدلله والشكر حالنا من احسن الى احسن. حملت مرة الخ وجبت سولاف حبيبت قلبي صار عندي اولاد اثنين وبنيه وعيالي ابد ما اروح يمهم رحت تقريباا ٣ مرات لو طلعت عليه زقوم وگدام يوسف وگال خلاص امي ما تريدنا بعد ولا تريد الجهال بعد منروح والله مرات انقهر احب احضر وياهم من ينجمعون لو يسوون فد مناسبه لان كلش احبهم بس شسوي ما اروح والسبب عمتي اگعد واسكت بس انقهر مرت تقريبا ٣ سنوات عشت مرتاحه بيها الحمدلله والشكر سجلت اولادي واحد مدرسه والخ روضه وبنتي عمرها سنتين بعدها توفى عمي الله يرحمه وهنا تغيرت الاوضاع عمتي انهارت اعصابها وتعبت نفسيتها خطيه كلش بحيث بقت لا تاكل ولا تشرب بقت تقريبا هذا حالها ٣ ايام وضربتها جلطه دماغيه وشلتها شلل نصفي وجابها يوسف يمي واني اداريها لان بيداء متريدها خليتها بعيوني ويوسف يدخل ويطلع ويبوسني من راسي لان مداريه امه خطيه هي همين حست بالذنب ومن تشوفني متخلي عيني بعينها تخجل مني ومرات تبجي لحد ما بقت فتره والحمدلله والشكر بالعلاج الطبيعي بده يتحسن وضعها شوي وبدت تشيل نفسها وتغيرت صارت تحبني وتحب جهالي لان نكسرت مو مثل الاول وتقاسمو الورث واشترينا قطعه وبنينا بيت يخبل واشتره يوسف سياره وذهب عندي والف الحمدلله والشكر الوضع من احسن الى احسن كل هذا نتيجة صبري وتعبي الي تحملته من عمي محد يتحمله بس صبرت وتحملت لخاطر زوجي واطفالي صح تعبت بس نتيجة التعب راحه واستقرار كل فتره يوسف يتذكر موقف ويتذكر اني شلون صبرت وياه ويبوسني من راسي ويگولي ما ابدلج بكنوز الدنيا انتي روحي ودنيتي لازم الانسان يتحمل وما يستعجل بقراره يصيرله موقف حلو وذكرى حلوه الى هنا نهاية قصتي اتمنى ان راقت لكم
ودمتم سالمين
