بيرق الاحزان
همس القوارير
البارت الخامس
من اجه الولد وشافني ثاني يوم اجتي خالته وامه واخته وگالت
خالة يوسف ام سلام
عيني ام زمن الولد متخبل عالبنيه وعاجبته حيل واهله همين مستعجلين واجينا اليوم نشوف شنو طلباتكم
امي
والله ام سلام ما عدنا طلبات البنيه بتكم والي راح تنطونه لبنكم انتم براحتكم
ام يوسف
عيني ام زمن غايبها وحاضرها ......... ونشتريلها گلاده وحلقه والنيشان هي تشتريه على ذوقها وحفله نيشان بيتكم انسويلها بيوم الخطبه
امي
خوش حجي واحنا موافقين وان شاءالله اهل وماكو فرق
ام يوسف
خلاص شتگولون يوم الجمعه خطبه ونيشان وسوولها حفله هذه فلوس بدله وصالون واحنا نجيب عصاير وحلويات وكيك
وكاسات مهر
امي
ميخالف الجمعه خوش يوم وربي يسعدهم ويتتم على خير
من طلعوا من يمنا طرت من الفرحه وامي خلت بيدي الفلوس واني اول مره الزم هيج مبلغ بصراحه عبالك بحلم الحمدلله رب العالمين راح يعوضني ويريح بالي واخيرا لگيت الانسان الي يسعدني ضلينا نجهز مستلزمات الخطبه وحجزت صالون وبدله حمره تخبل وحفيت وجهي لاول مره بحياتي احف وكل واحد يجي يشوفني يتخبل على شكلي تغير ١٨٠ درجه ولا كانما اني واجه يوم الخطبه طلعت من الصبح للصالون بدلت ومكياج وتسريحه اني انبهرت بشكلي من يشوفوني الناس ويوسف شيگولون عزمنا الدنيا كولها حتى خالتي ام فلاح والجوارين وعمامي وعماتي مخليت احد من دخلت وشافتني الناس نبهرت كولش بيه وخالتي ام فلاح گامت تبجي لان ابنها ما اخذني بعدها دخلوني بغرفة امي اجه السيد عقدلنا ومهرنا مهر شيخ وبعدها اجه يوسف فدوه لعينه يخبل وحلو ولابس قاط رصاصي وقميص وردي صرنا احلى ثنائي لبسني الحلقه وهو خجلان ولبسني گلاده وساعه وسوار واكلني كيك وشربني عصير بس گوه مسيطر على نفسه يصب عرگ من الفشله تقرب عليه وهمسلي
يوسف
طالعه مثل الاميره
اني دنگت وضحكت بعدها كملنا مراسيم خطبتنا وبقى يمنا تعشى وهو فرحان گعدنا اني وياه بغرفتنا
يوسف
ان شاءالله مرتاحه
زمن
الحمدلله
يوسف
الله يقدرني واسعدج
زمن
ان شاءالله
يوسف
شوفي من هسه خليني صريح وياج طلعه وطبه من غير علمي ماكو واي شي تردينه وتحتاجينه تطلبينه مني وما تگولين لهلج لان اني صرت مسئول منج من اليوم
زمن
ان شاءالله
يوسف
وعگب باجر نروح نعقد محكمه
زمن
ان شاءالله
يوسف
وهاي ان شاءالله ضيفيلها بعد شي مثلا ان شاءالله حبيبي
اني ضحكت ودنگت
وفعلا هيج مرت الايام بقت خطبتنا شهرين بين يوم ويوم يجيلي يوسف حتى نتعرف على بعض والي عرفته من شخصيته
شخصيه قويه جاد بحياته انسان ملتزم الصح صح والغلط غلط ما عنده حل وسط مثقف وكولشي فاهم ولوتي بحيث ما اگدر اضم عنه شي او اكذب عليه وهو المعيل لهله موضف وراتبه نعمه من الله وبالبيت امه واخوه متزوج هو ومرته واولاد اثنين واخوه ممتزوج وابوه وامه وبيتهم طابقين بيت اخوه فوگ واني غرفتي جوه وغرفه امه وابوه وديوان ومطبخ وهول كبير وحديقه بيتهم كولش حلو وغرفه كبار وفرهه وحلوه وبنائه جديد ومرتب علمني هواي شغلات عن اطباعهم وعاداتهم ولازم البس عبايه لان ميحب تكون زوجته فرجه للناس وهمين اكبر مني ٨ سنوات عجبني فارق العمر لان كولش فاهم وخلوق
