بيرق الاحزان
همس القوارير
البارت الثامن
فد مره رحنا لبيت خالت يوسف ام بيداء عزمتنا عالغدى اني ويوسف والله رحبت بينا وگمت وياهم وساعدتهم. وتغدينا دخلنا لغرفة خالته دنشرب شاي
خالة يوسف
يمه الله يساعدج على عمتج متنحمل دائما تگول بيداء تعاملج مو زين والشغل كوله عليج ودائما تحجي عليج وتگول انتي مو نضيفه بالرغم بيداء تمدح بشغلج وتگول خالتي مو زينه وياها وهي خالتي وصخه ومنافقه وحجاية وجهين
اني بصراحه تفاجئت من كلام اختها عليها وبيداء شلون تحجي هيج على خالتها وهي امها شلون قبلت بيداء تحجي على اختها گدامها
زمن
لا عمتي زينه بس عصبيه شويه اني تعودت الشغل ميتعب واني الحمدلله مرتاحه
خالة يوسف
عمي نيالها على هيج چنه متنطي بيها وخادمتها بعد شتريد امينه خاتون
زمن
تسلمين خاله والله عمتي زينه الحمدلله حتى ويانا شنريد منها كلش كافي هي ام يوسف اخليها بعيوني
المهم كملنا غدى وتونسنا ورجعنا للبيت شافني يوسف مرتاحه خطيه مكيف رجعنا وكعدنا يم عمتي سئلتنا على اختها وشنو سوتلنا غدى كتلها الناس مقصرو الحمدلله ارتاحينا عدهم طبعا اني مسولفت ليوسف رجعت استلمت المطبخ طبعا ماعين الغدى محد غاسلهم ينتضروني ونضفت المطبخ وسويت عشى اجه يوسف تعشينا بعدها دخلنا غرفتنا واجه يوسف يحضن بيه ويبوسني گتله والله تعبانه اليوم خطيه متفهم الوضع لان حامل گالي ارتاحي ولفيت راسي ونمت ثاني يوم طبعا گعده من الصبح ريوگ ومطبخ وطبخ وتنضيف هستوني كملت الغدى دافوت لغرفتي وصاحت عليه عمتي
ام يوسف
ولج تعاي عوبه شنو حاجيه عليه بيت اختي
زمن
اني والله كولشي محاجيه
ام يوسف
لا حجيتي ومسيتيني گدام بيت اختي يا عديمة التربيه انه اعرف شغلي وياج عبالج اختي تصف وياج
زمن
لا والله محجيت شي
نزل حماي على صياح امه
قصي
شكو يمه شصاير
ام يوسف وهي تبجي
هذه الحيوانه الي ممتربايه رايحه لبيت اختي تگوللهم عمتي وصخه ونقالة حجي ومنافقه وما تنحمل والله يفكني منها شوكت تموت وارتاح
اني بقيت ساكته وصافنه نصدمت من حجيها تقربلي حماي
قصي
والله لو ما زوجة اخوي ومالي حق الزمج چان كسرتج تكسر هسه بس اخاف يحسبونج عليه مره
حشى الاگول بوجهه تفل عليه وراح يم امه ويصيح
قصي
هي هاي بنت شوارع منين الله جابها علينا شنو الزبايل الي ندخلها لبيتنا خلي يجي هذا يوسف اذا ما خليته يموتج اله ادفنه هنا كلشي ولا امي خط احمر ديري بالج
وهي موتت روحها بجي واني دخلت غرفتي وسديت الباب ابجي ومصدومه من الصار والله اني محجيت حجي بيداء هذا شويه ودگ الباب يوسف وتلگته امه بدموع وبجي طلعت اشوفها شنو تحجي اول مدخل
يوسف
شبيكم شصاير يمه ليش تبجين ما عاش الي يبجيج
ام يوسف
يمه والله من ورى مرتك ليش هيج اني قصرت وياكم اني غثيتكم حتى الشغل كوله عليه اگول حامل خطيه هذه جزاتها ليش هيج ياربي حضي
يوسف
شبيها زمن غير افتهم
ام يوسف
من رحتوا البارحه لبيت خالتك ضاله تحجي عليه اني وصخه وانقل كلام ومنافقه ومشغلتها خدامه شوكت تموت وارتاح منها مخلت حجايه محجتها حتى على خواتك
طبعا ضافتلها بهارات للسالفه
يوسف
مستحيل اني جنت موجود وزمن محجت شي
اني واكفه گبالهم وابجي
ام يوسف
لا يمه هي وخالتك دخلن للغرفه يشربن شاي ويسولفن انت شمدريك بالحجي الصاير
زمن
يوسف والله محجيت شي اني يمك ما احجي مو احجي گدام خالتك اصلا الحجي بيداء حجته
وگام قصي يريد يضربني
قصي
حقيره تردين تخلين الحجي على مرتي وطلعين منها اذا ما تضربها اني اضربها
ضلو يتحاجون بينهم اجه يوسف ضربني راشدي ودفعني بالغرفه وسد الباب واسمع عيطتهم وصياح امه لسابع جار طلعتني اسفل السافلين واني بالغرفه وابجي
