Bachelor's Pad series book 1: MR. INVINCIBLE

Part 31

MABILIS na lumipas ang mga araw. Nagulat pa si Daisy na araw na ng benefit concert ng TV8 Foundation. Kahapon pa sila walang tulog sa paninigurong maayos ang lahat. Habang nag-aayos sila ng stage, dumaan pa ang kanyang ama kasama ang ilang miyembro ng board of directors at pinaka-head ng TV8 Foundation na tiyahin niya. Mukhang impressed naman ang grupo dahil nang magtama ang tingin nila ng kanyang papa ay ngumiti ito at pasimpleng nag-thumbs-up.

Pagsapit ng gabi, nagsidatingan na ang mga performer sa backstage. At nang matanaw ni Daisy ang mga miyembro ng Wildflowers, agad na sumikdo ang kanyang puso at hinanap ng mga mata si Rob. At nang makita ang binata, magkahalong saya at kaunting kirot sa dibdib ang kanyang nadama. Dalawang araw niyang hindi nakita si Rob dahil masyado siyang abala. At alam niya na hindi pa rin sila magkakaroon ng pagkakataong makapag-usap. Subalit sapat na sa kanya na makita ito ngayong gabi.

Kukunin na sana ni Daisy ang atensiyon ni Rob nang lumapit si Remi sa kanya, isa sa mga katrabaho. "Daisy, nandito na ang mga major sponsor. Inihatid na namin sa VIP seats. Kailangan mo silang batiin, hindi ba?"

"Oo," sagot ni Daisy. Hindi na siya nagkaroon ng pagkakataong masulyapan man lang uli si Rob dahil hinatak na siya ni Remi paalis ng backstage at patungo sa VIP seats. Pagkatapos ng mga sponsor, kinailangan din niyang batiin ang iba pang VIP guests. Sunod niyang inasikaso ang media na nagko-cover ng kanilang event. Bumalik lang uli siya sa backstage upang batiin ang Wildflowers.

"Are you girls ready?" tanong ni Daisy sa limang babae.

Ngumiti ang mga babae sa kanya.

"Yes. Huwag kang mag-alala, we're always ready," sabi ni Yu.

Gumanti siya ng ngiti at hindi napigilang igala ang tingin dahil wala sa tabi ng banda si Rob. "Ahm, nasaan ang manager ninyo?"

Hindi nakaligtas kay Daisy ang bahagyang pagkawala ng ngiti ng Wildflowers at ang nag-aalalang palitan ng tingin ng mga ito bago sumagot si Carli. "Kasama niya si Rick. Biglang tumawag ang producer namin sa Amerika para sabihing nasa NAIA sila. Susunduin nina Rob si Mr. Gallante."

"Oh, okay." Hindi niya alam kung bakit may worry sa mga mukha ng Wildflowers na marinig na darating ang producer ng banda. Subalit katulad ng maraming bagay sa araw na iyon, hindi natuon doon nang matagal ang kanyang isip.

"Stand by, Wildflowers!" sigaw ng isang staff.

Tumalima ang limang babae at muling ngumiti si Daisy. "Have fun."

"We will!" Iyon lang at nagtungo na sa stage ang Wildflowers. Kahit nasa backstage, narinig ni Daisy ang ingay at dagundong ng sigawan ng mga manonood sa labas. Muli niyang iginala ang tingin sa paligid, nagbabaka-sakali pa ring makita si Rob kahit alam niyang wala roon ang binata. Sana lang ay naroon na si Rob bago matapos ang benefit concert. Gusto niya na makapag-usap naman sila ngayong gabi.

Nang magsimula nang mag-perform ang Wildflowers, kinalma ni Daisy ang sarili at naglakad patungo sa gilid ng stage upang manood. Ngunit habang nag-e-enjoy ang lahat ng tao roon, ang kalahati ng kanyang atensiyon ay nag-aabang sa pagdating ni Rob.

Ang kaso, patapos na ang set ng Wildflowers ay wala pa rin ni anino ni Rob. At dahil tinawag na si Daisy ng emcee upang ipakilala sa lahat ng dumalo bilang major organizer ng event, nawala na ang kanyang atensiyon sa pag-aabang sa pagdating ng binata.

Dahil paano pa siya madi-distract kung nasa harap na siya ng libo-libong tao? At ang iba roon ay ang board of directors ng TV8, ang kanyang ama, at iba pang matataas na posisyon sa alta-sosyedad? Higit sa lahat, sigurado si Daisy na karamihan sa mga taong naroon ay nasundan ang masasamang balita tungkol sa kanya habang ang iba ay siguradong hindi siya gusto.