باسل كان بسمع في كلام وجن وهو سااكت وهادئ وما رد ليها بي كلمه وقفل الخط ورقد وهو بفكر وخاتي يدو في راسو...
وجن اتصلت لي مها وحكت ليها الحصل عشان لو باسل اتصل ليها يكون كلامهم واحد.. مها قالت ليها ماكان تعملي كدا البت دي مسكينه والله وجن قالت ليها اسمعي هنا انا كلمتك ولو قلتي حاجه لي الولد دا بتخسريني
في اللحظه دي علا بدت تصحى .
مها قفلت الخط وجرت عليها ...
كان في دكتور بسمع في كلام مها مع وجن كلوووو من البداايه وهو كدا فهم الحصل وخلا المريضه توصل للحاله دي.. الدكتور دا اسمو محمد وعنو دور في القصه بلاقينا في الحلقات الجايه..
علا صحت وكانت في نفسها بتدعي وتقول ياااارب يااارب اطلع حلمانه يااارب اكون حلمانه واصحى القى مافي شي يااارب طلعني من الهم والمصيبه دي...
بس دعواتها م بتغير الواقع
فتحت عيونها لقت مها جنبها مها بقت تقول ليها ي علا خوفتينا عليك علا بقت تبكي بي صوت مبحوووح ورايح مها حضنتها وبقت تصبر فيها ي بت اهدي واصبري خلاص دا قدر ربنا خلاص دا الحصل البكا م بغير شي
علا قالت ليها مها سوقيني من هنا طلعيني وقامت على حيلها
مها قالت ليها ح تمشي وين؟
وح تعملي شنو علا قالت ليها بس ارح
طلعتهم كدا لقو عفاف وابتسام علا عاينت ليهم نظرة احتقاااار وبقت طالعه بس م خلوها وطلعو وراها وعفاف بقت تكوورك ليها ي بت استني ي علا انتظري ي علا افهمي بس علا م ردت وطلعت الظلط وقفت ركشه وطلعت فيها طوالي وقالت ليها اركبي يامها ومشت طوالي على الشقه ..
عفاف وابتسام وقفو الركشه ووراهم طوالي ..
علا وصلت وطووواالي دخلت اوضتها ونزلت شنطه كبيرة وبقت تلم في حاجاتها هدومها وشيتاتها واي شي بخصها دخلت غرفة حبوبتها ولقت فيها بواقي السجاير والقذارة شالت الفلاشه وكم حاجات بتخصها
كانت بتلم في حاجاتها سرعه سرعه عشان م تشوف عفاف وهي طالعه
ومها كانت بتساعدها بس قبل م يلحقوا ويلموا
عفاف جات داخله ومعاها ابتسام علا كانت ساكته ومواصله بتلم في حاجاتها
عفاف بقت تتكلم معاها ح تمشي وين وح تعيشي من وين وفي النهايه انا امك وما حأخليك..
علا قالت ليها انتي ما امي انتي وجدان.. وانا امي ماتت من زمان وياريتني انا مت قبل م اكتشف حقيقتك ي وجدان بتتكلم وهي بتلم في حاجاتها ومها بتساعد فيها
عفاف قالت ليها م حتطلعي من هنا وما حتمشي مكان وانا اي غلطانه لكن برضو م يمنع اني امك وانتي ماعندك زول غيري ح تمشي وين وحاتعيشي من وين
علا قعدت وقالت ليها زي م انتي بعتي شرفك بالقروش انا كمان ببيعو وبتبع خطواتك ومنك بتعلم ي وجدان هنا ابتسام اتدخلت وقالت ليها ي علا احترمي نفسك مهما كان دي امك علا قالت ليها انتي بالزاات مفروض م تتكلمي..
عفاف قالت ليها يعني انتي صدقتي كلام منصور وماعاوزة تسأليني من شي قالت ليها وعاوزاني اسألك من شنو وهو كان معاك في الاوضه
عفاف قالت ليها ي زولة تمام اعملي البريحك لكن انتي كان عاوزة تنحرفي م حتكوني فرقتي مني في شي واعرفي انو لو طلعتي من الباب دا م حترجعي تاني واياااك من تجي راجعه تاني علا قالت ليها
اقوول ليك حااجه انا م طالعه انا قاااعده في البيت دا لكن انتي لو فتحتي خشمك معاي ولا سألتيني من شي ح تندمي وانا حافضحك واتفضلي انتي وصحبتك اطلعوا برا من غرفتي
طلعتهم وقفلت الباب عليها هي ومها
علا قالت لي مها ي مها عليييك الله اقيفي جنبي ي مها اقعدي معاي م بقدر اعيش معاهم براي
مها قالت ليها انتي ليه غيرتي رايك ووافقتي تقعدي
قالت ليها ﻷنو عاوزة انتقم من امي...
انا لااازم انتقم ...مها قالت ليها ي علا انتي راسك فيهو شنو وبتفكري في شنو؟
علا قالت ليها خليهو بالنيه بس وارح هسا نمشي الداخليه نجيب حاجاتك ونجي
وفعلا طلعوا ومشو الداخليه..
وجن طبعا عملت نفسها م عارفه شي وقالت ليهم مالكم اتأخرتو كدا وانتي ي علا وشك دا وارم كدا مالو علا قفلت باب الاوضه وحكت ليها بالتفصيل وقالت ليها ﻷنك انتي صحبتي واختي وانا م عندي غيركم انا عاوزاكم تقيفو معاي وتمشو معاي بيتنا وكانت بتبكي
وجن قالت ليها انتي عاوزة تعملي شنو
علا قشت دموعها وبي ابتسامه كدا حزينه ابتسامة زول يائس وفقد اي شي وماعندو شي يخسرو قالت ليها ....ح تشوفي براك
الحلقه الجايه علا ح تعرف وجن ومها على حقيقتهم وانهم ش...ش بالمعنى الواضح
يتبع....
