جنون عاشق .. للكاتبة المتميزة ... الاء الشريفي

الحلقة الخامسة عشر

الحلقة الخامسة عشر


(. قعدت فطيمة تبص فى الشارع بتركيز .)
فطيمة : ايه ده !!
زياد : هاا شايفة ايه ؟
فطيمة : شايفه عيال بيلعبوا كرة فى الشارع
زياد : انتِ هتهزرى يا فطيمة
فطيمة : مانا مش فاهمه حاجة بصراحة
زياد : فى حد مراقبك
فطيمة : حد مراقبني !! انت بتقول ايه ؟
زياد : فى العمارة اللى قصادكوا فى راجل قاعد مع بتاع الامن
فطيمة : طيب وايه المشكله ؟
زياد : الراجل ده بقالى فترة بشوفه بيمشي وراكى شكله مخبر
فطيمة : مخبر !! ليه بتقول كده ؟
زياد : شبه المخبرين شكله كده وتصرفاته وبعدين ايه اللى ممكن يراقبك غير مُخبر
فطيمة بقلق : وانا هيراقبني مُخبر ليه يا زياد
زياد : معرفش يا فطيمة انتِ ادرى
فطيمة : انت خوفتنى
زياد : لا متخافيش انتِ بس خدى بالك من تصرفاتك وكل خطواتك الفترة الجاية
فطيمة : خطوات ايه وتصرفات ايه بس انا مش هخرج من بيتنا
زياد : لا تعاملى طبيعي ، بس قوليلي انتِ عمرك كان ليكي نشاط سياسي او ما شابه او مثلاً حد فى عيلتكوا
فطيمة : لا محدش فى عيلتى قبل كده دخل قسم اصلاً ولا مشيوا فى مظاهره
زياد : شكل كده فى ضابط عايز يخطبك وممشي وراكى مخبر
فطيمه : تفتكر
زياد : وارد
فطيمة : ربنا يستر
زياد : متقلقيش خير ان شاء الله
*_____________________________________________**__ _________________________*
فى احدى الكافيهات ...
(. بعد ما مشيت رهف من عند أدهم فى العيادة كلمها وطلب منها يتقابوا لانه مخنوق شوية .)
رهف : مالك يا حبيبي
أدهم : انتِ بتحبيني ؟
رهف : ايه ده !! ده سؤال تسأله
أدهم : حبيبتى انا مش عارف مالى حاسس انى متلخبط وتايه
رهف : وانت معايا ؟
أدهم : عشان معاكى
رهف : مش فاهمه ؟
أدهم : انا لما بحب بحب اوى ، بحب بصدق وبكل مشاعرى زى ما بيقولوا وده السبب اللى بيدمر حياتى لو اللى بحبه ده فارقني
رهف : بس انا عمرى ما هسيبك ، مفيش اى حاجة هتاخدنى منك الا الموت
أدهم : نفسى حتى الموت مياخدكيش منى
رهف : ياريت بايدينا منفارقش الناس اللى بنحبهم حتى بالموت
أدهم : انا بحبك اوى عشان خاطرى متبعديش عنى
رهف : ابعد عنك ايه يا اهبل هو انا اقدر
أدهم : اهبل !! هى حصلت
رهف : طيب اقولك حاجة وتصدقنى
ادهم : انا بصدق كل حاجة تقوليها
رهف : انا بقيت زيك بالظبط ، حاسه انك فى حياتى من زمان
أدهم : بجد ؟
رهف : بجد والله يا أدهم ، حاسة انك معايا بقالك سنين يمكن من يوم ما اتولدت
أدهم : انا بحبك اوى
رهف : وانا بعشقك
*_____________________________________________**__ _________________________*
بعد كام يوم فى ليڤربول ...
(. ذكرى قاعدة بتقرأ مجله ، رجع من بره مروان واتسحب وجه من ورا ضهرها وباسها فى خدها ، ذكرى اتخضت وفرحت .)
ذكرى : حبيبى انت جيت
مروان : لا يا روحى مجتش بس بعت شفايفي يبسوكى ويرجعوا تانى
ذكرى : ههههه ، كنت فين بقي كده وسايبني
مروان (يلف ويقعد جنبها) : كنت بخونك
ذكرى : نعم !!
مروان : ههههههه يا هبلة صدقتى بسرعه كده
ذكرى : مانا بصراحة بقلق منك
مروان : لا لا اقلقى فى كل حاجة الا موضوع الخيانه ده
ذكرى : اشمعنى بقي ؟
مروان : لانى مبحبش الخيانه ، يعني لما كنت ببقى على علاقة مع واحدة وبرغم انها علاقة عابره الا انى كنت بحترمها ومكنتش بعرف حد غيرها ، تقريباً انا عمرى ما عرفت اتنين فى نفس الوقت
ذكرى : غريبة اوى انك تكون بتعمل حاجة تغضب ربنا بس بتتقى ربنا فى نفس الوقت
مروان : الخيانة ملهاش علاقة بالتدين قد مالها علاقة بـ طبع الانسان
ذكرى : عندك حق
مروان : بحبك بقي
ذكرى : وانا بموت فيك يا روحى
مروان : قوليلي بقي ، مبسوطه هنا
ذكرى (بتحضنه) : اى مكان معاك يبقي جنة يا روحى بس .... (وتسكت)
مروان : بس ايه ؟
ذكرى (بتقوم من حضنه) : بس انا نفسى اعيش حياة طبيعيه
مروان : يعني ايه حياة طبيعيه ؟
ذكرى : يعني اطبخلك ، البس اللى انا عيزاه فى اى وقت ، اتكلم براحتى ، بصراحة يا مروان الحياة الممنهجه دى انا مش متعوده عليها ومش قادرة اتعود
مروان : انا مستغرب جداً بصراحة يعني لما اقولك انا عايز اريحك واخليكي ملكة دى حاجة متخلكيش مبسوطه
ذكرى : حبيبي الوسطيه افضل شئ ، يعني الحياة متكونش مُرفهة اوى ولا تكون قاسية اوى ، يعني لا ناكل بالشوكه والسكينه ولا ناكل بايدنا ناكل بالمعلقه ، خير الامور الوسط
مروان (بياخدها فى حضنه) : بصى يا حبيبتى ، انا عندى ٤٣ سنه يعني مش صغير عشان اغير طباع اتربيت عليها من زمان ، انا اتربيت ان الاكل بالشوكه والسكينه مثلاً ، اتربيت ان النوم له لبس والبيت له لبس والخروج له لبس والخروج كمان له تقسيماته ، اتعودت ان فى حد بيدير البيت ، اتعودت ان كل حاجة لها وقتها ولها نظامها
ذكرى : واضح ان احنا اتربينا كل واحد بشكل مختلف خااااالص
مروان : بس انا كبرت على التغيير لكن انتِ لسه صغيره ممكن تتعودى على ده
ذكرى : اتعود على ايه بس يا مروان ، ازاى تبقي الحياة عباره عن فساتين وخروجات وتنطيط وفسح واكل ونوم ، لازم يكون في هدف
مروان(بيمسك ايدها ويبوسها) : انا هدفى انى اسعدك ممكن يبقي هدفك فى الحياة انك تسعديني
ذكرى : طيب ممكن عشان خاطرى تفكر فى موضوع الشغل تانى
مروان : حاضر يا حبيبتى
ذكرى : حاجة كمان
مروان : امممممم
ذكرى : متشربش خمور تانى وانتظم فى الصلاة شوية
مروان : خمور !! انا مشربتش من ايام ما كنا فى شرم
ذكرى : بجد يا حبيبي
مروان : بجد يا قلب حبيبك
ذكرى (بتحضنه اوى) : ربنا يخليك ويهديك ليا يارب
مروان : ويخليكي ليا يا حبيبتى
*_____________________________________________**__ _________________________*