Sazaye ishq. سزائے عشق Completed ✔️

Book 2 chap 17

" konsi baat..? achha pehlay tum idhar aao , yahan betho" Zoyan ne usay haath se pakar kar bed par bitha diya. Zarish chup chaap uska kehna maan rahi thi.

" ab Aaraam se batao,  raat ke is waqt tumhain Mateen se kya kaam yaad aagaya hai ?.."

" Zoyan tumhain pata hai Aapi ko severe depression ke attacks hotay hain , aur is liye wo rozana uski dawaaiyaan leti hain. Par do din se , in saaray jhammelon main Aapi ne koyi dawaayi nahi li . Aur aaj.. Aaj to tum ne bhi dekha hoga ke Aapi itni khaamosh lag rahien thien. Aur humain jis baat ka dar tha, aapi ne wesa kuchh nahien kiya. "

Zarish ne apni pareshani ki wajah batayi aur Zoyan uskay saamnay zameen par ghuthnon pe betha Zarish ke haatho ko apne haathon main thaamay khaamosh usay sun raha tha.

Aayat depressed thi..? Usnay dekha nahien  , kyunkay saari raat uski nigaahon ka markaz to sirf Zarish bani huwi thi. Par ye dawaiyon ki baat kis taraf jaa rahi hai..? Aur do din dawayi na khane se kya farq par sakta hai...?

" haan to Mateen ko batana hai ke Aayat ne dawaaiaan lien hain..?"

" nahien Zoyan... Yehi to mujh se ghalti ho gayi hai. mujhay ammi ne bataya tha ke aaj kisi ke haath aapi ko dawaayi deni hain par main Aapi ko dawaayi bhaijna hi bhool gayi... Ab agar itefaaq se aaj aapi ki tabiat kharaab ho gayi to..!? Zoyan mujhay dar hai agar aapi ko panic attack huwa to Mateen bhaai aapi ko sambhaal nahien paayain ge. "

"Kyun...?"

"tumhain nahien pata us haalat main Aapi ko sambhaalna kitna mushkil hota hai. mujhay lagta hai mujhay is waqt Aapi ke saath hona chaahiye.." Zarish is waqt waqayi bohat pareshaan lag rahi thi. Aayat ke liye uski fikar saaf ayaan thi.

Zarish ne pareshani main apna sar pakar liya . Usay samajh nahien aa raha tha ke wo Aayat ki dawaayi dena kesay bhool gayi. Aur wo bhi tab jub Aayat pehle se hi itni depressed thi. 

" idhar meri taraf dekho Zarish...... Aisa kuchh nahien hoga , Aur tumhaari aapi itni kamzor nahien hain jitna tum unhain samajhti ho , wo bohat mazboot hain.  Aur tum har waqt to unkay saath nahien reh sakti Na.? unhain akelay apni zindagi main barhnay do "

Zoyan ne usay samjhaanay ki koshish ki, par Zarish ka dil ab bhi bechain tha. shayad is liye kyunkay sirf wahi thi jis ne pehlay us haadsay aur phir unkay abu ki wafaat ke baad Aayat ke dard ki gehraayi ko uski cheekhon main suna tha. sirf wahi thi jo Aayat ko uski siyaah  raaton main sambhaalti thi.

" Par Zoyan.." Wo ek maasoom bachay ki tarhaan Zoyan ki taraf dekhte boli. Uska chehra ab bhi fikar mandi se bhara tha.

Is waqt wo Zoyan ko itni khoobsoorat lag rahi thi ke usay apni khush qismati pe yaqeen nahien aa raha tha. Ke itni paak rooh us jesay larkay ke naseeb main kesay aa gayi. Zarish jitni zaahiri khoobsoorti ka paikar thi , Utna hi uska dil bhi khoobsurat tha.

Usay is tarhan dekh Zoyan ka dil khushi se shaad ho gaya tha.

" Mateen Aayat ko sambhaal le ga.. tumhain uskay liye pareshaan honay ki koyi zaroorat nahien hai. " Apnay haathon main pakaray Zarish ke haathon ko Zoyan ne apnay honton se lagaatay huway kaha. To Zarish ke udaas chehray pe halki si muskurahat phail gayi.

" tumhain poora yaqeen hai...? " Zarish ke maasoom sawaal par Zoyan muskura diya. Wo Zameen se utha aur uskay saamnay khara ho gaya. Zarish ab gardan uthaaye uski taraf dekhtay huway uskay jawaab ka intzaar kar rahi thi.

" mujhay poora yaqeen hai.." Zoyan ne kaha aur apnay cupboard ki taraf barh gaya. Zarish usay heraangi se dekh rahi thi. Wo apnay cupboard se kuchh nikaal kar waapas aa gaya aur abkay wo Zarish ke bilkul barabar main beth gaya. Uskay haath main red colour ka velvet ka box tha.