Sazaye ishq. سزائے عشق Completed ✔️

Book 2 chapter 15

Koyi to baat thi jo usay pareshan kar rahi hai. 

" aur soch soch kar maathay par paseenay bhi aa gaye...? kyun bhai aisa kya soch rahay thay.." Abkay idrees ne luqma diya to ek baar phir qehqahon ka silsila shuroo ho gaya jo Murad sahab ke unki taraf aanay se hi ruka.

Zoyan sirf hont bhinchay muskurata raha par Mateen main is ki bhi himmat nahi thi. Wo is waqt sirf is soch main gharq tha ke aaj ki raat wo Aayat ka saamna kesay karay ga.

Function ke khatam hone ke qareeb Murad sahab , Mateen Zoyan aur baaqi qareebi rishtay daaron ke saath ladies hall main daakhil huway jahan khawaateen ne inka kayi rasoomaat ke saath istaqbaal kiya.

wo dono fehmida beghum ke humraah saamnay stage par do baray royal velvety sofon par surkh libaas main sar jhukaaye bethi Aayat aur Zarish ki taraf barhay.

Mateen ki nazar jub Aayat ke chand ko sharmaatay chehray par  pari to wo jesay saans lena hi bhool gaya tha.

Paanchh saal pehlay , Kitni khuaahish thi uski Aayat ko is libaas main apnay liye sajay sanwaray dekhnay ki.

In lumhaat ki.... jub wo haq se ye keh sakay ke ye meri Aayat hai...!

aaj ye banao singhaar Aayat ne sirf uskay ke liye kiya hai , us se uthti ye madhosh karti mehak aaj aur humaisha sirf usi kay liye hai, aur kisi ke liye nahien.

Aur aaj...  paanchh saal baad...

jub sub kuchh barbaad ho chuka hai.

jub wo khud ye baat jaanta hai ke wo Aayat ke laayak hi nahien hai.. phir bhi,  uskay andar ke ek khud garz mard ko apni la haasil mohabbat ko haasil karnay par , uski anaa ko, uski izzat e nafs ko jo taqveeyat mili thi , wo is se qatayi inkaar nahien kar sakta .

Har cheez se be khabar , wo apni is fatah ko , is dushman e jaan , dil ruba ko bina palak jhapkaaye dekhta raha , jo us se mansoob thi. phir chaahay in dono ke ird gird kitnay hi sachaayi ke zehrilay kaantay uska is lumhay se nikal aanay ka intzaar kar rahay hon.

aur unka intzaar zyada taveel na honay paaya tha ke doosray hi lumhay Aayat ne apni nigaahain uthaayi thien aur apnay aas paas itnay logon ki mojoodgi ke bawajood wo aankhain seedhi Mateen ki aankhon se takraayien thien.

Jesay wo us ki mojoodgi aur apni taraf uthti un nazron ki tapish se maanoos ho.

Mateen ki nazar Aayat ke be taassur chehray par pari , jo har taassur se aari ek laash ka gumaan de raha tha.

Aaj un aankhon main na dard tha, na ghum, na khauf..... kuchh bhi nahien...

kuchh bhi aisa nahien tha jis se gumaan ho ke wo ek zinda insaaan hai , koyi zinda laash nahien.

Mateen ko apnay seenay main uthta dard aur gehra hota mehsoos honay laga. Par Aayat ne kuchh hi lumhom main apni nazrain phir se jhuka lien aur Mateen ko apnay hisaar se azaad kar diya.

Fehmida beghum ne Mateen aur Zoyan ko Aayat aur Zarish ke barabar bitha diya. Mateen ko laga jesay waqt ruk sa gaya ho.

Wo intzaar kar raha tha ke usko apnay nazdeek dekh Aayat wahan se cheekhti chillaati uth khari hogi , aur Mateen se ek baar phir apni nafrat ka izhaar karay gi.

Par waqt apni usi raftaar se chalta raha ..aur jesa Mateen ne socha tha , wesa kuchh bhi na huwa.

Aayat abhi bhi us ke barabar main jeyun ki teyun bethi rahi.

Na uska naazuk wajood kaanpa , aur na hi usnay ek lafz bhi kaha. Balkay usnay ek nazar bhi utha ke Mateen ki taraf dekha tak nahien.

Par doosri taraf Mateen... Mateen Aayat ko apnay itnay nazdeek mehsoos karkay , guzartay har lumhay ke saath, wo khud ko ek  jaani pehchaani kefiyat main ghirta mehsoos kar raha tha.