انت موتي

6

#انت_موتي
#للكاتبة Hiba Abbass   
الحزء العاشر         
مياده رجعت على بيتهم و مشت غرفة مها
_ حسام جا ؟
_ عاوزه بيه شنو . مياده بفقد اعصابو و بضربك بعد ده
_ حنين مظلومة
_ دليلك ؟ . هو ما اتهمها ساي كان كل شي بادلة
_ للاسف ما عندي بس حاجيب
_ انتي متأثرة بالافلام و لقيتي ليكي موضوع و عاوزة تعملي فيها كونان شوفي قرايتك احسن ليكي
_ خيير
مياده مشت غرفتها و كانت مغيوظة لدرجة اتصلت على رماح حبيبها قالت تشكي ليه همها يمكن يفكر معاها في حل
_ الوو
_ حبيبو كيفك
_ ما كويسة يا رماح و الله
_ ليه في شنو ؟
و حكت ليه كل القصة
_ طبعا تخطيط من امو حاصل في القصة دي
_ اي طيب اكشفو كيف ؟
_ ما عارف و الله يا مياده لكن مافي غير تعملو نفس الحركة
_ اللي هيا ؟
_ تسرقو تلفون وائل امكن تلقو فيه شي بتعلق بالموضوع
_ المشكلة حافتش في رسايلو مع منو
_ انتي ما شاكة في زول معين
_ مافي غير عزه البت دي خلقة ما بطيقها
_ اها عشان ما بطيقيها تشربكيها فيها ؟
_ لا بس ما بعرف
_ حاولي تخلي حنين تسرق تلفون وائل
_ انسب حل بس ان شاء الله نلقى فيه شي
و قعدت تفكر بس اتزكرت انو وائل غير تلفونو و بعداك قعدت تقرا و كانت مستنية حسام يجي . و لمن سمعت صوتو تحت مع امها طوالي طلعت ليه لاقتو في الممر
_ حسام ممكن تجي لحظة عاوزة اتكلم معاك
_ لو عاوزة تفتحي نفس الموضوع انا ما داير اي كلام
_ عليك الله بس عشان خاطري
دخل معاها غرفتها و قعد في الكنبة و هي قعدت جمبو : حسام في لعبة اتعملت عليك انت و حنين و زي ما انت خاتي انها خانتك هي ...
قاطعها حسام : الفت ليكي قصة عشان تبرر لنفسها . مياده ما ليكي دعوة بالموضوع ده بس ابعدي عنها و لو سمعتا انك اتكلمتي معاها تاني ما تلوميني على البحصل
_ حسام عليك الله اديني فرصه اتكلم . في ناس دخلو بينكم و عملو لعبة عليكم و اولهم وائل . وائل لا حبيبها لا شي وائل صاحبها و بدت تحكي ليه كل شي
حسام باستهزاء : قصه جميلة جدا بس للاسف مافي اهبل بصدقها
_ عارفاك ما حاتصدق لكن لو جبتا ليك ادلة
_ ادلة شنو انا شوفتا مكالمتها معاه و رقمها في تلفونو و رسايلهم
_ بسسس سؤال . رسايلهم دي لمن فتحتها شوفتا رقمها ؟
_ شوفتا الاسم قدامي مسجل بحنين و رقمها تحت الاسم في مكالماتهم
_ حسام انا ما بتكلم عن المكالمات بتكلم عن الرسايل في الواتس قريت الاسم بس و لا اتأكدت انو هو نفس رقمها ؟
_ لا قريت الاسم . بس ده ..
قاطعتو مياده : طيب ليه ما يكون مسجل رقم اي زول تاني و اتكلم معاه على انو حنين عشان يوريك الرسايل دي
_ هو العرفو شنو انه تلفونو حايقع في ايدي ؟
_ ليه ما يكون التلفون ما اتسرق و لا حاجه ؟
_ قصدك انو عزه متفقة معاه ؟ مياده عليكي الله انتي لسه صغيرة و طيبة و ما بتعرفي شي
_ حسام ليه واثق في عزه للدرجة دي ؟
_ لانها مستحيل تكذب علي في شي هي ..
_ حسام بلا صحبتي بلا اختي من سنين يعني بتثق فيها اكتر من حنين ؟
حسام و قف و بعصبيه قال لمياده : لو حنين مظلومة خبت علي ليه انها بتتكلم مع وائل الحاجة لو ما غلط ما بطر الواحد يدسها
مياده وقفت و فجأه انفعلت : عشان عصبيتك دي عشان ما حاتديها فرصة تفهمك هي ليه بتتكلم معاه عشان من اول كلمة حاتقول ليها اقفلي الموضوع و ما تتكلمي مع وائل تاني
_ لانو انا عارف وائل شنو
_ طيب هي ما كانت عارفة و قايلة الخلاف البينكم سوء تفاهم ما تنسى انك ما وريتها ليه اتشاكلتو
_ لانو زمان كنتا اهبل و قايلها بت بريئة و محترمة و لو عرفت انو واحد من اصحابي و لا ود اهلي قال عنها كده اكيد حاتتجرح
_ طيب هي تعرف من وين ده كله ؟ بتعلم بالغيب ؟
_ مياده اقفلي الموضوع ده و ما يتفتح تاني و ..
قاطعته مياده : اديني بس اسبوع و انا بجيب ليك كل الادلة و بثبت ليك كل شي
_ اسمعي يا مياده ..
_ ما حاتخسر شي و الله ما حاتخسر شي و بعدها العاوزو بعملو ليك
_ انا ما عاوزك تحتكي بيها لاي سبب
مياده دموعها نزلت : و الله حنين مظلومة و هي كمان شايفاك زي ما انت شايفها و ما عارفة انك كمان مظلوم انا ما وريتها برضو اي شي لانها هي كمان ما حاتصدق بس اديني فرصه اوضح ليكم كل شي
حسام لمن شاف دموع مياده و اصرارها عرف انها هي بتحب حنين شديد و ما حايقدر يقنعها الا تقتنع براها : اعملي العاوزاه لكن اعرفي انو مافي حقيقه غير القلتها ليك عشان كده مافي اي دليل يثبت عكس كده و بضيعي في زمنك ساي و لو ركزتي في قرايتك احسن ليكي و بعد الاسبوع ده ما اسمع السيرة دي تاني لانك اصلا حاتقتنعي براكي
و طلع من غرفة مياده . و مشى على غرفتو و ما ختا في راسو غير انو كل القالته مياده عباره عن قصة الفتها حنين عشان تبرر موقفها قدام مياده و هي براها حاتقتنع . تاني يوم العصر بعد دوام المدرسة مياده مشت لحنين لحصة الفيزياء قبل مواعيد الحصه ب10 دقايق مياده بعد ما فتحت ليها الشغالة دخلت و قعدت في الصالون و جات حنين نازلة و دخلت الصالون
_ ما تخافي جيت بموافقة حسام
_ كيف ؟!
_ ما تشغلي بالك حسي في الوقت المناسب حاتعرفي كل شي
_ مياده انا عاوزه اركز في قرايتي و ما عاوزة انشغل بشي تاني و الموضوع ده انتهي
_ سمح ركزي فيها . و اقنعيني انك من امس ما فكرتي في كلامي
_ لا ما فكرتا و لا حافكر و ما بهمني و لا بفرق معاي
_ سمح
مياده كانت عارفه انو حنين بتكذب عليها و انو الموضوع شاغل بالها بس الجرح الجواها من حسام اكبر بكتير من اي شي . جا الاستاذ و بعد الحصه مياده رجعت بيتهم و كان كل همها انو لازم تتكلم مع صحبات حنين من وراها . و تاني يوم كان في حصة كيميا في مدرسة ناس حنين مصطفى جا ساق مياده و وداها مدرسة حنين لانو حسام كان عندو محاضره . لمن مياده وصلت مدرسة ناس حنين كان باقي زي 40 دقيقه للحصه و كانو قاعدين كلهم مع بعض حنين و مياده و هاله و ريهام و ملاذ
مياده : هلولة ماشة المكتبة اشتري لي قلم رصاص يلاكي معاي
حنين استغربت : اشمعنى هاله ؟
مياده : بتغيري علي يا نونتي ؟
حنين : ههههههه بغير عليكي في عينك بس يعني عرفت من متين يعني ؟
مياده : ما موضوع اي وحدة بس تمشي معاي
حنين : خلاص امشو
مياده و هاله مشو على المكتبة
_ كأنك عاوزاني في حاجة
_ ايوا فعلا . و موضوع مهم شديد يا هاله
_ خير ان شاء الله
_ خير ما تخافي بس اولا عاوزة اطلب منك طلب
_ اتفضلي
_ عاوزاكي تسوقي حنين على جنب نظام انتي عاوزاها في حاجة و اشغليها لي على قدر ما تقدري لانو الموضوع انا عاوزاكم فيه كلكم بس حنين ما حاتديني فرصة اتكلم فلازم تكون مافي . فانا حاتكلم مع ملاذ و ريهام و بعدين خلي ريهام و انتو راجعين تحكي ليكي
هاله شكت انو الموضوع عن حسام بس اتزكرت انو مياده ما عارفة بالكان بين حنين و حسام : طيب
و رجعو على ناس حنين . و فعلا هاله ساقت حنين على جنب و قالت ليها انو في مشكلة في بيت ناس هاله و هي مضايقة و عاوزة تحكي و ما بتقدر تحكي قدام مياده لأنها تعتبر لسه غريبة عنهم .
اول ما مشو حنين و هاله مياده بدت تتكلم مع ملاذ و ريهام
مياده : انا اتفقت مع هاله تسوق حنين على جنب لانو حنين ما حاتديني فرصة اتكلم
ملاذ باستغراب : في شنو ؟ في حاجه حاصله مع حنين في البيت او كده ؟
مياده : لا ما تخافي ما كده
ريهام : طيب احكي
مياده : زي ما عارفين انو انا اخت حسام
ملاذ و ريهام عاينو لبعض و استغربو و مياده واصلت كلامها : و انا عرفتا كل شي
ملاذ : حنين حكت ليكي ؟
مياده : حنين حكت لي انها كانت بتحب واحد و حكت لي كل شي عنهم بس ما قالت لي انو هو نفسو اخوي
ريهام : و طيب انتي عرفتي كيف ؟
مياده : في كذا حاجة خلتني اشك و عرفتا من مها اختي الكبيرة انو حسام كان بحب وحدة اسمها حنين و اول امس لمن جا حسام يسوقني اتأكدتا
ملاذ : و عرفتي اخوكي سابها كيف ؟
مياده : ما هو انا ده العاوزاكم فيه و حكت ليهم كل شي
ريهام : انا كنتا حاسة انو في شي غلط
ملاذ : استني انتي صدقتي ؟
مياده : لو الكلام ده كان قالو لي حسام كان ما صدقتو و كان قلتا بتبلى على حنين عشان يبرر لنفسو . بس الكلام ده كله حكتو لي مها اختي و هو ما قاعد يخبي عنها شي و لو ربطو كلام حنين و كلام حسام حاتلقو اجوبة على حاجات كتيرة
ريهام : زي انو حسام من بدا يتغير على حنين حوالي قبل شهر من ما يسيبو بعض و عزه لمن ورتو انو حنين بتتكلم مع وائل من وراه كان قبل شهر من ما يسبو بعض و حنين كانت قالت انو مرات بتكون بتتكلم مع حسام بقول ليها انو عزه داخلة ليه و بقفل منها عشان يتكلم معاها
مياده : ايوا لانو عزه في الفترة ديك كانت بتتكلم معاه كتير عشان تثبت ليه انه حنين بتخونو مع وائل
ملاذ : بس الغلط اخوكي كان من اول ما عزه بدت توسوس ليه كان يتكلم مع حنين ما كان يسكت
مياده : هو خاف تزعل منو و تعتبرها عدم ثقة منو و ما قدر يكذب عزه من اولها دي حبيبتو و دي صحبتو من جهة و عزه زاتها قالت ليه انو ما يتكلم معاها الا لمن عزه تثبت ليه اول و يتأكدو للاخر
ملاذ : حتى ولو ما كان يختها من الاول انها خيانه كان يخت انو ممكن يكون في اي سبب خلاها تتكلم مع وائل
مياده : الخلاه يشك انو من وراه و حنين كانت بتخبي عليه و لمن عزه جابت ليه تلفون وائل و شاف المكالمات بعينو ختا انو مافي سبب يخليها تخبي عليه الا انها تكون بتخونه
ملاذ : و طيب قبل ما يسمع منها يعاقبها بالطريقة دي ؟
مياده : انا معاكي في انو رد فعلو كان قاسي لابعد حد بس هو معزور برضو اتصل على حنين و هو شايفها قدامو مع وائل و قالت ليه انها في البيت
ملاذ : برضو ده ما ..
ريهام : ملاذ الحصل حصل و الاتنين غلطانين حنين غلطت في انها من اولها كان توري حسام و حسام غلط في انه من اولها سمع كلام عزه و ما واجه حنين
ملاذ : لو ما حسام كان زول عصبي ما كان حنين خبت عليه و مسحت مكالماتها مع وائل اول باول و قالت تستناه يروق كم يوم اول
مياده : ده نفس الكلام القلتو ليه
ريهام : يا جماعه نحنا مافي منو الغلطان حسي نحنا في انو لازم نشوف حاجه نكشف بيها الكلام ده كلو
مياده : لمياء . لمياء وين ؟
ريهام : للاسف اتحولت من مدرستنا
مياده : لو وصلنا ليها هي بتقدر تثبت لحسام انو حنين كانت بتتكلم مع وائل عشان ترجعهم لبعض
ملاذ : انا ممكن القى رقمها من صحباتها البقرو معانا هنا
مياده : طيب حلو . فضلت حاجة
ريهام : اللي هيا ؟
مياده : لازم نثبت كمان انو عزه داخله مع وائل في الحكاية ممكن تعمل فيها انو هي ما عارفة شي عن ده كلو و بس شافت وائل بتكلم مع حنين و جات ورت حسام
ملاذ : بس كيف ؟
مياده : انا كمان ما عارفه كيف
ريهام : انا حاتكلم مع مازن لمن ارجع و اكيد بقدر يلقى طريقة
بعداك مواعيد الحصة جات و دخلو على حصتهم . و بعد الحصة جا حسام يسوق مياده كانو كلهم طالعين مع بعض
مياده : طبعا الليله حنت مصطفى اخوي . بنات عازماكم كلكم العرس بكرا
هاله : و الله يا ريت بس انا طلعتي صعبة و خاصتا امي حاتقعد تقول لي ما صحبتك من مدة طويلة و 100 قصة
ملاذ : و نحنا نفس الاسطوانة
مياده : ما مشكلة تجو عرسي انا . حنين جاية بعدين الحنة صح ؟
حنين : و الله يا مياده ما حاقدر عندي قراية كتيرة
مياده : ياخي حاولي
حنين : لو جيت الليله بكرا ما حاقدر اجي
مياده : خلاص ما مشكله بس بكرا تكوني معاي
حنين : ان شاء الله
حنين ما كانت عاوزه تمشي الحنه لانها في البيت و اكيد حاتصدم بحسام كذا مره لكن الزفاف في صاله و زحمة و في ناس كتيره فما حايحصل شي . و لمن شافت عربية حسام من بعيد خافت و قفت في محلها
ملاذ : حنين مالك وقفتي يلا
حنين : محمد عربتو مافي حادخل استناه جوه
مياده فهمتها و سكتت : طيب يلا يا بنات مع السلامه
و مشت مياده ركبت العربيه و كل وحده رجعت بيتها . ريهام اول ما رجعت البيت اتصلت على مازن و حكت ليه كل شي
_ اول حاجه لازم تلمو في لمياء دي باي طريقه
_ طيب ما صعبه دي بس ان شاء الله تقتنع انها تجي معانا و تتكلم مع حسام . بس حانثبت لحنين زاتها كيف انو حسام كان فاهم غلط
_ من عزه زاتها
_ كيف ؟
_ لو عزه داخله مع وائل في القصه مافي زول غيرها حايكون رسل ليه صورة حنين لانو عزه فتره كده كانت عامله فيها مصاحبه حنين فلازم يكون في شي في تلفون عزه بتعلق بالموضوع ده يا ونسه مع وائل يا اما نفس الصوره الفي تلفون وائل
_ و حانلم في تلفونها كيف ؟
_ بنفس الطريقه القالت لمت بيها في تلفون وائل
_ قصدك نسرقو ؟
_ مافي حل غير كده
_ طيب . معناها دي عليك انت . لكن متين ؟
_ بكرا لمن امشي الجامعه
_ اوكي
ملاذ لمن رجعت البيت اتصلت على وحده صحبت لمياء معاها في الترحيل و شالت منها رقم لمياء و اتصلت عليها
_ الو
_ الو
_ لمياء كيفك
_ بخير الحمد لله . منو معاي ؟
_ انا ملاذ . ملاذ عبد الرحمن كنتا معاكي في المعارف
_ ملاذ صحبت حنين . اهليين كيفك
_ الحمد لله تمام . انتي كيفك و كيف مع تالته ؟
_ ماشي الحال والله بس تعب من اولها
_ ايوا تعب شديد ربنا يعينا بس و بالتوفيق ان شاء الله
_ و ليكي كمان
_ اللهم اميين يا رب . اكيد مستغربه من اتصالي
_ صراحه ايوا
_ بصراحة يا لمياء عاوزاكي في موضوع مهم و عاوزه منك تساعديني فبلييز ما تحرجيني
_ لو في شي في ايدي اكيد ما حاقصر
_ تسلمي . انتي و وائل سبتو بعض صح ؟
_ ايوا بعد خلصنا تانيه بكم يوم كده . بس ما يكون مرسلك لي انتي برضو
_ لا لا . بس ممكن اعرف سبتو بعض ليه ؟
_ وائل واحد حيوان و حقير و حيوانه انا الحبيتو في يوم و عمل فيها انو اتغير و فارقه معاه بالجد و بقى بني ادم بس ده عمرو ما بتغير بعد ما رجعنا لبعض بمساعدة حنين صحبتك بفتره تاني رجع لقلة ادبو و تفاهتو و سبتو في الاخر
_ طبعا فهم حنين انك سبتيو عشان ود عمك و حلفها ما تسألك
_ اصلا حقير و ما بهمني بقى
_ طيب يا لمياء وائل خرب لحنين حياتها كلها
_ و الله انا كنتا عاوزه انصح حنين انها تبعد عنو و عن صحوبيتو و الزي ده ما بتخاوا بس ما لميت فيكم تاني من بعد ما خلصنا تانيه
_ للاسف نحنا عرفنا الحاجه دي متأخر
_ مالو عمل شنو ؟
ملاذ حكت للمياء كل الحصل
_ و الله انا عارفاه تافه و زباله بس ما اتوقعتو للدرجه دي
_ فنحنا عاوزينك تساعدينا نكشف عمايلو
_ كيف و انا حاقدر اساعد بشنو ؟
_ كل المطلوب منك تجي تلاقينا و نحنا حانجيب حسام الكان حبيب حنين و حنين و توري حسام انو حنين يوم لاقت وائل في المنتزه عشان ترجعكم لبعض و انتي برضو كنتي في بس جيتي متأخره
_ صراحه يا ملاذ انا ما عاوزه ادخل في قصص و مشاكل مع وائل تاني ده واحد مؤذي
_ فاهماكي لكن مافي حل تاني غير كده
_ معليش بس ما بقدر ما تزعلي مني
_ طيب ما مشكله و لا يهمك
ملاذ قفلت من لمياء و هي محبطه لابعد حد و اتصلت على مياده و حكت ليها الحصل
_ اها يا مياده حانعمل شنو الحل الوحيد الكان في ايدنا و طار
_ ريهام اتصلت علي قبل شويه و اتكلمت مع مازن و مازن حايشوف لينا صرفه و حايلم في تلفون عزه و امكن نلقى شي فيه
_ طيب لو ما لقينا ممكن نشوف تلفون وائل
_ وائل غير تلفونو قبل شهرين يعني احتمال كبير ما نلقى شي فيه فتلفون عزه هو الاضمن
_ بس التلفون ما زي كلام لمياء كان
_ اسمعي اديني رقمها
_ منو لمياء ؟
_ اي
_ طيب
و ادتها الرقم مياده قفلت منها و اتصلت على لمياء
_ الو السلام عليكم
_ و عليكم السلام . منو معاي
_ لمياء انتي ما بتعرفيني بس انا اسمي مياده انتي قبل شويه اتكلمتي مع ملاذ و انا متصله عليكي لنفس السبب
_ يا جماعه انا ما بقدر و ده كل العندي فرجاءا ما تزعجوني
_ على فكره انا بت عمة وائل و اخت حسام حبيب حنين و وائل ما اذى حنين براها اذى اخوي كمان و قلب ليه حياتو انتي ما تتصوري هو كان بحب حنين كيف اخوي من وقتها بقى زول تاني لدرجة انو قبل يومين امي كانت في المستشفى بسبب تغير حسام و انو بقى زول تاني تماما و مافي زول بامكانو يساعدنا غيرك
_ انتي بت زيي و اهو وائل حنين الما عملت ليه شي قال عنها كلام بس عشان يغيظ حسام و ما راعا لشي و انها بت و ده كلام بمس سمعتها فما بالك لو انا مشيت فتنتو ممكن يعمل لي شنو
_ وائل ود خالي و انا اوعدك انو ما يعمل ليكي شي و حافهمو هو زاتو انو لو فكر يسألك ساي انا حاوصل كل عمايلو لخالي و خالي صعب شديد و هو بهرش مو لدرجه
_ طيب . انا حابه اساعد بس خايفه
_ ما تخافي و الله بضمن ليكي و حسام اخوي زاتو بعد يعرف اي شي ما حايخلي وائل يسألك
_ اوكي . يفترض الاقيكم متين ؟
_ انا عندي فرصة 5 ايام بس تاني ما اكتر
_ انا ما بقدر اطلع الا الخميس
_ المشكله بكرا عرس اخوي الكبير و الخميس البعدو فرصتي حاتكون انتهت فلو يوم الجمعه يكون كويس جدا
_ المشكله قلتا ليكي انا الا الخميس
_ ما تطلعي بكرا عشان يخلوكي تطلعي الجمعه و قولي عيد ميلاد وحده صحبتك و لو عاوزه ممكن وحده مننا تتصل على امك و تعمل فيها ست عيد الميلاد و تقنعها . معليش يا لمياء عارفه انو تقلتا عليكي بس و الله مافي حل تاني
_ لا و لا يهمك و انا زاتي حابه الحيوان داك يتكشف . طيب انا بشوف امي و بكلمك
_ تمام شكرا بالجد شكرا ليكي
و قفلت من لمياء و هي مبسوطه لابعد حد ما باقي غير انهم يلقو حاجه في تلفون عزه و مازن يقدر يشيلو . بالليل كانت حنت مصطفى في الحديقه الكبيره الخلفيه بتاعت بيت ناس حسام مازن جا الحنه و كانو قاعدين هو و حسام في اخر الحديقه على جنب . حسام كان قاعد يعانين طول الوقت على باب الصاله عشان يشوف اذا حنين جات و لا لا و كل مره كان بقول اكيد ما حاتجي بعد السمعتو ليها لكن ده ما منعو من انو يستناها لانو من ما مياده اتكلمت معاه و هو يومين ما نايم من التفكير و ما قدر يهمش الموضوع و يعتبر كأنو مياده ما قالت ليه شي . مازن كان ملاحظ ليه
_ مستني زول ؟
_ لا لا
_ طيب مالك كل شويه بتعاين للباب
_ عادي يعني لا قاعد اعاين لا حاجه حاكون مستني منو يعني ؟
_ و عيونك دي مالها
_ ساهرتا امس بس و الليله صحيت بدري
_ ساهرتا و لا ما نومتا اصلا ؟
_ الما بنومني شنو ؟
_ يعني مثلا مثلا يعني بتكون بتفكر في كلام مياده
_ كلام مياده ؟ و انت العرفك بيه شنو
_ مياده بتمشي تحضر حصص في مدرسة ريهام
_ اي صح نسيت . بس برضو وصلك كيف الكلام ؟ يعني ريهام و مياده كمان اتصاحبو ؟
_ يعني حاجه بالشكل ده .
_ غريبه
_ الغريب شنو ؟
_ صاحبوها و هم عارفنها اختي هم شامني
_ اولا عرفو انها اختك امس بس و تانيا كانو شامنك لانهم كانو قايلين انك خونتا حنين لكن حسي مافي سبب
_ بالله حتى صحباتها مفهماهم كده ؟
_ حسام انت غبي ؟ و لا جنيت يا زول . يعني لو هي الخانتك صحباتها ما حايكونو عارفين الحاجه دي ؟
_ ما عارف
وقف و قال ليه : لانك ما داير تعرف . لكن لو شغلتا مخك ده بتعرف
_ حسي انت وقفتا ماشي وين
_ ماشي بيتنا
_ الحفله ما انتهت
_ انت بتجيب لي العصب ما بتطاق ياخي
_ اقعد اقعد ما عارف انا صحبك و لا هي و لا عشان صحبة ريهام
_ ما بقول ليك بتجيب العصب ؟ اي شي بقى واضح لكن خليك على كده بعد يومين انت اكتر زول حاتندم على العناد ده كلو
_ خلاص كويس لمن اندم اشمت فيني
_ لا اشمت فيك لا تشمت فيني ماشي بيتنا نتفاهم بكرا و زاتي ماشي انوم
_ محاضرات بكرا و مافي البنومك حسي شنو ؟
_ عندي موضوع في الجامعه
_ موضوع شنو ؟
_ بتعرف بكرا
تاني يوم مازن مشى الجامعه بدري و لاقى عزه كانت شايله شنطتها و ماسكه دفترين في ايدها و تلفونها و قعدو في كنبه كده كانت خاته بينهم شنطتها و الدفترين و فوقهم التلفون جات بت صحبتها وقفت و سلمت عليهم و سألت عزه من حاجه عزه شالت واحد من الدفاتر كانو واقفين و انشغلو فيه كانت بتشرح ليها في حاجه مازن شال تلفون عزه و عمل نظام انه جا تلفون و زحا بعيد شويه و قفل تلفون عزه و ختاه في جيبه و جا قعد في محلو و لمن البت مشت عزه قعدت و اتونسو شويه
_ عزوز يلا انا ماشي بعد ده . نتلاقى بعدين في العرس . حاتجي صح ؟
_ اكيد . لكن حسي ممكن توصلني معاك في البيت ؟
_ طيب يلا
ركبو العربيه و عزه و هي بتفتش في شنطتها : سجمي تلفوني وينو
_ فتشيو كويس
_ بري و الله مافي
_ حايكون مشى وين يعني شنطكم الكلها كرور دي بكون حايم فيها
_ مازن اضرب لي فيه عليك الله
و مسك تلفونو و دقا في تلفونها و قال ليها : مقفول
_ سجمي ما يكون اتسرق . انا ما متزكره اذا كان في ايدي و لا في الشنطه
_ لا لا لمن لاقيتك كنتي ماسكه الدفترين بس
_ معاناها نسيتو في القاعه . حامشي اشوفو
_ اجي معاكي ؟
_ لا لا امشي انت ما اعطلك
_ طيب يلا لبعدين
مازن ما قدر يستنى لمن يصل البيت وقف العربيه على جنب و حاول يفتح التلفون لقاه قافلاه بنمط بس قدر يفتحو برمز الPIN و فتح السجل لقى رقم مسجل بولوشي هي كانت مفهمه حسام انها اتشاكلت مع وائل بعد ما عرفو انه حنين بتخونو معاه و بقى بفتش و لقى حاجات كتيره في التلفون انبسط انو كده اغلب الحقايق حاتتكشف و دور عربيتو و مشى . حنين بعد ما رجعت من المدرسه قعدت تقرا و الساعه 5 مياده جاتها تسوقها معاها الكوفير لانها كانت مصره اصرار شديد و مشو عملو شعرهم و حنين كانت طالعه جميله لحد ما طبيعي و بعد المغرب رجعو بيت ناس حنين و بدو يلبسو حنين كانت لابسه فستان حرير اسود من قدام تحت الركبه و طويل من ورا و اكمامه تلاتربع بتاعت دانتيل و فيه شغل بسيط جدا بالفضي من فوق و الباقي سادا و فاكه شعرها الطويل و عامله شقه بالجمبه و عامله روج خفيف وردي و الفستان كان مع لونها و جسمها خياال . و مياده كانت لابسه فستان بني و عامله تسريحه لفوق و كمان طالعه حلوه بس ما زي جمال حنين . مياده اصرت على حنين تمشي معاها بعربية حسام بس حنين اصرت تجي مع امها و محمد . حسام كان لابس بدله سودا و قميص ابيض زي باقي اخوانو بس هو كان اوجه واحد فيهم و مع طوله البدله كانت خرافيه عليه . كان جمب المدخل بتاع الصاله . لمن حنين و امها و محمد نزلو حنين جمب الباب قالت لمحمد انها عاوزه تخلي تلفونها في درج العربيه شالت منو المفتاح و ختتو و قفلت العربيه و جات . حسام لمن شاف منى و محمد داخلين براهم افتكر حنين ما حاتجي و كان نفسو يشوفها . بس بعد شويه لمن جات داخله لوحدها انبهر بجاملها و بقى متسمر في مكانو و ما حسام براه كل الموجودين انتبهو على حنين و انبهرو بيها و كل واحد رفع عينو و عاين ليها ما قدر ينزلها جات مياده جاريه عليها و دخلو مع بعض حسام كان واقف جمبو مازن و حسام كان لسه ما قادر ينزل عينو من على حنين . مازن لكزه و قال ليه : اقلاها صلي على النبي في سرك بت الناس بتقرضها بعيونك . حسام عاين لمازن بس ما قدر ينكر انو كان بعاين ليها و سكت . حنين كانت واقفه جمب مياده و بنات اهلها . مها سلمت على حنين ببياخه و مشت حنين استغربت بس مياده طوالي شغلتها . و قصادهم على مسافه بسيطه كان واقف مازن و حسام . مازن شاور لحنين و سلم عليها من بعيد و هي سلمت عليه من بعيد . لمن عاينت لحسام برضو دقات قلبها زادو لمن ما قدرت تتحكم في نفسها و ارتبكت كمان لمن شافتو و اناقتو و وجاهتو زايدين كانو . بعد جو العرسان و وقفو عشان يرقصو سلو . كانت حنين مقبله على امها بتتكلم معاها و بدت اغنيه كانت الاغنيه المفضله عندها هي و حسام و اول ما سمعتها قلبها دق بشده و اتلفتت حسام كان قصادها بالجهه التانيه و برضو لمن سمع الاغنيه قلبو وجعو و بقى بعاين ليها لمن وقعت عيونها في عيون حسام حاولت تنشغل و بقت بتعاين لرقصة العرسان بس عيونها بدو يرقرقو طوالي مشت بسرعه و طلعت على مدخل الصاله . جات ماره بسرعه بجمب ناس حسام و هي ما قادره تمسك دموعها و حسام شافها و هي بتمسح دموعها . مياده شافت حنين و مشت وراها . مازن كان منتبه على كل شي من بدت الاغنيه مسك حسام و قال ليه حسام تعال دايرك في موضوع .

#يتبع