A String of Words (Book 1)

Ayo

Ang tulang ito ay pinamagatang Ayo.

A-Y-O

Ito ang tawag sa nararamdaman mo kapag hapong-hapo ka na, sawa na sa buhay

Yung tipong nakangiti ka isang minuto at lumuluha na kasunod

Pakiramdam kapag nais mong isuka ang iyong pagkatao pero di ka pa handang lisanin ang mundo...

Ayo.

Ito, ay walang kahulugan.

O maaring ito ang lahat ng kahulugan na nilalaman ng isang tatlong-letrang salita?

Ayo.

Ito, ang lahat ng paliwanag sa mga damdaming wala namang pangalan.

Ayo.

Ito, ang tawag sa kombinasyon ng kapayapaan at digmaan

Ayo.

Ito, ang buhay ko matapos mo akong iwan..

Ayo.

Gusto ko man sanang sabihin na ito'y isang hiram na salita na may malalim at ubod na halagang kahulugan ay hindi maari

Na ipinamana ito ng lolo ng lolo ng lolo ng lolo ng tita ng ama ng tiyo ng pamangkin ng bayaw ng ninong ng nanay ng biyenan ng anak ng kuya ng ate niya, ay hindi.

Nangangahulugan ito ng Wala.

Pero bago ang lahat,

Ayo na walang pakahulugan maari ka namang bigyang umpisa.

Dahil bago nawalan ng saysay ang salitang ito ay nagkaroon muna ang lahat ng bagay ng simula

Gaya ng buhay ko bago ka pa naging bahagi nito—ay mali—

Bago pa umikot ang mundo ko sa isang tulad mo

Ayo
—Dayo

Hindi ka naman taga-rito

Isa kang dayuhan sa aking mundo

Hanggang sa binalot ng presensiya mo ang lahat ng nandito

Karisma na nakalalason

Napaikot mo pati ako

Nakahuhumaling ang iyong mga ngiti

Matatamis pati iyong mga pagbati

'Gang sa naging pamilyar ako sa init ng iyong mga kamay

Sa mga sulyap mong nakamamatay

At ako, masaya

'Gang sa namalagi ka na sa isipan ng isang dalaga

Ayo
—Tayo naging mas malapit

Nakabigkis ang ating mga braso sa bawat desisyon na ating gagawin

Nakasalalay ang buhay natin sa ating bawat paghinga

Hindi ko kakayanin 'pag wala ka.

Ayo
—Sa'yo

Nangako sa isa't isa

Dahil may tiwala ako sa iyo

At ikaw sa akin

Hawak mo na ng buong-buo ang aking pagkatao

Ikaw ang umangkin ng lahat ng karanasan at unang pagkakataon na aking dinanas.

Ayo
—Hayo

Nagtanan, tumakas

Nagbalak magpakasal

At sumumpa sa harap Niya

Dahil mahal, handa ko na yatang harapin ang mundo basta't hawak mo ang kamay ko.

Ayo
—Mayo

O naku, bakit ganito anong nangyari?

Umabot lang tayo ng tatlong buwan bago ko nadiskubreng tumitikim ka ng ibang putahe

Hindi ba ako sumapat sa iyong pamantayan?

At di nagtagal lang ay nahuli kong kumakaliwa ka?

Ayo
—Kayo

Mas pinili mo siya

Umiikli, humahabol na lamang

Ang aking mga salita

Ayo
—Layo

Namaalam ako,

Iniwan na kita.

Ayo
—Payo

Kakalimutan na kita

Tutal kinalimutan mo na lang rin ako.