Sazaye ishq. سزائے عشق Completed ✔️

Chapter 18

"Nahi... nahi.." Uski Ankho'n se ab Ansoo behna shuroo ho gaye thay aur wo nafi main sar hilatay huway baar baar keh rahi thi.

Aayat ki ankho'n se behta har ansoo , uski nafrat aur khuaf se bhari har nazar , Mateen ke dil par tezaab ka asar kar rahi thi. Par wo jaanta tha ke is sub ka zimmay daar wo khud hai. Aur ab ye sub uski taqdeer ka hissa hai.

Zoyan ko samajh nahi aa raha tha ke ye sub kya ho raha hai, wo heraangi o pareshani se ek nazar kabhi Mateen ke saakit wajood ko dekhta to kabhi Aayat ko jis ka chehra is had tak safaid lag raha tha , jesay kisi ne us kay badan se khoon ka har qatra nichor liya ho.

Is se pehlay ke Mateen ya Zoyan kuch kar sakain Aayat bijli ki si raftaar se wahan se muri aur wahan se bhaagnay lagi.

Is waqt us kay dimaag main bus ye junoon tha ke usay kisi bhi tarhaan is darinda sift insaan se door bhaagna hai , wo usay phir se apnay nazdeek nahi aanay de gi.

Kabhi nahi..!!

" Aayat..!! oh no..! Wo road ki taraf bhaag rahi hai..!" Zoyan ne Mateen ki taraf dekhtay kaha , par Mateen ab wahan mojood nahi tha, jub Zoyan ne herangi se wapas Aayat ki taraf dekha to Mateen bhi Aayat kay peechhay bhaag raha tha.

"Aaaayaat...!! Ruk jao..! .. Oh sh*t!!!"
Jub Mateen ne dekha ke Aayat jis taraf bhaag rahi hai , usi taraf se ek car bhi full speed main Aayat ki taraf aa rahi hai. Ye dekh usay laga jesay kisi ne uskay jism se rooh kheench li ho.

Mateen aur taiz Raftaar se Aayat ki taraf bhaagnay laga . aur ain usi waqt jub Aayat se wo car takraanay waali thi Mateen ne ba mushkil us ka haath pakar liya aur apni taraf kheencha. aurbagair ek second bhi wahan ruknay ke ,wo  Aayat ki cheekh o pukaar ke bawajood usay road se pavement tak le kar aa gaya.

Ye sub kuchh hi seconds main huwa tha , Aur Aayat ki cheekhnay aur Ronay ko dekh kar kayi log wahan un kay ird gird jama honay lagay, par kisiko samajh nahien aa  raha tha ke Aakhir muaamla kya hai...? Miyan biwi ka masla hai ya kuchh aur..?

" chhoro mujhay..! Nahien...!! please mujhay jaanay do... nahii!" Aayat apna haath Mateen ki giraft se chhuratay huway musalsal rotay huway chheekh rahi thi. Aur Mateen us waqt sirf usay be yaqeeni se dekhay ja raha tha.

" ae larkay chhoro larki ka haath.. shakal se to parhay likhay lagtay ho , aur ye harkatain.." Kisi ne aakay Mateen ke haath se Aayat ka haath chhuranay ki koshish ki , par Zoyan ne , jo Road cross karkay ab unki taraf pohanch gaya tha, ek dum se us aadmi ko Mateen aur Aayat se door hataya.

" ye humara gharailoo maamla hai aap log jaaiye yahan se...! " Haala'n ke wo khud in dono ko is tarhan dekh pareshan ho gaya tha. Par wo is tarhaan logo ko koi moqa faraham nahi kar sakta tha , kyunkay wo jaanta tha ke ye log agar beech main aaye to kitna bara tamaasha khara ho sakta hai.

" androoni maamla hai to ghar pe niptaana tha , road pe ab ye sub ka maamla ho gaya hai!!"

" haan haan ...aur ye larki ko kyun pakra huwa hai " aur pata nahi kitnay log Zoyan se behas karna shuroo ho gaye thay.

" Aayat meri baat suno , please meri taraf dekho.." Apnay ird gird ke mahol se be khabar Mateen , ba wajood Aayat kay ronay aur khud ko chhuranay ki koshishon ke usay dono shano se thaamay huway tha aur Aayat se minnatain kar raha tha. Wo ek pal ke liyay bhi apni nazar Aayat ke ansuo'n se tar surkh cheray se hata nahi pa raha tha. Aayat ki bikhri latain jo thori dair qabal uskay dupattay main chhupi huwi thien , ab  paseenay main bheegi Aayat ke chehray ka muhasra kiye huway thien.