يانجمٍ وهج في حلّة سهيل

« ٤١ »

-
أمعن النظر بكل تفاصيله يدفع نفسه الثمن بأغلى ما يكون لأجل تعيش معه بنفس هالحياه وما ينقصها شيء ، اللي عاشت بقصور وحواليها خدم ما تطلع إلا على قصر وحياة أجمل من اللي كانت تعيشها ، ألتفت على البوابات وعلى دخول عزيز ونيّار ، وقفوا موترهم ونزلوا وهو بدوره تقدم لهم يسلم ، أبتسم عزيز ينطق : أرحب أرحب
سلم على خشمه ينطق : أبقه وش حالكم ؟
نيّار : نحمد الله ونشكره وأنتم ؟
نجم : بخير جعلك بخير
عزيز : حميد بيعرس ؟
رفع حاجبة بدهشة ينطق : أشوف وصلك العلم ؟
ضحك عزيز ينطق بحدة : أكيد خلاص صرنا أعز الأخوياء
نجم : ماشاءالله عليكم
مشى نيّار لأمير وكمل عزيز ينطق : بتروح ؟
هزّ رأسه بالإيجاب ينطق : الله الله
عزيز : معك محل ؟
ألتفت على خروجها من البيت ينطق : خالتك معي
زفر عزيز ينطق : تقدر تقول زوجتي معي مو بكذا تجرح رجولتي الله يستر عليك
ضحك نجم ساخر يعطي عزيز ظهره ويمشي لموتره ، ركب يشوفها واقفه عند الجلسة الخارجية ، تسلم على نيّار وسرعان ما أنفعل يصدّ عنها بغضّب ، كانت قريبه منه وتضحك معه مما أثار غيرته ، أبتسمت تنطق بهدوء نبرتها : بابا بنمشي تبون شيء كلكم ؟
هزّ رأسه بالنفي ينطق مع الباقين : سلامتكم
مشت لموتر نجم وأبتسمت من تقدم عزيز لها ، أحتضّنها وضحكت تحاوط كتوفه ، حاوط خصرها ينطق بصوت خافت : وش هالزين كله !
أبتسمت بوسع ثغرها تنطق : أحبك
فزّت من ضربّ نجم بوري ولمحت نظرته الغاضبّه ، ضحك عزيز يقبّل كتفها وينطق : بسم الله عليك طير قلبك ، أمحق نسيب !
زفرت تبتعد عن عزيز وتنطق : مع السلامه
عزيز : وين يا حب حتى أنا معزوم
توسعت عيونها بخفه تنطق : بالله ؟
هزّ رأسه بالإيجاب وأبتسمت تنطق : طيب تعال معنا
عزيز : لا وشو له أثقل عليكم وتعرفيني ما أمون مره بلحقكم بسيارتي
هزّت رأسها متفهمه تنطق : أنتبه لنفسك
رفعت نفسها تقبّل وجنته وأبتسم يسلم عليها خدادي ، أبتعدت تمشي للموتر ، زفر يمسح وجهه وشنبه ينطق : حشى والله لو بأخذها سنه ما صار كل هالسلام !
فتحت الباب تركب وزفرت تنطق : تأخرت ؟
صدّ عنها يمشي ويخرج من القصر ، لاحظت إنها تجاهلها تنزل شنطتها عند رجولها ، رفعت نفسها تنطق : إذا ما تأخرنا عادي نأخذ قهوة ؟
ثبّت كفه عند ثغره يكتفي بذراع وحده بالسواقه ، عضّ طرف شفايفه ينطق : القهاوي والقدوع هناك
وهج : أدري بس أبغى أتقهوى معك
نجم : وتبلشيني معهم إذا صبّوا لي ؟
ضحكت بخفه تنطق : بتنازل بس بشرط
أبعد كفه يعدّل جلسته ويسوق بكلتا ذراعيه ، مسكت ذراعه تنطق : تقولي وش فيك منفس
نجم : أنا منفس ؟
وهج : ايه دامك تمشي على روقان معناته ما تأخرنا طيب ليش زعلان ؟
أبتسم على جنب ينطق : ماشاءالله كنت منفس وصرت زعلان
هزّت ذراعه تنطق بجدية : أوف قول لي وش بخاطرك
رفع حاجبة ينطق بنبرة غاضبّة : حاولي ما تكررين اللي حصل مع نيّار حتى لو كان زوج أختك وترا ماهو واجب عليك تسلمين عليه ناهيك عن قربك منه قبل شوي وخففي أحضان وبوسات وأمسكي لسانك عن كلمة أحبك قلنا ولد أختك وتحبينه بس ماهوب كل شوي حلى هو ؟!
تركت يده مصدومه من غيرته اللي أثارتها بلحظات ، عضّت شفايفها تمنع نفسها تضحك على شكله العفوي ، أخذ قلبها بعصبيته وغيرته عليها ، شّد على الدركسون ينطق : أنا طبعي غيور على أمي وأختي حتى على بنات أعمامي أغار من وأنا صغير ربيّت على ذا الطبع وتعلمت إن اللي ما يغار ما فيه خير لا على أهله ولا حَرمه فكيف لو كانت الغيره عليك أنتي !
أبتسمت تسند رأسها على كتفه وتنطق : بس هم أهلي ومثل ما ربيّت أنت على الغيره أنا ربيّت على التفتح وإنه طبيعي جدًا أسلم على عيال خالتي وحتى أنسابنا اللي هم أهل عزوز لمن يجون يدخلون عندنا ونجلس جلسة وحده..
قاطعها من رفع جواله يتجاهلها وينطق بحسرة وصوت هامس : شوف وش أقول وهي تقول لي وش !
حطّ الجوال على أذنه ينطق بحدة : مشيتوا ؟
نطق شجاع من خلف الجوال : لا يا أخوي بدري حتى سهيل توه يقوم
نجم : زين زين
شجاع : وينك ؟
نجم : جايكم
قفل الجوال يرميه بحضّنه وينطق : بنروح عند أهلي بعدين بنطلع كلنا لأهل عجلان
زفرت تحطّ رأسها على الشباك بدون رد ، ألتفت عليها وزفر يسحب فرامل يجنب عن الخط ، شهقت تلتفت له ومدّ ذراعه يسحب الهاند بريك ، رفع عيونه لها ينطق : فيك شيء ؟
تكتفت تنطق بهدوء نبرتها : لا ، ممكن نمشي ؟
نجم : يحرم علي أمشي وأنتي كذا علميني أنا قلت شيء خطأ والله العظيم إني لا أعتذر
وهج : ماهو خطأ الخطأ إنك ما تتقبل كلامي وفكرة إني ترعرعت وكبرت على هالأشياء
نجم : يا بنتي أنا داري وما قلت لك كذا إلا حبّ وغيره عليك والله ما ودي أسمع كلمة أحبك من ثغرك إلا لي ولا ودي أشوف الأحضان والبوسات ذي لغيري أبغاك كلك لي تشوفيني أطلب شيء مستحيل !
رفعت حاجبها تنطق بجدية : وش المشكله لو قلتها لناس أعزهم وأحبهم تقارن حبي لك بحبي لهم ؟
فكّ أزرة ثوبه بغضّب ينطق : الشرهه علي يوم تكلمت
فزّت قبل يحرك الموتر تمسك فكه ، لفّت وجهه نحوها تنطق بحدة : نجم !
رفع عيونه لعيونها يرتخي بين يدينها وينطق : لبيه وعيونه آمري
حاوطت وجهه بكفوفها تنطق : ما أبغى يجي بيننا مثل هالزعل اللي ماله أساس وكله أفكار غلط بغلط
حاوط خصرها بذراعه يقربّها له ، قطع المسافات بينهم ينطق بهدوء نبرته : عشان خاطري لو لي خاطر ، قولي تم يا عذبة الأطباع
رفعت عيونها تبتسم وتنطق بسخرية : شف شف يقول لو لي خاطر محد ساكن بالخاطر وسالب تفكيري كله غيرك
شّد عليها يثبّت خشمه على وجنتها وينطق بثقل نبرته : قولي تم ولا تعذبين الحال زود عذابه
مسكت وجهه تبعده عنها وتنطق : والله تم بس أنتبه روجي يطبع وما يروح
رفع حاجبة بدهشة ينطق : مفضوح أنا لهالدرجه ؟
ضحكت بعلّو صوتها تنطق : جدًا
دفع نفسه نحوها يقبّل خدها وينطق : هذي تصبيره والوعد آخر اليوم
شابك كفه بكفها وصدّت بخجل للشباك ، مشى بالموتر يكملون طريقهم لبيت آل جراح ..
« بيت الشايب سعد »
زفرت تسنّد المكنسه على الجدار وتنطق بغضّب : حشى اللي يشوف هالتراب يقول ما كنست لي سنين وأنا قبل البارح كانسه !
ألتفتت على أمها اللي تقدمت لها تركض ونطقت : بسم الله وش فيه ؟
تنهدت تنوف تنطق بتعب : قبل شوي كنت عند أبوك وسمعت خبر لي أعوام أنتظر أسمعه !
تخصرت تنطق بفضول : عساه خير يارب
خبطت تنوف كتفها تنطق : خير خير قومي تجهزي وأكشخي لا أوصيك
ميّلت رأسها بعدم فهم تنطق : لحظة وش دخل كشختي في الخبر اللي تنتظرينه ؟
مسكت تنوف كفوف بنتها تنطق بحدة : يا نعجه أحمد ولد الشايب سهيل جاي يخطب فيك
طارت عيونها بصدمة وتجهمت بمكانها ، ضربت تنوف رأسها تنطق بحسرة : يا ويلي عليها قومي عجلي بيجون بعد المغرب
شهقت ترفع طرف قميصها وتركض لداخل البيت ، أبتسمت تنوف تتبع بنتها ، وقف عجلان بطريقها ينطق بصدمة : سلامات شفيكم تسعون !!
زفرت تدفعه وتنطق : ما علمك أبوك ؟
هزّ رأسه بالنفي ينطق بعدم فهم : يعلمني وش ؟
تنوف : أحمد جاي يخطب
عدّل شماغه ينطق بتساؤل : أحمد من ؟
تنوف : ما غيره ولد سهيل
توسعت عيونه بصدمة ينطق بضحكه : أقعد يا حميد والله حيّ النسيب
أبتسمت تمشي للداخل ومشى عجلان للمجلس ، دخل يجلس بجانب أبوه وينطق : صدق إن أحمد جاي يخطب ؟
هزّ سعد رأسه بالإيجاب وأبتسم عجلان ينطق : خلنا نضرب عصفورين بحجر
ألتفت سعد على ولده ينطق : وشو ؟
عدّل عجلان قعدته ينطق : يعني مثلاً مثلاً يأخذون نوير وأنا أخذ وحده من بناتهم
سعد : ما عندك مشكله بس من هي ؟
حكّ عجلان رأسه بعدم معرفة ينطق : والله مدري وأنا ولدك بس بقول لنوير وأنشدها من أحسن وحده
ضحك سعد ينطق بسخرية : قوم قوم جهز المجلس
وقف عجلان يفتح شبابيك المجلس ويشّب النار تحت إشراف الشايب سعد عليه وتوجيهاته ، بينما كانت تنوف تجهز بدورها قسم الحريم بمساعدة نوير اللي خلصت نفسها بسرعة بحكم إنها فضلت تكون بأهدى وأنعم إطلالة ، تقدمت تحط المبخره على الطاولة وتثبّت العودة عليها تبخر الصالة ، رفعت رأسها على دخول عجلان اللي نطق : القهوة جاهزه ؟
زفرت بتوتر تنطق : أذن المغرب ؟
هزّ رأسه بالنفي ينطق : على مشارف الأذان خلاص
توجهت للمطبخ ومشى خلفها ، شالت الفناجيل ترتبها على الصينيه وتمدّها لعجلان اللي أخذها منها ونطق : خليك هنا شوي وأجيك
زفرت من خرج تتأمل إنعكاسها في الصينيه الفضية ، عدّلت شكل شعرها ورفعت عيونها من رجع عجلان يركض ودخل يقفل الباب وراه ينطق : نوير أبغى أخطب حتى أنا عندهم
توسعت عيونها تضحك بصدمة وتنطق : منجدك ؟
هزّ رأسه بالإيجاب ينطق : ايه وش بلاك تضحكين ؟
نوير : أقصد عشان ما عندك وظيفه
عجلان : والغنم اللي أتاجر بها
لفّت تعطيه ظهرها وتنطق : ما تعتبر وظيفه يا أخوي
عجلان : ما عليك مني وعلميني من تنصحين فيهم
نوير : عندك شمايل وأسيل
زفر عجلان ينطق : ومن شمايل منهم ومن أسيل ؟
ألتفتت عليه تنطق بصدمة : أمانه ما تعرفهم ؟
هزّ رأسه بالنفي ينطق : صاحيه أنتي كيف بعرفهم من الخبل اللي بيتكلم عن خواته
نوير : صادق والله المهم أسيل أخت شجاع وشمايل أخت منيف
أبتسم بخفه ينطق : ما فيه إلا هم الثنتين
نوير : إلا فيه بنات عبدالكريم التوأم جمان وأشجان
سكت لثواني وضحكت تقول : أعترف فيه وحده جازت لك
عجلان : والله شكلها بنت نايف
صفقت نوير بفرحة تنطق : شمايل أذرب وحده ما عرفتك والله إنك ذويق !
أبتسم يعدّل شكله وينطق : حمستيني يا حيوانه كيف شكلها !
ضحكت بعلّو صوتها تحتضّنه ، أبتسم يحاوط ظهرها وينطق : الله ييسر أمرك ويوفقك يا عين أخوك
شّدت عليه تنطق بإبتسامة عريضة : وياك يا حبيبي
أبتعد عنها يخرج من المطبخ ، تقدمت تخرج خلفه للصالة تجلس على الكنب تقابل أمها المنشغلة بجوالها وزفرت تتمنى يمشي الوقت ويروح التوتر اللي فيها ..
« بيت هزاع آل جراح ، قبل المغرب »
وقف موتره يقفله ، ألتفت عليها ينطق : تنزلين ؟
هزّت رأسها بالإيجاب تنطق : أكيد
نزلت وأنتظرها حتى قفلت الباب يقفل الموتر ، مشى لمجلس الرجال وعينه عليها ، دخلت مع الباب تهمس بـ : سلام عليكم
ألتفتت غرور عليها توقف وتنطق : هلا وغلا عليكم السلام !
أبتسمت بهدوء تنزل طرحتها على أكتافها ، تقدمت غرور تسلم عليها وأبتعدت تنطق : يالله إنك تحييها أجلسي تقهوي
جلست بجانب غرور تنطق : كثر خيرك غرور
غرور : بس فنجال عشان خاطري
أبتسمت بخفه تنطق : تمام صبّي
مدّت غرور ذراعها للدلة تصبّ لوهج ، رفعت عيونها على العنود اللي دخلت توقف ، أبتسمت العنود تنطق : هلا هلا بزوجة نجم
أبتسمت بخفه تسلم على العنود وتجلس ، مسكت الفنجال من غرور تأخذه ، أبتسمت غرور تتكي وتنطق : كيفكم طيبين ؟
ألتفتت عليها تنطق : حمدلله بخير وأنتي واللي ببطنك ؟
توسعت عيونها تتمسك بكرشتها الصغيرة وتنطق : أما واضح
ضحكت وهج تنطق : بالنسبه لدكتوره مع الأسف
ضحكت مع وهج تنطق : كلنا طيبين أبشرك
ترشفت من الفنجال تنطق : حمدلله
غرور : بتروحين للخطبة ؟
هزّت رأسها بالإيجاب تنطق : ايوه ما جهزتوا ؟
غرور : اوه لا أنا ما بجي تعبانه شوي
وهج : اها سلامتك من التعب
زفرت غرور تنطق بضيق : يا لبى قلبك والله وأعذريني يا وهج عن الكلام الشين اللي طلع مني قبل عسى ربي يوفقكم ويرزقكم بالذريه الصالحه ويسعدكم دنيا وآخره
ثبتت كفها على صدرها تنطق : يكفيني يكون هالكلام من قلبك ومعذوره والله
أبتسمت بخفه تنطق : ما عليك
خرجت نجد من الغرفة بعبايتها وخلفها أمها والحريم كلهم اللي بيروحون لبيت الشايب سعد ، وقفت لهم وشهقت نجد تنطق : يمه وهج !؟
هزّت رأسها بالإيجاب تضحك وتنطق : وش يمه وش شايفه أنتي
ركضت لها تحتضّنها وأبتسمت وهج تحاوطها ، ضحكت نجد تنطق : ما قصدي شيء ياختي بس أنصدمت يوم شفتك
ضحكت بسخرية على نجد تبتعد عنها ، تقدمت تسلم على الحريم كلهم وأبتسمت حور تنطق : ماشاءالله تبارك الرحمن هالزين كله لنجم ؟
أبتسمت بوسع ثغرها تنطق : الزين كله لي الله يسلمك
ضحكوا البنات وسكتت حور متعجبة من جوابها ، مسحت ريمان على كتفها تنطق : بسم الله حصنتك من كل عين تضرك بسم الله عليك
أبتسمت بخفه تنطق : عمري خاله ريمان
تقدمت تنحني تشيل شنطتها من جانب الجوهرة ، رفعت عيونها على وهج تنطق : حددتوا عرسكم ؟
هزّت رأسها بالنفي تنطق : لسى
ضحكت حياه تنطق بسخرية : خايفين يصير شيء وتقبع
ألتفتت لها بصدمة تنطق بحدة : لا أبشرك ما بيصير شيء بإذن الله بس أدعي ربي يفكنا من شر الحساد وخبيثين النوايا !
ضحكت أسيل بصدمة من رد وهج ، عدّلت شعرها وألتفتت على الجوهرة اللي نطقت : امين عسى ربي يفككم شر من فيه شر لكم
أبتسمت لجدة نجم تنطق : امين يا حبيبتي امين
دخلت شمايل للصالة تنطق : هيا أنتي وياها مشينا
وقفت بمكانها تنطق بدهشة : هلا وهج هلا
وقفت وهج تتقدم لها تسلم عليها ، أبتسمت تحاوط ظهرها تسلم عليها خدادي وتنطق : شخبارك وحشتينا ؟
أبتسمت وهج تنطق : بخير ما يوحشك غالي يارب ، أنتي أخبارك ؟
أبعدت شمايل عنها تنطق : على حالي مامن جديد
أبتسمت لها بخفه تصدّ عنها ، مشت شمايل للخارج وسرعان ما تبعوها البنات وباقي الحريم ، مسكت شنطتها تلتفت على غرور اللي نطقت : لا تقطعيننا
وهج : افا عليك والله ييسر لك ويتمم حملك
أبتسمت لها غرور تنطق : اللهم امين ودعناك الله
خرجت وهج من الباب تزفر بغضّب وتنطق : كعب بالرمل وش هالكابوس !
رفعت عيونها على نجم الواقف بين الرجال ، وقفت بمكانها من تقدم رماح لها ينطق : أرحبي
تنحنحت تنطق بصدمة : هلا عمي الله يبقيك
ألتفت نجم عليهم وزفر يصدّ يسمع كلام جده ، قبّلت جبينه وأبتسم يقبّل جبينها وينطق : وش حالك يا بنتي ؟
بلعت ريقها بربكة تنطق : الحمدلله أنت كيفك يا عمي
رماح : نحمد الله ونشكره ناقصك شيء بخاطرك حاجه ؟
هزّت رأسها بالنفي تنطق : الله يكثر خيرك
أبتسم رماح يشدّ على كفها وينطق : ها سلمينا عليك
تركها يتوجه لموتره وزفرت تكمل طريقها لموتر نجم ، ألتفتت عليه تشوفه يدخل كفه بجيبه ويفتح لها الموتر ، أبتسمت تركب وقبل تقفل الباب فزّت من مسك مسعود الباب ينطق بإبتسامة عريضة : المزيونه بتروح ما سلمت علي ؟
ضحكت تمسك صدرها وتنطق : روعتني الله يصلحك
طلع على التكايه يرفع نفسه لها ، أبتسمت تأخذه لحضّنها وأبتسم بفرحة يحاوطها وينطق : تكفين قولي لنجم يخليني أجي معكم
ضحكت تبعده وتثبت كفوفها على أكتافها تنطق : بحاول عشانك
أبتسم يقبّل جبينها وسرعان ما أنهارت تضحك من شدة لطافته ، لاحظت إنها عادة عندهم من الصغر تنطق : تحبّ الكعبه يا عمري أنت
نزل من الموتر على مجيء نجم ، فتح الباب يركب ونطق بحدة صوته : معليه يا رجال بنتصافى هناك
ضحك شجاع ينطق : علمتك غير أحسب لي معكم
ضحك بسخرية يقفل باب موتره ، ألتفت عليها من نادته ينطق : لبيه ؟
وهج : عادي تخلي مسعود يجي معنا ؟
شغل موتره ينطق بعدم فهم : مسعود ؟
هزّت رأسها بالإيجاب تنطق : حرام والله مره بخاطره يجي
نجم : هو وينه ؟
أشرت على مسعود ونطق نجم بحدة : مسعود قشع لا أتلك !
ركض مرعوب لموتر أبوه وزفر نجم يحرك ، ألتفت على صدمتها وأبتسم ينطق : تعودي كذا تعاملي مع الوراعين
زفرت بغضّب تنطق : حرام عليك إذا كذا تتعامل معهم شلون بتسوي بعدين ؟
أبتسم على جنب ينطق : قصدك مع عيالنا ؟
تنحنحت بخجل تنطق : أوف اللي هو حرام تسوي كذا فيهم
نجم : كلهم نفس الشيء ما يفرق معي سواء كانوا عيالي أو غيرهم ، هذول شياطين لو عطيتيهم وجه أبتلشتي بهم عمرك كله
زادت صدمتها وتجهمت بمحلها ، ألتفت عليها وسرعان ما أنفجر يضحك بسخرية ينطق : أمزح معك يا بنتي عمي شافه وهو جايك وحلف علي ما أخذه معي
ضربت كفه وضحك يتمسك بكفها ، سحبه لثغره يقبّله وينطق : ما وريتيني وش لبستي
سحبت كفها تنطق بحدة : ما بوريك بعد وتستاهل بعد ذا كله
ضحك ينحني على الدركسون وزفرت تضحك بخفه ، ألتفتت عليه تتأمل الغمازات الواضحه لها تنطق : دايم أضحك
بلل شفايفه ينطق بسخرية : دايم ضحكيني
أبتسمت تحاوط ذراعه تستند على كتفه ، قبّل رأسها ينطق : بتوريني ؟
ضحكت تضرب ذراعه وأبتسم ينطق : شكلها لا
وهج : مدري صراحه يبي لها تفكير
رفع حاجبة بدهشة ينطق : الله أكبر شدعوه ترا كلها لبس
ضحكت تبتعد عن كتفه وتنطق : دام الدعوه لبس ليش مصّر
زفر نجم يدعس ويزيد من سرعة موتره ، تنحنح ينطق بغضّب : وتسأل بعد إنا لله
صدّت وهج تنطق بجدية : قلت لك بفكر
نجم : أقول لا تنسين إني بنفرد بك
توسعت عيونها تلتفت عليه وتنطق بسخرية : طيب بعرف ليش تقولها وكأنك تهدد ؟
أبتسم بخفه يكمل طريقه ، مدّ كفه يثبتها على فخذها وزفرت تحط كفها فوق كفه تناظر مع الشباك الطريق المظلم الطويل المتجه للحلّة بحكم بيت الشايب سعد اللي يقع بجانب حلّة سهيل ..
« حلّة سهيل ، بيت الشايب سعد »
خرج عجلان من البوابة يشوف سياراتهم توقف قدام الباب ، زفر يفرك كفوفه قد إيش أشتاق لمنظرهم بهالمكان ، بعد الحريق صار المكان خالي من الصوت والحياة ، صوتهم الواضح قدامه جدد روحه وأبتسم بوسع ثغره يرفع كفه بالسماء ويرحبّ بالرجال ، تقدم يسلم على سهيل اللي نطق : الله يبقيك يا عجيلان وش وقعك ووقع أبوك ؟
عجلان : بخير نسلم عليك
هزّ سهيل رأسه بالإيجاب يتقدم للمجلس ، سلم على الباقين وأبتسم يوقف بوجه أحمد ، تنحنح أحمد وضحك عجلان يسحبه لحضّنه وينطق : نسيبي !
ضحك أحمد يحاوطه وينطق : إن قالها الله !
أبتعد عنه وأبتسم يضربّ تحية لنجم القادم من جهة موتره ، وقف يردّ التحية وينطق بحدة : أسترح يا أبو سعد
ضحك يتقدم له يسلم عليه ، حبّ خشمه ينطق : وش حالك يا عجيلان ؟
عجلان : أبشرك طيب وبخير وأنت يا النجم الساطع
نجم : مامن جديد دخلنا ؟
مدّ عجلان ذراعه ينطق : أقلط وعلمني متى الرجعه أشوفك كل عصر وأنا راجع بالحلال واقف عند العمال
مشى نجم وألتفت بدون ما يشعر عجلان يشوفها تمشي بجانب نجد يتوجهون لمدخل الحريم ، زفر ينطق بهدوء نبرته : قريب إن شاءالله على الأسبوعين الجايه
عجلان : ماشاءالله عليك والله الصمله !
نجم : هم وأنزاح تكفى يا عجلان
خبط عجلان كتفه ينطق : رجال يا أبو رماح رجال
نجم : مثلك وشرواك
زفر يدخل للمجلس ويتقدم للشايب سعد ، أبتسم من لمح نجم ينطق : حيّ الله اللي ما خلا حلال جده يروح
أبتسم يقبّل جبينه وينطق : الله يبقيك ويسلم عمرك وش حالك نفداك ؟
شدّ سعد على عصاته ينطق : طيب وبخير
نجم : جعلها دايمه
مشى يجلس بجانب شجاع اللي نطق بهمس : ها وش قولك ؟
زفر نجم ينطق بغضّب : ما أنت بجاي ريحني !
شجاع : طيب علمني وش عندك فالحلّة
نجم : وش لزومك ؟
زفر شجاع يصدّ عنه وأبتسم نجم يسمع لسواليف الشيبان ، تنحنح سهيل ينطق : زين ما لحقكم شيء من الحريق يا سعد
سعد : لا الحمدلله والله يعوضكم خير
سهيل : اللهم امين
عمّ الصمت المجلس للحظات حتى كسر رماح حاجز الصمت ينطق : مثل ما جاكم العلم حنا جايين نطلب بنتكم لأخوي أحمد على شرع الله وسنة رسوله
أبتسم سعد ينطق : الله يحييكم والساعة المباركة في ذمتي
أبتسم سهيل ينطق : الله يبقيك وأبد اللي تبونه تآمرون عليه والمهر نتفق عليه بعدين
سعد : الولد يبغى شوفه شرعيه ؟
ألتفت سهيل على أحمد اللي هزّ رأسه بالإيجاب وزفر يصدّ عنه وينطق : ايه لو ما عندكم مانع
سعد : أبد حقه لكن ما حن مستعجلين على شيء يا سهيل يشوفها وإن زانت الخواطر أتفقنا أنا وأنت بعدين على كلش
سهيل : أبشر يالله يا ولد لا نبطي على العرب
وقف أحمد بصدمة يخرج مع عجلان وسهيل ، ألتفت سهيل على دخول عزيز اللي نطق : لا تقولون قدكم سارين ؟
رفع سهيل رأسه ينطق بحدة : لا حول ولا قوة إلا بالله ما عهدت مترك كذا ولا من أنتم طالعين عليه ؟!
جمد عزيز بمحله ينطق بربكة : سمّ ؟
زفر سهيل ينطق بجدية : سلم يا ولدي داخلٍ لك على يهود !
طارت عيونه ينطق بعجلة : سلام عليكم ورحمة الله وبركاته
ضحك أحمد ينطق بسخرية : من النفضه قال السلام كامل
ضحك عجلان وزفر سهيل يتقدم للمدخل ، تقدم عزيز يسلم على أحمد وينطق : مبروك يا عريس خلصتوا ؟
أحمد : الله يبارك فيك وعقبالك ، والله عاد حن بنشوف
ضرب عجلان ظهر أحمد ينطق : وش قصدك يا قليل المروءة
ضحك عزيز ينطق : أجل خذ راحتك والله يسمع منك
سحب أحمد يهمس بإذنه وينطق : غير أحجزها لي
تعجب أحمد ينطق بفضول : من هي ؟؟
أبتسم عزيز ينطق بسخرية : أختو لمنيف
شهق بصدمة ينطق : في ذمتك صادق ؟!
ضحك يهزّ رأسه بالإيجاب وينطق : ايه يا أخوي أجل أكذب
فزّوا عجلان وأحمد من صوت سهيل القادم من الداخل وضحك عزيز عليهم ينطق : أدخلوا بس
سحب عجلان أحمد اللي ألتفت على عزيز ينطق : أبشر بسعدك راجع لك يا أبو نيّار !
هزّ عزيز رأسه لأحمد ينطق : وجهك السعد موفق
دخل للمجلس ينطق بصوت عالي : سلام عليكم
وقفوا الرجال لعزيز يسلمون عليه ، أنتهى من السلام يجلس بجانب نجم وينطق : حيّ النسيب وش مسوي
قفل نجم جواله ينطق : أنتظر إتصال خالتك
ألتفت على نجم بحدة يمسك الفنجال ، ضحك نجم يمسك كفه وينطق : أستهد بالله حلفت عليك تنزله
عزيز : والله لو ما تعقل إن يعلمّ الفنجال في جبهتك
بلل شفايفه ينطق بسخرية : خلاص أهدى من كذا
زفر عزيز ينزل الفنجال ويصدّ عن نجم ، أبتسم من شاف منيف بجانبه ينطق : يالله إنك تحيي منيف
رفع منيف عيونه على عزيز ينطق : الله يبقيك يا جراحنا
أبتسم عزيز ينطق : جازت لي الكلمة يا عسكري
ضحك منيف ينطق : يا حبّي لك يا عزيز
عزيز : ما تحبّ إلا اللي يحبّك اي والله
أبتسم منيف يصدّ عنه وزفر عزيز يسمع سوالف الرجال بينما ينتظرون عودة سهيل واللي معه ..
« مجلس الحريم »
جلس أحمد ورفع سهيل عيونه على عجلان ينطق : أقعد معهم يا عجيلان وعسى الله يكتب اللي فيه الخير
آشر بإصبعه على خشمه ينطق : على خشمي أرتاح يا عمي
خرج سهيل وتقدم عجلان يدق الباب وينطق : يمه تعالي
وقفت تنوف من سمعت صوت عجلان تتقدم لجهة الصوت ، أبتسم ينطق بهمس : خلي نوير تجي
أبتسمت ترجع للصاله علطول ، انحنت تهمس بالقرب من أذن بنتها : روحي لأخوك
ألتفتت على أمها تنطق بتساؤل : ليه وش يبغى ؟
زفرت تنوف تهمس بحدة : يا بنتي الله يرضى لي عليك من وين جايبه الغباء ذا أكيد عشان الشوفه قومي وجع !
بلعت ريقها توقف بصدمة وتمشي للمجلس ، أبتسمت تنوف للحريم تجلس بمكان نوير وتستلم صبّ القهاوي لهم ، شّدت على كفوفها ترفع عيونها على عجلان اللي معطيها ظهره تتقدم له تلمس كتفه ، ألتفت عليها ينطق : أدخلي
عضّت شفايفها بربكة تنطق : أنت بتجلس معي صح ؟
ضرب رأسه بخفه ينطق بهمس : أكيد حرام يختلي فيك !
عدّلت شعرها تنطق : كيف شكلي ؟
أبتسم عجلان ينطق : تهبلين
أبتسمت بربكة تتقدم مع أخوها تدخل للمجلس ، قفل الباب خلفهم وزفرت ترفع عيونها على أحمد اللي وقف بدوره ينطق : هلا أبوي هلا !
رفع عجلان عقاله ينطق : أخو من طاع الله !
ضحك أحمد يجلس وينطق : ونعم أتوب والله
شّدت على كفوفها تشعر باللهيب يسكن وجنتيها ، عضّت شفايفها تجلس بعيد منه وتقدم عجلان يجلس بينهم ، تنحنح أحمد ينطق : وشلونك ؟
رفعت عيونها له وسرعان ما صدّت تنطق : حمدلله
أحمد : نتوكل على الله ؟
هزّت رأسها بالإيجاب وأبتسم أحمد ينطق : ما بتسأليني شيء ؟
زفرت تشتم الحالة اللي تحصل لها وقت تتوتر أو تخجل من شيء ، فهي من عهدت نفسها كانت دائمة الصمت في مثل هالمواقف ، شّدت على كفوفها تنطق : لا ترجع لأبوي في سالفة المهر
عدّل جلسته ينطق : أسلمي بخاطرك رقم ؟
زفر عجلان ينطق بحدة : لا يا رجال بـ..
قاطعه أحمد ينطق بحدة : عجلان أطلع منها !
ألتفت عليها ينطق : آمريني يا نوير
بلعت ريقها تنطق بعجلة : سبعين
طارت عيون عجلان بصدمة وأبتسم أحمد ينطق : أبشري
أبتسمت بخفه تنطق بصوت هامس : تبشر بالخير
أحمد : باقي شيء ؟
هزّت رأسها بالنفي توقف وتنطق قبل تخرج : معنا وقت بيعرفنا على بعضنا زين
خرجت وألتفت أحمد على عجلان ينطق : يا ليتك مكرمنا بسكوتك !
وقف عجلان ينطق بصدمة : تستهبل أنت وياها المهر ثابت بقبيلتنا !
زفر أحمد يمسك عجلان بياقته وينطق بحدة : وأنا وش علي بقبيلتكم المهر عندنا العروس اللي تحدده وزين إنها تكلمت ولا كان جبرتوها على رقم !
تنحنح عجلان ورجع أحمد يشدّ وينطق بتحذير : هي في وجهي ما تناقشها عن اللي حصل !
هزّ عجلان رأسه بالإيجاب ينطق : أبشر وأنت أبخص
أرخى يدينه يترك عجلان ويخرج من المجلس ، ألتفت سهيل وفزّ أحمد لأبوه ينطق : الله يسامحك ليه ما رحت ترتاح ؟
خبط سهيل على كتفه ينطق : بعدي يا ولدي وزودها عشرين
أبتسم بوسع ثغره ينطق : تم !
ضحك سهيل بخفه يمشي مع أحمد للمجلس ، بإتفاق ثمانين ألف مهر لنوير ، تقدم يدخل للمجلس ينطق : اللهم لك الحمد كما ينبغي لجلال وجهك وعظيم سلطانك
وقفوا الرجال وأبتسم الشايب سعد ينطق : الحمدلله أجل بشاورك يا سهيل على موعد الملكة وما يحتاج عرس وأنا أخوك
أحمد : أزين ما جاء
ضحكوا كلهم وألتفت على عزيز يتوجه له ، انحنى له يهمس بالقرب من أذنه : عادك صامل ؟
ضحك عزيز ينطق بسخرية : يا أخوي والله لو إني قايل لك قبل شهرين ترا توني أكيد صامل !
أبتسم أحمد يلتفت على جماعته وينطق بعلّو صوته : أجل جايكم بالبـ..
سحبه عزيز وطاح أحمد بحضّنه ، زفر بربكة ينطق بحدة : لا يا حميد وش تسوي لا لا !
ضحك أحمد ينطق : يا ثور ما قصدي عنك وخر
زفر بغضّب يدفع أحمد عنه وينطق : الثور أنت طيرت عقلي !
ألتفت على نجم بجانبه ، بلع ريقه بربكة من نظراته ينطق : بخاطرك شيء ؟
هزّ نجم رأسه بالنفي يوقف ويخرج من المجلس ، رفع جواله يتصل على وهج ، أبطت عليه والعزيمه على مشارف النهاية ، ما وصله رد وزفر يعاود الإتصال لكن قاطعه رقم نمر اللي أتصل عليه ، تنحنح يفتح المكالمة وينطق : أرحب يا أبو سعود
نمر : هلا بالشيخ فاضي ؟
زفر نجم يفكر بالموعد اللي بينه وبينها فالحلّة لكنه يعزّ نمر بد العرب كلهم ، مسح على شاربه ينطق : فاضي آمرني ؟
أبتسم نمر ينطق بشك : كأنها بدون نفس ؟ أبغاك بكره ماهوب ذلحين
ضحك نجم بسخرية ينطق : الله يطمنك أبشر بالخير بكره
نمر : بروح أخطب
رفع حاجبة بدهشة ينطق : في ذمتك !
نمر : والله
نجم : الله يبشرك ما بغيت
أبتسم نمر ينطق : ما لقيت اللي أبيها إلا من تالي
نجم : خلاص حاضرين بس دق علي
نمر : أزهل وعود لشغلك يا أبو رماح
أبتسم نجم ينطق : ودعناك الله
قفل الجوال يرفع عيونه على أسيل الواقفه ، أبتسمت ترفع كفها له وتقدم نجم لها ينطق : وش تبين ؟
أسيل : أسمع مدري كيف أقولها لك بس
سكتت وميّل رأسه ينطق بجدية : بنت فيه شيء ؟
توسعت عيونها بصدمة تنطق : لا لا بس وهج كـ..
فزّ يدخل بدون ما يسمع زياده من أسيل ، ضرب الباب ينطق : يا ولد بدخل شوفوا لي طريق
رفعت عيونها لظلاله على الباب تضحك وتنطق : جابته الغبيه
ضحكت نجد تنطق : نوير تغطي
أبتسمت نوير تسحب جلالها على رأسها وألتفتت نجد تنطق : تعال تعال
ضحكت أسيل تدخل من بعد ما دخل نجم ، جلس على ركبه يمسك كفوفها وينطق بنبرة قلقة : فيك شيء ؟
جلست أسيل تنطق : اخ حمدلله وربي أول ما طلعت لقيته بوجهي يالله يا شاطرات هاتوا الفلوس اللي عليكو
ضحكت نجد تمسك ذراعه وتنطق : نجم تحدي تحدي
ألتفت على أخته وبلل شفايفه بغضّب ينطق : تحدي أجل ؟
ضحكت وهج ترفع ذراعينها تستسلم وتنطق : والله فكرتهم مالي شغل
مسك ذراعها يسحبها معه يخرج من عندهم ، شهقت من كانت بتعثر بالكعب تنطق : بشويش لعبه ترا !
قفل الباب عليهم بغرفة جانبية ينطق بحدة : طار عقلي حسبت جاك شيء أنتفضت وجيتك أسعى فازعٍ لك وتقولين لعبه كذا بارده مبرده !
وهج : طيب قلت لهم بس أصرّت أسيل لأن الموضوع فيه فلوس ولا والله ما لي يد بالسالفه
زفر يفكّ أزرة ثوبه وينطق : وش اللعبه ؟
أبتسمت تشرح له بحماس وتنطق : طبعًا هي تحديات ولفت العلبه وجات على أسيل ونجد اللي تطلب وطلبتها تناديك بس خافت أسيل بالبدايه وترددت وإنك مستحيل تجي بعدين دخلوني بالموضوع وهذا اللي حصل
مسح وجهه وشنبه ينطق : ما يكبرون ويعقلون ذول
رفعت أكتافها بعدم معرفة تضحك ، نزل عيونه على الفستان الزهري اللي لابسته ، فاتنه وعذبه بشكل يتعبّه ، أيقن إنها اللي تحلي اللبس وترفع من مقامه ، تزهى بها الملابس أي شكل وأي لون ، توسعت عيونها تلفّ بمكانها وتنطق : صح شرايك ؟
أبتسم يغطي ثغره يصدّ عنها ، أبتسمت بدهشة من ردة فعله تتمسك بأكتافه وتنطق : ما جاز لك شكله
سحب كفها يعضّ أصابعها وشهقت تسحب كفها منه ، ألتفت عليها ينطق بحدة : هيا تجهزي بخطفك
عقدت حجاجها تنطق بغضّب : بعد العضه شلون تبيني أروح معك آسفه بس باقي ما فقدت عقلي !
سحبها من خصرها يعضّ خدها ويقبّله بعمق ، شهقت تحاوط وجنتيه بكفوفها وتنطق : نجم وش هالعنف !!
ارتخى بين يدينها يعشق عذوبتها وطريقة كلامها ، ينفضح ويتجرد من هويته قدامها ، ما يعرف نفسه ويغفل عن تصرفاته ويقدم بأفعال ما تمثله أبدًا ، يدوخ ويهيم ويبحر لأبعد الحدود وهو معها ، ضحكت ودوّى صدى صوتها بأقصاه ، أبتعد يفصل قُبلته يقابل وجهها ، المسافة بينهم شبه معدومة ، زفر ينطق بهدوء نبرته : لو تبين السلامة أتركيني
سحبته لها تقبّل ثغره تضيعه فيها أكثر وأكثر ، يعشق من يعانق ثغره بثغرها فكيف لو المبادرة جات منها ، حاوط خصرها بكلتا يديه يشّدها له ويتعمق بها أكثر ، أبتسمت تفصل بينهم وتنطق بحدة : أنتبه تعاودها ماهو بصالحك تهدد حفيدة العميد !
دفعته تعطيه ظهرها وتنطق قبل تدخل : طبعة الروج
سحب شماغه يتلطم به وينطق بنبرة تجهلها : أنا في موتري عجلي لا تبطين
خرج من عندها يترنح عجز يمشي بثبات ، لعبت بحاله وضيعت علومه ، أبتسمت تقفل الباب وتتوجه للصاله ، انحنت تأخذ شنطتها وعبايتها وتنطق : أنبسطت معكم بنات وبإذن الله لنا لقاء قريب
شهقت نوير تنطق بصدمة : أما عاد بتروحين ؟!
رفعت أكتافها بقلة حيلة تنطق : أنتم خربتوا على أنفسكم حلف بعد اللعبه ذي ما أجلس
توسعت عيون نجد توقف بغضّب وتنطق : وش الشخصنه ذي أصبري بأكلمه لك !
فزّت وهج تمسكها توقفها وتنطق : لا لا أساسًا تعبانه شوي ما نمت بعد الدوام
شمايل : نشبوا لك ياخيتي روحي الله يستر عليك ماعليك فيهم
ضحكت بخفه تنطق : عمري والله أحلى من ينشب وأبشروا بعوضكم
أبتسمت نجد تحتضّنها وتنطق : العوض شوفتك يا روحي
حاوطتها تسلم عليها وتبتعد ، لوحت لهم بيدها تخرج من عندهم ، تحجبت وخرجت من الحوش للشارع ، تقدمت لموتره تركب وتنطق : ليش ما نمشي للحلّة شوفها هنا
ألتفت عليها ينطق : وأخلي موتري تلعب به الشمس ؟
توسعت عيونها تنطق : شدعوه بنجلس للصباح ؟
هزّ رأسه بالإيجاب ينطق : قفلي بابك
قفلت الباب وحرك نجم للحلّة ، دخل مع البوابة ونزل يقفلها من بعده ، تقدم لموتره ينطق : تسوقين ؟
هزّت رأسها بالإيجاب تنطق بحماس : والله ؟
ضرب مرتبته ينطق : أطمري ودخليها تحت النخل وتعالي لي عند العريش
أبتسمت ترفع نفسها وتتقدم لمكانه ، زفرت تنزل كعبها وتنطق : الأرض فيها شوك ؟
مسك كعبها يشيله عنها وينطق : لبقي الموتر وأدعيني ومالك إلا اللي يشلك بين يدينه
أبتعد عنها وأبتسمت تحرك الموتر بهدوء للمزرعة ، لاحظت تغير كبير في شكل المزرعة ، صار بين كل نخلة والثانية مسافة كبيرة توسع لسيارة عائلية ، وقفت الموتر تطفي المحرك وتقفل نوره ، فتحت الباب تنزع طرحتها عن شعرها وتتنفس من ضربت النسمات وجهها ، رفعت عيونها على نجم الواقف عند العريش وأبتسمت تنطق بهمس : بتدلع شوي
ضربت بوري وألتفت لها وسرعان ما ضحكت تأشر له يجيها وفعلاً نزل نجم شماغه وأغراضه يرفع طرف ثوبه يتجه لها ، وقف قدامها ينطق : أقربي وحطي يدك على رقبتي
رفع طرف ثوبه يعضّ عليه بأسنانه ، ضحكت ترفع ذراعيها تحاوط برقبته وانحنى يرفعها بين يدينه ، كف أسفل فخوذها وكف يحاوط خصرها ، رفس باب موتره برجله يركض فيها وسرعان ما صرخت تضحك بصوت عالي ، أبتسم بوسع ثغرها من صفق شعرها وجهه وأنتثر عبيرها بصدره ، شّدت عليه تترجاه يوقف ولبى لها يوقف عند العريش وينطق : وصلنا يا طويلة العمر
أبتسمت تنزل من بين يديه وتتقدم للقعدة تجلس ، مشى يتبعها يجلس بجانبها ويبعد المركى من بينهم وينطق : أقربي لا يأخذ الخلاء حيّز بيننا
...
انتهى البارت ادعموني بنجمة وكومنت عشان اتحفز اكملكم 🤎