يانجمٍ وهج في حلّة سهيل

« ١٠ »

-
هو ما قدر يقرب أكثر حتى يشعر فيها كان تارك بينهم مسافة الأكيد أنه يشتمها والآن بات باله مشعول جدًا نام بعد تفكير عميق ومن هدأت الأصوات فتحت عيونها بصدمة ، رفعت رأسها وسرعان ما توسعت عيونها برعب من شافته قدامها نايم وما كان صوته مجرد خيال ، أبعدت البطانية عنها وسحبت الخفيفة من تحت رأسها ، تقدمت بهدوء له وشهقت بخفه ما هي مصدقه اللي تشوفه ، اللي كان قبل ليلة قاسي وحاد الطباع يتواجد قدامها بالجانب الحنون اللي ما توقعته يتواجد فيه ، عضّت شفايفها لثواني ونطقت بهدوء نبرتها : أف يا نجم أف
سحبت البطانية الخفيفة تغطيه فيها ، لفّت عليه تشوف قربه منها وأبتسمت بهدوء تستنشق طيّبه وريحة العوده ، أبعدت عنه توقف وتمشي لزجاج جدتها تتأملها وتراقب وضعها ، في جهة أخرى هربت منه إبتسامة نابعة عن دهشته منها ، كيف قدرت تمثل عليه بدون ما يشعر فيها إنها صاحيه ، أو هو من زود هيمانه فيها ما فكر يركز عليها إذا هي نايمه أو لا ، فتح عيونه بهدوء يوقف ويمشي تجاهها ، زفر ينطق : ‏زودٍ على عذوبة أطباعك ما هنى لك نومك خايفه البرد يجيني ؟
ألتفتت له بصدمة تنطق : أنت حقيقي ؟
صدّ عنها ينطق بسخرية : وش ودك ؟
شابكت كفوفها ببعضها تنطق بقلق وبنفس واحد : متى جيت وكيف جيت وليش جيت !!
توسعت عيونه بصدمة ينطق : بشويش حضرة الدكتورة داخلين تحقيق ؟؟
أبتسمت بفشلة وقالت : لأني مصدومة هم مانعيني أنزل ومانعين عزيز يجيني عشان احترازات السلامة والعدوى
تكى على الزجاج الخاص بغرفة مزنه ينطق : من هو عزيز ؟
رفعت حاجبها تنطق بسخرية : مثل ما عرفت أسم سمو ما ظنتي غفلت عن عزيز
بلل شفايفه ينطق : يمكن غايتي أسمعها منك ؟
وهج : أنا أكون خالته
هزّ رأسه بالإيجاب ينطق : عندي علم
توسعت عيونها تنطق بسخرية : ليه تسأل طيب ؟
أبعد عن الزجاج يعدّل وقفته وينفض يدينه ، رفع عيونه عليها ينطق بداخله : ‏دخيلك دامك سكنتي القلب ووريده وخذيتي النبض والإحساس أحذري تخيبين رجاي فيك وتخونين وتقتلين ما بقى من روحي بلا أسباب !
صدّ يمشي وهي واقفه تناظره بذهول ونطقت : نجم !
شّلت حركته من نطقت بأسمه وبصوتها العالي ، أبتسم بخفه ينطق بصوت شبه مسموع : ودعناك الله يا عذبة الأطباع
غادر الطابق وسكنت تحسّ بوحشة من راح ، هي أعجبت فيه لكنها ما تناست من سالفة جدها وكيف تأذى وبشدة من سهيل وأهله ، عضّت شفايفها تنطق : الله يحفظك
رفعت عيونها للساعة بالسقف وسرعان ماوسعت عيونها بصدمة ، كيف أشرقت الشمس وكيف عدى الوقت بسرعة وهو برفقتها وبدون ماتشعر أنهم قضوا الليل كله سوا ، ألتفت للدكتور اللي تقدم لها ونطق : معليش حضرة الدكتورة تركناك الليل كله بدون مكان ترتاحين فيه
ميّلت رأسها بعدم فهم ونطقت : يعني جيت مو عشان جدتي ؟
كان مرتبك وتقدم يفتح لها الغرفة الخاصة بجدتها ، أبتسم لها ينطق : حمدلله أستقرت حالتها وبننقلها للغرفة فوق وتقدرين ترافقين معها
تقدمت وهج له ونطقت : مين أرسلك ؟
أبتسم بربكة ينطق : محد تفضلي معي سجلي بياناتك
زفرت بغضّب تنطق بهمس : ياربي منك يا نجم !!
تقدموا الطاقم يطلعون سرير مزنه للقسم وبعد ما عبأت وهج بياناتها صعدت للغرفة تدخلها ، دخلت تشوف السرير حقها والجناح الضخم ، أبتسمت بدهشة من شافت ورد بجانب سرير جدتها وتقدمت تقرأ الكرت ، عبّست بملامحها من شافته فاضي تمامًا ومشت تشيله وتحطه قدام سريرها ، أبتسمت تنسدح ونامت علطول أثر التعب وسهر الليالي ..
« حلّة سهيل ، الجمعة صـباحًا »
طلعوا من المسجد بعد الصلاة ونطق أبو منيف : الفطور في بيت أمي يا جماعة
هزّ رماح رأسه بالإيجاب ونطق : كلكم تعالوا لحد يخالفنا
مشوا جميع لبيت الجوهرة يلبون دعوتها للفطور ، مشى نجم يمشي بإتجاه مخالف عن طريقهم يتوجه لمجلس سهيل ، دخل للمجلس ونطق : علامك ما جيت تصلي معنا ؟
رفع حاجبة بغضّب ونطق : تعال شلني على ظهرك !
جلس بجانبه ينطق بصدمة : لا والله ما أنت على بعضك وش في خاطرك يا سهيل ؟
سهيل : ما جاتني الدكتورة الأربعاء ولا جيتني أنت
ميّل رأسه وتذكر أنها مرافقه مع جدتها ، رفع عيونه ينطق بجدية : أكيد عندهم ظرف ولا ما بيخالفون موعدهم وأنا كان عندي تدريب وعندك علمٍ به
سهيل : ايه معذور وش صار على موضوع مترك ؟
نجم : بنمشي قبل العصر عشان نلحق صلاة العشاء عندهم تعرف الخطوط والمسافات
هزّ رأسه ينطق : اللي ودك قم ألحق الفطور
نجم وقف ينفض ثوبه وينطق : وأنت ؟
سهيل : بتجيني به أخت غيث
هزّ رأسه ومشى يغادر المكان ، طلعت غرور بوجهه وشهقت برعب تنطق : يمه من وين طلعت !!!
رفع حاجبة بدهشة ينطق : من وين يعني ؟
كانت الشمس على وجهها وما ركزت أنه نجم إلا من صوته ، عضّت شفايفها لثواني ونطقت : ما دريت أنك نجم
مشى يتخطاها ويدخل بيت الجوهرة ، سلم بصوته العالي ومشى يدخل للداخل ، جلس على السفره بجانب عيال عمه وبدأوا يأكلون فطورهم ، رفع رماح رأسه ينطق : نجم يا أبوك عادك صامل على موضوع شايب آل ساير ؟
هزّ رأسه بالإيجاب ينطق : الله الله زهبوا عماركم ولحد يخالف كلامي من كبيركم لصغيركم !
أجابوا له جميع بالإيجاب ما عدا أحمد اللي نطق : والله عندي شغله وأنا عمك أن كان خلصتها لحقتكم وأن كان ما امداني أعذروني
نجم : معذور يا حميد معذور
همس جابر بالقرب من أبو دحيم ينطق : وش سالفة ساير ؟
أبو دحيم : يعتذرون منه على شيءٍ حصل
جابر : وشهو ؟
رفع كتوفه بعدم معرفة وقال : لما وصلنا لمجلسه بنعرف
زفر جابر بضيق ينطق : مدري وش ورا نجم ذا !
كملوا أكل اللي خلص قام يكمل أشغاله لهذا اليوم ..
« قصر مترك ، العصر »
كان عزيز يشرف على التحضيرات والتجهيزات بالمجلس للضيوف اللي ما عنده أي أدنى فكره عنهم وعن من يكونون ، كان يطبق كلام مترك وتوجيهاته له ، ما كان فالقصر أحد غيره ، مترك يزور مزنه ووهج ما زالت بالمستشفى مع جدتها ، زفر بتعب يجلس وينطق : روزا لا حطي الطيب والعود على الطاولة بآخر المجلس
هزّت رأسها ومشت تكمل ترتيباتها ، خرج من المجالس الخارجية ومشى لداخل القصر ، رفع جواله يتصل على جده وينطق : متى واصل ؟
مترك : الحين بجيك وصلوا الضيوف ؟
هزّ رأسه بالنفي يدّعي أن مترك يشوفه ونطق : لا يا طويل العمر
مترك أبتسم براحة ينطق : أشوى جايك
عزيز : الله يستر عليك وهج بتجي معك !
مترك : أبد كيف تجي وتترك جدتها ؟
عزيز : يالله يالله أستعجل
قفل مترك وصنّم عزيز بصدمة من سمع أصوات السيارات أمام البوابات الخارجية ، مسك رأسه ينطق : لا تكفى !
ركض يخرج للخارج ويشوف عيسى يفك البوابة لهم ، كان بيصرخ ويرفض لكن فات الأوان ودخلوا بالفعل ، شّد على ثوبه ما تعود يرحب بالضيوف ونطق داخله بيأس : تكفى ألحق يا جد ألحق !
وقفوا سياراتهم بالحوش الضخم وعزيز مصدوم من كمية البشرية اللي نزلوا من السيارات ، وقف عند مدخل المجلس ينطق بصوته الجهورّي : ارحبوا يالله حييّهم !
رفعوا آل جراح أصواتهم يردون عليه وأهتز داخله من هول المنظر وعلّو الأصوات ، ارتخى بصدمة من لمح مروان والدكتور باسل من بينهم ونطق بهمس : وش قاعد يصير ؟؟
كان يشوف سهيل وخلفه أولاده ومن بعدهم أحفاده كلهم ، وفعلاً حضروا آل جراح من كبيرهم لصغيرهم ، أجبر نفسه يبتسم لهم وداخله مصدوم ، دخلت سيارة مترك واستهَل وجه عزيز له ، مشى ينزل من سيارته بسرعة ونطق : يا مرحبا يا آل جراح الله يحييكم اقلطوا اقلطوا
تقدموا يسلمون عليهم كلهم وضيفوهم فالمجلس ، دخلوا ومن جلسوا كلهم نطق سهيل : الله يسلمكم ويغنيكم ويجمل حالكم يا آل ساير وماهي غريبة عليكم
أبتسم مترك ينطق : حق وواجب حق وواجب !
وقف رماح ووقف نجم معه ، وقف مترك وألتفت لعزيز يهمس له : قم !
وقف بصدمة ونطق رماح : جايين ومتعنين وقاطعين مسافات وأبسط شيء نسويه في حقكم وما جينا إلا عشان نعتذر منكم ونطلب السماح
هزّ مترك رأسه ينطق بحدة صوته : جيتكم والله تعزّ علي لكن ما عندنا اللي ترجونه إلا في حالٍ واحد !
وقف سهيل ينطق : لو تطلب رؤوس الرجال ما تغلى عليك أطلب يا مترك !
زفر مترك بضيق من كلام سهيل له ، هو فقد سهيل بدنياه لكن الجرح ما برى ، رفع عيونه ينطق : وين اللي هدد بنتي ؟
تقدم نجم يتوسط المجلس ونطق : قلت بسلمه بنفسي وأنا ما أرجع في كلامي يا مترك
رفع حاجبة ينطق بحدة : وينه يا نجم وينه !
تقدم يمشي لجهة مترك ، وقف قدامه ونطق بحدة صوته وعيونه بعيون مترك : أنا اللي غلطت بالتصويب وأنا اللي طرحوني منصاب وأنا اللي ما هقيت الهوى يتمكن مني وأنا اللي ذبحتني بموتٍ أحمر وأنا الشجاع وأنا الصنديد وأنا والله ندّ للشجعان وأنا اللي أصبحت طريحٍ لمنتوقة العنق ‏وزاهية الخد ونحيلة الخصِر وأنا اللي أصبحت هيمان في نجل عيونها الوساع أنا قدامك سووا فيني ما تبي لكن لا تردني وأنا جايك بجماعتي من أكبر شيبانهم لأصغر صبيانهم أنا نجم بن رماح بن سهيل أطلب كريمتكم على شرع الله وسنة نبيه !
وقفوا رجال آل جراح بصدمة من طلب نجم ، وقف جابر ينطق بصدمة : وش قاعد يقول هاه ؟ وش قاااعد يقول..
قاطعه صوت سهيل اللي نطق : أقطع يا جابر !
أبتسم مترك بسخرية ينطق : تمرد عليكم كلكم وقال كلمته بدون ما يشاوركم ولا حتى ألتفت لأطول شارب فيكم ؟
شّد رماح على كتف مسلط ينطق : نجم..
طاح نجم على رجوله ورمى شماغه ، فزّ مترك يرفع شماغه وانحنى عزيز يرفعه ، رفع عيونه بضيق ينطق : أنا في وجهك يا مترك ما تردني أنا جيتك معهم لا تردني لهم لحالي !
كانت أنفسهم تغلي حسرة ، كيف تمرد عليهم ولا فكر يشاورهم وبدون رأي منهم نطق برغبته وبصوته العالي ، أبتسم مترك يشّد على كتوف نجم وينطق : أنت تنحط فوق الرأس يا ولدي وأبشر باللي يطيب خاطرك والله ما ترجع لهم خايب تبي وهج ؟ ما تغلى عليك !
تقدم عزيز ينطق بصدمة : لحظة لحظة لا نتحمس ترا باقي بنأخذ شورها طبعًا !
أبتسم بوسع ثغره وبانت نجوم وجنتيه ، مسح كفوفه ببعضها ينطق : اللي تبونه أنا كلي تحت أمركم !
أبتسم عزيز ينطق : محشوم يا أبو رماح !
تقدم رماح يمسك ولده وينطق : سرينا سرينا يا نجم !
ألتفت لأبوه ونطق : ماني رفيقكم بسري للقاعدة
زفر رماح بغضّب ينطق بهمس : تتهرب ؟ مردك للمجلس اللي أنت خابره !
مشى يتخطى ولده بغضّب منه ، ألتفت نجم لشجاع اللي تقدم ينطق : من شفت نجومك تشع وأنا جاي أبارك !
بلل شفايفه يلفّ شماغه على أكتافه وينطق : الله يتمم يا الشجاع
شجاع : اللهم امين والله يعطيك مرادك يا أبو رماح الليلة فيه محتوى كايد لا تخالفنا فالنفود أنا والعيال
مسح وجهه وفتّل شنبه ينطق : تم اسبقوني
تقدم مترك لنجم من فضى المجلس وغادروا جميع ، ألتفت له ينطق : أرحب
أبتسم مترك ينطق : البقى يا مرحب أسمعني يا نجم ما بنعطيك رد فالفترة الجاية لين يرجعون أهلها من السفر ويتشاورون فيما بينهم
نجم : أبد خذوا راحتكم بس عطوني الرد في غضون أسبوعين
رفع مترك حاجبة ونطق : وش عندك ؟
نجم : عندي مهمة
هزّ رأسه من فهم ونطق : كم ؟ ولا ما عندك علم
رفع كتوفه بعدم معرفة وقال : والله ما عندي علم
أبتسم مترك يخبط كتفه وينطق : أجل أستريح والرد بيجيك وعسى الله يتمم ونعم الرجال يا نجم
تقدم يسلم على مترك ويحّب خشمه وينطق : ونعم بحالك ولا عليك زود يا أبو الأمير !
أبتسم مترك ينطق : شكلك دريت أني اسأل عنك قمت تسأل عني ؟
نطق نجم بسخرية : عندي شجرة العايلة كاملة خاف وأنتبه مني !!
مترك ميّل رأسه ينطق بسخرية : ما نخاف يالنسيب وأن كنت ذيب فالرجال ذيابه !
نجم رفع كفوفه ينطق : والله معاد أدري وش أقول بعد النسيب عسى الله يتمم
ضحك مترك وأبتسم بخفه ينطق : ما ودي أطول عليكم أرتاحوا ولا تستعجلون بشيء ودعناكم الله وبشروني
هزّ مترك رأسه بالإيجاب ينطق : ما يضيع لك تعب بأذن الله وأنتبه لا ينهشونك الجماعة !
صدّ نجم يمشي وينطق : يا رجال بعيدة على شواربهم
ضحك مترك وخرج نجم بموتره يغادر المكان ، ألتفت مترك على عزيز اللي نطق : أبشرك وهج دقت علي تقول كتبوا خروج لجدتي !
أبتسم بفرحة ينطق : الحمدلله وجه خير علينا ولد رماح
تكى عزيز على كتف جده ينطق : وش سالفته من وين جاء والله ما فهمت منه إلا أنه جاي يخطب خالتي
مترك : هو حفيد سهيل يالدلخ
شهق بصدمة ينطق : صح !! كيف ما ركزت لمن قال أسمه وبعدين من عاد يتقدم لبنت كذا ؟ وقسم بالله تقول فلم رعب
دفعه مترك ينطق : وخر مني يا المايع وبعدين وش عرفك بفعايل الرجال !
أبتسم عزيز بفشلة ينطق : جرحك وصل
صدّ مترك يتحسّب على عزيز ، ضحك بصدمة ينطق : وش في أمه شخصن !!
توسعت عيونه من قفل مترك الباب ونطق بحدة : جدي والله لو ما تفك الباب !! تراني أطول منك
فتح الباب يناظر بعزيز اللي قمط وتقدم بهدوء ومن وصل للباب ركض بسرعة للداخل ورمى مترك عقاله عليه ، ضحك يقفل باب غرفته وينطق : حافظ حركاتك هذي حافظها !
مترك : أطلع إذا أنت على رجال !
ضحك عزيز ينطق : قديمه تستدرجني عشان تخنقني والله ما أجيك
زفر مترك يتجاهله ويمشي لغرفته يتصل على وهج ..
« المستشفى ، جناح المرضى »
منسدحه على سريرها وتكلم ليلى ، صرخت ليلى بحماس تنطق : وقسم بالله الحب يا جاهلينه ولا يسرق بطانيه عشانك !!
شهقت وهج تنطق : أصبري جدي يدق !
صرخت ليلى بتهديد تنطق : لا تقفلين حطيني أنتظار !
ثبتتها على الانتظار وفتحت المكالمة تنطق : أهلاً جدو
مترك : هلا يا جدو وينك فيه ؟
وهج : بالغرفة مع جدتي
مترك أبتسم ينطق : صدق كتبوا لكم خروج ؟
أبتسمت بوسع ثغرها تنطق : ايه ايه بنطلع بعد يومين تخيل مزوني صحت وأكلت عشاءها وعطوها أدويتها ورجعت تنام
أبتسم مترك ينطق : يارب لك الحمد
وهج : ايه وش عندكم من أخبار ؟
شّد على يده يدفن الكلام داخله وينطق : ما به شيء
هزّت رأسها تنطق : فهمت تبي شيء ثاني أمرني ؟
مترك : أنتبهي لنفسك ولجدتك
أبتسمت وقالت : لا توصي حريصه مع السلامة
مترك أبتسم بخفه ينطق : ودعناكم ربي
قفلت المكالمة ورجعت لإتصال ليلى تنطق : ليلو ؟
ليلى : هلا والله موجودة موجودة
وهج : ياخي حاسه أني أزعجت جدتي شكلي بسكر
شهقت ليلى تنطق : ياربي هذي اللي بذبحها صدق ! مافيه ما بتقفلين لو تراسليني فالشات وأنا أسولف ما عندي مشكلة
ضحكت بصدمة تنطق : لا وع كأني في بث مشاهير
ضحكت ليلى تنطق : غبيه
ضحكت وهج وسكتت من شهقت ليلى تنطق : لحظة كيناز تتصل علي
وهج : دخليها معنا
زفرت ليلى بغضّب تنطق : أقول فكينا منها شوي وأجيك
ضحكت تنطق : طيب
تعلقت بالانتظار وأبعدت جوالها تدخل الواتس ، فتحت الشات مع نجد وزفرت من ما شافت رسايلها لها يومين ، عضّت شفايفها تهمس : معقولة سحب جوالها ؟!
خرجت من الشات تدخل قروب عائلتهم ، أبتسمت تتأمل صور أبوها وأمها وسمو فالأيام اللي قضوها سوا ، خرجت تشوف ملفين "pdf" فتحتها تشوف رحلة طيران لهنادي وأمير من أستراليا للسعودية ، أبتسمت تقرأ التاريخ ونطقت بتفكير : بعد يومين ؟
شهقت برعب من نطق ليلى بحدة : وش اللي بعد يومين !!
عضّت إبهامها تنطق : حسبي الله على عدوينك طار عقلي !
ضحكت ليلى تنطق : بسم الله عليك بس وش اللي بعد يومين
وهج : أبوي وأمي بيرجعون إلا وش قالت كيناز ؟
ليلى : صراحة معاد أقدر أجاملها تبينا نفطر سوا بكره
وهج هزّت رأسها بالنفي تدّعي أن ليلى تشوفها ونطقت : ماش توقيتها غلط ما أقدر أترك مزنه أبدًا
ليلى : وأنا عناد ما بطلع معها
ضحكت بخفه تنطق بهدوء : خلاص انقلعي بنام
أبتسمت ليلى تنطق : طيب ليه انقلع !
وهج : باي !
قفلت بدون ما تسمع ردها ، غمضت عيونها ورجعت تفتحها تشوف سرير جدتها أو بالأحرى ورد نجم قدام وجهها ، شالته تفتح الدولاب وتدخله فيها ، قفلته وصدّت تنطق : أحسن حل صراحة
غمضت عيونها وشّدت على بطانيتها ، نفس البطانية اللي جابها لها من المستودع ، كانت تشوف طيوفه وصدى حروفه قدامها ، هزّت رأسها تبعد الأفكار عنها ورجعت تجبر نفسها تنام وبعد وقت طويل قدرت تنام ..
« القاعدة ، مكتب نجم »
مشى يخرج من مكتبه من أنتهى من شغله ، سحب المفتاح يقفل الباب ويدخل المفتاح بجيبه ، مشى يلتفت ووقف يشوف اللواء ركن كايد خلفه ، رفع ذراعه يضرب تحية له واستراح من نطق كايد : أستريح يا نجم
تقدم يسلم عليه وينطق : أوامرك ؟
كايد : بتطلع بالكتائب الجمعة الجاية
رفع حاجبة بدهشة ينطق : كانت المدة أسبوعين وش حصل ؟
كايد : هذي الأوامر وما عليك إلا التنفيذ يا حضرة المقدم
هزّ رأسه بالإيجاب ونطق بحسرة : على خشمي
أبتسم كايد ينطق : عليه الطيّب يا نجم
مشى يغادر المكان وزفر نجم بضيق يمشي للخارج ، قصرت المدة وقّلت المهلة المحددة عن اللي قالها لمترك ، ما يقدر يخبره أنه يبي القرار النهائي في أقل من سبع أيام ولا يقدر يروح للمهمة وهو ما سمع قرارها ، خرج للخارج على هطول الأمطار الغزيرة ، ضّم يدينه فوق رأسه ومشى يركض لموتره ، وصله وهو مبلل بالكامل ، ركب موتره وسحب البريهه من على رأسه المبلل وخلخل أصابعه ينثر شعره اللي يوصل طوله لحاجبيه على وجهه ، زفر يسحب جواله ويتصل على عجلان اللي وصل صوته وهو يقول : أرحب يا عريس
رفع عيونه للمطر على الزجاج الأمامي ينطق : ما بستغرب العلوم تنتشر فالحلّة أسرع من إنتشار اللهيب فالهشيم اليابس !
ضحك عجلان ينطق : عادك خوينا ؟
نجم : عادكم فالخيام ؟
عجلان : الله الله وأحمد توه يوصل
نجم نطق بترجي : تكفى يا عجلان ركب لنا بكبسة لحم والله أني جوعان
أبتسم عجلان ينطق : حماتك تحبك قده على النار يطبخ
استهَل وجهه ونطق بهدوء : ينصر دينك يا عجلان !
عجلان : عجل علينا
نجم : جايكم
قفل الجوال ونزله على فخذه ومشى يخرج ويتجه للنفود ..
« النـــفــود »
سحب فروته يلبسها فوق بدلته ، فتح باب موتره ونزل يركض للخيمة من المطر اللي يضرب القاع بكل قوته ، دخل الخيمة ونطق : سلام عليكم
وقف أحمد ينطق : عليكم السلام أقرب وعلمني اللي يقولونه العيال صدق ؟؟
تقدم يجلس وينطق : الله الله
شهق أحمد ينطق : لا لا ما تسويها !
شجاع : والله سواها الذيبان
أحمد : كذا وبدون ما يأخذ شور أحد ؟؟
نجم نطق بحدة : يا رجال افحمونا بالشور حقهم لا بالله ما خذيت رأي أحد ولا شاورت رجالٍ فيهم !
تقدم عجلان بالصحن يجلس وينطق : سموا بالله وكملوا سوالف
تقدموا يجتمعون على الصحن ورفع نجم عينه ينطق : بيض الله وجهك يا عجلان
عجلان : والله لو تدعي لي من اليوم لبكره ما صار أبيض
ضحكوا أحمد وشجاع عليه ونطق نجم بسخرية : أجل سود الله شعرك !
ضحك عجلان ينطق : ايه كذا تمام
أبتسم بسخرية يكمل أكل ، رفع عيونه من نطق عجلان : ايوه وكيف تكون العروسة ؟
رفع حاجبة ينطق بحدة : لا كذا بعشيك تراب بدال اللحم والرز أنتبه !
ضحك شجاع بصدمة ينطق : هذا جزاه وهو معشيك ؟؟
عجلان : ما يستاهل إلا التراب
ضحك أحمد ينطق : شفيكم ما فهمتوه ؟ يغار يغار
نجم : ما امداها يا حميد
شجاع : أجل برر كلامك
نجم : أمزح مع عجلان لكنه شدها شوي الله يهديه
أبتسم عجلان ينطق : لا دام تمزح خلاص حتى أنا أمزح
كملوا عشاهم على السوالف الخاثرة ومن أنتهوا تقريبًا وقف عجلان ينطق : آخر واحد السفره عليه
فزّوا العيال واقفين ما عاد نجم اللي ما أستوعب وظل ساكن بمكانه ، ضحك عجلان بسخرية ينطق : أبرك وأسعد تستاهل قم الله لا يهينك وشل السفره وغسل الصحن والقدر
وقف نجم بصدمة ينطق : طيب..
قاطعه عجلان يدفعه وينطق : عريس ان شاءالله لو أمير عند أمك يا حبيبي شل شل
رفس نجم يد عجلان ينطق : خلاص لا تنافخ !
ضحك عجلان يمشي ويخرج للمغاسل ، وقف المطر وزان الجو بشكل عجيب ، سحب السفره بغضّب يلفّها ويحطها فالصحن ويمشي للمطبخ ، ألتفت يشوفهم يضحكون ويسولفون ونطق بحسرة : أوريكم يالجحلط !
ضحكوا العيال عليه ومشى يتجاهلهم ويدخل المطبخ ، حط الصحن بالمغسلة ومشى يشيل القدر ، فتح الغطاء وسرعان ما توسعت عيونه بصدمة ينطق : الله يعجل بيومك يا عجلان !!
كان أسود وبقايا الرز محترقة ومتلاصقة بقاع القدر ، ثبته يملأه بالماء الحار ومن تعبأ بالكامل قفله بالغطاء ينطق : يالله وخالقي ما ألمسه !
سحب الصحن يغسله ومن أنتهى منه غسل يدينه ومشى يخرج ويتوجه لموتره ، أبتسم عجلان ونطق : تعال كمل سمره
ألتفت عليه ينطق : أقول صمّها لا أجي وأبرك فوقك
ضحك عجلان بصوت عالي ينطق : تقلع بس
ركب موتره يشغله ويرجع للحلّة بنعاس شديد بعد ما امتلأ بطنه ..
« حلّة سهيل ، المجلس »
وقف جابر بغضّب من هدوئهم ينطق بعصبية : ما أدري كيف للحين ساكتين ولا عاجبكم أنه تقدم لبنت غريب على حساب بنت عمته اللي للحين ما ملك عليها حتى وكل ما سألتوه قام يسكتكم ويسلك لكم !!
وقف رماح ينطق بغضّب : كلنا في نفس الموقف حتى حن ما كان عندنا علم ألعن الشيطان اللي رابض بين كتوفك وأجلس ننتظره يجي ويبرر موقفه
ضحك جابر بسخرية ينطق : وش يبرر ووش يترك ؟ بيجي ويرمي عليكم كم كلمة ويمشي والله معاد هو يشوفكم شيء ولا ما كأن سوا سواته الله يسود وجهه ووجيهكم !
زفر رماح يستغفر ويجلس ، كان سهيل يحترق على نار هاديه من كلام جابر عنهم ومن فعلة نجم اللي تسود الوجه ، رفع عيونه ينطق بحدة : الزواج ما بيتم أرتحت ؟
جلس جابر ينطق : بنشوف وش آخرتها
ركض مسعود يدخل للمجلس وينطق : جدي نجم جاء
رفع سهيل عيونه على مسعود ونطق بحدة : خله يجيني ذا الساع !
مسعود : أبشر
مشى يخرج للحوش وينطق : نجم جدي يبيك
فرك عينه بتعب ينطق : علمه أني تعبان وبمسي وعدنا بكره الصباح
مسعود نطق بصدمة : لا لا يبيك ذلحين !
مسح وجهه يستغفر ونطق بحدة : مسعود اذلف مني
مشى يتخطاه ويتجه لبيته ، وقف من نطق سهيل بغضّب وعلّو صوت : نجم !! أدخل لا أطلع عليك
زفر بضيق ينطق : يا صبر
مشى يرجع وأبتسم مسعود ينطق : ما علمتك أنه معصب
هوش لمسعود اللي صرخ برعب من نجم ونطق : وأنا ما علمتك تذلف ؟؟
ركض يتبعد عن نجم اللي مشى يدخل المجلس ، وقف عند الباب ببدلته المبلولة والنعاس والتعب الواضح على ملامح وجهه ، رفع شعره عن وجهه ينطق : سمّ يا سهيل ؟
ضحك جابر بسخرية ينطق بهمس : طويل وجه !
ألتفت نجم له ونطق بحدة : أرفع صوتك لو أنك رجال !
صرخ سهيل بغضّب ينطق : رفعناك في كل مجلس وحطينا رأسك فوق كل رجال ويوم غرك المدح رفعت خشمك علينا ورحت تطلب البنت من أهلها وبدون ما تأخذ شور أحد منا ؟!
زفر بغضّب ينطق : أنا في غنى عن زايف المدح والإعجاب ولا يوم قلت لراعي الطبل طبّل لي وأنا معادني صبي تمشي عليه قرارتكم دون حول منه ولا قوة ورأيه مهمش ومدفون !
كانوا ساكتين وتقدم نجم لهم ينطق بحدة : أنا رجال الشنب خطّ في وجهي ولحيتي عن لحى بعضكم وأتحدى أطول شارب يوقف بوجهي ويقولي أن كلامي غلط !
ما زال الصمت من جهتهم ومحد قدر يعارض كلامه ، ضرب الجدار ينطق : سكت في موضوع بنت جابر عشان خاطرك يا سهيل ولا ما ذكرت أني طلبت البنت منكم وسكتت وما قلت شيء قضمت الغيض ودفنته داخلي لكن في موضوع آل ساير لا والله ما يوقف قدامي إلا الموت ودكم توقفوني أذبحوني وهاكم سلاحي يا ربعي !
رمى سكينته على الأرض ينطق : والله ما يردني عن بنت أمير شيء والرجال منكم يطلع قدامي ويواجهني !!
وقف بصدمة من هدوئهم ونطق بصدمة : شفتوا آخرتها جاء ورمى كم كلمة وسكتوا ؟؟
انحنى جابر يسحب سكينة نجم وينطق : أنا اللي بوقفه عند حده !!!
نطق سهيل يقاطعه بحدة : حتى لو هي رغبتك ومناك ما بيحصل الزواج وأن كأنك صامل ملك على بنت عمتك وأنت أبخص بالباقي !
سحب سكينته من يد جابر يهمس : لا يكون صدقت أنك رجال وطلعت تواجهني ؟
دفعه جابر ومشى يخرج من المجلس ، ألتفت نجم على سهيل ونطق : وأرجع أكرر ما بيصير إلا اللي أبيه ومثل ما قلت يا سهيل أنا أبخص بحياتي وبقرارتي وبمستقبلي وآخر كلامي عندي تدريب طول الأسبوع وبنهاية الأسبوع بطلع مهمة ما أدري كم مدتها ودعناكم الله
مشى يغادر المجلس ويمشي بتعب لبيته ، فتح الباب ودخل يقفله وراه ويمشي لغرفته ، وصل ورمى نفسه على سريره بتعب من أحداث اليوم ونطق بهدوء : يالله إنك تيسرها ولا تعسرها علي
...
انتهى البارت ادعموني بنجمة وكومنت عشان اتحفز اكملكم 🤎