ايمان: ضروري...
ويبا: شوفي... اللي ظريف الحاج ظريف معاه... غير سيري معاه مقادة و ديري خدمتك ماكاين اللي يقرب ليك ولا يجي جيهتك... و هو كايعرف شكون كايخدم نيت و شكون غير كايرقع... عندو غير نيشان..
ايمان: لهلا يحشمنا...
الشادلي: (كايدخل) صباح الخير...
ايمان+ويبا: (كايوقفوا) صباح النور...
الشادلي: (كايشوف في ايمان) وهيبة... شكون هادي؟!؟
ويبا: هادي ايمان اخت نادية...
الشادلي: (كايسلم عليها) السلام أ بنتي.. كيدايرة لاباس؟!؟ خليتك صغيورة.. كيدارين الدار كلشي لاباس؟!! (ايمان ساكتة كاتشوف فيه باستغراب) مالك؟!؟ ياكما خلعوك مني؟!!
ايمان: (كاتحشم) لا لا... كلشي كايهضر عليك بالخير... غير قلتي خليتيني صغيورة و انا ماعاقلاش تلاقيتك قبل...
الشادلي: (كايضحك) كنتي صغيرة.. في الحفلة ديال المدرسة اللي كانوا داروا في الليسي لنادية ملي جات هي الاولى في الباك... تلاقيتكم... منتي مع باباك و ماماك... ماعقلتش أشمن عام بالضبط... و لكن شحااااااال هادي...
ايمان: (كاتحدر راسها حشمانة) كانت عندي واقيلا 11 عام... سمحليا ماعقلتش مزيان...
الشادلي: هزي راسك أ بنتي... الخدمة ماكاتبغيش الحشمة... المهم دابا غير تسناي شوية... (كايدور عند ويبا) وهيبة...
ويبا: وي الحاج...
الشادلي: خليها معاك هنا حتى يجي السي مبشور... هو اللي غايتكلف بكلشي... را باقي ماوصل مابانتش ليا طوموبيلتو في الباركينغ التحت... ملي تحسي بيه جا.. دي ليه ايمان و قولي ليه خت نادية... هو عارف اشنو خاصو يدير.. را وصيتو و شرحت ليه كلشي...
ويبا: واخا أ الحاج...
الشادلي: (كايدخل للبيرو ديالو و كايرجع تاني) ماعرفتيش واش أمير ولدي جا ولا مازال؟!؟
ايمان: (كاتنقز) لا ماغايجيش...
الشادلي: أشنو؟!؟ شكون قالها ليك؟!!
ايمان: (مرتبكة) غير قبيلا سمعت سفيان قالها لنادية...
الشادلي: (معصب) وهيبة.. شوفي ليا سفيان.. قوليه دابا يجي عندي... (كايدخل و كايردخ الباب)
ويبا: ناري تعصب... النهار غايدوز مزفت.. وا كاطيري يا ختي.. كان ناشط...
ايمان: خليه يعرف... الليل كله و ولدو سهران... الضصارة كيدايرة..
ويبا: و نتي مااااااااااااالك؟!؟ آش دخلك؟!؟ أول درس تعلميه... و خليه حلقة في ودنيك... دخلي سوق راسك... هوما عائلة بيناتهم.. ياكلوا بعضياتهم گاع... ماسوقناش...
YOU ARE READING
المسلسل الرومانسي المغربي "Love Story"
Romanceالمسلسل المغربي Love Story... 13 عام دازت باش كتبت هاد المسلسل... و كنت كتبتو مباشرة من بعد ماكملت "الغوتة"... و حيت كانت غير الكليكة اللي كاتقرا... الشخصيات كانوا تقريبا عندهم نفس الأسماء... و كان أول مسلسل رومانسي كتبت... و هو اللي كان كبر الصفحة...
مسلسل "LOVE STORY" - الحلقة 15
Start from the beginning