من جمعة اكتشفت أنو صابني مرض خطير و يتسمى نوعا ما نادر. كنت لباس عليا دايرين بيا عايلتي و أصحابي في نهار و ليلة كل شي تقلب. المرض هذا ما يعطيش مؤشرات قبل تقوم الصباح تلقاه عندك فرد ضربة. ميعطيش سخانة في الليل و إلا ردان ميوترش الأعصاب. شي ملي شفناه و قريناه... نحب نفرغ قلبي و نحكيلكم كيفاه بداني. تصورو قمت من النوم أول حاجة نعملها محليتش الفايسبوك و المسنجر بالرغم عندي فيهم 4 ميساجات و 3 إشعارات. زوز كمنتارات على عركة و أربعة ميساجات كمالة لحديث البارح. قمت متقلقة و مش كيف العادة أما راني محسيتش. تصورو في عوض منبقى في فرشي نعمل دورة في الأنستقرام نسيتو جملة... دخلت شفت الطقس على التطبيق. أنا نشوف الطقس ؟؟؟؟ نلقاها شوية شمس و شوية غيم و شوية ريح.
قمت من الفرش غسلت وجهي تعديت للكوجينة نلقى شوية ماعون من البارح. من العشاء متع البارح. تصورو متقلقتش و ما فديتش ؟ نهارتها عندي مريض واحد في العيادة و زوز الأخرين، واحد كلمني البارح قلي منيش جاي و واحد كلمتو أنا على بقية فلوس مهزش عليا باين لا جاي لا هو لا فلوسو. بقالي واحد مع الحداش. تصورو كيف تذكرتهم لي مهمش جاين قلبي ما وجعنيش . تصورو ما خممت كان فالراجل لي جايني ؟ لهنا المرض بدا يستفحل أما أنا باقي مفقتش. تعرفو كيفاه بديت نفيق ؟ و أنا في الدار ماو صباحي فارغ جبدت السطل و الخيشة و قلت نعمل مسحة العادة و نخمل الدار. حضرت دبوزة الجافال و الدينول و دبوزة منظف الأرض لي قريب يوفا (تصورو متقلقتش خاترو بش يوفا و هو أصلا سومو 12د). عملت هكا حليت الشبابك بش نحي ريحة النوم من الدار . أنا حليت الشباك و المرض عطاني أول مؤشر. عجبتني النسمة الباردة و الدنيا مغيمة شوي أما نهارتها بالذات شفت الشمس تخت الغيوم. و شدتني حالة من الهستيرية لين منعرش على روحي كيفاه خبيت السطل و ماعون التسيق و هزيت التليفون و بديت نبربش. نعمل هكا نكلم نومرو عمري ما توقعت نكلمو !!!! المرض هذا خايب يولي يتحكم فيك و يخليك تعمل حاجات خارجة على المألوف. كلمت جارتي... هذي في عمري قرات معايا قبل أما هي عملت فارمسي. لا تجبد حد لا تضحك ضحكة من القلب لا تنبرلك على واحد لا عندها بحث صحيح لا تعرف أصلا تسمي الناس و الكوبلوات. ماسطة شوي. كلمتها ! قلتلها فاضية قتلي أي قلتلها نمشيو نحوسو ؟ إيجاني للدار تو نمشيو مبعضنا.
لحظة ؟ أنا نستدعا عبد للدار من غير ما نسيق و نلم و نبدل الزرابي و نحضر الحلو؟ تي أنا كي ميبداش عندي حلو باهي منستدعى حد على قهوة إلا ما نشري ب 50 دينار كعك ورقة و نبدا نحاوز في صغاري بش ما ياكلوشو. تي أنا كي ما يبداش عندي لحم بقري قد راسي و علوش منستدعى حد يونسني على الطاولة. آه مالا ! اليوم عيطلها و صالتي مش منظمة و لعب ولادي محطوطين في القاعة. المشكلة أنو اليوم عيني صبحت مريضة معادش تشوف العوج حسيتها عادية الصالة و حسيت اللعب زينوها. جات زينب لداري فيسع سلمت عليها من غير ما نتصنع حسيت روحي ما حشمتش كيفاش أول مرة نكلمها. حاسة روحي مرتاحة. قلتلها لحظة سمحني نلبس و نجيك. مشيت نلبس. غريييبة طول مديت يدي لمريول باج محلاه معاه سروالو. عندي سبادري حلو يخرج و خفيف مرتاح في الساق. على البرد خترت دودون تقرب في اللون و هزيت إيشارب على الريح. اليوم لا بقيت نقيس لا هبطت القارد روب الكل. مكيجت شوي حطيت شركة عندي مديدة ناسيتها و بارفان فراز و خرجت.
وين نمشيو يا زينب ؟
زينب هذي ترسم في وقت فراغها. تصورو اللطف اليوم مقلتلهاش محلاهم رسماتك يهبلو ! ما جاملتهاش. اليوم حكيت معاها على الألوان و كيفاه تخلطهم و اللطف سبعة ألطاف حسيت روحي مهتمة بالحديث و المعرفة أكثر من المجاملات.
و أنا نحكي يعمل هكا المرض يتحكم في إيدي و ساقي نلقى روحي نسوق ماشية لدار سالمة بش نشرب فيها قهوة الصباح. هي متع ثلاثين دقيقة مشي و 30 رجوع و أنا نخدم 11. تصدقو مستانسة كيف بش نعمل بروقرام لازم نهاري كامل يبدا فاضي مكانش منمشيش. و لازم كي نمشي لبلاصة نبقى فيها ساعتين ثلاثة و منبداش مربوطة بشي. اليوم مشيت و أنا مقتنعة أني بش نقعد شوي و نروح.
تصورو طريق كامل تليفوني يفبري ممسيتوش موقفتش على اليمين و حليت قريت. ما شديتش في أيدي و كملت سقت. ما عطيتوش أهمية لا ليه للفايسبوك. وصلنا الدنيا ريح و أنا عندي الشقيقة. نهارتها الريح موجعليش راسي و مخممتش أصلا في المرض، بقينا البرة الطقس حلو و نستحلى في نسيمة الصباح. جانا الmenu لا كسرت راسي كيما نعمل مع صحابي نبدا نقرا في البوتي داج هذا فيه قهوة و أملات و هذا زايدة فيه دبوزة ماء. قتلو قهوة و كرواسون قلي معنا كان الكايك قتلو مالا كايك. أنا الكايك في داري مناكلوش اليوم ربك هبط عليا تساهل. حكيت مع زينب اكتشفت إنها دخلت للكورال. تعدا الوقت نحكيو و أنا فايقة بلي منيش عادية : بالي مفرهد عافانا و عافاكم الله. في الطاولة لي ورانا فما بروفة قراتني قبل معروفة صعيبة. ساعات تقلها صباح الخير متجاوبكش. و متحبش تعطي كور. قاعدة وحدها تخدم علىpc متاعها. نفس المرايات و الخزرة نشوفها نتفكر الراشا. شافتني و جات العين في العين و أنا كنت نكرها و هي متحمل حد. نعمل هكا و نقوم نسلم عليها ! و الغريبة سلمت عليا و قتلي شعاملة تو وين وصلت قلتلها حليت نخدم و عندي راجلي و صغار. قتلي نفرح كيف نشوف أولادي كبرو ! وه ؟ قلتلها إيجا أقعد بحذانا. الغريبة مش غادي الغريبة أنها جات و قعدت. قالت تحضر في كور تبسط فيه بش الطلبة يفهموه و ميجيهمش صعيب. و فيسع تبدل الموضوع على دار سالمة و الأرض و التراب و الفارماكو و الأعشاب الطبية. إختصاص زينب عاد. جا وقت خدمتي خلصنا كل حد على روحو محسيتش روحي اليوم نحلف و نتكتف بش نخلص عليهم و إلا نحس بالذنب كيف ما يخلونيش. خرجنا من المطعم بعد ما تفاهمنا بش نرجعو نفطرو فيه أحنا الثلاثة بعد غدوة. مشيت نخدم جا الباسيون لي هو قريب راجلي سلمت عادي و عديت نلقاه حاضر للتقليع. 15 ديما نوحل فيها اليوم جات ساهلة مسهلة زعما خاطر المرض مخلانيش نخمم في complications ؟
و أنا خارجة قتلي السكريتارة راهو جاك فولان كملك الفلوس. خذيتهم و خرجت. و عاودت روحت لداري لي متسيقتش و للنفس الصالة لي فيها اللعب الخايضين. وللدي في الدار قتلو حمزة تلم الصالة وحدك و إلا نجي نعاونك قلي تو نلمها وحدي و نجي أنا نعاونك في الكوجينة. وقتها بديت نشك أنو مرضي معدي. زاد جا راجلي قلي صحة صحة اللبسة و هي راي قديمة من الزهاز. زهما هو زادة عديتو ؟ حليت تليفوني و الفايسبوك لأول مرة نلقى أختي مازالت تحكيلي على مرت خويا لي نبزت أمي و نلقى صاحبتي قتلي العشية اللمة في القهوة طرح تنبير و و حدة أخرى صاحبتي برشا تحكيلي على الدنيا كيفاه غلات و بنت خالي عملتلي كابتير على عركة في قروب العيلة. و نلقى زينوبة بعثتلي برقرام برنامج المسرح البلدي ليوم جايبين بوشناق. قتلي نمشيو ؟ قلتلها نمشيو. سألت أولادي الزوز يحبو يجيو معايا و إلا يمشيو مع بوهم للمناج خاتر واعدهم. واحد حب يجي معايا و لاخر مع بوه. لأول مرة كل واحد فيهم ياخذ قرارو في حاجة يحبها. وقتعا اقتنعت إلي مرضي معدي و إلي أنا عديت عايلتي الكل ! مالا أنا شكون عداني بيه ؟؟؟
تفكرت إلي البارح عند الحجامة يحكيو على عروسة الحومة الجديدة لي راجلها فصع و بطل العرس. لي غادي الكل لي عفس في الراجل و قالو مش مسؤول و لي عفس فيها و قال تتشرط. كان زينب متكامتش و ملي كانت بش تجبد هزت روحها و خرجت و أنا شفتها و وقتها تعديت !
Ce texte est une thérapie mentale...
La vie n'est qu'une fois !
