تعداو خمسة سوايع ملي روحنا من المطعم . ريحتها مفماش. ملي روحنا دخلت لبيتها ظلمتها و رقدت. أحنا موالفين كيف نلعبو بالكورة في وسط السقيفة وين الخصة، إطل علينا مرة على مرة. نفيق بيها مركزة معانا. هي صحيح معانا في الدار و الناس الكل هكا هكا بيها أما معندهاش حبيب. ظاهرلي معندها كان أحنا، الثلاثة غشاشر. و اليوم فهمت هي علاش جات.. أذن المغرب بدات الدنيا تظلام شعل ضو الكوجينة و النسا دخلو بش يمرمطو العشا و هي شي... لا شربت قهوتها متع العشية لا طلت من شباك بيتها ... آخرتها هزيت الكورة بالقوي و لطختها على بابها. و تخبينا الثلاثة. . درج زوز ثلاثة نصف ساعة شي ما طلتشي. الأمل الوحيد إنا نعاودو نشوفوها في الليل كيف يطلعولها طبق العشا.
أحنا هكاكا و دق الباب. خالتي عربية جات. دخلت تتسلهب و نحات سفساريها في الكوجينة و سكرو الباب على رواحهم. بعد بشوي عيطولنا أحنا الثلاثة بحذاهم دخلونا على أساس بش نتعشاو و ردو الباب. أنا لتو مسقمة، مفجوعة من الشي لي سمعتو و معيني في عشاوات. و زيد مشية المطعم ما زادتنا شي خاتر الدينار مصرفناهش هي لي خلصت علينا. هو الحقيقة المطعم ما خلصش خاتر مولاتو صاحبتها أما الحاجة هذي ما نعرفها كان أنا. البنات ماشي فيبالهم هي خلصت.
قربتلنا خالتي عربية الدهرية و مسحتلنا على روسنا. و هي متعمل شي هكاكا لله حتى التبسيمة تعطاها على المصلحة
-للاتكم اليوم ما قابلت حد ؟ ما حكات مع حد ؟
جاوبتها آمنة و هي غاطسة في الصحن :
-
لا كان معانا أحنا الثلاثة كهو فطرنا و بعد مشينا للجنينة
-مثبتين بالكشي شافتشي حد في الثنية و الا سلمتشي على حد حتى بالحواجب ؟
-لا لا
امنة تجاوب و أنا قلبي يدق في الأربعين
_و شكون استقبلها غادي ؟ ما جاتهاش مرا ؟
هي سألت السؤال هذا و أنا وجهي صفار و حسيت راسي رزن.
هذي خالتي عربية شادة كاسة الحمام و في نفس الوقت داوي بالعربي و تمسد العباد. الديار الكل دخلتلهم و تعرف خنارهم آش مخبين في قللهم و آش داسين في صرايرهم. نسناسة كبيرة و بنات الحومة الكل قبل ما يعرسو يتعداو على يديها. أخت امنة الكبيرة كل نهارين تمشيلها قال شنوة بش طير السو عليها.
تلفتت عمتي لخالتي و قالتلها : اوه يا عربية ها الحكاية الحولة لي جيتني بيها ... توة معناها جوليات بعد معراتها للة و حفاتها بش تجي هي تملك مطعم كيف هذاكا و أحنا ما نعلموش ؟ تي بشير الحجج الكل تتعدا على ايدو قبل ما يمضيها شيخ التراب. كان جاتو حاجة هكا راو قلي. ماو فكولهم التركة الكل قال شنوة ملك لتونس و يرجع لتونس. بش تقعد ظهرها بعد ما قيدت فلسة و تقوم تملك مطعم ؟
