-كذبني يا تبر كذب . ماك ديما ما تسمعنيش و بعد كلامي يطلع صحيح. قلك الجوابات الكل تكتب فيهم هي متع زوار المطعم سبنيور و رومان و ترك
-كيف قعدتو شكون جاكم ؟
قلتلها آمنة :
-
قعدنا و بعد جانا لي يسربي هزنا بش نغسلو ايدينا في الدويرية
-قتلكشي وسقتهم من هوني و حلت الطريق لروحها. علاه باعثتكم تغسلو ايديكم قلك علينا بنايتنا خماج و الا مسخين
-لا يا خالتي ماو صفية قعدت معاها
امنة قالت هكاكا و أنا وجهي لخلخ و عمتي سفارت بكلها. نعرفها ما تحبش دخلني في ها المداخل. و أكا الدهرية لتو مكبشة :
-جاهاشي شكون؟ شفتشي شكون جاها و إلا كلمها من بعيد ؟
خممت شوي و أنا نرعش و قررت نحكي :
-لا شدتني بحذاها بش متبقاش وحدها و بعد حطو الموسيقى دوب رجعو البنات.
جاوبتها على عكس لي تستنا فيه ياخي تن فزت بكاها و حمارت.
-أسمع بالله الذي لا اله الا هو جاية بش تحير المخبل في كبة. حل عينك يا تبر و خلي ها المفرخ يخدموها و يعسو عليها. و الله يا البنات كان تجيبولنا خبر باهي تجيو كل يوم للحمام و نحللكم المقصورة متع خاتم الدم و تتفرشكو .
-يا بلحق ؟ قلتلها آمنة.
المقصو ة هذيكا فيها برشا دلال و يعملو حتى كرايم للوجه و للبدن.
-و راس بنيتي أما انتوما عسو علاها ديما و أي حاجة تعملها و الا تسألكم عليها ايجاو قولوهالي تلقاوني في الحمام.
-نمشيو نعسو عليها ؟
-أي براو ألعبو بحذا بيتها ديما في العلي بشوي على طراطش صوابعكم. أيا نبقيك على خير يا تبر، حقا هاو لي قعد من كعك عرس بنت فتيحة
-عمتي نهزلها الكعك و نشوفها فاش تعمل ؟
أنا قلتلها هكاكا و هي تكبست و صفارت و قتلي لا أنت لا تو تطلع عارم. عارم هو التربيجة متع أخت امنة الكبيرة على اسم جدتها.
-خلاها تمشي فيسع تحطهم على طاولتها و تجي، جاوبتها أكا النسناسة متحمسة.
-من العشية ماهيش قابلة الزيارة و مسكرة على روحها نخاف تهبط تعمللنا صابونية. تو نطلعولها العشا فرد مرة
-أيواها مالا مصكرة على روحها. قتلكش هذيكا متكدرة نعرفو ريق السواحلية راني. هذيكا يا شافت حاجة يا سمعت حاجة حيرتلها محونها، الكبدة مشومة. خلي الطفلة تطلعلها كان كلمتكم قلها طفلة صغيرة طلعت من راسها.
للة البية 9
Start from the beginning
