أسرار شمس

شرط تعجيزى 10

إلتفتت تامى لشمس فأومأت برأسها ,إقتربت تامى من جدها فانحنى يضمها لصدره وقال: آه ياروحى... ...

إهتز عبد الحميد فأسرع حازم وحمدى يمكسو به وساعدوه ليجلس لم يترك تامى التى نظرت له بتفحص وقالت: إنت جدو....

أيوه انا جدو يابيرى..

تمارا.. تمارا...

تغير وجه عبد الحميد وقال: إنت إسمك بيرى .. مش تمارا.

حازم : خالى... أرجوك...

نظرت شمس لعبد الحميد بغضب وقالت: تامى بتحب إسمها , تمارا ...

رمق عبد الحميد شمس بنظرة نارية اخافتها ولكنها حافظت على ملامح وجهها هادئة لن تسمح له بإرهابها وقال: مش هانشرح الإسم ده جه إزاى؟ لكن حفيدتى إسمها بيرى وليها شهادة ميلادها الأصلية بإسمها ... الأب حازم والأم ....

حازك: من فضلك ياخالى مفيش داعى للكلام ده دلوقتى دى أول مرة تامى تبقى معانا, من فضلك....

نظر عبد الحميد لتامى وقال: هم يقولو زى ماهم عايزين , أنا هانادى لك بيرى..

نظرت له تامى بحيرة وحركت كتفيها لأنها لم تفهم ونظرت لشمس ثم إقتربت منها وهمست فى أذنها وقال عبد الحميد بسخرية: إيه مش عاجبها الإسم ؟؟

كتمت شمس غضبها وقالت : لأ عايزة تروح التواليت...

نسرين: تعالى ياروحى انا اوديكى.

أمسكت تامى يد امها : لأ انا عايزة مامى ...

وقفت نسرين: تعالو معايا..

إبتعدت نسرين مع شمس وتامى وقال حازم بغضب: وبعدين ياخالى؟؟

البنت إسمها بيرى إيه الغلط اللى عملته.

بلاش تلخبطها هى عارفة إن إسمها تمارا ,

لكن بنتى سمتها بيرى...

زفر حازم بقوة, يعرف جيدا مدى عناد خاله ولكنه قال: لو ضايقت البنت ممكن ترفض تيجى تزورنا تانى.

إيه تزورنا؟؟ يعنى إيه هاتسيبها للبنت دى؟؟

طبعا .. دى امها...

قاطعه خاله بغضب: أمها ميرنا مش أى ست تانية والبنت لازم تعرف وتيجى تعيش معانا, إحنا اهلها واولى بيها مش واحدة غريبة.

شمس مش هاتبقى غريبة ياخالى . هاتبقى مراتى ,يعنى من العايلة...

إنت برضه مصمم تتجوزها بعد كل اللى حصل.

ومصمم اكتر من الأول لأنها هى اللى ربت بنتى وبتحبها...

دق عبد الحميد بعصاه على الأرض وزمجر .