زينة الهاشم 2

الجزء 28

زينة الهاشم 2 💝
الجزء 28
طلعنا لقيتو مسيق ومنقي الحالة صح مش كيما أنا بصح المهم دارلي جاست هايلة دخلنا للبيت لقيتو مفرشها ولورد داير حالة _راك موجدها _في ميزك هيا ازربي لبسي قبل ما ينوض المشاكس لبست نويزات ودخلنا عالمنا الخاص جبناها للفجر ( كي نقول للفجر مش معناها غير علاقة معندوش موتور قصدي سهرة قسرة حكايات) دوشنا صلينا ورقدنا  منظتش حتى 10 غسلت ورحت للكوزينة لقيتو قاضي كلشي  طيبت قهوة ونوضتو صباح الفل _صباح النور تأمني بربي يازينة توحشت دارنا _ههههه علاه لتحت مهيش داركم _لالا بصح قصدي توحشت نصبح عليك وحدنا براحتنا حتى ناض عبد الاله يبكي _مش براحتنا _حرام ليل ونهار غير يولي يعرف نزوجو باه ميحرمش عليا _ههههه هيا نوض نتقهواو ، جبنا يامات لاباس الحمد لله رجعنا لطبيعة ليلة عندي وليلة عندها وأنا مش عاجبني الحال ونشنف _لاه ديري هكا واش هدرنا _افهم نغير منقدرش نتقبل بلي ترقد معاها _لا اله إلا الله تقول متفاهمين على جدي تظل هيا تنقرش نتهنى منها ترجعي نتي باغيين تهبلوني ها خلو قسامي نتهنى ، بالسيف لا تقبلت الفكرة ناضت لالة هدى بحكاية داري وحدي كيما هيا ولى هشام غير مسمطها رجعت ولات تروح لدارهم تبات في ليلتي وفي ليلتها مرات حتى بعد المغرب تجي دارت هيا والعجوز مندبة نطقت قالتلها منيش خدامة عليك على بناتك هيا معززها دايرلها دارها وأنا باقية نتبونش عليكم ناضت بينها وبين زهيرة قاتلها رانا نخدمو على رواحنا تشادو من الشعر  فالليل كانت ليلتها ناضت تشاكاتلو تزايد هو وياها فطنت بيه كي دخل معايا فالفراش_كيفاش طلقوك جيت _زينة واصل حدي ارقدي خليني نموت ديجا ...جا نايض حكمتو وين صايي والله ما نهدر بتنا هذيك الليلة للصباح ناض ليهم واش الحكاية بقات هدى تبكي وتشفع راهم حاقريني راهم عامليني _واش حابة من تالي _حابة داري وحدي _ وأنا منقدرش نديرلك دارك معندي باه نبني معندي باه نكري _ساهلة اقسملي مع زينة هيا جهة وأنا جهة أنا كلبت ما بقى فيا عقل بغيت ندخل نشنتفها _لالا محال _خلاص مالا هيا تهبط معاهم ياك يحبوها ويدلوها هيا وبنها وانا نطلع الفوق _يا خاه واش تهدر _نهار خطباتك عمتك قاتلك زينة تطلع الفوق ونتي تبقاي معايا صح ولالا _هيه_ونتي واش قلتيلها خليها تتلف علينا نهارات ونخرجها قاع من حياتو سكات كمل هشام هدرتو _شوفي يا بنت خالي دار كاين غير هذي يا تقعدي مع عمتك وتهنيني يا داركم كاينة وناض خرج الرخيسة باغية تقسم عليا داري اصبري نوريلك .جبنا يامات قوى الحس بينها وبين لبنات كانت فالاول غير مع زهيرة ضوكا ولات حتى مع زهية هشام كره منهم ولى ملي يدخل هيا تشتكي والعجوز تشتكي انا مدخلتش كامل العكس قلبت الحكاية ليا وليت ملي يدخل وانا حبيبي عمري حتى كي يسقسيني دابزو ولالا نقولو مشفتش سيرتو مين وليت منهبطش طول لتحت وعبد الاله يهبطوه لبنات لجداه يلعبو معاه حتى يرقد يجيبوه هياملي ليلتها باينة غير يدخل تبدى تشتكي يعاود يهز روحو ويجي عندي رجعت راحت غضبت في دارهم قاتلو الساعة لي ديرلي داري ارواح اديني جابت شهر مين يأست جات وحدها.
رجعت هدى ورجعنا لطبيعتنا ليلة بليلة سكتت على حكاية الدار بصح الرخيسة بقات تحفرلنا من تحت لتحت، هذي السمانة مرضلي عبد الاله درتلو الفاكسان وأثرت عليه مالا ما هبطش قاع لتحت اليوم كي شفتو مليح هبطتو وجمعت معاهم كي جيت طالعة حلفت عليا العجوز باش نتعشى معاهم رحت مع زهية للكوزينة درنا العشا بقات تحكيلي على فاتح قاتلي ملي نجبدلو على الخطبة يقولي مزال اصبري وأنا كرهت قتلها كون مهدرتيش قاع معاه خلي حتى هو يجي وحدو بقينا نحكو فالسوجي ونسينا رواحنا تعشينا خلينازهيرة تغسل فالمواعن وانا طلعتي وليدي وطلعت خاطر هشام اليوم يبات لتحت بدلت لعبد الاله ورضعتو مع رقدتو نسمع فالعياط لتحت فالاول حليت الباب نتصنت نسمع فالعجوز تقولو دعوة الشر فيك اطلقها وهشام يعيط اليوم نقتل جدها مهيش دايرالي حساب مدارتليش قيمة قلت باين بلي هو وياها كي عوايدهم جيت داخلة نسمع في زهيرة تبكي نتا خويا اطلقها والله قتلتها ازهية نوضي يا زهية _اخاه  واش كاين جريت دخلت نلقى هدى في باب شمبرة لبنات وقفة وتضحك دخلت نلقى هشام يضرب في زهية والعجوز وزهيرة يحاولو يفكوها لحقت طبعتو عليها طلقها وشدني من شعري جابني بزوج كفوف وذنيا صوناو جرات العجوز فكتني منو امشي اخرج عليا الطفلة مبعوجة نتا كاش ما دير فيها وهو كي الوحش مينشافش هكا وطيتو راسي اقسم بالله نتي وياها نقتلكم ونشرب من دمكم وخرج خبط الباب لحقت معاهم لزهية مسكينة مدمدمة قاع كسرها تكسار الله يجيبهالو الكلب العجوز غير تعاير وتسب فينا وفيه وانا مفاهمة والو تفكرت وليدي طلعت لقيتو مزال راقد تكسلت بحذاه نبكي نبكي حتى رقدت ، للصباح نضت نغسل نلقى وجهي مطراسي بيديه راسي يوجع درت فطرت ورجعت لفراشي وباقية غير نخمم ونبكي غاضتني عمري ياسر سيرتو ضربني قدامها الرخيسة وكي نتفكر كيفاه تضحك وتتشفى في زهية النار تشعل فيا جاتني زهيرة _ما تسقسي عليك كيفاه صبحتي _شوفيني ورديلها خبر _معليش زينة ختي بصح اقسم بالله ومنجيبلكش حقك نتي وزهية منها منتسماش _شكون وصح علاه ضربها _الفرخة بيعتها بلي تهدر مع فاتح وقاتلو نتي تعميلها في عينيها وراها تجي عندك على عينا وتخرج من عندك تتلاقاه _يا القحبة الخامجة هبطت نجري زدمت ليها لشمبرتها لقيتها تهدر فالتليفون تلحت جبدتها من شعرها  لحقت معايا زهيرة شنشفناها خرجنا فيها قاع الحرة والعجوز والله ما قالت ولا سلكت بيناتنا خلفنالها قاع السوط لي داتو زهية خليناها طايحة وتسب فينا اصبرو يجي هشام ونقولو ويدير ويعمل فيك قتلها من بكري يعمل فيا مش غير اليوم يا الخامجة حاوزتني العجوز امشي لدارك وإذا جا متعانديش معاه خليك منهم طلعت لداري نلقى عبد الاله فاحم بالبكا ياخاه نسيتو قاع من جرة القحبة سكتو ورضعتو نضت غسلت وبدلت مع الليل حتى دخل الثور الهايج  صح ضربتي هدى بقيت ساكتة مهدرتش كامل _نهدر مع ربك لا  انا غير ساكتة لحقت العجوز _امشي خطي الطفلة معندو مدخلها راني نقولك هيا وزهيرة سمعت القحبة تهدر من الدروج تحاماو فيا فالزوج قتلو هيه انا ضربتها جا يتلاح يضربني حكماتو العجوز _ حط يدك عليا اقسم بالله ندي وليدي ونروح منزيد نرجع _تخلعي فيا  قودي لداركم بصح وليدي منا ميخرجش خرجاتو العجوز بالسيف غلقت وراهم الباب وطحت فالارض نعدد علابالي مايحبنيش غير أنا محتمة روحي عليه وهو مين غايضاتو وشافاتو شافق عليا وساكت اليوم بان على حقيقتو محال يحبني ولا حبني أنا كنتلو نزوة وشهوة غير شبع مني سمح فيا لا وزيد حاب يضربني على جالها.
شبعت بكا ليل كلو نتلوى وحتى ولدي مسكين بايت يبكي معايا نظن حس بيا للفجر نضت صليت وصليت الاستخارة ورقدت حتى للظهر نضت غسلت ودرت كليت صليت شوية جات عندي زهيرة قاتلك ما ارواحي _قوليلها اسمحيلي بصح مافيا وش يتحرك ومعنديش خاطر نهبط ونشوف هذيك الزبل _اسكتي انا حابة نقتلها راها غالقة على روحها في بيتها ولا كنت درتلها كثر من البارح _مزالك برك تضربيها باه يرجع عليك سي خوك _علاه يرجع عليا البارح مهدرش كامل معايا المهم ختي انا نهبط ونتي لكان قدرتي اهبطي شوفي زهية واهدري معاها محبت تاكل محبت تنوض من لفراش اهدري معاها غير نتي تسمعلك _ان شاء الله هي راحت وأنا بقيت بيني وبين نفسي مالا ساجي غير عليا ختو محكاش كامل معاها عييت من التخمام حتى قريب لعشا دخلت عندي العجوز لقاتني نخمل فحوايجي فالفاليز _واش ديري نتي _واش ندير نلم في دوزاني مسمعتيش ولدك قالي روحي لداركم _يا طفلة اركحي وشدي دارك خطيك من الهبال _ نورمالمو تفرحي راني رايحة ومخليالك ولدك وبنت خوك على راحتهم _انعلي الشيطان _ونتي علاه منعلتيهش علاه خربتيلي داري وحطمتيني هكا في واش أذيتك من أول يوم جيت فيه حاولت نكون مليحة معاك جامي كسرتلك كلمتك علاه كسرتيني هكا طحت فالارض نعدد ونبكي تلاحت عنقتني شفتها مسحت دموعها وزربت خرجت  شوية دخل هشام كان لتحت _واش ديري نتي _نلم في دوزاني ياك قتلي روحي لداركم _هيه قتلك روحي بصح سمعتي شرطي _انعم سمعتو تهنى راح نخليلك ولدك بقى يشوف معايا مصدوم _تخليه _هيه نخليه خاطر علابالي مكاش لي راح يعوض باباه هاني قدامك صح ماما ميتة بصح عوضتني يما عليها وحتى ماتت يما عوضوني خواتاتي عليها بصح بابا مكاش لي عوضني عليه _ونجيب _نجيب صح كان ليا سند وديما معايا بصح بلاصة بابا وحدها عوضها بابا (جدي) بصح غير مات عاودت فرغت بلاصتو _حتى معايا أنا_ههه ضحكتني  علاش واش شفت معاك نتا ديما معاك فالمشاكل حتى صحتي وخسرتها عييت وكرهت من أني ديما آخر اهتمامك لازم ترضي أهلك وحبيبتك على حسابي أنا  _راحتك كي تبعدي عليا _معلاباليش المهم مش حابة نبقى مع واحد مايحبنيش كنتلو نزوة وشهوة برك وأول ما لقى البديل سمح فيا _يا والله مالا 5 سنين كلهم هذو كانو غير نزوة _أكيد خاطر كون كان حب ماتعيشني واش عشت نتا من لول كنت تحب هدى ولا علاه تدخلها عليا مالغري جامي فرطت فيك وفي واجباتي معاك وحتى بعدما جات شحال من مرة أذاتني بصح نتا ديما تتغاضى بصح أول ما أنا دنيتلها بغيت تضربني وفوقو حاوزتني وحاب تنحيلي ولدي مننكرش أني نحبك ونحبك لدرجة الجنون بصح باراكات هنا وخلاص عييت نستحمل مقدرتش عييت صايي عييت _نتي تحبيني جامي نظن نتي لي كنت ليك نزوة نتي انسانة أنانية ونكارة عشرة _أنا تقول عني هكا _ايه نتي نكرتي الانسان لي وقف عليك نسى صغرو نسى أحلامو باه غير يرضيك فالخر تقولي معوضنيش على بابا ، نتي نسيتي هذا الحمار لي واقف قدامك واش دار على جالك من نهار شافك حتى نهار جابك عندو نسيتي بلي هذا نذل وتضرب على جالك ونسب وقاع هذا ما سمحش ومفرطش فيك مننكرش أني أذيتك وغبنتك بصح مش كيما قلتي نتي باه نرضيهم لالا باه نتي متتأذياش باه ميدناوش ليك وتاني خاطر كنت غالط فيك كنت داير في بالي حتى نتي تحبيني كيما نحبك أنا بصح ظهرت غالط الوحيد لي يحوس على رضايتكم هو هاذ لحمار بصح نتوما كل وحدة تخمم على مصلحتها.