زينة الهاشم 2

الجزء 20

زينة الهاشم 2 💝
الجزء 20
جبنا الطريق كامل ساكتين حتى وصلنا عند الطبيبة دخلنا لقينا الغاشي بزاف بقينا نستناو مع الاول نورمال ممبعد مقدرتش وليت مرة نوقف مرة نقعد مرة نمشي شوية راح هشام هدر مع الفرملية دخلتنا للطبيبة شافتني قاتلي صح مكيش في خطر بصح لاطونسيو نتاعك طالعة كانت قيستهالي وقيستلي  حتى السكر غير بلا براي الصغيرة مدرتش لي زاناليز وحتى السكر طالع خصك الراحة قتلها مالا نروح لدارنا باه نرتاح قاتلي وين_ولاية ....._ إذا شايفة روحك صح ترتاحي روحي بصح مسيو من فضلك حاذر مع الطريق وسوق بالعقل خرجنا من عندها قتلو وصلني لدارنا وارجع قالي داكور رجعت فرحانة  مع وصلنا نزلت نجري وطالعة مع الدروج_ربك بالعقل هبلتي جيت طالعة لداري مخلانيش قالي ارواحي قبل لتحت عندي هدرة معاك. دخلنا لشمبرتنا لقديمة  اقعدي قعدت _زينة منديكش لداركم _ياه علاه ياك قتلي نديك _ساعفتك برك منيش مطمن وعلابالي الطبيبة غير شفيتيها قاتلك روحي انا منيش مطمن _واش راحلي فيك تطمن ولالا انا حابة نروح لدارنا _هكا معندو مراحلك فيا صحا مالا تبقاي هنا وتبقاي لتحت حتى نشوفك ارتحتي باه نديك هذا آخر كلام عندي وناض خرج وخلاني ناكل في روحي ونبكي حتى رقدت بدمعتي نوضني نتعشى محبيتش كملت رقادي للصباح فطنت ملقيتوش حذايا مالا سيغ راه راقد عندها كي جيت نايضة شفتو راقد فالارض رحت غسلت ورحت طيبت قهوة دخلت عليا لعجوز واش ديري مزال الحال راها 7 قتلها مالا مزال الحال ياك كي جيت عروسة قلتيلي لازم نوض على7 ولا هذا القانون غير عليا شفت كنتك الجديدة متنوضش لل 10 ولا هيا بنت خوك حقا بصح معليش كاين ربي _يا طفلة واش بيك صبحو محرشينك _صار واش بيا نتي علابالك والسبع نتاعك علابالو كان هو ديجا واقف وراها قالي واش تخلطي على صباح ربي شداتو خليها الطفلة مهيش في حالها _هيه من نهار دخلت داركم منيش في حالي هزيت قهوتي ورحت للبيت نسمع فيه يقوللها واش بيها هاذي قاتلو صحا بني متعاندهاش الطفلة مريضة وزادها الحمل صار مالا شربت قهوتي ورجعت الماعن للكوزينة شعلت تيلي تفرجت شوية رجعت عيطت لصليحة قتلها تعبانة ومريضة حابة نجي ومحبش يجيبني قاتلي بالاك الطبيبة قاتلو متديهاش قتلها لالا العكس قاتلي روحي _مالا علاه محبش يجيبك _مشاحنة برك _زعما زينة كاش ما صرا ومخبية عليا _لالا والو برك عيانة ومديڨوتيا _معليش حنونتي غير من الحمل وضوك تريحي جبت قريب سمانة هكا لي يهدر معايا كلمة نلصق فيه سيرتو لعجوز ووليدها صليحة ملي نهدر معاها تقولي حاسة بيك حاجة قاتلي نجي مع نجيب نطلو عليك قتلها لالا مجيش محاباش نعييهم بمشاكلي براكات اليوم تالمو مقنوطة غير حكيت معاها بدات تجبدلي في لساني حتى حكيتلها بلي رجعها وكامل واش صرا بلي رقد معاها قاتلي ضوكا طفرت كي راكي حزنانة ومنايفاتو واش استفدتي ولا كي راكي ترديلو فالهدرة هو ويماه راكي حاسبة درتي انجاز  لالا حنونة راكي غالطة هوما راهم ساكتينلك حاسبينك صح ممسوسة وإلا كون راكي نتي هدى وهدى نتي _واش قصدك _قصدي واضح كون راه شابع فيك طرايح كيما كان معاها وهيا يدللها ويرجعها زينة _محال يديرها ديجا والله ويديرها نروح من عندو _وين تروحي ولي في كرشك كيفاه ديري حسابك محال يخليهولك إذا شايفة روحك تقدري تعيشي بلا بنتك ولا وليدك ارواحي اليوم قبل غدوة وقوليلو كي نولد ارواح اديه نحلفلك متزيدي تشوفيه ولا حتى تسمعي عليه علابالك علاه _علاه _خاطر عندو البديل هدى ولاتلو زينة لي تهتم وتتهلى فيه علابالك استخدمت خطة نتاعك ضدك _علاه راكي تقوليلي هكا ودموعي ويدان _راني نحذر فيك زينة رجعتي هدى بلا ما تفيقي افطني على روحك حنونتي وارجعي كيما كنتي ورجعي راجلك عارفاتك شاطرة مش قاع واش جوزتي راح تمديهلها على طبق من ذهب لالا وفوقو بنت ولا ولد _محال نموت ومنمدلهاش بنتي _وكي يديها باباها يا لوكان زيارة مرايحاش تتلاقاها وهيا تهتم بيها خمي زينة مليح كوبيت من عندها شرقت بالبكا واش حياتي السامطة هاذي علاه ملي نقول سقمتلي تعواجلي هكا.
جبت فايت اليومين وكلام صليحة في وذنيا النوم وحرم عليا ، اليوم قبل العشا دخلت دوشت كي كملت ودخلت للشومبرة لقيت هشام تما  بديت نشف في شعري وكل ما نشوف معاه نلقاه تايه فيا كملت بقيت نفرز فالشومبرة دقدقت علينا زهيرةايا تتعشاو (مزالنا لتحت معاهم) قتلها صحا نضنا للكوزينة ضوكا ناكل معاهم تعشينا ولميت الماعن غسلتهم عياو معايا خلي نغسلوهم  ولا نعاونوك محبيتش غسلت المواعن وسيقت الكوزينة غسلت ودخلت شمبرتي لبست شورت بالبيستي نتاعو ساتان بالغوج هبطتو قبل ما ندوش وشديت بلاصتي بحذا هشام كان هو راقد ولا الاصح لاعبها راقد  علىما غفيت حسيت بيه يبوس فيا من يديا ذراعي وطالع لرقبتي عندت محبيتش ندور عندو حسيتو غير كي هزني _واش دير _والو طالعين لدارنا نقصي حسك حتى نطلعو، سكت حتى طلعنا ودخلنا جوزنا طول لبيتنا سطحني على السرير ويشوف معايا نظرة شهوة عرفتو راح فيها بصح اصبر ومنعذبكش ونخرج فيك الاول والتالي انا ضوكا صايي حصلت معاك بصح لازم نخرجها فيك _الزين نتاعي عمري _ والله هذا قاع مشكتيش مش كل مرة تكلخني كثر من سمانة منايفني وتشنف عليا ولا ضوكا رجعت هدى نتاعك _يبوس فيا من سيقاني وطالع والله هذو والو نتي الكل فالكل  ونتي لي نايفتيني وتهدري معايا بهدرة مش مليحة _وينتا _كيفاه وينتا مكيش جايبة خبر وقيلا مين ممسوسة وحق ربي كون مش مريضة وما تأكدلي وتعاود بلي راكي ممسوسة خاطر مكيش نفس زينة لي كانت صوتها ميعلاش عليا لا وليت طيري وتقابحيني بكلام السوء كون ذبحتك وشربت من دمك  يا نندب عندها صح صليحة وقيلا زودتها كثر وكثر  مالا غير خليني لين ونحاول نسيه فالحكاية _ حبيبي تحبني _نت..اك عليك _حتى انا نموت عليك على هذي الكلمة غرقنا في عالمنا الخاص جبنا الصباح مع بعضنا دوشنا مع بعض ورقدنا منضناش حتى للظهر _حبيبي عمري نوض هيا _ عيان تعبتيني البارح يا مشاكسة _نتا طولت عليا وانا توحشتك بزاف مجيت نكمل كلامي لقيتو دارني تحتو وغطسنا في بعضنا حتى للعصر نضنا دوشنا وكلينا _حبيبي حابة نروح لدارنا _يا عمري والله لا خايف عليك وزيد قرب رمضان باقي 3 ايام وينتا نديك وينتا نجيبك وبحالتك هذي محال تروحي صباح وتجي عشية _والله مخنوقة _نوضي البسي نخرج حبي بوستو على فمو _بركاي متخربي لا تخلاص عليك فالفراش لا خرجة لا والو ضحكت وزربت لبست خرجنا درنا شحال  جبنا عشانا من برا مع دخلنا تعشينا ورحنا رقدنا قالي هشام من البارح فيك خايف نضرك مالا ارقدي ومتخربيش فيا.
لحق علينا رمضان تفاهمنا نفطرو كامل مع بعض متصلحش نتقاسمو خرجو هوما لعجوز وعروستها راحو شراو انا مرحتش معاهم كنت تعبانة مقدرتش نخرج ومنفحتليش اصلا باش نروح ، قالتلنا لعجوز راح نديرلكم الدالة في رمضان كل يوم يطيبو زوج هكا باش متقلقوني ماديرولي الحس  قالتنا زهيرة مع زينة وزهية هي وهدى، هشام محبش قالها زهيرة تقرا وزينة راح تبقى وحدها بزاف عليها قالتلو معليش خلات حتى نضنا كامل وقالتلو انا نعاون زينة منيش حابة زهيرة تكون مع هدى ميتفاهموش وعلبالي راح يتقابضو ومخصناش المشاكل زهيرة تتفاهم مع زينة وزهية مع أي واحدة مديرش المشاكل. نهار اللول قالتلنا لعجوز انا نطيبلكم ومن بعد دبر راسكم اتفاهمو كل يوم زوج يطيبو وزوج يغسلو لماعن. انا ديجا قبل يومين من رمضان قولت لهشام حابة نخدم شوي حوايج لرمضان اذا تقضيلي قالي معليش مكانش مشكل  جابلي لحوايج وخدمت مقروط خدمت بزاف وزدت بقلاوة وزدت خدمت ليسيڨار تاع الديول كي شغل صامصة عمرتهم وحطيتهم في بوغتمونجي وخليتهم باش كي نبغي نجبد نقليهم ونعسلهم وفرات منتعبش كعاد راح نهبط لتحت معاهم لفريجيدار تاعي لفوق راح يبقى فارغ قلت نخبيهم لهنا وكي تكون دالتي نهبطهم لسهرة . نهار اللول مقدرتش نرقد الصباح هبطت لتحت قلت نشوف وش نخدم لقيت لعجوز في الكوزينة عاونتها وطيبت معاها درت لفلون لسهرة وطلعت كان ديجا قريب الظهر ستنيت صليت وقريت شوي قرآن ورقدت منضتش حتى فات العصر تعبت بزاف ونضريت مهبطتش طول حتى قرب يأذن لقيت لبنات يوجدو فالطابلة لبنات عادي مقالو والو وهذيك هدى قاعدة تتخنزر مديتهاش كامل فيها قعدنا فطرنا، بعد لفطور عيت نعاونهم تفابليت نضت هي معجبهاش الحال قالتلي واش يالالة طلعت لفوق لداري محبيتش نرد عليها ونقلق روحي. روحت تكيت حتى رتحت من بعد صليت وعاودت هبطت لقيتهم كملو كلش وجدنا لسهرة تاعنا ديجا انا هبطت معايا حبات بقلاوة حطيتهم وهي كانت في شمبرتها مشافتناش حتى جا هشام ولعجوز باش جات قعدت معانا. جاز اليوم اللول عادي واليوم الثاني كانت دالتي انا وزهيرة كعاد متقراش  نضت كيما موالفة على 8هبطت لتحت دوزنت مرامطي الله الله بالطبع  وكملت شغلي حتى لحقت 11 دخلت لعجوز لقاتني ديجا وجدت كلش قالتلي وش راكي ديري وعلاش مريحتيش مازال الحال وعلاه مرحتيش نوضتي زهيرة قلتلها خليها مسكينة  صاي انا كملت كلش قالتلي نوضيها تكمل الي بقا قلتلها والله غير كملت صاي خليها قالتلي فواش نعاونك قلتلها صاي كملت درت حريرة (هوما يقولولو جاري ولا شربة فريك) ودرت معاها لمثوم ودرت طاجين لحلو ودرت ليسالاد من بعد خممت وش نزيد ندير قررت ندير سالاد دوفروي وصاي، تعاونت انا ولعجوز ودرناها كملت طفيت على كلش وطلعت لداري قريت شوي قرآن ستين الظهر يآذن نوضت هشام راح يصلي فالجامع وانا صليت فدار ورقدت مانضت حتى لعشية وانا كنت ديجا وجدت البوراك وحطيتو خص غير نقليه وصاي، هبطت جوايه الستة ملقيتش هدى لثم تهنيت منها.