زينة الهاشم 2

الجزء 06

زينة الهاشم 2 💝
الجزء 06
باتت شهيناز معايا هذاك اليوم رقدت انا وهيا في بيتي وخواتاتي فالصالون حتى رقدو كامل مع الساعتين نتاع الصباح عيطت لهشام من عند شهيناز حكيت معاه شوية قالي حاب نشوفك والله توحشتك بزاف قتلو مانقدرش علابالك نجيب قاطع عليا الخرجة وحدي قالي مع شهيناز قتلو والله ما يحب قالي والحل كيفاه مالا نجيك للدار وخلي لي يصرا يصرا قتلو لالا تعيش والله ما ناقصة قالي وكيفاه نبقاو هكا مانحكي معاك منشوفك يا الرب العالي واش هذا العذاب مقدرتش قتلو وانا علاه علابالك عبد مغلوب على أمري قالي صحا وينتا رونديفو نتاع طبيبتك قتلو منا على 15 يوم قالي اوكي مالا نهار هذاك نجي نشوفك وأمري لله زدنا شوية وكوبينا ، كي لحق هذاك النهار دات صليحة ولادها لفتيحة ختها ورحنا للطبيبة لبست الملاية النواغ مع الخمار المارون والطالون لي جابهملي هشام لي لقيناه تما يستنى فينا صليحة راحت لاصال داتونت قاتلي كي تلحق دالتك نعيطلك وانا ركبت معاه في طونوبيلتو (راها عندو نتاع باباه الله يرحمو) صافا صافا لاباس ممبعد قالي وينتا ترجعي عندي توحشتك بزاف قتلو علاه لي عندك مهمش قايمين بالواجب واقيلا قالي زينة واش هذي الهدرة قتلو علاه معجباتكش حقا جامي سقسيتك ونتا جامي حكيتلي وينتا خطبتها وينتا جبتها قالي زينة خلينا من هذا السوجي حنا متوحشين بعض قتلو نونونو قاع متبدلش الحديث ضوكا حابة نعرف وتحكيلي كلش بلا متخبي ولا والله ثلاث متزيد تسمع صوتي ولا تشوفني بدا يتأفف ويتململ قالي الحكاية بدات كي عولت نخطب وما مبغاتش ما بقينا للزوج معندين رجعت خالتي (خالتو هذي نكرها من ربي ومنا بديت نكرها كثر) قاتلها ياك الحمد لله راكم لاباس عليكم والدار واسعة جيبيهملو في زوج قتلو الله يجيبها في راسها ان شاء الله قالي مالا ما شرطتلي باش نجيبها هيا قبل قتلها مانقدرش نخاف ميمدوليش زينة قاتلي حاجتهم إذا مبغاوش يمدو بنتهم  قتلها والو منديش زينة والله ثلاث مندي لخرا قاتلي مالا فتح عليها برك و دخل عليها وحتى جيب زينة عقد عليها طرطقت عينيا فيه اللعبة ملعوبة قبل الزواج وانا الحمارة راقدة على وذنيا قالي تالمو ضغطت عليا قتلها غلطت مع زينة ووقيلا راهي بالحمل مالا خلي نزرب بزينة نخاف يفيق خوها وكاش مايصرالها  سكتت وقبلت بصح حلفتني نجيب لخرى ممبعد.
بقيت مصدومة شوية قالي زينة واش بيك قتلو كمل كمل قالي من الاول كي فاقت بلي الحكاية كذب بقات جايبتها ورايا من لخر حسبتها شطارة قتلها منجيبهاش وسايرتك غير باش ندخل زينة قاتلي مالا والله كي ماجبتهالك نخرجها منا وراكي شفتي المشاكل لي دارتهملنا حتى المرة اللخرة كيما جينا مع بعض لداركم كي رجعنا من وراها قاتلي راني رحت مع خالاتك وخطبتها رسمي وإذا مجبتهاش متبرية منك ليوم الدين وحليبي سم على قلبك قاع ذاك والله مديتها فيها بصح كي قواو المشاكل وشفت بلي غبنتك معايا سيرتو المرة التالية كي ضربتك ومرضتي قبلت وشرطت عليها باه نبني الفوق ونخرجك وحدك وهيا تبقى معاها وتاني شرطتلها منديرش عرس ونتي متسمعيش حتى انا نقولك مالا قبلت جبتك لداركم ونهار فتحت عليها جبتها مدرتلها لاعرس لاوالو عمامي وعماتي ديجا من الاول مش قابلين وهي جاو خالاتي وأهلها معاها درنالهم عشا برك وزينة تاني حاجة علابالي زعفتي كي دخلت عليها ضحكت قتلو عطيتها اسمك وتخمم إذا زعفت على هذيك الحاجة قالي لالا حنونتي والله حنا من عاداتنا يشوفو عذرية البنت مبغيتش نحرج خالي لي كان باقي يستنى باه يشوف شرف بنتو والله حاولت وحاولت .... قتلو اسكت يرحم باباك وزربت فتحت الباب وطلعت عند صليحة مصدومة من كلامو جا عندي دورت وجهي عليه قاتلي صليحة واش بيك زينة وجهك مخطوف مزية جات هذيك الفرملية عيطت عليا دخلنا عند الطبيبة في ثلاثة صافحت عليه قاتلو أهلا استاذ هذي وين تعرفو خليني منهم قلبتني وشافت ليزاناليز قاتلي صافا راكي مليحة شوية حتى قاللها هو طبيبة بليز شوفيها وجها أصفر قاتلو راني نشوف فيها ضوك نوزنلها لاطونسيو لقاتها طالعة قاتلي واش بيك قتلها والو قاتلي تكملي هكا تعياي مشلولة قاللها بعيد الشر شافت معاه صليحة نتاع واش بيها تبسم وهبط راسو المهم خرجنا من عند الطبيبة قالنا استناوني نشري الدوا ونجي قاتلو صليحة خلي ضوك نجبدهولها ببطاقة الشفاء خليتهم يهدرو ورحت جا عندي شدني من يدي قالي زينة واش بيك نحيت يدي منو وشديت في صليحة ورحنا للدار دخلت ديراكت للشومبرة غطيت راسي ورقدت جات صليحة عيات تهدر فيا مجاوبتهاش نحاتلي حوايجي وعاودت غطاتني وراحت من الصدمة مقدرتش نهدر حتى البكا مقدرتش نبكي وتقول دمعة طاحت 3 ايام تحسب ميتة صليحة كل وقت تتفقد فيا مسكينة ركبتلها الخلعة بحالتي هذيك لدرجة عيطت لهشام قاتلو واش درتلها الطفلة تقول ميتة وهو الدم نشف في عروقو زعما جا يشوفني مخلاهش نجيب .
يامات ارتحت شوية حكيت لصليحة قاع واش قالي قاتلي عجوزة خبيثة ربي يجيبهالها بصح لي حيرتني كيفاه خالو رضى على بنتو قتلها منعرف قاتلي زينة انا محبيتش ندخل بصح هو راه كل مرة يأكد بلي حتموها عليه وكل حاجة دارها على جال باه تكوني معاه واحتمال كبير يكون مطايقهاش ممكن لهاذ السبب لحد الان ماعندوش ولاد معاها خمي مليح هذي راها حياتك ونتي الوحيدة لي تقرري قتلها قررت وخلاص ، بقينا يامات جات شهيناز عيطتلو من عندها بقى يسقسي فيا بصح انا مجاوبتوش خلاص كي سكت قتلو طلقني قالي كيفاه قتلو ايه طلقني قالي احلمي نموت ومنطلقكش قتلو كيما تحب انا رايحة نشوف حياتي ونتا ابقى تبكي على الاطلال وكوبيت عيا يعيط مبغيتش نرد هدرت معاه شهيناز قاللها فوتيهالي محبيتش رجع يبعث فليميساج مع الأول يسب ويكفر ويتوعد فيا قال تعيشي حياتك ندير فيك ونعمل فيك وكي تهدن رجع يحاول فيا والله نحبك ونموت بلا بيك ووووو المهم مديتها فيه براكات عليا ، جات كريمة سمانة وهيا هنا من عوايدها تجي بصح لا كثرت يومين هذي المرة حسيتها طولت وغير ساكتة حسها وتنقريشها كامل مكاش فالليل سمعتها تهدر مع بناتها بصح مفهمتش على واش فهمت غير بنتها الكبيرة كي قالتلها تشريلي طابلات قالتلها ديرو واش قلتلكم والله نشريلكم لي تحبو المهم كلشي بيناتنا ،للصباح بناتها لبسو وقالت راح يديهم باباهم يدورو شفت مع صليحة الحكاية فيها إن حتى وليدها الصغير وبعثاتو (كريمة عندها 4 اولاد طفل كبير 13سنة وزوج بنات واحدة 7 سنين ووحدة 5 سنين وطفل صغير عندو 3سنين ) المهم راحو للليل سقساها نجيب لولاد مجاوش قاتلو راحو يباتو فالدار  ، الغدوة منو الصباح دقديق فالباب راح يتكسر كنت انا وكريمة راقدين حتى دخلو علينا ولادها يبكو يا ماما يا حنونتنا خلعوني جات صليحة قالتلها راجلك هنا شفتها كي شافت مع بناتها وضحكت حضنتهم ودخلتهم في بلاصتها قالتلهم استناوني هنا وخرجت شوية جات الضحكة من الوذن للوذن قاتلهم نوضو حبابي هيا نرجعو لدارنا قالولها ماما متنسايش قاتلهم والله مننسى برك كيما تفاهمنا ولبست خملت قشها وقش ولادها وراحت رحت لصليحة حكيتلها قاتلي باينة كي الشمس راهم كانو مدابزين بعثتلو لولاد هجوه وهبلوه كي عرف روحو ما يقدرلهمش جا داها وهكا رجعت بلا ما تطيح نيفها قتلها والله قاتلي ايه اتعلمي يا زينة ملي راحت وانا نخمم وتفكرت هدرة زاكي كي يكون قرار حياتهم واحد مايسمع ويقررو وحدهم بصح زينة الكل يدخل بقيت غير داهشة ونخمم قتلني التخمام وليت نضت صليت صلاة الاستخارة ووليت تقريبا يوميا نصليها ونطلب ربي إذا فيه خير ليا ربي يرجعهولي ويجمعني معاه عاجلا وإذا فيه شر ليا ربي يبعدو ان شاء الله ،فاتو يامات قلال اليوم قاتلي صليحة عاونيني صحا ختي هذا وين عيط نجيب وقال جاي مع جماعة صحابو نضنا خملنا وجدنا الحالة حنا هكاك عيط بابا عند صليحة جاوبتو قالي روحي للبيت وحدك واسمعي واش راح نقولك دخلت قتلو راني معاك بابا قالي زينة ترجعي لراجلك ولالا بقيت ساكتة قالي شوفي دبري راسك المهم هو راه جاي وجايب معاه الجماعة لكان حابة ترجعي كي تدخلي عندهم قولي نرجع نجيب ميقدر يقول والو ولكان محبيتيش ترجعي ثاني قدامهم قوليلو وبالسيف عليه يطلقك وتتهناي منو خمي مليح بنتي هيا باي كوبيت وجريت توضيت و فرشت السجادة نصلي وندعي يا ربي نورلي طريقي واش القرار الصحيح لي لازم نديه.