Blank Charge (Myanmar Translation)

9

"ကားတစ်စီးမှာ အစိတ်အပိုင်းတွေအများကြီးရှိတယ်... တစ်ခါတစ်လေကြရင် ပစ္စည်းမလုံလောက်မှုတွေ ထုတ်လုပ်မှုအဆင့်တွေကြောင့် ကားမော်ဒယ်အတူတူဆိုရင်တောင်မှ ကွဲပြားတဲ့ တပ်ဆင်ပုံတွေရှိလာတတ်တယ်..."
ချင်ကျိုးက လော့ရွှယ်ချင်းကို ရှင်းပြပေးရင်း လက်မှတ်ထိုးရန်အတွက် အော်ဒါစာရွက်ကို ပေးလိုက်သည်။
"ဒါကြောင့် ဒီလိုကားဘရန်းတွေမှာ အဆင့်နိမ့်ဗားရှင်းတွေရှိတာက သာမန်ပဲလို့ပြောလို့ရတယ်... မောင်းရတာ ချောချောမွေ့မွေ့မဖြစ်ဘူးဆိုရင် ကားရဲ့အလုပ်လုပ်တဲ့စနစ်က သိပ်မကောင်းတာ  ဒါမှမဟုတ်ရင် အဆင့်နိမ့်တဲ့ ပစ္စည်းတွေတပ်ထားတာကြောင့်ပဲ..."

"ဒါ ဖြစ်ကောဖြစ်နိုင်လို့လား?"
လော့ရွှယ်ချင်းက ဘောပင်ထုတ်ပြီး အော်ဒါစာရွက်ပေါ် လက်မှတ်ထိုးလိုက်ပြီးနောက်တွင် မျက်မှောင်ကြုတ်ရင်း ချင်ကျိုးကို ကြည့်လိုက်သည်။
"ဒါက ပုံမှန်ရောဟုတ်လို့လား?"

"ဒါပေါ့..."
ချင်ကျိုး ပြန်ဖြေသည်။
"လူအများစုက သိတောင်မသိလိုက်ဘဲ ကြုံတွေ့နေရတာမျိုးလေ..."

"အဲ့ဒါဆိုရင်တော့ ပုံမှန်မဟုတ်တော့ဘူး..."
လော့ရွှယ်ချင်း လေးလေးနက်နက်ပြောလိုက်သည်။
"ဒါက ဝယ်သူတွေကို လိမ်လည်လှည့်စားနေတာမဟုတ်ဘူးလား?"

သတင်းထောက်တစ်ယောက်အနေဖြင့် သူမ၏ လုပ်ငန်းကျွမ်းကျင်မှုကြောင့်လားမသိ စကားအစကတည်းက လော့ရွှယ်ချင်းသုံးခဲ့သည့်စကားများမှာ အတော်လေး သန်မာပြင်းထန်သည့် စကားလုံးများဖြစ်နေခဲ့သည်။

သူတို့နှစ်ယောက်က လိမ်လည်မှုအကြောင်း ဆွေးနွေးနေကြပြီဖြစ်၍ ချင်ကျိုးကျွမ်းကျင်သည့် နယ်ပယ်ထဲသို့ ရောက်သွားပြီလေပြီ။

"ပြောဖို့တော့ ခက်ပါတယ်ဗျာ..."
ချင်ကျိုး လည်ဂုတ်ပေါ် လက်နှစ်ဖက်ယှက်တင်ရင်း ထိုင်ခုံပေါ် မှီထိုင်လိုက်သည်။
"လိမ်လည်တယ်လို့ ပြောချင်ရင် ရည်ရွယ်ချက်ရှိရှိလိမ်လည်ခြင်း၊ အယောင်ဆောင်ခြင်း၊ ကိုယ်စားပြုဟန်ဆောင်ခြင်းအပြင် လိမ်လည်ခံရသူတွေနဲ့ သာမန်ဆက်ဆံရေးတစ်ခုရှိခြင်းဆိုတဲ့ အဓိကအချက်လေးချက်ထဲကနဲ့ ညီရမယ်လေ... ကားပြခန်းမှာ ပြထားတဲ့ကားတွေက ထုတ်လုပ်တဲ့သူတွေရဲ့ ကတိစကားတွေကို အတိအကျကိုယ်စားမပြုသလို ခင်ဗျားလက်ထဲမှာရှိနေတဲ့ အရောင်းအဝယ်စာချုပ်ကလည်း ကားရဲ့ တည်ဆောက်ပုံအကြောင်းကို တမင်သက်သက် လှည့်စားထားတာမဟုတ်ဘူးမလား... ဒါကြောင့်မလို့ ထုတ်လုပ်သူတွေကို လိမ်လည်မှုနဲ့ တရားစွဲဖို့ မဖြစ်နိုင်သလောက်ပဲ..."