عند العيال بالبر الساعه 11 صباحا ..
رعد : ياعيال مو على اساس نقعد للفجر ونرجع ؟
سعود بضحك : يرجال احسن الحين اذا رجعنا اكيد المدير بيكون عارف اننا هربنا وبيعاقبنا كالعاده .
عبد الرحمن : طيب ياعيال خلاص خلونا نرجع ترا تو صحينا ومافطرنا امشو نفطر .
سعود بعد ماوقف : يلا خلونا نشيل العزبه ونمشي ...
رجعو للسكن ودخلو من الباب الخلفي للسكن عشان الحارس مايمسكههم .
رجعو لغرفتهم الي كانت بجانب غرفة البنات ، تروشو بسرعه وكشخو .
سعود : يلا ياعيال مشينا نروح نف... ماكمل جملته الا درعم عليهم المدير عايد وهو متكتف وبأبتسامه عريضه وقال : ماشاء الله بتفطرون اجل ؟ ثم صرخ : وين كنتو من امس ؟ انا ماعاقبتكم ؟
عبد الرحمن بلع ريقه وتقدم للمديره وباس راسه وقال : شدعوه ترا عادي رحنا للبر مافيها شي .
ابتسم المدير وقال : على المكتب انت وياه يلا .
طلعو وتوجهو للمكتب واكلو ترزيل كالعاده ،
طلعو الثلاثه من المكتب ورجعو لغرفتهم وقال سعود : اووووفف ! الحين كيف نطلع نفطر ؟ محد مننا يعرف يسوي فطور متسنع !
رعد بحماس : ياعيال تشمون الريحه ؟
عبد الرحمن : اي جايه من مطبخ الغرفه الي جنبنا .
سعود بحماس : امشو ياعيال نقلط معهم وربي جوعان .
عبد الرحمن : يلا
عند البنات ..
ليال وهي تصرخ من المطبخ : غرام تعالي ساعدينا انا وسجى !
غرام بصراخ : تعبانه ...
فتح سعود باب الغرفه ومعاه رعد وعبد الرحمن توجه لغرام الي جالسه على الجوال وقال : ماشاء الله شذي الريحه الحلوه انت الي مسوي الفطور ؟
غرام ببرود : شدخلك ؟
سعود بغضب : ياورع ! تقول لي انا شدخلك ؟ تبيني افرشك هنا ؟
غرام بغضب : تخسي وتعقب مابقى الا انت يالطعس تفرشني
مسك سعود ياقة غرام وقرب وجهه من وجهها : اسمع ياورع تراك تلعب مع الشخص الخطأ بعطيك فرصه تعتذر مني .
بعدت غرام يده عن ملابسها : تخسي اعتذر منك !!!
وهجمت غرام عليه وسددت له ضربات ورا بعض وهو برضو سدد لها ضربات وسمعو البنات الصوت وجو ومسكت ليال عبد الرحمن وتهاوشت معه ومسكت سجى رعد وتهاوشو ..
درعم عليهم المدير عايد وصرخ : وجع إن شاء الله وش خليتو للبزاين امش انت وياه عالمكتب الان !
تركت غرام سعود وشمقت له وطلعت اول وحده ولحقها سعود ثم لحقوه الباقي ..
بالمكتب ..
المدير بغضب : ممكن اعرف ايش صاير ؟ يعني سعود وشلته دايم مشكله جديده متعودين لكن انتم يالتوأم من اول يوم لكم علطول هوشه ! شفيه ؟
غرام بعد ماقلبت عيونها : ذا الطويل هو الي بدأ "اشرت على سعود" وكملت : درعم بغرفتنا بدون سلام وجاي يدور الفطور عندنا غصب !
سعود بعد ماناظر غرام بصدمه وهو يتوعد لها : اقول اسكت يالخكري لا اجلدك مره ثانيه .
ناظرته غرام بغضب وقالت : جرب بس وربي لا اكسر يدك يالطعس .
المدير بغضب : بسسس انت وياااهه عزّام وسعود !! تراكم مو اطفال !!
وحول نظره على ليال وعبد الرحمن وقال : وانت وياه ليش تهاوشتو ؟ ليال ببرود : بصراحه شفته يعزز لخويه وهو يضرب اخوي عزّام وقهرني عشان كذا تضاربت معه .
عبد الرحمن ببرود : اسكت يالخكري
ناظرته ليال ثم شمقت له وانقهر عبد الرحمن من ليال وقرب منها كان بيصفقها بس مسكت يده بقوه ، صرخ المدير وقال : بسسس!! وقدامي بعد ! ناظر لـ ليال بعد ماتركت يد عبد الرحمن : انت اظن انك خالد صح ؟ ليال بعد ما قلبت عيونها : صح
ثم ناظر بسجى ورعد وقال : مايحتاج تتكلمون اكيد انكم فزعتو بالهوشه زي الجحلط هذول ، ناظر بسجى وقال : وانت ليث ، عزّام وخالد وليث من اول يوم لكم مضاربه ؟ وبالاجازه ؟ وش خليتو للدوام ؟
غرام ببرود : اقول انت ترا ازعجتنا ! واذا اول يوم لنا ! خلاص قلنا لك الطعس ذا قل ادبه علي وعلمته الآداب وانتهت المشكله ! ناظرها سعود بغضب وكان وده لو يتضارب معها لكن مسك نفسه .
المدير بهدوء : يلا كل واحد على غرفته ولا اشوف احد يطلع منها انتم معاقبين للأحد ! طلعو السته مع بعض وكل واحد يرسل نظرات حقد للثاني اتجهو البنات لغرفتهم والعيال لغرفتهم
———————————————————————————
" عند العيال بالسكن "
كل واحد جالس على سريره بصمت ، سعود : كله بسبب الخكري ذا اللي اسمه عزّام عاقبنا المدير عايد بسببه .
عبد الرحمن بغيض : حطيت براسي ذاك الي اسمه خالد لسانه طويل ، ابي اربيه من جديد .
رعد بهدوء : ليث ذاك ، صراحه اسمه حلو ، اول ماشفته حسبته بنت .
عبد الرحمن بضحك : طبيعي بتحسبه بنت كلهم خكاريه .
سعود وهو صافن بالجدار يفكر : صدق ان عزّام خكري ، بس والله يشباب اول مره احد يتمكن من ضربي ، بالعاده مايمدي الشخص يلمسني الا وانا فارشه .
عبد الرحمن وهو يناظر برعد : شفيه ذا ؟
رعد بعد ماحول نظره لعبد الرحمن : اول مره سعود يعترف بقوة احد غيرنا .
سعود وهو يتأفأف : الحين بنقعد محبوسين هنا وبكره دوام .
رعد بزعل : اليوم كانت اخر فرصه اشوف فيها حبيبتي قبل الدوام بس راحت علي ، كلها من ليث الخكري .
عبد الرحمن وهو يناظر سعود : هذا الي همه ، استغفر الله بس .
ضحك سعود...
" عند البنات "
ليال بقهر : يع يبنات شفتو ذاك الي تضاربت معه ! وربي يقهر ودي اكمل عليه غاثني .
غرام بغيض : ولا ذاك الي اسمه سعود وربي يبنات ياهو جالطني .
سجى بضحك : احسن شي لما شمقتي له ومشيتي ماشفتي وجهه كيف صار احمر .
غرام بعد ماضحكت : الحين يبنات وش نسوي محرومين من الطلعه كلها من الغثيث سعود !
سجى : تعالي ابي اسوي لك ميكب اضيع وقت .
ليال : ياغبيه ماجبنا الميكب معنا .
ناظرتها سجى وراحت لخزانتها وبعدت الملابس وطلعت من ورا شنطة سوداء حجمها متوسط وجت وجلست قدام البنات وقالت : مصدقين اني بتخلى عن الميكب ؟
ضحكت ليال وقالت : وربي انك كفو ، جبتي روجي الاحمر ذاك ؟
سجى : ايه معليك .
غرام ببرود : سجو تعرفين اني اكره الميكب ومستحل احطه على وجهي .
سجى : خلاص انقلعي بحط انا وليال ، فتحت الشنطه وباللحظه ذي دخل عليهم محمد للغرفه ، توترت غرام وانسدحت على الشنطه عشان ماينتبه للي فيها وفعلا ماعطى للموضوع اهتمام واتجه لسريره وقعد يطقطق بجواله ..
شهقت ليال وقالت : الفطور برد يبنات !
غرام ببرود : كلها من الطعوس .
سجى : يلا عادي امشو نصخنه بالمايكرويف .
قامو البنات وافطرو وعزمو محمد معهم ، مر الوقت ونامو البنات .
قعدت غرام اول وحده واتجهت للحمام واخذت شاور سريع قبل مايقعد محمد ، لبست المشد والثوب بالحمام وطلعت قعدت ليال وسجى ومحمد وفعلا تجهز الكل ، تهجز محمد وطلع وترك البنات بالغرفه ..
سجى بعد ما لبست جزمتها : بنات وين فصلنا ؟
غرام بعد ما حطت الشماغ على كتفها : امشو نسأل المدير عايد .
ليال بعد ماحطت الشماغ على كتفها : غرام شعرك مبلول ليش مانشفتيه ؟
غرام ببرود : مالي خلق
تنهدت ليال بقلة حيله واتجهو البنات لمكتب المدير دخلت الغرفه بدون ماتدق الباب ..
المدير وهو يكلم سعود : اعقل انت واللي معك ترا مو ناقصين وجع راس
قاطع كلامه دخول غرام ، المدير : سلامات وش قلة الادب ذي انت الثاني ؟ تجاهلته غرام وناظرت بسعود وشمقت له ، سعود : امسك عيونك يالخكري .
غرام بهدوء : سدها يالطعس .
المدير : بس ، ناظر بغرام وكمل : شعندك ياعزام؟
غرام ببرود : فصلنا مانعرف وين .
المدير بهدوء : انتم مع سعود وشلته ، سعود خذهم معاك للفصل يالله .
سعود ببرود : شدخلني فيهم هالخكاريه .
المدير بغضب : سعود ، خذهم معك انت رايح رايح .
طلع سعود من الكتب ولحقوه البنات ..
سعود ببرود وهو يناظر لغرام : انت يالخكري ترا للحين مانسيتها لك تجهز اليوم بالفسحه ورا المدرسه لاتهرب انت واخوانك .
غرام ببرود : ماعليك ماراح نهرب يالطعس راح اربيك من جديد : ابتسم سعود ببرود وقال : شجاعتك حلوه .
وقف سعود ولف عليهم وقال : هذا الفصل يالخكاريه .
غرام ببرود : شكرا يالطعس .
سعود بأبتسامه بارده : العفو يالخكري .
دخلو الاربعه للفصل وكان الاستاذ موجود : ماشاء الله انت وياه خالد وليث وعزام من اول يوم لكم تأخير؟ يلا وقفو على الجدار . وبهاذي الاثناء اتجه سعود لمكانه اخر الفصل بالزاويه عند عبدالرحمن ورعد .
غرام ببرود : سلامات يا استاذ الحين تخلي الطعس يجلس وحنا لا ؟
الاستاذ بغضب : هذا غاسلين يديننا منه دايم كذا .
غرام بعد ماتوجهت اخر الفصل للزاويه الثانيه وجلست بالمكان الفاضي : اجل خلاص اغسل يدك مننا حنا بعد لأنك بتتعود .
اتجهو ليال وسجى عند غرام الي كان بجنبها كرسي فاضي وقدامها كرسي فاضي ، جلست ليال بجنبها وجلست سجى قدامها .
سعود بصوت عالي : والله طلعت مو سهل يالخكري .
غرام ببرود : افا عليك يالطعس ازهل .
غضب الاستاذ من كل اللي صار قدامه ولكن مابيده شي .
كمل الاستاذ الشرح وانت الثلاث حصص الاولى الي كانت مليانه محارشات بين شلة غرام وشلة سعود ؛ جاء وقت الفسحه راحت غرام ومعها ليال وسجى ورا المدرسه ، وفعلا كان سعود وشلته موجودين ،
غرام وقفت قدام سعود وعبد الرحمن قدام ليال وسجى قدام رعد ..
سعود وهو متكتف : مستعد يالخكري ؟
غرام بعد ماتلثمت بالشماغ : اتم الاستعداد يالطعس .
قرب سعود من غرام ومسك ياقتها ولكمها على وجهها لكن غرام ردت له اللكمه لكمتين ، بينما سجى ماسكه رعد وتلكمه ونفس الشي مع ليال تجمعو الطلاب والشجار لازال مستمر ، وبلحظه ولما كانت غرام تضرب سعود حست بأن المشد بدأ يرتخي وقف سعود من الضرب بعد ماشاف هدوئها المفاجئ ناظرها بصدمه وهو يشوف صدرها اللي برز شوي مع انه مو واضح كثير لكن انتبه لأنه قريب منها وكان هو الوحيد اللي انتبه ، قرب منها بصدمه وهمس لها : شذا يالخكري ، كيف كذا !
غرام بصدمه : اسكت استر علي يالطعس بشرح لك كل شي بس مو قدامهم .
تدارك سعود الوضع وبسرعه حضنها عشان محد ينتبه لها ونزل جكيته ورماه عليها وقال بهمس و سخريه : البس اقصد البسي يابنت .
ناظرو الرباعي بصدمه للموقف الي حصل قدامهم مشو السته مع بعض واتجهو للسكن دخل سعود غرفته وقال لغرام الي وراه : ادخل .
دخلو غرام وسعود ودخلو وراهم الرباعي وهم مو فاهمين شي .
سعود وهو متكتف : شتسوين بمدرسة العيال يابنيه ؟
انصدم الكل من كلام سعود وقال عبد الرحمن : سعود شتقول وش بنيه وبعدين ليش حضنته وعطيته جاكيتك شسالفه ؟
غرام وهي تناظر بالبنات : بنات خلاص انكشفنا .
ليال بأنفعال : عزام شفيك وش الي بنات ارفع علومك .
سعود ببرود : شفت كل شي بعيوني مايمدي تنكرون .
رعد وهو يناظر ومو مستوعب شي : ياعيال شفيكم يلا نكمل مضاربه .
غرام وهي تناظر البنات : بنات وانا قاعده اتضارب انفلت المشد وارتخى وشافني سعود ، بس كويس ستر علي حسبته طعس ماعنده مشاعر .
سعود ببرود : اقول يابنيه اخلصي تكلمي شجابكم مدرستنا ؟ تنهدت غرام وشرحت لهم الوضع بالكامل وقالت بالنهايه : اتمنى تسترون علينا وماتعلمون .
تعاطفو الشباب معهم وقال سعود ببرود : عليكم الامان وحنا زي اخوانكم واسف لأني ضربتك ياعزام ماكنت ادري انك بنت .
غرام بأبتسامه : لا عادي متعوده .
ناظروها سعود وعبد الرحمن بأستغراب بينما رعد كان صافن بسجى ويقول بداخله : هل معقوله انا كنت اتضارب مع بنت ! وين المرجله يارعد .
اعتذر رعد لسجى واعتذر عبد الرحمن لـ ليال وقال سعود : طيب ياعزام وش اسمك ؟
ليال بهدوء : اسمها غرام
ناظر سعود بعيون غرام وكأنه ماكان مدرك انها جميله وجدا .
عبد الرحمن : طيب انت ياخالد وش اسمك ؟
ليال : اسمي ليال .
عبد الرحمن : اسمك حلو
ليال بغرور : عارفه
رعد : طيب اجل ليث وش اسمه ؟
سجى بهدوء : سجى
رعد بأبتسامه : تشرفنا وانا رعد
سجى بطرف عين : طيب ادري انك رعد
قامت غرام ودخلت الحمام عدلت المشد وطلعت نزلت جاكيت سعود وعطته جاكيته وقالت : شكرا ياسعود .
حس سعود بمشاعر غريبه ولأول مره تناديه سعود تعود على طعس من فمها ؛ ابتسم وقال : عفوا غرام .
طلعو البنات وراحو غرفتهم وماكملو الحصص الدراسيه ..
عبد الرحمن وهو يناظر سعود : ولد ارفع علومك شفيك تخرفنت لما قالت شكرا سعود .
سعود ببرود : تخسي اتخرفن انقلع بس .
رعد : شباب انا بروح لحبيبتي بالكوفي سعود عطني مفتاح السياره .
اخذ رعد المفتاح من سعود وتوجه للكوفي اللي راح يقابل فيه حبيبته ؛ امل .
———————————————————————————
نزل رعد للكوفي اللي بيقابل فيه امل ؛ كانت امل جالسه على الكرسي ومعطيه ضهرها للباب وتكلم بالجوال ، ابتسم رعد وتقدم بهدوء من خلفها وهو مشتاق ؛ تلاشت ابتسامته بعد ماسمع حكيها وضحكها بالجوال .
امل : يلا حبيبي الحين يجي الغبي رعد وبحاول هالمره اخذ منه ألف ريال ، وبعدها اقابلك .
اظلمت الدنيا بوجه رعد ؛ كان يحبها فعلا وكان مستعد يسوي اي شي عشانها ، وكان بس ينتضر يخلص الجامعه ويتقدم لها على سنة الله ورسوله .
تقدم بهدوء وملامح بارده وجلس على الكرسي ؛ ارتبكت امل وخافت لو انه سمع حكيها .
رعد ببرود ووجه خالي من المشاعر : ليه ؟
امل بارتباك : وش اللي ليه رعد
رعد وهو ماسك نفسه : ليه الاستغفال هذا كله واللف والدوران ؟
امل بهدوء : لايكون سمعت كلامي بالجوال .
رعد ببرود : اللي بيننا انتهى يا أمل وكل حبي لك الصادق تلاشى .
ابتسمت امل وقالت : طيب احبك ، انتبه على نفسك وياحظ اللي بتاخذك .
رعد بغضب وقهر على كلامها المتناقض مع افعالها : هاذي النهايه راح انساك بسرعه لاتخافين دام هذا كلامك ، اتمنى ماشوفك مره ثانيه .
قام رعد وطلع من الكوفي ركب السياره وانطلق بدون وجهه محدده ، وين المفترض انه يروح بهاللحظه ؟ امه اللي مايعرف مين هي ؟ او ابوه الي مايعرف مين هو ؟
بعد مافر نص الرياض ، قرر انه يتجه لوجهته الاخيره ؛ السكن .
دخل السكن وبدون مايحس اتجه لمكتب المدير عايد ؛ دخل المكتب
عايد : وجع بدون استئذ ..
سكت عايد بعد ماشاف رعد بهالحاله ؛ كان ذابل وعيونه حمراء وواضح انه باكي ومنهك ومتعب .
قام عايد واخذ رعد بالأحضان يحتويه وكأنه اب له .
بكى رعد بحضن عايد ، وكان عايد صامت ولا يتكلم بحرف ، كان ينتضر رعد يخلص بكاء عشان يسأله ويتكلم معاه . بعد ما هدأ رعد شوي استقام رعد من حضن عايد واتجه للخارج بدون ولا كلمه .
ابتسم عايد ورجع يكمل شغله ؛ الشي الي مو معروف عن علاقة شلة سعود بعايد انهم يعتبرونه ابوهم ، صحيح مايعرفونه الا من ثلاث سنين حيث درسو المتوسط عنده ، وبرضو بيكملون الثانويه عنده ؛ وصحيح انه يشد عليهم لكنه يغليهم ويحبهم ويعتبرهم عياله .
اتجه رعد لغرفته هو وسعود وعبد الرحمن ، دخل الغرفه بهدوء وكان سعود جالس على سريره ، اتجه رعد لسريره وانتبه له سعود
سعود بهدوء بعد ما استقام : رعد شفيك مو على بعضك ، صاير شي بينك انت وأمل ؟
رعد بأستهزاء : اي انهيت كل شي بيننا .
سعود بهدوء : احسن شي سويته ، امل ذي مارتاح لها ابدا .
رعد بهدوء : من عذرك ماترتاح لها ، بس انا غبي ، استغفلتني ياسعود وانا الي حبيتها بروحي قبل قلبي .
تقدم سعود وحضن رعد ؛ كان يعرف سعود ان بهاللحظه رعد مايحتاج مواساة ، يحتاج حضن واحتواء .
رعد بقهر : ياسعود كيف انساها وهي الي وقفت معي بأسوء حالاتي؟ ياسعود كيف انساها وكل شي يذكرني فيها؟ كلامها بحر ياسعود ؛ وافعالها ماتعبي فنجال ! ياسعود انا لو ادري عن شين طبعها ماعطيتها فرصه تعرف اسمي ، حبيتها وعطيتها كل الحب الي كان المفروض اعطيه لنفسي .
ناظر رعد بعيون سعود وقال : ياسعود قلي وش اسوي ؟ ليش الكل مايبيني ؟ لا ام ولا ابو ولا حبيب .
نزلت دمعة سعود بحسره وهو يتأمل اخوه الي ماجابته امه : رعد مو الكل مايبيك ، انا ودحوم موجودين لك دايم ، وبالنسبه لـ أمل خيره لك انت وياها ، تجربة حب فاشله وحده مو يعني ان الحياه وقفت بوجهك ، لاتنسى عوض ربي .
استقام رعد ومسح دموعه وقال : شكرا سعيدان تدري اني احبك انت ودحوم اكثر شي بهالدنيا ومستعد اخسر امل وطوايفها عشانكم .
ابتسم سعود ، اتجه رعد خارج السكن وجلس على كرسي بالحديقه الي تربط مابين السكن والمدرسه نزلت دموعه بخفه وهو يتذكر كلام امل له ، مقهور مو على انه خسر امل ! مقهور انها قدرت تستغفله وتلعب عليه .
———————————————————————————
عند البنات بالغرفه ..
سجى : بنات وين محمد ؟ واغراضه مو موجوده بعد !
محمد بعد مادخل الغرفه : خلاص بطلع مابي اسكن معكم ، مجانين انتم تتضاربون مع شلة سعود ؟ يمين بالله ماقعد عندكم !
وغادر الغرفه ..
غرام بضحك : بنات طلع بدون اي جهد مننا .
ليال براحه : واخيرا يمدي اخذ راحتي بهالغرفه بدون مشد ولا اي شي يعكر مزاجي .
سجى بخنق : بنات اشتقت لأمي الله يرحمها .
ليال بعد ماتنهدت : الله يرحمها هي عند ربي بمكان احسن الحين .
تجاهلتهم غرام وقالت ببرود : الله يرحمها ، يلا خلونا ننام بكره ورانا دروس .
سجى بضيق : بنات ابي اطلع للحديقه اشم هواء وارجع .
تنهدت غرام وقالت : تمام سجو بس لاتطولين ..
نامو البنات ونزلت سجى للحديقه وكان المكان شبه ظلام ، سمعت صوت بكاء مكتوم ماتنكر انها خافت لكن تشجعت وقربت بشويش ، كان جالس على الكرسي شخص لابس ثوب ومتلثم بالشماغ قربت منه سجى ووقفت قدامه : رعد هذا انت ؟
التفت رعد بسرعه ومسح دموعه وقال بصوت مبحوح اثر البكاء : اي انا شبغيت ليث ؟
سجى بهدوء : اذا كنا لحالنا نادني سجى .
رعد : لا مابي ابي ليث .
سجى وهي رافعه اكتافها : براحتك ، المهم شفيك ؟
رعد : ولا شي ضيقه بسيطه .
سجى بأبتسامه : اثارينا كلنا متضايقين .
ناظرها رعد وقال : انتي متضايقه ؟
سجى : شوي ، لكن الشكوى لله .
رعد بهدوء : عادي اسأل ؟ اومأت سجى بأبتسامه وكمل حكيه : الحين انتم وين ابوكم ؟ ليش رماكم بالشارع ؟ مو بناته انتم ؟
تنهدت سجى : الا بناته ؛ هو اساسا بس طرد غرام لكن انا وليال لحقناها لأننا عارفين ان ماعندها مكان تروح له ولا تقدر تدبر حالها .
رعد بهدوء : ليش طردها طيب ؟ ومعقوله ماسأل للحين عنكم ؟
سجى : ابوي يكره غرام بشكل غير طبيعي ، وماعرف السبب ، بس هو اذا ناظرها يقول ان عيونها قبيحات ويتمنى لو يشيلهن من مكانهن ، وغير كذا كان يومي يضربها ضرب مو طبيعي حتى امي تبكي عشان يتركها ، كان يوديها للملحق ويقفل الباب ويضربها بقوه على اتفه الاسباب ؛ واحيانا بدون سبب .
رعد بأنفعال : طيب وانتي كان يضربك ؟
سجى : لا انا وليال كان يعاملنا طبيعي ، بس غرام يعذبها ويحبسها ايام بالملحق وبدون اكل ، ولما ماتت امي الله يرحمها بعدها بأسبوع طرد غرام وانا وليال طلعنا معها والعنود صديقتنا ساعدتنا واخوها اجر لنا شقه بأسمه والحمد لله مشت امورنا .
رعد بأنفعال : مافي اب يضرب بنته كذا ويحبسها ، فهمت الحين ليش لما اعتذر سعود منها قالت عادي متعوده على الضرب !
سجى : الله يهديه
رعد : هو اسمه ايش ؟
سجى بهدوء : علي
حساب الكاتبه انستا ( ilut7n )
