يانجمٍ وهج في حلّة سهيل

« ١١ »

‏علامك يا نــجد فزيّتي وقفلتي الشباك ؟
جاك الشجاع والشوق معلّم في يمينه

‏طيحتي بالهوى ماهو بالمطيح الدارج الشكاك
‏مطيحي مطيح شجاع ٍطيحته تحزن معادينه

‏امريني وش بخاطرك والله أن قلبي ما يعصاك
‏لي قلبٍ يبغاك وأنا في ذرى وجهك لا تخلينه !
-
أبتسمت ترجع شعرها خلف أذنها وتنطق بهدوء نبرتها : عوّد لبيتكم يالشايب شباكي على بيت نجم وأخاف يسمعك !
أبتسم شجاع ينطق : تخافين علي ؟
ضربت رأسها بخفه تنطق : شجاع !
مسك صدره ينطق بدهشة : لعنبو غيرك لبيه ؟!
ضحكت بخفه تقفل الشباك ، أبتسم يلتفت يمين وشمال ومشى يغادر قبل أحد يشوفهم ، وبالجهة الثانية خلف النخلة الطويلة اللي بجانب السطح كانت متخبية خلفها وتسمع حديثهم كله ، شهقت بصدمة تنطق : هذي آخرتها يا شجاع تحبّ نجد وتتغزل فيها بالصريح ولا كأنك تخون ثقة نجمي فيك ! لكن طبّك والله في يديني وأن ما كشفتك قدامه ما أكون أنا غرور
ضحكت بسخرية مصدومة من اللي شافته ومشت تنزل وتدخل بيتهم ..
« بيت جابر ، المجلس »
أبتسمت توقف وتسمع آخر كلام أم جمال ، هزّت رأسها تنطق : ما قصرتي يا بعدي وعازمينك قريب على زواج بنتي
أبتسمت أم جمال تنطق : الله يكرمك ان شاءالله أول الحاضرين
نجلاء : ايه ان شاءالله يالله توصين ؟
هزّت أم جمال رأسها بالنفي تدّعي أن نجلاء تشوفها ونطقت بهدوء : صح يا أم غرور ودك برقم أم البنت ؟
شهقت نجلاء وأبعدت الجوال تخفي حماسها ورجعته على أذنها تنطق : ايه ولا عليك آمر تعرفين صديقتي من الطفولة وضيعتها من سنين مثل ما حكيت لك يعني
أبتسمت أم جمال تنطق : والله بسم الله عليها هنادي من أرقى وأجمل وأطيب الحريم اللي قابلتهم حرمةٍ ذربه شايله نفسها وأهلها كلهم وما أستغرب لمن جيتي تسألين عليها بعد السنين اللي حكيتيها لي !
زفرت نجلاء تتهزأ فيها بصمت ونطقت : ما عندي إرسال عجلي يا أم جمال !
أم جمال : برسله لك واتس الآن
هزّت رأسها بالإيجاب تدّعي أن أم جمال تشوفها ونطقت بعجلة : يالله صدق من محاسن الصدف اللي سمعنا فيها صوتك ودعناك الله
أبتسمت أم جمال من طيبة نجلاء بدون ما تدري عن صادق نواياها ، هزّت رأسها تنطق : يا حبيبة قلبي يا أم غرور عسى الله يتمم على بنتك و..
قفلت نجلاء الجوال ونطقت بقرف : وع ما تسكت ذي !
مشت تخرج من المجلس وتنتظر رسالة أم جمال ، أبتسمت بخبث تنطق : أجل هنادي ؟
ضحكت بعلّو صوتها ونطقت : والله لا أصير كابوسك وكابوس بنتك الحيه يا هنادي !
مشت تطلع الدرج لغرفتها ، رّن جوالها معلّن رسالة وصلتها وأبتسمت تنطق : تونا بدينا
قفلت الجوال ومشت تنسدح على فراشها وتنام بهدوء لأجل الأحداث والمخططات اللي بتقولها لأمها شاهرة اللي بتكون ذراع نجلاء اليمين فالقادم ..
« المستشفى ، ظهرًا »
سلمت من أنتهت من صلاتها ووقفت تنطق : يمه بتصلين ؟
هزّت مزنه رأسها بالإيجاب تنطق : اي بالله بصلي يا بنتي
تقدمت وهج تشيل طاولة الإفطار من حضن مزنه وتدفع سريرها توجهه للقبلة ، ضحكت من بدأت تحجبها وضحكت مزنه تنطق : يا جعلها دايمه يا وهج دنيانا لكن خلصي وأنتي تضحكين راح وقت الصلاة
أبتسمت تقبّل جبين جدتها وتنطق : تقبل الله حبيبتي
أبعدت عنها مبسوطه في التحسن الكبير اللي تشوفه بجدتها ، حتى صارت تسولف كويس وتتذكر أغلب أحداث اليوم بدون نسيان ، جلست ترفع جوالها وتشوف رسالة من عزيز ، فتحتها وشهقت من كثرة الرسايل وضغطت رقمه تتصل عليه ، أنتظرت ثواني ووصلها صوته وهو يقول : لبيه ؟
وهج : هلا عزوز وش الرسايل ذي كلها !
عزيز نطق بقلق : شوفي والله ما أقدر أمسك لساني وخايف أتكلم وتنفعلين وتكلمين مترك ويجي يدعس رقبتي !!
وقفت بخوف تنطق بحدة : عزيز أمي وأبوي بخير ؟؟
ضرب رأسه بتعب ينطق : شوفوا الحماره وين راح تفكيرها ؟ ايه بخير علامك استخفيتي !
وهج : أسكت خفت والله طيب دامهم بخير وش غيره ؟
ألتفتت على مزنه اللي نطقت بصدمة : فيهم شيء ؟؟
أبتسمت ونطقت بعجلة تهدي جدتها : لا لا يمه طيبين وبخير
أرتاحت مزنه وضحكت وهج تنطق : يا عمري يا مزوني طيرت عقلها !
عزيز : لأنك حماره
رفعت حاجبها تنطق بحدة : شكلك نسيت أني خالتك ؟
عزيز : سوري ما أحترم خاله أصغر مني وأقصر مني سلامات يا أبوي وين !
وهج : طيب طيب أوريك
قفلت الجوال بوجهه ونطقت بهدوء : زفت صدق ما ينعطى وجه
ضحكت مزنه تنطق : أنتي اللي دلعتيه
وهج : أدري والله ونادمة أشد الندم
مزنه : بس ما لقيت أحد يحبك مثل عزيز والله أنك عزيزة عليه ولا يرضى عليك كلمة وحدة تمس خاطرك !
أبتسمت وهج تنطق : وهذا اللي لاوي ذراعي على عزوز
ألتفتت من دخلت الممرضة ومعها أدوية مزنه ، ودخل الدكتور خلفها ، رجعت بسرعة تسحب الستاره وتبقى خلفها ، كان يكلم مزنه ويسألها عن وضعها وكيف صارت ، وبعد حديث طويل أبتسم ينطق : خلاص الليلة تكتبون خروج والحمدلله على السلامة
أبتسمت مزنه تنطق : الله يسلمكم
خرج الدكتور وفتحت وهج الستاره تنطق : أخيرًا قضت الأيام وبنرجع للقصر !
هزّت مزنه رأسها بالإيجاب تنطق : حمدلله على كل حال وحمدلله على العافية
وهج : اي والله الحمدلله
مزنه : أقولك يا بنتي
أبتسمت تقرب من جدتها وتنطق : لبيه وأبشري من الحين
أبتسمت مزنه تنطق : أبغى أكل بطاطس
ضحكت وهج بصدمة تنطق : بس ؟
مزنه : وأبيه بالكاتشب
أشرت بأصبعها على عينها اليمين ونطقت : من عيني اليمين قبل اليسار
مزنه أبتسمت تدفعها وتنطق : يالله يالله جعت
ضحكت تمشي وتلبس عبايتها ، ضبطت حجابها ومشت تخرج للممر ، أبتسمت من شافت جدها ونطقت : جدو !
ألتفت مترك عليها ينطق : يا مرحبا يا بنتي
أبتسمت تسلم عليه وتنطق : كيفكم ؟
مترك : طيبين الحمد لله وأنتوا ؟
وهج : حمدلله جدتي بخير وبنطلع الليلة وغيره ؟ مافيه شيء
مترك أبتسم ينطق : حلو حلو أمير عجل برحلتهم ومشوا الفجر اليوم وبيوصلون على العشاء ان شاءالله
توسعت عيونها وقالت : بالله ؟ ما قالوا لي
مترك : بيقدرون يطلعونها الحين ؟
ميّلت شفايفها بعدم معرفة تنطق : ما أعرف تبي نحاول ؟
هزّ رأسه بالإيجاب ونطقت وهج : بس وشفيك مستعجل ؟
مترك : ما أبغى أمير يوصل وهي فالمستشفى
هزّت رأسها من فهمت وتقدمت للاستقبال تكلمهم ، بعد فترة قصيرة قدرت تقنع الدكتور بمساعدة مترك اللي حط المسؤولية بالكامل على عاتقه ووضح للدكتور أستعداده ، طلعت تساند جدتها اللي تمشي ونطقت بهمس في أذن وهج : ما جبتي البطاطس !
توسعت عيونها تضحك بصدمة وتنطق : والله راح من بالي
زفرت مزنه بغضّب تنطق : عشاني اللي موصيتك
قبّلت كفها تنطق : يمه لا تقولين كذا
دفعتها مزنه تمشي لوحدها وتنطق : وخري بروح أجيب لي من الدكان
أبتسمت وهج تركض ورا جدتها يخرجون من المستشفى ..
« حلّة سهيل »
هزّ مسعود رأسه يسمع تعليمات جده ونطق بحدة : أبشر بلفّ البيوت كلها وأقول لهم
سهيل : خلهم يعجلون ويجهزون قبل يقبل العصر !
دق تحية ومشى يركض للبيوت ينقل لهم كلام سهيل ورغبته بالخروج في كشته جماعية ، وما هي دقايق إلا والأصوات مرتفعه والسيارات متجمعة والأغراض من يد للثانية ينقلونها ويرتبونها فالسيارات ، ألتفت شجاع ينطق : منيف مدّ لي قدور الذبايح
منيف : وش بنذبح خروف ؟
هزّ شجاع رأسه ينطق : يقوله سهيل
منيف : طيب طيب
تقدم يشيل القدور ويناولها لشجاع اللي بدأ يصفها فالشنطة الخاصة بالجمس القديم ، قفل الشنطة ينطق : خلصنا صح ؟
تكى مروان ينطق : ايه ما بقى شيء
شجاع : وش دراك وأنت ما شليت شيء ؟
مروان : تستهبل صح !
ضحك منيف ينطق : حرام عليك يا شجاع شل الصحن
شجاع : الله أكبر الله لا يشكر فضله
مشى يركب الجمس وضحك منيف ينطق : مروان أمش لا يفصل عليك زيادة
زفر مروان بغضّب ينطق : يعض على شحم
مشوا يركبون بجانب شجاع ، ألتفت لسهيل اللي خرج مع رماح ومسلط من المجلس ونطق : شجاع ركبوا البنيات معكم يساعدونكم فالأغراض ويجهزون الغداء لين نجيكم
شجاع هزّ رأسه بالإيجاب ينطق : طيب
فتح الباب ينزل من الجمس ويمشي لبيت أبوه ، دخل للبيت ينطق : أسيلوه !
طلعت من المطبخ وهي تأكل سلطة ونطقت : خير ؟
شجاع : أمشي وجيبي معك البنات كلهم
رفعت حاجبها تنطق بحدة : كلهم !!
شجاع : يعني اللي بيساعدونك والجيدات منهم
هزّت رأسها تنطق : طيب بس لا تقول أنك تسوق الجمس القديم
ضحك بصدمة يرمي عليها علبة المويه اللي لقاها جنبه وضحكت تصرخ وتنطق : يا تبن !!!
شجاع : خلصيني والله ما أخليك
طلع من عندها وضحكت تمشي لجوالها ، رفعته ودخلت القروب بالواتس تكتب فيه وتبلغهم جميعًا ، قفلت جوالها ومشت تنزل الصحن بالمطبخ وتخرج منه ، لبست عبايتها وبرقعها وطلعت تتبع شجاع ..
« القاعدة »
مسح عرق جبينه ينطق بحدة صوته رغم تعبه الشديد : ثابت يا عسكر !
وقفوا جميع امتثال لكلمته ، ميّل البريهه حقته لأجل تظله من الشمس الحارة اللي هو مستنكرها بعزّ الشتاء ، بلل شفايفه ونطق : نستكمل بكره على خير
عطاهم ظهره ومشى يخرج من الميدان ، دخل المبنى وزفر بقرف ينطق : وش الحر ذا أعوذ بالله !
رفع حاجبة من سمع صوت جواله داخل مكتبه ونطق : من ذا اللي ما لقى يدق إلا بالقوايل
فتح المكتب ورفع عيونه بصدمة ينطق : أرحب يا أبو سعود !
أبتسم نمر يوقف وينطق : هلا مرحبا يا أبو جراح
تقدم يسلم عليه وينطق بهدوء : وش المناسبة السعيدة اللي رجعتك للقاعدة ؟
نمر : جيت أجدد أوراقي وأسلم خطتي العلاجية للواء كايد
هزّ رأسه ينطق : يالله حييّه وش أكرمك ؟
نمر : والله ما ودي إلا إنك ترد على جوالك اللي صمخ أذني
أستوعب صوت الإتصال القادم من جواله وتقدم يفصله من الشاحن ويرفعه يشوف الرقم المجهول ، طلع من المكتب وقبل يقفل الباب نطق : أعذرني يا أبو سعود
هزّ نمر رأسه له ينطق : معذور
قفل الباب وفتح الإتصال علطول ينطق : مرحبا ؟
زفر مترك ينطق : ما بغيت يالنسيب
توسعت عيونه يعتدّل بوقفته وينطق : أرحب !
أبتسم مترك ينطق : وصلني خبر أن مهمتك تقدمت من ناحية الوقت
هزّ رأسه بالإيجاب يدعّي أن مترك يشوفه ونطق : الله الله
مترك : وعلامك ما قلت شيء ؟ ولا هونت
نزع البريهه من على رأسه يبعثر خصلات شعره وينطق : مالك لوا ما هونت بس ما بغيت أعجلكم
أبتسم مترك ينطق : أجل سجل رقمي عندك وسلمنا عليك وبإذن الله يجيك الرد قريب
ميّل رأسه ينطق : أبشر توصي تآمر ؟
مترك : سلامتك
نجم : في أمان الله
قفل الإتصال وأبعده عن وجهه يسجل رقم مترك ، فتح نمر باب المكتب ينطق : نجم تطلع معي ؟
كان يقرأ ومندمج برسايل القروب فالواتس عن الكشته ولا رد ، تقدم نمر يخبط كتفه وينطق : أبو جراح !
رفع عيونه على نمر ينطق بحدة : وش بلاك أنت
ضحك نمر ينطق : تخاويني ؟
هزّ رأسه بالنفي ونطق نمر بصدمة : افا !
نجم : ها قول تم والله ما تردني !
نمر رفع حاجبة ينطق : تم والله ما أردك وش بغيت ؟
نجم : تقلط على الكشته وتقابل الرياجيل كلهم
توسعت عيون نمر بصدمة ينطق : أهلك ؟! الله ينكبك يا نذل
رفع كتوفه ينطق : مالي شغل أنت اللي حلفت
مشى نمر بقلة حيله يتبع نجم وينطق : بجي معك
نجم : تعال حيّ الخوي والله
نمر : يقالك بترقعها ؟
كبح ضحكته ومشى يركب موتره ، ركب نمر معه وأنطلق نجم للحلّة لأجل يبدل ملابسه وبعدها يتوجه لمكان الكشته المحدد ..
« حلّة سهيل »
ضرب شجاع الدركسون وزفر بغضّب ينطق : حسبي على العدو والتأخير !
أسيل : باقي جمان
ألتفت أشجان تنطق : جمان ما بتجي أساسًا !
رجعت أسيل تعدّ البنات ونطقت بصدمة : وين نجد ؟؟
شمايل : نجد بتجي مع نجم قالت لي
شجاع : يعني أمشي ؟
غرور زفرت من الضيق ونطقت : ايه دخيلك وفك الشبابيك  صرعوني ورا !
ضحكت شمايل بصدمة تنطق : والله ؟
ضغطت شمايل عليها زيادة ونطقت : هاه كيفك الحين أزيد ؟
زفرت تصدّ عن شمايل وتنطق : مريضه !
مشى شجاع ونطق بهمس : حسافة الانتظار وسيدة العذارى ماهي بينهم
ألتفت مروان ينطق بهمس : من هي ؟ جمان !
توسعت عيونه بصدمة ينطق : وجع وجع أقول بيت قصيد طرى في بالي !
ضحك مروان ينطق : بسم الله وش دراني !
زفر شجاع يصدّ ويناظر الطريق بصمت ويستمع بصبر لشكاوي غرور بالطريق ..
« بداخل السوبر ماركت »
تتجول بالممرات وهي متمسكة بحفيدتها ، زفرت وهج بتعب ونطقت : يمه وريتك كل براندات البطاطس اللي تبيع كاتشب ورفضتي ممكن توصفين لي شكل اللي تبينه ؟
ميّلت مزنه رأسها تنطق : وش باندات ذا !
ضحكت بخفه وتوسعت عيونها من ركضت مزنه تنطق : لقيته لقيته !
تقدمت وهج لها وضحكت تنطق : لا أنا رسمي بنجلط يمه وريتك ذا مليون مره وقلتي لي لا
فتحت مزنه كيس البطاطس تأكل وتنطق : وش دراني ما عرفته منك مغير تقلبينه يمين ويسار ومستعجله لو أنك رايقه مثلي كان عرفته
مشت وضحكت وهج من نطقت مره ثانية : بس والله لذيذ
حضّنت وهج ذراعها تنطق : والله محد لذيذ غيرك يا أمي
مشت تخرج وشهق الموظف وضحكت وهج تنطق : بحاسب أنا بحاسب
ألتفت لها ينطق : اللي ودك ، كاش ولا شبكه ؟
رفعت جوالها تنطق : شبكه
حاسبت وخرجت من السوبر ماركت تتبع جدتها ، أبتسمت تشوف مترك يفك لها الباب ويساعدها تركب ، مندهشة من كمية الحُب اللي تشوفه بعيون مترك وبأفعاله لمزنه ، وعلى الرغم من السنين اللي عدت ومضت ما قّل مقدارها بقلبه وبكل يوم يزيد غلاتها بداخل صدره ، تقدمت تركب بالخلف ونطقت : تعبتني مزونك يا مترك !
أبتسم مترك يقبّل كفها وينطق : يهون التعب وتهون الأعتاب الثقيلة في ظل ضحكه من مزوني والله تهون !
توهجت خجل من كلامه تصدّ وتسحب ذراعها منه ، ضحك بعلّو صوته ينطق : يا جعل عمري فداك يا مزنه
أبتسمت بخفه تنطق : مجار يا مترك إلا ما قلتوا لي وين بنروح ؟
مترك : بخاطرك نروح مكان ؟
هزّت رأسها بالنفي تنطق : ودي نرجع للقصر
مترك : هذانا رايحين له
أبتسمت وهج تنطق : وأمي وأبوي جايين بعد
هزّ مترك رأسه بالإيجاب ينطق : الله يحفظهم ويستر عليهم أمير قال لي إذا وصلوا الرياض بيتصل علي
هزّت رأسها تميّل به جهة الشباك وتتأمل الطريق الطويل للقصر ..
« الــبرّ ، عند خــيام الرجال »
وقف أحمد من سمع صوت سيارة وأبتسم يشوف سيارة نجم وسرعان ما تلاشت إبتسامته ونطق بصدمة : الكلب جايب معه ضيف !
ألتفت سهيل ينطق : منهو ؟
رجع أحمد بخطواته وألتفت على أبوه ينطق : نجم جايب نمر
أبتسم سهيل ونطق : ونمر منا وفينا ماهو غريب !
قاموا الرجال لوجود نمر ونطق سهيل بتحذير : لا تفتحون موضوعنا البارحه قدام الضيف سامعين ؟
هزّوا جميع رؤوسهم ممتثلين لكلمة سهيل ، تقدم نجم يسلم بصوته الجهورّي ومشى نمر من خلفه يسلم ، من أنتهى نمر من السلام جلس بجانب نجم وألتفت على سهيل اللي نطق : وش حالك يالنمر ؟
أبتسم نمر ينطق : بخير جعلك بخير أنتوا وش وقعكم ؟
جميعهم ردّوا بصوت واحد - الحمدلله - وأبتسم نمر ينطق : جعلها دايمه
أبتسم رماح ينطق : أبطيت علينا يا نمر
نمر : والله كنت في مهمة حتى ما كملتها رجعت من إصابة وجلست الفترة كلها أتدرب لحالي في بيتي
ألتفت على نجم يخبط كتفه وينطق : ما خلاني النجم الساطع وبين فترة والثانية يسيّر علي
نطق رماح بقلق : ما قالنا نجم عن إصابتك
نمر ميّل رأسه ينطق : والله أنا اللي طلبته يا عمي ما ودي أتكلف على أحد وأنا ما فيني إلا العافية
تقدم مسعود يصّب له قهوة ويصّب لنجم بجانبه ، أبتسم يمسكها وينطق : الله يسلمك يا مسعود العود !
ضحك مسعود ينطق : يشهد الله علي أني أحبك أحس محد يقدرني بالدنيا ذي كلها إلا أنت
ضحك نمر ووقف شجاع ينطق بحدة : اذلف هناك بس
نمر : خله علامك عليه ؟
رجع شجاع ونطق : رافعٍ ضغطي !
ضحك نمر وسرعان ما ألتفت على سهيل اللي نطق : حمدلله على سلامتك يا ولدي وأنت منا وفينا ما بيننا كلافة وأن كان تكلفنا فأنت في ذمتي تستاهل
ثبت نمر كفه على رأسه ينطق : جعلكم في زود والله يسلمكم جميع
رفع نجم حاجبة بدهشة من نطق سهيل : مشتهين كبسة من يدينك يا نجم !
وقف ينفض ثوبه وينطق : بشرط يقوم شجاع معي
توسعت عيونه بصدمة ينطق : يا نذل
ضحك نمر عليهم ونطق بسخرية : خلك ذوق شوي بس شوي من نذالته
آشر نجم على صدره ينطق بصدمة : افا أنا نذل ؟ حرام عليكم
مشى بسرعة من وقف شجاع يرميه بالعقال ونطق بسخرية : قوم بس الله لا يهينك ورانا غداء
مشى شجاع وراه ينطق : وشرايك تصمها ؟
رفع حاجبة ينطق بسخرية : بدعس رقبتك لا تغلط !
دفعه شجاع يرجع وينطق : هيا شوف من يساعدك
سحبه نجم يحتضّنه وينطق : عاد لا تصير مايع
ضحك شجاع ينطق : طيب وخر كتمتني مع الحر ذا
نجم : والله مدري وش جاكم والكشته بعزّ القوايل !
شجاع : يقالك تغيير جو ليت سهيل يستغل وقت فراغه بالنوم وأنا أخوك
ضحك نجم بخفه ينطق : بس والله برد فالبر
هزّ شجاع رأسه ينطق : انشهدنه برد
قرب شجاع من نجم يمشون ووصلوا خلف الصخرة ، بدأ نجم يشتغل وشجاع يساعده بتقطيع لحم الذبيحة اللي سلخها العامل شفلوت ، أنتهى نجم من اللحم يسحب البصل ، تقدم شجاع يحط القدر على الغاز ويشبّه ، نزل نجم الصحن وبدأ شجاع يحرك بهدوء ..
« خــيام الحريم »
أبتسمت من سمعت صوته وهو يسلم على الرجال ونطقت بهمس لأشجان : جاء نجمي !
أبتسمت أشجان تنطق : بس يقولون جايب ضيف
رفعوا عيونهم على نجد اللي تقدمت تنطق : سلام عليكم
دخلت جمان خلفها وسلمت مثلها ، ردّوا جميع الحريم السلام وكملت الجوهرة سالفتها ، ميّلت شفايفها بعبوس تنطق : متأكدة ؟ مين قالك
أشجان : يقوله مسعود لدحيم أخوي
غرور : ومن هو الضيف ؟
رفعت أشجان كتوفها بعدم معرفة وقالت : وش يدريني بعد
ألتفت أشجان على جمان تنطق : جاء معكم ضيف ؟
هزّت رأسها بالإيجاب ونطقت : ايه نجم يقول لحد يجينا وبعدين وش عندك تسألين
كانت أشجان بتتكلم لكن قاطعتها غرور من وقفت وتوسعت عيون جمان تنطق بسخرية : مو صاحية بتروحين ؟؟
غرور زفرت بقرف تنطق : جمان فكيني شرك بالله
جمان رفعت حاجبها تنطق : حبيبي ركزي يعني لا أنتي تحّلين لنجم عشان تنشبين بوجهه أربع وعشرين ساعة وغير كذا فيه ضيف !
رفعت رأسها بغرور تنطق : ما طلبتك تشرحين وبعدين خطيبي وأنا أبخص باللي أسويه معه ياشين اللقافه صدق ولا عشان عندك أخو ومحرومه تسوين شيء تبغينه ؟ تذكري أني وحيدة النجلاء وبِكر جابر ومحد يقول كلمه فوق كلمتي !
ضحكت جمان بسخرية تنطق : يا حرام والله كل هالشو عشان توضحين أنك ما غلطتي ؟ مسكينه صراحة
صدّت جمان تكمل قهوتها وتستمع لحديث جدتها الجوهرة ، زفرت بغضّب تنطق بهمس : الله يشلك يا مريضه
مشت غرور بقهر تغادر الجلسة كلها وتتجه لمكان الطبخ ، أبتسمت من شافته رافع ثوبه الأسود ومتشمر ويشتغل ، وقفت خلف الصخرة تسترق السمع لحديثه مع شجاع اللي نطق : زين ما سويت خلك على بنت آل ساير وأترك عنك شيطانة نجلاء يعني تخيل فوق أن أمها نجلاء جدتها شاهرة مستحيل تلاقي حسنة وحدة فيهم !
رفع عيونه لشجاع ينطق : ما جانا الرد باقي ليه مستعجل
شجاع : أدري بك صامل ولا أنت راضي إلا إذا جاتك الموافقة
نزل اللحم فالقدر ونطق يغير الموضوع : حطيت البهار ؟
عبّس شجاع بملامحه ينطق : الله الله
سكب الماء الحار وقفل القدر بقوته ينطق : عطني الصمام
مدّ شجاع الصمام لنجم وثبته بمكانه ، وقفوا أثنينهم وشهقت توزي نفسها خلف الصخرة ، عصّب نجم رأسه بشماغه يلتفت على شجاع اللي نطق : رجعنا ؟
نجم : بروح الخلا اسبقني وبجيكم
هزّ شجاع رأسه بالإيجاب يرجع ومشى نجم بالجهة المعاكسة يلبّي نداء الطبيعة ، تقدم شجاع وشهق بصدمة من ثبتت غرور عصا خشب حادة على عنقه ودفعته بقوتها على الصخرة ونطقت بحدة : أسمعني يا ولد الخال والله لو عاد سمعتك تحرض نجم علي لا أعلمه عن سواتك في نجد أخته من ورا ظهره والله ما أرحمك وتدري بغلاة نجد عند نجم وكيف ما يرضى عليها ولك أن تتخيل ردة فعله لو عرف أنك تختلي فيها وتتغزل وتطرب وتحكي الشعر عشانها !
نطق شجاع بصدمة وعيونه عليها : أذكري الله يـ..
قاطعته غرور وهي تشّد على العصا وتنطق بحدة : تراك ما بعد عرفتني يا شجاع والله ما أرحمك أبعد عن نجم ولعاد تشوفك عيني عند أخته وترا والله لو ألمحك أو أسمع مره ثانية عنك وإنك تحرضه علي أني لا أقوله وترا الدليل بين يديني ولا تقول بنت جابر ما قالت !
...
انتهى البارت ادعموني بنجمة وكومنت عشان اتحفز اكملكم 🤎