ရင်မှာ ဝှက်၍ ပျိုးခဲ့ပါသော.....

အပိုင်း ( ၃၆ )

''ဟယ် လုပ်ကြပါဦး
ဟိုမှာ ညိုမ သောင်းကျန်းနေပြန်ပြီ''

လက်ထဲရှိတာတွေနဲ့ ကောက်ပေါက်နေတုန်း
အော်သံတွေရယ် မြရှိရာဆီပြေးလာတဲ့အသံတွေကြားလိုက်ရပြီး ခွေးမကြီးမှာလည်း အဝေးကိုပြေးသွားတော့သည်။

''ဟယ် အစ်မ
ခြေထောက်မှာ သွေးထွက်နေပြီ
အကိုက်ခံလိုက်ရတယ်နဲ့တူတယ်
ဘယ်လိုလုပ်ကြမလဲ''

ကောင်မလေးတစ်ယောက်အော်သံကြောင့်
ကိုယ့်ခြေထောက်ကိုယ်ငုံ့ကြည့်မှ ဘယ်ဘက်ခြေထောက်မှာ သွေးစို့နေတဲ့သွားရာကိုတွေ့လိုက်ရသည်။
အရမ်းကြီး မဆိုးပေမဲ့လို့ ပေါက်သွားတာကြောင့်သွေးစို့နေသည့်အပြင် တခြားပွန်းပဲ့ရာတွေလည်းရှိနေသေးသည်။

''ဘော့စ်ဘေဘီလား
ဟဲ့ အကိုက်ခံရတာ ဘော့စ်ဘေဘီဟဲ့
တစ်ယောက်ယောက် ဘောစ့်ကိုသွားပြောကြဦး''

''ဟုတ် ဟုတ် ကျွန်တော် သွားပြောလိုက်မယ်''

''ညီမလေး ထနိုင်လား
လာ အစ်မလက်ကိုတွဲပြီးတော့ထ
ဒီညိုမက အရင်ဒီလိုမဟုတ်ဘူး
ကလေးမွေးထားလို့ ဆိုးနေတာ''

''ဟုတ်
လာကူပေးလို့ ကျေးဇူးပါပဲ
မြလည်း ဒီလိုကြီးကိုက်မယ်မထင်ထားတာ
ကိုယ်တိုင်က ပေါ့တာပါလေ''

ကိုကို့ဆိုင်က အစ်မတွေအကူအညီနဲ့ ဆိုင်ဘက်ကိုပြန်ရောက်တော့ ကိုကိုက အပြေးအလွှားရောက်ချလာပြီး
ခုံပေါ်ထိုင်နေသော မြရှေ့၌ ဒူးတစ်ဖက်ထောက်ထိုင်လိုက်ကာ မြရဲ့ခြေထောက်ကိုသူ့ပေါင်ပေါ်တင်စေပြီးမှ ကိုက်မိထားတဲ့ ခြေထောက်ကို ချက်ချင်းကြည့်တော့သည်။

''ဒဏ်ရာက ပေါ့လို့မဖြစ်ဘူး
ဒီကဆေးပုံးထဲမှာ အရက်ပြန်ရှိတယ်မလား
မြန်မြန်ပေးစမ်းပါ''

ကိုကိုသည် ဆိုင်က ရေသန့်ဘူးကို ယူကာ ဒဏ်ရာကိုသေချာဆေးသည်။
ပြီးတော့မှ သူ့ဝန်ထမ်းယူလာပေးသည့် အရက်ပြန်နဲ့ အနာကို လောင်းချလိုက်သည်။

''အာ့ ကိုကို့
စပ်တယ်''

''ပိုးဝင်မှာစိုးလို့လေကွာ
ဒီမှာကြည့် ကိုက်ရာက အကွင်းလိုက်မပေါ်ရုံတမယ်ပဲ
တခြားရော ဘယ်နားခိုက်မိသေးလဲ
ပြ ဒီဘက်ခြေထောက်ရော''