تاني يوم الصباح صحيت متاخرة الساعة 9عديل وحتى انو الصبح فاتني ربنا يغفر لي ـ قمتة اتسوكتة واتوضيت صليت ومشيت المطبخ عشان اشرب الشاي ـ لما دخلتة لقيت وجن بترتب و بتمر في المطبخ وبتغني ساااي ـ قلتة ليها م شاء الله الايام دي نفسياتك فل الله يديمها ـ ضحكت وقالت لي بسطة من الله سااي ـ قلتة ليها متاكدددة ولا داسة عني حاجةة ـ حسيت بيها اتوترت شوية لما قلتة ليها كدة ف قالت لي ادس عنك شنووو الزول م ينبسط😒 ـ قلتة ليها الله يديمهااا هههههههـ ـ اها اليوم الفطور حتعملي شنو ـ قالت لي حأعمل فطاير بس اصلا انا وانتي برانا ماف زول معانا ....
كبيت الشاي وقعدتة في الكرسي وبدينا نتونس ـ قالت لي رسيل معليش عندي سؤال وانت عارفاني فضولية م بعرف اسكت ـ قلتة ليها قولي قولي وتقريبا عارفة سؤالك شنو هههههههـ ـ قالت لي شنوو ـ قلتة ليها لا حابة اسمع السؤال منك ـ قالت لي امممم دة منو الامس الكنتي بتخلطي معاااه ـ هههههه والله كنت متاكدة حتساليني السؤال دة بس ح اجاوبك ي ستي دة واحد صديقي اتعرفتة عليه من فترة وامس كان متضايق ف اتصل علي , لو بتتذكري مش كان حكيت ليك عن الود الشلتة منو كتب وكدة ـ قالت لي ااي ـ قلتة ليها بس يااهو ...
قالت لي امممم وقعدت تعاين لي بنظراتها البفهمها ديك ـ قلتة ليها اصدقاااء اصدقاااء والفي راسك غلط غلط عشرة مرات غلط ـ ضحكت وقالت لي طيب اقتنعت ...
قلتة ليها اها وانتي جديدك والمكمل رصيدك وغمزتة ليها نظام تشغيلة ـ قالت لي بري يختي انا لسة صغيرة ع الامور دي وعملت روحها مشغولة ـ المهم عديتها ليها وم حبيت احكها معاها طالما هي م عايزة تحكي لي بخصوص علاقتها هي وكريم ف حأسكت واشوفها حتحكي لي متين ولوحدها من دون م اسألها.....
بعد اسبوعين كان في معارض لليوم العالمي للكتاب وكمان في مكتبة جديدة قريبة من السوق حيفتتحوها يوم الاثنين وأول يومين حيكون الدخول مجان وحتى حيكون في تخفيض في اسعار الكتب للناس العايزة تشتري وحيكون في مسابقات ثقافية وبرامج حلوة ف كنت متحمسة جدا وأكيد حأستمتع شديد ـ ف اتذكرت فادي وقلتة ي ربي حيكون عارف بالافتتاح دة ولا اكلمو ـ رسلتة ليهو رسالةة واتساب وكلمتو اذا حابي يجي ـ قال لي طبعا حأجي دي حاجة مستحيل افوتها ـ بعدها كلمتو باليوم والزمن حق الافتتاح ....
حاولتة اخلص اخر لي كتاب شلتو من فادي عشان بعد بكرة ارجعهم ليهو معاي مرة واحدة ...
بالمساء وجن قالت لي امشي معاها البوتيك الجمبنا عشان المرطب حقها خلص وزيت الشعر حقها برضو قرب يخلص ـ قلتة ليها اي ارح انا كمان عايزة اشتري السيروم حق فايتمين سي ومعاهو جل الالوفيرا والصن بلوك حقي برضو قرب يخلص ـ اتخمخمنا بتيابنا ومشينا
طبعا ولا واحدة فينا بتعرف تلبس توب زي الناس ههههه
ـ ونحن داخلين البوتيك مهاد كانت طالعة منو (صحبتي العرسها كان قبل 3شهور) انا وقفتة عشان اسلم عليها ـ بس بتتخيلو انها اتخطتني وعملت فيها م شايفاني بس عادي الموضوع م هماني شديد ف لو العرس بغير الناس كدة لدرجة سلام الله م بسلموه حريقة في العرس والله.
