عدت فترة شهرين والجامعة لسة م منها خبر ,زهجتة من قعدتة البيت وعدم الموضوع وقلت احسن اشوف لي شغلانة املا بيها زمني واستفيد منها بدل م اضيع وقتي في الفاضي ف قررتة أقوي لغتي الإنجليزية دخلتة قنوات في اليوتيوب وتلقرام ونزلتة حصص تقوية في speaking(المحادثة) اصلا الانجليزي حقي كويس بس محتاجة اقويه ... في واحد صحبي دخلني في قروب ظابط شديد في تلقرام فيهو ناس عابرين جدا في الانجلش بنزلو حصص وريكوردات فيها شروحات للكلام البرسلوه وفي نهاية كل بارت بنخلصو بناخد تست وبرضو بنزلو كتب pdf بنقراه واليوم البعديه بنناقشو ـ بالجد استفدتة شديد والحاجة الحلوة انو في تشجيع فيما بينا ولو في اي حاجة م واضحة لينا في. Leaders بساعدونا ...خلال اسبوعين فقط حسيت نفسي عبرت شديد وحاجات كتيرة اتعلمتها وحتى ذخيرتي اللغوية فل الحمدلله ـ كنت مبسوطة شديد بالانجاز دة ف بديت أنزل كتب بطلع عليهم ....
يوم الجمعة عقد مهاد بت جيرانا ـ مهاد كانت صحبتي شديد بس للاسف حصل بينا سوء تفاهم ونست كل البينا واللحظات الحلوة القضيناها سوا وعلاقتنا بقت سطحية شديد ـ بس دة كلو م بمنع انو م امشي عقدها ـ لبستة فستان مورد وطرحة بالبني ,عملتة ميك اب خفيف ومشيت مع امي و وجن ـ كنت مبسوطة ليها شديد خاصة انها اتزوجت حب حياتها بعد تعب ومعافرة وختمو حبهم بالحلال♥
باركتة ليها بس اتماسخت معاي شديد وحتى سلامها كان بارد ومستفز ـ عاينت لي من فوق لتحت وقالت لي عقبالك ان شااء الله وم تجيبي ليه عرسان بهربو زي المرة الفاتت ههههههههههه ـ بعد م قالت كلامها دة حسيت بخنقة في حلقي طلعتة سريع من بيتهم وماسكة دموعي بالجلالة ـ أول م وصلتة البيت دخلتة غرفتي وقفلتة الباب علي وبكيت بكاء قلبي كان واجعني شديد ـ مهاد ذكرتني بالماضي الماقادرة انساه ولا حيجي يوم وانساه ـ فتحت لي الجرح ال ليهو سنة كاملةونص بداوي فيه ـ ذنبي شنو اذا العريس اتراجع عن العرس في اخر اللحظات وقال لي م ينفع نكمل وعرسي باقي ليه ايام بسيطة ذنبي شنو اسمع كلام جارح بالصورة دي ـ والله بكيت لمن صدعت ـ بعدها دخلتة استحميت وغيرتة ملابسي اتوضيت وصليت استغفرتة لحدي م حسيت اني ارتحتة شوية ...امي و وجن لما رجعو لقو وشي مورم وعيوني تعبانة ـ خافو شديد وقعدو يسالوني مالك والحصل عليك شنو ومالك رجعتي بدري و و و رفضت اني احكي ليهم الحصل بس امي كانت مصرة شديد واضطريت احكي ليها الحصل ـ ماما و وجن زعلو شديد من كلام مهاد واسلوبها معاي ف قالت لي بكرة بجيك راجل سيد سيدو ي بتي وكتااار العايزنك بس نحن م بنديك لاي زول ـ قلتة ليها ياأمي انا م حكيت ليك عشان تقولي لي كدة, وأصلا موضوع حاجة اسمها عرس دة شايلاه من راسي وخالص م مفكرة فيه كل البهمني اخلص جامعتي وأطور نفسي وخالي قال لي بس اخلص جامعة حيعمل لي كل الاجراءات وأسافر ليه في الامارات وحيشوف لي شغل هناكـ ـــ ياااابت انت جنيتي م عشان واحد خذلك تقومي تحردي العرس ماف كلام زي دة وحكاية انك عايزة تسافري دة تشيليه من راسك واياااك ثم اياااك اسمعك تاني بتقولي م عايزة تعرسي وطلعت خلتني مع وجن ـ قلتة ليها وجن عليك الله احكي مع امي دي وفهميها اني عرس مااااابعرس ـ رسيل عيب تقولي كدة وزي م خالتو قالت لازم تنسي الماضي وتشوفي حياتك ـ قلتة ليها حتى انت ي وجن ماعايزة تفهميني ......
**رسيل كانت بتحب ليها واحد اتعرفت عليه عن طريق بت خالتها وحبو بعض وجاء اتقدم ليها ـ عملو خطوبة وبعد فترة قررو يكملو زواجهم وكانو مبسوطين شديد ـ جاب ليها سد مال م شاء الله كل الناس بتحكي عنو ونزلت دخان وترتيبات عرسهم كانت جاهزة ـ فجاة قبل العرس بعشرة يوم العريس اتصل وقال م عايز يكمل واي زول في طريق ـ رسيل في البداية افتكرتو بمزح بس للاسف طلع جادي وقدر م حاولت تتصل ليه عشان تفهم الحاصل شنو م كان برد وحتى م كلف نفسو يوريها السبب عشان ضميرها يرتاح ـ مشت بيت اهلو واتكلمت مع امو وابوهو وطلعو هما كمان م عارفين السبب اعتذرو منها على تصرف ولدهم ـ طبعا وقتها هو سافر برة السودان وغير شرايحو واخبارو انقطعت ـ بعدها دخلت في حالة نفسية سيئة جدا لدرجة انها جمدت سنة كاملة في الجامعة ـ والحمد لله قدرت تتجاوز الحصل ومن لحظتها شطبت حاجة بقولو ليها زواج وحب من راسها ..وللان بتتمني إنها تلاقيهو وتسألو ليه عمل فيها كدة ليه كسرها بالصورة وشنو الذنب الارتكبتو عشان يعمل فيها كدة ....
***فشل علاقة مُعينة يعني تجربة حتستفيد منها في علاقاتك القادمة..
صاح بتتألم لكن بتكون أقوي عشان تواجه كُل خُذلان وصدمات جاية..
ما كل فشل يعني النهاية ، مرات الفشل بكون ياداب البداية !
والما اتعلم م̷ـــِْن الضربةة الاؤلى بيستحق التانيه.****
يتبع ....
