*عند فادي*
أول م الخط قفل خت يدو في قلبو ـ ضربات قلبو كانت متسارعة كأنو أول مرة في حياتو يحكي مع بت ـ كان مستغرب من الشعور الحاسي بيهو ـ معقولة وحدة مابعرفها وشافها مرة واحدة تلخبط مشاعرو للدرجة دي ـ شنو الحاجة المميزة فيها لدرجة انو تفكيرو كلو بقى عنها ـ م ياهو في بنات كتار حلوات ومغريات وأي شي بس ماف واحدة حركت مشاعرو ولا هو اصلا مهتم بالجنس اللطيف ـ ايش معني تجي دي وتحرك مشاعرو الجامدة ليها سنين ....
وجن اتصلت لي وقالت الاسبوع الجاي حترجع البيت لانها اشتاقت لينا وهناك الوضع م عجبها ـ انبسطتة شديد لاني بالجد كنت فاقداها وحاسة بالملل من عدم وجودها جمبي ..
بالمساء بعد م صليت العشاء قعدت اقرا في الرواية واثناء م بقلب في الصفحة لقيت صورة ـ لما شفتها كانت صورة فادي ـ دققتة في الصورة شديد ف بالجد ملامحو كانت حلوة جدا عيونو فيها براءة بس واضح انو حزين من جوة ـ رجعتة الصورة في مكانها وحسيت روحي نعستة ف طفيت النور ونمت ....
يوم السبت ماما قالت لي حنمشي اليوم نسلم على عمتك ياهو طوالي بتجينا لكن نحن طولنا م مشينا ليها ـ انا عن نفسي م عندي النية امشي والله لاني خايفة يشغلو لي الموضوع داك تاني هي وماما بس اتوكلت وقلتة لو بالغلط جابو لي سيرتو انا حعمل صامت وم حرد ....
لبستة لي اسكيرت وتيشيرت باللون الاسود وطرحة بالبيج واسبورت بالبيج ـ عملتة ميكب خفيف وطلعنا ـ أول م وصلنا سلمت علينا بلهفة وكيفك يابتي السمحة وقربت من اضاني وقالت لي ويامرت ولدي وضحكت ـ انا اتجاوزت الموضوع وسلمتة عليها بنفس الشوق ـ لقينا بنات اختها معاها اللي هم بنات عمتي وجدان ـ يلا عمتو وجدان بتكرهنا عديل والسبب شنو الله اعلم لابتجينا ولا بنمشي ليها هي وبناتها عدا بابا ع طول بمشي بسلم عليهم وم عندهم مشكلة معاه م في النهاية اخوها بس بكرهو ماما شديد وحاسدنها على بابا وعلى حبو ليها ....
أول م شافونا سلمو علينا بآخر نفس ـ وعاد نحن بنقصر سلمنا عليهم بنفس الطريقة ـ عمتو عارفة الجو مكهرب فيما بينا ف كانت بتتونس وبتحاول تلطف الجو....
عمتو قالت لي يلا ي رسيل اعملي لينا بسبوسة من يدك الطاعمة دي و وهاد تعمل لينا القهوة اما ولاء تعمل لينا الفنكوش والفشار ..
*وهاد اكبر مني ب سنتين كانت متزوجة قبل سنتين وانفصلت عن راجلها وم عندها اولاد ـ هي جميلة شديد بس مغرورة وشايفة روحها وكأنها ايشواريا راي وبتهتم جدا بالظاهر وبتمووت في البوبار ـ وتقريبا دة كان سبب انفصالها عن زوجها خاصة انها بتاعت مقارنات وم عندها قناعة خالص يعني مهما راجلها دة يعمل ليها ويجيب ليها بتشوفو ولا شي ...
اما ولاء دي في عمري كدة طبق الاصل عن اختها ...
فكيت طرحتي وطلعتة الاسبورت قلتة بما انو البيت م فيهو رجال اقعد براحتي ـ مشيت المطبخ وبديت اعمل في البسبوسة ـ كنت مركبة سماعاتي وبدندن سااي ـ بعد دخلتها الفرن بديت اجهز في العسل ال حأزقيها بيه ـ اثناء م كنت مندمجة في شغلي في زول جاء من ورا وغطى لي عيوني ـ وطبعا الحركة بكرها شديد ـ فبديت ازح اليدين من وشي وبقول منوو انت ـ فلما كنت بتحسس اليدين كانو واضح انو يدين راجل ف عرفتة انو دة مجد قلتة ليهو مجد بطل خلاص عارفاك دة انت
ـ قام ضحك وزح ايدينو من وشي قال لي عرفيني كيف بالله هههههـ. ـ قلتة ليهو دي دايرة ليها عِرفة كمان واصلا دي حركاتك من زمان😒😒ـ قال حرم مشتاقين ي عسل ومالك قال حاربتينا وطولتي م جيتينا ـ والله ي مجد مشغوليات بس ـ قعد يحاكي فيني مشغوليات قال ـ ضربتو في كتفو وقلتة ليهو مجد احسن ليك إتلم ـ هههههههه طيب طيب معليش لكن علي الطلاق برضو مشتاقين ـ قلتة ليه بالاكتر ياسجم اخبارك شنو وكيفك مع الشغل ـ قال لي والله مضغوط شديد الايام دي لكن الحمد لله ماشي الحال... قعد اتونس معاي مسافة لحدي جهزتة البسبوسة وقطعتها ـ شال منها قطعتة واكلها وقال ي سلااااااام تصدقي وتؤمني بالله انو دي احلى بسبوسة اضوقها في حياتي كدي دسي لي كم قطعة لبعدين قبل م يقضو عليها كلها ـ قلتة ليهو هههههه عيوني ليك ـ قال لي عسل دة وغمز لي ـ طوالي صريت ليه وشي ـ قال خلاص بصل دة ـ طبعا قعدت اضحك ـ بعدها قال لي حيمشي يستحم وحيجي يشرب معانا القهوة ومااتنسي زي م وريتك دسي ليك زي اربعة قطع بعدين اتعشى بيهم ـ قلتة ليه م نااسية يلا غوور....
**مجد ود عمتها ل رسيل عمرو 26سنة ولد عمتو ندى الوحيد وعندها بتين كبار متزوجات وحدة في السعودية والتانية ساكنة القضارف ـ مجد شخصية طيبة وظريفة شديد وبعتبر رسيل زي اختو الصغيرة زي م هي شايفاهو اخوها ومن لما كانو صغار مجد بحب يشاغلها ويكاويها وزمان كانت بتبكي هههه بس اسي كبرت ومازال بحب يشاغلها وبعمل الحاجات البتغيظها..
وهاد كانت بتعمل القهوة في الكانون برة لانو ماما وعمتو بحبو ريحة القهوة وبالزات لما يقلوها ـ ولاء مشت عشان تجهز الفنكوش ..
بعد م خلصنا وجهزنا الصينية حقتنا عمتو ندى قالت لي امشي نادي مجد دة قولي ليهو يجي يشرب معانا القهوة ـ مشيت ليهو في الصالون ولقيتو واقف في المراية بظبط في شعرو ـ ناديتو عشان يجي يشرب القهوة ـ قبل م ارجع ناداني قال لي رسيل معليش طلب بسيط ـ قلتة ليهو اتفضل قال لي بس اكوي لي قميصي الفي طرف السرير دة والمكوة هناك في الشباك ـ قلتة ليهو تدفع كم ـ قال لي العايزاهو بدفعو ليك ههههه ـ المهم اتعابطتة ليه في البداية بس كويت ليه القميص ـ ولاء جاتنا قالت لي مالكم اتاخرتو كدة وقعدت تعاين لي من فوق لتحت نظرات كره ـ مجد قال ليها جايين جايين ومشينا ـ هي كانت قدامنا وانا ومجد وراها ـ مجد عمل لي حركة مضحكة نظام دي مالها دي ـ قلتة ليهو بري وقعدنا نضحك براحة ....
يتبع....
